LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • od mutu 1 pp. 6-11
  • Ŵakunozgeka Kuchita Khumbo la Yehova

Vidiyo palije.

Phepani, pali suzgo linyake.

  • Ŵakunozgeka Kuchita Khumbo la Yehova
  • Ŵakunozgeka Kuchita Khumbo la Yehova
  • Mitu Yichoko
  • Nkhani Zakuyanako na Iyi
  • CHIGAŴA CHA KUCHANYA CHA GULU LA YEHOVA
  • GULU LA YEHOVA LIKULUTA PANTHAZI
  • ‘Sandani Vinthu Vyakuzirwa Comene’
    Gongwe la Mulinda Likupharazga Ufumu wa Yehova—2013
  • “Nkhamba Kuwona Mboniwoni za Chiuta”
    Yehova Wawezgerapo Kusopa Kutuŵa!
  • Kasi Mukwendera Lumoza na Gulu la Yehova?
    Gongwe la Mulinda Likupharazga Ufumu wa Yehova—2014
  • Yehova Wakulongozga Gulu Lake
    Gongwe la Mulinda Likupharazga Ufumu wa Yehova (Lakusambira)—2020
Wonani Vinyake
Ŵakunozgeka Kuchita Khumbo la Yehova
od mutu 1 pp. 6-11

MUTU 1

Ŵakunozgeka Kuchita Khumbo la Yehova

PA CHARU chapasi pali mawupu ghanandi chomene gha visopa, gha ndyali, gha malonda, na ghanyake. Mawupu agha ghakulondezga fundo zakupambanapambana. Kweni pali gulu limoza pera ilo likupambana na mawupu ghose agha. Mazgu gha Chiuta ghakulongora makora kuti gulu ili Mbakaboni ŵa Yehova.

2 Ntchakukondweska kuti muli mu gulu la Yehova. Mukuchita khumbo la Chiuta chifukwa mwalimanya. (Sal. 143:10; Rom. 12:2) Mukuteŵetera Chiuta na mtima wose pamoza na ŵabali pa charu chose. (2 Kor. 6:4; 1 Pet. 2:17; 5:9) Nga umo mazgu gha Chiuta ghakuyowoyera, ndimwe ŵakutumbikika kweniso ŵakukondwa chifukwa mukuchita khumbo la Chiuta. (Zinth. 10:22; Mrk. 10:30) Para sono mukuchita khumbo la Yehova mwakugomezgeka, muzamukondwa chomene munthazi.—1 Tim. 6:18, 19; 1 Yoh. 2:17.

3 Mlengi withu, wali na gulu lapadera chomene ilo lili pa charu chose chapasi. Gulu ili, likulongozgeka na malango ghake. Fundo iyi yikulongora kuti Yehova ndiyo wakulongozga vyose ivyo vikuchitika mu gulu ili. Tikumugomezga chomene Chiuta chifukwa ni Mweruzgi withu, wakutipa malango, kweniso ni Themba lithu. (Yes. 33:22) Chiuta wakuchita vinthu mu ndondomeko yiwemi, lekani waŵika ndondomeko yakuti ‘tigwirenge ntchito pamoza na iyo’ kuti khumbo lake lifiskike.—2 Kor. 6:1, 2.

4 Apo nyengo iyi yili pafupi kumara, Yesu Khristu, uyo ni Themba, wakutilongozga kuti tilutilire kuchita khumbo la Chiuta. (Yes. 55:4; Chivu. 6:2; 11:15) Yesu wakayowoyerathu kuti ŵalondezgi ŵake ŵazamuchita ntchito yikuru kuluska iyo wakachita apo wakaŵa pa charu chapasi. (Yoh. 14:12) Yesu wakang’anamuranga kuti para nyengo yajumphapo, ŵalondezgi ŵake ŵazamuŵa ŵanandi chomene ndipo ŵazamusangika mu vigaŵa vinandi. Iwo ŵazamupharazga makani ghawemi gha Ufumu ku vigaŵa vyakutali chomene vya charu chapasi.—Mat. 24:14; 28:19, 20; Mil. 1:8.

5 Umu ndimo vyaŵira nadi. Kweni nga umo Yesu wakayowoyera, ntchito ya kupharazga makani ghawemi yizamumara pa nyengo iyo Yehova wali kusankha. Mauchimi ghose gha mu Baibolo ghakulongora kuti zuŵa likuru na lakofya la Yehova lili pafupi.—Joye. 2:31; Zef. 1:14-18; 2:2, 3; 1 Pet. 4:7.

Tikwenera kuŵikapo mtima kuchita ivyo Yehova wakukhumba. Kuti tichite nthena, tikwenera kumanya makora umo gulu la Chiuta likwendera

6 Apo tili mu mazuŵa ghaumaliro, tikwenera kuŵikapo mtima kuchita ivyo Yehova wakukhumba. Tikwenera kumanya makora umo gulu la Chiuta likwendera ndipo tikolerane nalo. Gulu ili likwenda makora chifukwa likulondezga fundo, malango, na visambizgo vya mu Baibolo.—Sal. 19:7-9.

7 Para ŵateŵeti ŵa Yehova ŵakulondezga ivyo Baibolo likuyowoya, ŵakuchita vinthu mwakukolerana ndiposo ŵakukhala mwamtende. (Sal. 133:1; Yes. 60:17; Rom. 14:19) Kasi ntchivichi chikovwira kuti tikoleranenge na ŵabali ŵithu wose? Ntchitemwa. Tikukolerana chifukwa chakuti tili kuvwara chitemwa. (Yoh. 13:34, 35; Kol. 3:14) Pakuti tikuchita ivyo Chiuta wakukhumba, tikwendera lumoza na chigaŵa cha kuchanya cha gulu la Yehova.

CHIGAŴA CHA KUCHANYA CHA GULU LA YEHOVA

8 Ntchimi Yesaya, Ezekiyeli, na Daniyeli, ŵakawona mboniwoni ya chigaŵa cha kuchanya cha gulu la Yehova. (Yes., chaputara 6; Ezek., chaputara 1; Dan. 7:9, 10) Mpositole Yohane nayo wakawona mboniwoni ya chigaŵa cha kuchanya cha gulu la Yehova, ndipo ivyo wakawona wali kuvilemba mu buku la Chivumbuzi. Yohane wakawona Yehova wakhala pa chitengo chauchindami, wali na ŵangelo awo ŵakupharazga kuti: “Mutuŵa, mutuŵa, mutuŵa ni Yehova Chiuta, Wankhongonozose, uyo wakaŵako, waliko, ndipo wakwiza.” (Chivu. 4:8) Yohane wakawonaso “mwana wa mberere” wimilira “pakati pa chitengo.” Mwana wa Mberere wa Chiuta ni Yesu Khristu.—Chivu. 5:6, 13, 14; Yoh. 1:29.

9 Mboniwoni yakuti Yehova wakhala pa chitengo yikulongora kuti ndiyo wakulongozga gulu ili. Lemba la, 1 Midauko 29:11, 12 likuti: “A Yehova, ukuru, nkhongono, utozi, uchindami, na ntchindi ni vinu. Pakuti vyose ivyo vili kuchanya na pa charu chapasi ni vinu. Ufumu ngwinu, A Yehova. Ndimwe mukujikwezga kuŵa mutu pachanya pa vyose. Usambazi na uchindami vikufuma kwa imwe, ndipo imwe mukuwusa vyose. Mu woko linu muli mazaza na nkhongono, ndipo woko linu likukuzga na kupeleka nkhongono ku wose.”

10 Yesu Khristu, uyo wakugwira ntchito lumoza na Yehova, walikupika udindo na mazaza ghakuru kuchanya. Chiuta “wali kuŵika vinthu vyose pasi pa malundi ghake na kumuzgora iyo kuŵa mutu wa vinthu vyose mu mpingo.” (Efe. 1:22) Mpositole Paulosi wakati: “Chiuta wakamukwezga [Yesu] pa malo ghapachanya na kumupa zina ilo lili pachanya pa zina linyake lililose, mwakuti mu zina la Yesu, khongono lililose lijikame, la ŵakuchanya na ŵa pa charu chapasi ndiposo la awo ŵali kusi ku charu. Ndipo lulimi lulilose luzomere pakweru kuti Yesu Khristu ni Fumu, kuti Chiuta wachindikike.” (Fil. 2:9-11) Mazgu agha ghakutipa chigomezgo chakuti ulongozgi wa Yesu Khristu nguwemi.

11 Ntchimi Daniyeli yikawona Chiuta wakhala pa chitengo chake kuchanya ndipo ŵangelo ‘vikwi na vikwi ŵakamuteŵeteranga, ndipo vikwi 10 kwandaniska na vikwi 10 ŵakimilira panthazi pake.’ (Dan. 7:10) Baibolo likuti ŵangelo aŵa ni “mizimu ya kuteŵetera ŵanthu, iyo yikutumika kuteŵetera awo ŵazamuhara chiponosko.” (Heb. 1:14) Ŵangelo wose aŵa ŵali kupika ntchito zakupambanapambana mu gulu la Yehova.—Kol. 1:16.

12 Para tikughanaghanira chigaŵa cha kuchanya cha gulu la Yehova, tingamanya umo Yesaya wakajipulikira wakati wawona mboniwoni. Wakawona “Yehova wakhala pa chitengo chapachanya na chakutumphuskika,” ndipo “ŵaserafi ŵakimilira pachanya pake.” Yesaya wakati: “Mbaya ine! Nafwa kale, chifukwa nili munthu wa milomo yakufipirwa, nkhukhala pakati pa ŵanthu ŵa milomo yakufipirwa. Pakuti maso ghane ghawona Themba, Yehova wa mawumba!” Yesaya wakazizwa chomene ndipo wakajiyuyura wati wamanya umo gulu la Yehova liliri. Ivyo Yesaya wakawona vikamofya, lekani wakati wapulika mazgu kufuma kuchanya ghakupempha munthu kuti wapharazge cheruzgo cha Yehova, iyo wakati: “Ndine pano. Nitumani!”—Yes. 6:1-5, 8.

13 Para munthu walimanya makora gulu la Yehova, wakuŵa wakunozgeka kuteŵetera Chiuta. Lekani nase tikuyezgayezga kwendera lumoza na gulu la Yehova ilo likuluta panthazi. Tikugomezga chomene gulu la Yehova mazuŵa ghano.

GULU LA YEHOVA LIKULUTA PANTHAZI

14 Chaputara 1 cha buku la Ezekiyeli chikulongora Yehova wakwera pa gileta likuru chomene kuchanya. Gileta lauchindami ili likwimira chigaŵa chambura kuwoneka cha gulu la Yehova. Gileta ili Yehova wakuliyendeska makora chomene kuti wafiske khumbo lake.—Sal. 103:20.

15 Khwiro lililose la gileta lili na linyake mukati mwake. Khwiro lililose likuyana na linyake usani wake. Lekani makhwiro agha ghakuyowoyeka kuti ‘ghakuluta ku chigaŵa chilichose cha vigaŵa vinayi kwambura kuzgoka.’ (Ezek. 1:17) Makhwiro agha ghangaluta kulikose uko ghalazga. Kweni gileta ili para likwenda likulongozgeka makora. Yehova wangazomerezga yayi kuti gulu lake lendenge waka bwekakuko. Lemba la Ezekiyeli 1:20 likuti: “Vikalutanga uko mzimu wakhumba kuti vilute.” Yehova ndiyo wakulongozga gulu lake kwizira mu mzimu wake utuŵa. Tikwenera kujifumba kuti, ‘Kasi nkhwendera lumoza na gulu la Yehova?’

16 Kwendera lumoza na gulu la Yehova nkhuluta waka ku maungano na kupharazga yayi. Para tikwendera lumoza na gulu la Yehova tikwenera kulutilira kukura mwauzimu. Tikusanda “ivyo ni vinthu vyakuzirwa chomene” na kulondezga fundo ziphya izo tikusambira. (Fil. 1:10; 4:8, 9; Yoh. 17:3) Tikwenera kukumbukaso kuti gulu likwenda makora para tikukolerana. Ntheura tikwenera kugwiliskira ntchito makora vinthu ivyo Yehova watipa kuti tifiske ntchito yake. Vyakuchita vithu vikwenera kukolerana na uthenga uwo tikupharazga. Para tikuchita nthena tikulongora kuti tikwendera lumoza na gileta la Yehova.

17 Gulu likutovwira kuti tichitenge khumbo la Yehova. Kumbukani kuti uyo wakwendeska gileta ili ni Yehova. Para tikwendera lumoza na gileta ili tikulongora kuti tikuchindika na kugomezga Yehova uyo ni Jalawe lithu. (Sal. 18:31) Baibolo likulayizga kuti: “Yehova wapelekenge nkhongono ku ŵanthu ŵake. Yehova watumbikenge ŵanthu ŵake na mtende.” (Sal. 29:11) Yehova wakutumbika chomene ŵanthu awo ŵali mu gulu lake. Wakuŵapa nkhongono ndiposo mtende ukuru. Tikukayika yayi kuti Yehova walutilirenge kutitumbika apo tikuchita khumbo lake sono na muyirayira.

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani