Ufumu Uwo Uzamuwusa Caru Cose Capasi

Kasi ukughanaghana kuti ufumu uwu ni ngu?— Enya, ni Ufumu wa Ciuta, uwo uzamuzgora caru cose capasi kuŵa paradiso. Kasi ungatemwa kumanya vinandi vya Ufumu uwu?—

Ufumu uliwose ukuŵa na fumu. Fumu ndiyo yikuwusa ŵanthu awo ŵali mu caru cake. Kasi ukuyimanya Fumu ya Ufumu wa Ciuta?— Ni Yesu Khristu. Wakukhala kucanya. Sonosono apa, wazamuwusa waliyose pa caru capasi. Kasi ukughanaghana kuti tizamuŵa ŵakukondwa para Yesu wamba kuwusa caru capasi?—

Tizamuŵa ŵakukondwa comene! Mu paradiso, ŵanthu ŵazamutimbananga yayi nesi kuluta ku nkhondo. Ŵanthu wose ŵazamutemwananga. Kuzamuŵavya matenda na nyifwa. Ŵanthu ŵambura kuwona ŵazamuwona, ŵambura kupulika ŵazamupulika ndipo awo pasono ŵakutondeka kwenda ŵazamucimbira na kuduka. Waliyose wazamuŵa na cakurya cinandi. Vinyama vizamuseŵeranga lumoza, ndipo nase tizamuseŵeranga navyo. Ŵanthu awo ŵali kufwa ŵazamuwuka. Ŵanthu awo waŵasambira mu kabuku aka nga ni Rabeka, Rahabi, Davide na Eliya nawo ŵazamuwuka. Kasi ukukhumba kuzakaŵawona para ŵawuka?—

Yehova wakukutemwa ndipo wakukhumba kuti ukondwenge. Para ulutilirenge kusambira vya Yehova na kumupulikira, uzamukhala kwamuyirayira mu paradiso wakutowa. Kasi ndivyo ukukhumba?—