Kalata Yakufuma ku Wupu Wakulongozga

Ŵakutemweka Ŵapharazgi Ŵanyithu ŵa Makani Ghawemi:

Tili na mwaŵi ukuru chomene kusopera lumoza Yehova, uyo ni Chiuta yekha waunenesko. Ndise “ŵantchito ŵanyake na Chiuta.” Tili kupika ntchito ya kupharazga na kusambizga makani ghawemi gha Ufumu. Ntchito iyi njakuzirwa chomene chifukwa yikuponoska umoyo wa ŵanthu. (1 Kor. 3:9; Mat. 28:19, 20) Kuti tichite makora ntchito iyi, tikwenera kuchita vinthu mu ndondomeko.—1 Kor. 14:40.

Buku ili limovwiraninge kuti mumanye umo vinthu vikwendera mu mpingo Wachikhristu mazuŵa ghano. Likulongosora ivyo imwe mungachitapakuŵa yumoza wa Ŵakaboni ŵa Yehova. Para mukuchitako vinthu ivi na mtima wose, muŵenge na “chipulikano” chakukhora.—Mil. 16:4, 5; Gal. 6:5.

Tikumupemphani kuti muŵerenge mwakufwasa buku ili na kulondezga ivyo mwaŵerenga. Para ndimwe mupharazgi wambura kubatizika, kasi mungachita vichi kuti mubatizike na kuŵa Kaboni wa Yehova? Usange muli kubatizika kale, kasi mungachita vichi kuti mulutilire kukura mwauzimu na kuchita vinandi pakuteŵetera Yehova? (1 Tim. 4:15) Kasi imwe mungachita vichi kuti mu mpingo mulutilire kuŵa mtende? (2 Kor. 13:11) Buku ili, lili na mazgoro gha mafumbo agha.

Para ndimwe mubali wakubatizika, kasi mukumanya ivyo mungachita kuti muŵe muteŵeti wakovwira panji mulara? Ŵanthu ŵanandi ŵakuthilimukira mu gulu la Chiuta, ntheura pakukhumbikwa ŵabali ŵakwenelera kuti ŵalongozgenge mu mipingo. Buku ili limovwiraninge kuti ‘munwekere’ milimo yauzimu iyi.—1 Tim. 3:1.

Tikulomba kuti buku ili limovwirani kumanya ivyo mungachita mu gulu la Yehova kweniso kuti muchitenge vinthu ivi na mtima wose. Mose tikumutemwani chomene ndipo nyengo zose tikumulomberani kuti mulutilire kuŵa mu gulu la ŵanthu awo ŵakondwenge muyirayira pakusopa Yehova, uyo ni Dada withu wakuchanya.—Sal. 37:10, 11; Yes. 65:21-25.