Mutu 8
Ŵapharazgi ŵa Makani Ghawemi
YEHOVA wakatitumira Mwana wake Yesu Khristu kuti tisambireko kwa iyo na kuchita nga ndiyo. (1 Pet. 2:21) Munthu waliyose uyo wakulondezga Yesu ni muteŵeti wa Chiuta ndipo wakupharazga makani ghawemi. Yesu wakalongora kuti ntchito iyi njakukondweska, wakati: “Zani kwa ine, imwe mose mukuphyoka na kunyekezgeka, ndipo nimupumuzganinge. Yeghani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamupumuzgika.” (Mat. 11:28, 29) Waliyose uyo wapulikira mazgu agha, wajiwonera yekha kuti ngaunenesko.
2 Yesu ni Muteŵeti Mulara wa Chiuta, ndipo wakachema ŵanthu ŵanyake kuti ŵamulondezge. (Mat. 9:9; Yoh. 1:43) Wakaŵasambizga umo ŵangapharazgira na kuŵatuma kuti nawo ŵakapharazgenge. (Mat. 10:1–11:1; 20:28; Luka 4:43) Pamanyuma, wakatuma ŵanthu ŵanyake 70 kuti ŵakapharazge makani ghawemi gha Ufumu wa Chiuta. (Luka 10:1, 8-11) Apo wakaŵatumanga, wakaŵaphalira kuti: “Uyo wakupulikizga kwa imwe wakupulikizgaso kwa ine. Ndipo uyo wakuyuyura imwe wakuyuyuraso ine. Nakuti uyo wakuyuyura ine wakuyuyuraso uyo wakanituma.” (Luka 10:16) Apa Yesu wakasimikizgiranga ŵasambiri ŵake kuti ntchito iyo ŵapika njakuzirwa. Ŵasambiri ŵakapharazganga m’malo mwa Yesu na Yehova. Ndimo wakuchitiraso munthu waliyose uyo wakupulikira mazgu gha Yesu ghakuti: “Wize uŵe mulondezgi wane.” (Luka 18:22; 2 Kor. 2:17) Wose awo ŵakupulikira mazgu agha, Chiuta wakuŵatuma kuti ŵapharazgenge makani ghawemi gha Ufumu na kuzgora ŵanthu kuŵa ŵasambiri.—Mat. 24:14; 28:19, 20.
3 Pakuti tili kupulikira mazgu gha Yesu ghakuti timulondezge, tatumbikika chomene chifukwa ‘tamanya’ Yehova Chiuta na Yesu Khristu. (Yoh. 17:3) Tasambizgika nthowa za Yehova. Chiuta watovwira kuti tisinthe maghanoghano ghithu, tivware wunthu uphya, ndiposo kuti nkharo yithu yiyane na fundo zake zaurunji. (Rom. 12:1, 2; Efe. 4:22-24; Kol. 3:9, 10) Tili kujipeleka kwa Yehova na kubatizika chifukwa chakuti tikumuwonga kufumira pasi pa mtima. Para tabatizika ndikuti ndise ŵateŵeti ŵa Yehova.
4 Nyengo zose tikwenera kukumbuka kuti muteŵeti wa Chiuta wakwenera kuŵa na mawoko ghambura mulandu kweniso na mtima wakutowa. (Sal. 24:3, 4; Yes. 52:11; 2 Kor. 6:14–7:1) Tili na njuŵi yituŵa chifukwa tili na chipulikano mwa Yesu Khristu. (Heb. 10:19-23, 35, 36; Chivu. 7:9, 10, 14) Mpositole Paulosi wakaphalira Ŵakhristu kuti vyose ivyo ŵakuchita vipelekenge ntchindi kwa Chiuta kweniso kuti vileke kukhuŵazga ŵanyawo. Mpositole Petrosi nayo wakati nkharo yiwemi yingakopa ŵanthu kuti ŵasambire unenesko. (1 Kor. 10:31, 33; 1 Pet. 3:1) Kasi mungawovwira wuli munthu kuti nayo wapharazgenge makani ghawemi?
ŴAPHARAZGI ŴAPHYA
5 Para mwamba waka kusambizga munthu Baibolo, muchiskani kuti waphalirengeko ŵanyake ivyo wakusambira. Wangaphalirako ŵabali ŵake, ŵabwezi ŵake, ŵanyake ŵa ku ntchito, na ŵanthu ŵanyake palipose apo mpata wasangika. Fundo iyi njakuzirwa chomene para tikukhumba kuti awo tikusambira nawo Baibolo ŵalondezge Yesu Khristu na kuŵa ŵapharazgi ŵa makani ghawemi. (Mat. 9:9; Luka 6:40) Para munthu wakura mwauzimu ndipo wamba kuzgoŵera kupharazga payekha, wakhumbengeso kupharazga na mpingo.
IVYO MUKWENERA KUCHITA
6 Pambere mundapemphe uyo mukusambira nayo Baibolo kuti mwende nayo mu upharazgi, woneseskani kuti wakufiska ivyo vikukhumbikwa. Munthu uyo wakupharazga nase, ŵanthu ŵakumuwona kuti ni Kaboni wa Yehova. Ntheura wakwenera kulondezga malango gha Yehova ndipo wangaŵa wakwenelera kuŵa mupharazgi wambura kubatizika.
7 Apo mukusambira na munthu na kudumbiskana nayo visambizgo vya mu Baibolo, mungamanya nkharo yake. Mungamanya usange wakulondezga ivyo wakusambira mu Baibolo. Kweni pali vinthu vinyake ivyo ŵalara ŵangakhumba kuti ŵadumbiskane nayo pamoza na imwe.
8 Mulaŵiliri wa milimo ya ŵalara wasankhenge ŵalara ŵaŵiri (yumoza wa mu Komiti ya Uteŵeti) kuti ŵadumbiskane namwe nkhani iyi pamoza na uyo mukusambira nayo Baibolo. Mu mipingo iyo ŵalara mbachoko, mulara wangawovwirana na muteŵeti wakovwira uyo wakuchita makora. Ŵabali awo ŵasoleka ŵakwenera kukumana mwaluŵiro na munthu uyo wakukhumba kwamba kupharazga. Para ŵalara mwaŵaphalilira ku maungano gha mpingo kuti msambiri winu wakukhumba kuŵa mupharazgi, ŵangakumana namwe pamoza na uyo mukusambira nayo paumaliro wa maungano. Pakudumbiskana, waliyose wakwenera kuŵa wakufwatuka. Pambere msambiri wandazomerezgeke kuŵa mupharazgi wambura kubatizika, waŵe kuti wakuchita ivi:
(1) Wakugomezga kuti Baibolo ni Mazgu gha Chiuta.—2 Tim. 3:16.
(2) Wakumanya na kugomezga visambizgo vikuruvikuru vya mu Baibolo mwakuti para wafumbika wangazgora ivyo Baibolo likuyowoya, m’malo mwa kuzgora fundo za chisopa chautesi panji maghanoghano ghake.—Mat. 7:21-23; 2 Tim. 2:15.
(3) Wakupulikira dango la mu Baibolo lakuti wawunganenge na ŵanthu ŵa Yehova para wangafiska.—Sal. 122:1; Heb. 10:24, 25.
(4) Wakumanya kuti Baibolo likukanizga uzaghali, uleŵi, mitala, kweniso kuti ŵanalume panji ŵanakazi ŵekhaŵekha ŵagonanenge. Usange wakukhala na mwanalume panji mwanakazi uyo ŵandatorane mwakulondezga dango, ŵakwenera kulondezga ndondomeko yakwenelera kuti nthengwa yawo yiŵe yakuzomerezgeka.—Mat. 19:9; 1 Kor. 6:9, 10; 1 Tim. 3:2, 12; Heb. 13:4.
(5) Wakuloŵera yayi, nesi kumwa panji kukhweŵa munkhwala uliwose wakutimbanizga wongo chifukwa wakumanya kuti Baibolo likukanizga.—2 Kor. 7:1; Efe. 5:18; 1 Pet. 4:3, 4.
(6) Wali kuleka kwendezgana na ŵanthu ŵaheni.—1 Kor. 15:33.
(7) Wali kulayira ku chisopa chautesi, ndipo wali kuleka kukolerana na tumawupu tose twa chisopa chautesi. Kweniso wali kuleka kuchita tunthu tunyake twakukhozgera chisopa chautesi.—2 Kor. 6:14-18; Chivu. 18:4.
(8) Wakuchitako yayi ndyali panji kuzikhozgera munthowa yiliyose.—Yoh. 6:15; 15:19; Yak. 1:27.
(9) Wakuchitako yayi nkhondo nga umo Baibolo likuyowoyera pa Yesaya 2:4.
(10) Wakukhumba nadi kuŵa Kaboni wa Yehova.—Sal. 110:3.
9 Para ŵalara ŵandakhorwe na umo msambiri wakuzgolera, ŵangadumbiskana nayo malemba agho ghali mu fundo izi. Msambiri wakwenera kumanya kuti ŵanthu awo ŵakupharazga pamoza na Ŵakaboni ŵa Yehova ŵakwenera kuchita ivyo Baibolo likuyowoya. Ivyo msambiri wayowoya vingawovwira ŵalara kumanya usange wakumanya nadi ivyo wakwenera kuchita ndiposo ngwakwenelera kwamba kupharazga na mpingo.
10 Ŵalara ŵakwenera kumuphalira luŵiro msambiri para ngwakwenelera kwamba kupharazga na mpingo. Kanandi ŵakumuphalira para ŵamara waka kudumbiskana nayo. Para ngwakwenelera, ŵalara ŵamupokelere na kumuphalira kuti sono ni mupharazgi. (Rom. 15:7) Ŵalara ŵamuphalire kuti wambepo luŵiro kupharazga na kupeleka lipoti lake para mwezi wamara. Ŵalara ŵamulongosolere kuti para waŵa mupharazgi wambura kubatizika, ndipo wapeleka lipoti lake lakwamba la uteŵeti, ŵazamulilemba pa Kadi la Mpingo Lakulembapo Mulimo wa Mupharazgi. Pa kadi ili ŵazamulembapo zina lake na kusunga mu fayelo ya mpingo. Vinthu vyose vyakukhwaskana na mupharazgi ivyo ŵalara ŵakusunga vikovwira kuti gulu la Ŵakaboni ŵa Yehova pa charu chose chapasi livigwiliskirenge ntchito kweniso kuti waŵe wakwenera kuchita milimo yinyake yauzimu na kukhozgeka. Ŵalara ŵakweneraso kumuphalira kuti gulu likuŵika vyose vyakukhwaskana na ŵapharazgi ŵaphya pa jw.org pa chigaŵa cha Fundo Izo Ŵakaboni ŵa Yehova Ŵakwendera pa Charu Chose pa Nkhani ya Chisisi.
11 Uyo wamba sono kupharazga wangalutilira kuchita makora mwauzimu para tikuŵa nayo paubwezi na kumulumba pa ivyo wakuchita makora. Ivi vingamovwira kuti walimbikirenge kuteŵetera Yehova na kupeleka malipoti mwezi uliwose.—Fil. 2:4; Heb. 13:2.
12 Para ŵalara ŵawona kuti msambiri wa Baibolo ngwakwenelera kwamba kupharazga, ŵamupe buku la Ŵakunozgeka Kuchita Khumbo la Yehova. Para wapeleka lipoti lake lakwamba la uteŵeti wa m’munda, ŵapharazge ku mpingo kuti sono ni mupharazgi wambura kubatizika.
KOVWIRA ŴANA
13 Ŵana nawo ŵangapharazga makani ghawemi. Yesu wakapokelera ŵana na kuŵatumbika. (Mat. 19:13-15; 21:15, 16) Nangauli ŵapapi ndiwo ŵali na udindo wa kusambizga ŵana, ŵanyake mu mpingo nawo ŵangajipeleka kovwira ŵana awo ŵakukhumba kupharazga Ufumu wa Chiuta. Para imwe mwaŵapapi mukulimbikira kupharazga, ŵana ŵinu nawo ŵangalimbikira kuteŵetera Chiuta. Kasi mungamovwira wuli mwana uyo wali na nkharo yiwemi ndipo wakukhumba chomene kupharazga?
14 Para mupapi wawona kuti mwana wake wangaŵa mupharazgi, waphalire yumoza wa ŵalara awo ŵali mu Komiti ya Uteŵeti ya Mpingo. Mulaŵiliri wa milimo ya ŵalara wapemphenge ŵalara ŵaŵiri (yumoza wa mu komiti ya uteŵeti) kuti ŵakumane na mwana pamoza na mupapi wake uyo ni Kaboni. Para mwana wakumanya visambizgo vikuruvikuru vya mu Baibolo ndipo wakulongora kuti wakukhumba nadi kuŵa mupharazgi, ndikuti wakukura mwauzimu. Para ŵalara ŵakudumbiskana nayo fundo izi na zinyake izo ŵakudumbiskana na ŵanthu ŵalara awo ŵakukhumba kuŵa ŵapharazgi, ŵalara ŵaŵiri aŵa ŵangamanya usange mwana uyo ngwakwenelera kuŵa mupharazgi wambura kubatizika. (Luka 6:45; Rom. 10:10) Para ŵalara ŵakudumbiskana na mwana, ŵakwenera yayi kudumbiskana nayo vinthu ivyo ŵangadumbiskana na ŵanthu ŵalara pera.
15 Para ŵalara ŵakukumana na mwana, ŵamuwonge chifukwa chakuti wakuchita makora mwauzimu ndipo ŵamovwire kuti waŵe na khumbo la kubatizika. Ŵalara ŵakwenera kuwongaso ŵapapi chifukwa cha kumusambizga unenesko. Ŵalara ŵalongore ŵapapi chigaŵa chakuti, “Uthenga ku Ŵapapi Awo Mbakhristu,” pa peji 179-181. Chigaŵa ichi chikuchiska ŵapapi kuti ŵalutilire kusambizga mwana wawo.
KUJIPELEKA NDIPOSO UBATIZO
16 Para mukupharazga na kulondezga malango gha Yehova vikulongora kuti mukumumanya na kumutemwa. Ntheura lutilirani kukhozga ubwezi winu na Yehova. Kasi mungawukhozga wuli? Mujipeleke kwa Chiuta na kubatizika.—Mat. 28:19, 20.
17 Munthu uyo wajipeleka kwa Chiuta, wakulongora kuti wakukhumba kuchita khumbo la Chiuta. Kujipeleka kwa Chiuta chikung’anamura kulomba na kulayizga Chiuta kuti mumuteŵeterenge umoyo wose na kulondezga malango ghake. Ntheura munthu uyo wajipeleka kwa Chiuta wakwenera kusopa iyo pera umoyo wose. (Doto. 5:9) Ivi mukwenera kuchita mwekha, palije uyo wangamuchitirani.
18 Kweni ntchakukwana yayi kumuphalira waka Yehova mu lurombo kuti mukukhumba kuŵa muteŵeti wake. Ŵanthu ŵakwenera kuwona kuti mwajipeleka nadi kwa Chiuta. Nga umo Yesu wakachitira, namwe mukwenera kubatizika mu maji kuti mulongore kuti mwajipeleka kwa Chiuta. (1 Pet. 2:21; 3:21) Para mwasankha kuteŵetera Yehova ndipo mukukhumba kubatizika, kasi mukwenera kuchitachi? Phalirani mulaŵiliri wa milimo ya ŵalara kuti mukukhumba kubatizika. Iyo wazamutuma ŵalara kuti ŵadumbiskane namwe kuti ŵawone usange muli ŵakwenelera kubatizika. Kuti mumanye vinandi, ŵerengani chigaŵa chakuti, “Uthenga kwa Mupharazgi Wambura Kubatizika,” pa peji 182-184 mu buku lino, ndiposo “Mafumbo gha Awo Ŵakukhumba Kubatizika,” pa peji 185-207.
KUPELEKA LIPOTI LA UTEŴETI
19 Ŵanthu ŵa Yehova ŵakukhozgeka chomene na malipoti agho ghakulongora umo gulu likukulira pa charu chose. Kwambira apo Yesu wakaphalira ŵasambiri ŵake kuti makani ghawemi ghazamupharazgika pa charu chose, Ŵakhristu ŵaunenesko ŵakukhumba chomene kuti ŵamanye umo ntchito iyi yikwendera.—Mat. 28:19, 20; Mrk. 13:10; Mil. 1:8.
20 Ŵalondezgi ŵakwambilira ŵa Yesu, ŵakakondwanga chomene na malipoti gha umo ntchito ya kupharazga yikalutiranga panthazi. (Mrk. 6:30) Buku la Milimo likutiphalira kuti pa Pentekoste mu 33 C.E., mzimu utuŵa ukapungulikira pa ŵasambiri 120. Chiŵelengero cha ŵasambiri chikasazgikira mwaluŵiro ndipo chikafika pa 3,000, pamanyuma pake 5,000. Lipoti likapharazgika lakuti, “zuŵa na zuŵa Yehova wakasazgirangako kwa iwo awo wakaŵaponoskanga,” ndiposo kuti “ŵasembe ŵanandi ŵakamba kuŵa na chipulikano.” (Mil. 1:15; 2:5-11, 41, 47; 4:4; 6:7) Ŵasambiri ŵakwenera kuti ŵakakhozgeka chomene na lipoti ili. Malipoti ghakukondweska agha, ghakwenera kuti ghakaŵapa nkhongono ŵasambiri kuti ŵalutilire kuchita ntchito iyo Chiuta wakaŵapa, nangauli ŵalongozgi ŵa chisopa cha Chiyuda ŵakaŵatambuzganga.
21 Cha m’ma 60-61 C.E., Paulosi wakalembera kalata Ŵakolose, kuŵaphalira kuti makani ghawemi ghakapambikanga “vipambi na kuthandazgika mu charu chose,” ndipo “ghakapharazgika mu chilengiwa chose kusi ku mtambo.” (Kol. 1:5, 6, 23) Ŵakhristu ŵakwambilira ŵakapulikiranga Mazgu gha Chiuta, ndipo mzimu utuŵa ukaŵakhozga kuti ŵafiske ntchito ya kupharazga pambere muwuso wa Ŵayuda undaparanyike mu 70 C.E. Ŵakhristu ŵakugomezgeka ŵakakhozgeka chomene kupulika malipoti gha ivyo vikachitikanga.
Kasi muchitenge mwakukwana ntchito iyi pambere umaliro undize?
22 Mazuŵa ghano napo gulu la Yehova likusunga malipoti gha umo ntchito iyo yikuzunulika pa Mateyu 24:14 yikwendera. Lemba ili likuti: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.” Pakuti ndise ŵateŵeti ŵakujipeleka ŵa Chiuta, ntchito iyi tikwenera kuyichita mwaluŵiro. Waliyose wawoneseske kuti wachita mwakukwana ntchito iyi pambere umaliro undize. Yehova wawoneseskenge kuti ntchito iyi yafiskika. Ndipo para tikuchitako ntchito iyi, Yehova wakondwenge chomene.—Ezek. 3:18-21.
LIPOTI LINU LA UTEŴETI WA M’MUNDA
23 Kasi tikwenera kulembapo vichi pa lipoti lithu? Fomu ya Lipoti la Uteŵeti wa m’Munda iyo gulu likupeleka yikulongora ivyo tikwenera kulembapo. Fundo izo zili pasi apa zingatovwira.
24 Apo palembeka kuti “Ivyo Nagaŵira” (Vyakusindikizga panji Vyakuŵerengera pa vyamakompyuta) lembanipo unandi wa mabuku panji mavidiyo agho mukatumira munthu pa imelo panji mukagaŵira ŵanthu awo mbambura kubatizika. Pa chigaŵa cha “Mavidiyo Agho Nawoneska” lembanipo unandi wa mavidiyo ghithu agho mwawoneska mu uteŵeti.
25 Pakulemba “Ulendo Wakuwelerako,” pendani maulendo ghose agho mukawelerako kuti movwire munthu uyo ni Kaboni yayi uyo mukadumbiskanapo vya Baibolo. Tikupendaso ulendo wakuwelerako para taluta ku nyumba ya uyo tikamupharazgirapo, kweniso para tamulembera kalata, kumuyimbira foni, kumulembera meseji pa foni panji kumulembera imelu, para tamupa buku, mathirakiti, na magazini. Nyengo yiliyose para tasambira na munthu Baibolo, tikwenera kupendaso kuti ni ulendo wakuwelerako. Mupapi uyo wakulongozga pa kusopa kwa mbumba, wapendenge ulendo wakuwelerako umoza para pali mwana wambura kubatizika.
26 Nanga tingasambira Baibolo na munthu sabata yiliyose mu mwezi, kweni pa lipoti tikulemba kuti tili na sambiro limoza. Ŵapharazgi ŵakwenera kulemba masambiro ghose agho ŵachitiska mu mwezi, pa Lipoti la Uteŵeti wa m’Munda. Ŵanthu ŵambura kubatizika awo mukusambira nawo Baibolo ndiwo ni masambiro gha Baibolo. Para mubali wa mu komiti ya uteŵeti wamupemphani kuti musambirenge na mubali panji mudumbu wakulopwa mungapendaso kuti ni sambiro la Baibolo. Mungalembaso sambiro para mukusambira na munthu uyo wabatizika sono, kweni wandamalizge kusambira buku la Mungakondwa na Umoyo Kwamuyirayira!
27 Ntchakuzirwa chomene kupeleka lipoti launenesko la “Maora.” Maora ni nyengo iyo tikumalira pakupharazga ku nyumba na nyumba, mu msewu, kuwelerako kwa munthu, na kusambizga ŵanthu Baibolo, panji para tapharazga mwamwaŵi. Para ŵapharazgi ŵaŵiri ŵendera lumoza mu uteŵeti, wose ŵaŵiri ŵangalemba nyengo, kweni yumoza pera ndiyo walembenge ulendo wakuwelerako na sambiro la Baibolo para ŵangusambira na munthu. Para ŵapapi wose ŵakusambizgira lumoza ŵana ŵawo pa Nyengo Yakusopera ya Mbumba, sabata yiliyose ŵangalemba ora limoza. Ŵabali awo ŵakuyowoya nkhani zachisanisani ŵangalemba nyengo iyo ŵayowoyera nkhani yawo. Uyo wang’anamulira nkhani yachisanisani nayo wangalemba nyengo. Tikwenera chara kulemba nyengo iyo tikunozgekera uteŵeti, para tikwenda waka kwambura kupharazga pakuluta kukanozgekera uteŵeti, na para tikuchita vinthu vinyake vyambura kukolerana na uteŵeti.
28 Mupharazgi waliyose wakwenera kulomba na kupulikira njuŵi yake para wakulemba nyengo iyo wamalira mu upharazgi. Ŵabali ŵanyake ŵakupharazga uko kuli ŵanthu ŵanandi, apo ŵanyake ŵakupharazga uko kuli ŵanthu ŵachoko ndipo ŵakwenda mitunda yitali. Vigaŵa vyakupharazgako vikupambana, ŵapharazgi nawo ŵakupambana umo ŵakuwonera uteŵeti. Wupu Wakulongozga undaŵike dango pa nkhani ya umo ŵapharazgi ŵakwenera kupendera nyengo iyo ŵamalira mu upharazgi. Nakuti palije uyo wali kusoleka kuti wasandenge maora gha ŵanyake chifukwa nkhani iyi nja munthu waliyose payekha.—Mat. 6:1; 7:1; 1 Tim. 1:5.
29 Pakulemba lipoti, tikwenera kulemba maora pera, maminiti yayi. Ŵapharazgi ŵekha awo ŵakutondeka kuchita vinandi chifukwa cha uchekuru na ulwari ukuru ndiwo ŵangalemba maminiti. Ŵapharazgi aŵa ŵangapeleka lipoti la uteŵeti wa m’munda la maminiti 15. Nanga ŵangaŵa kuti ŵapharazga maminiti 15 mwezi wose, ŵakwenera kupeleka lipoti. Ŵalutilirenge kuŵa ŵapharazgi ŵakukhazikika ŵa Ufumu. Ŵapharazgi awo ŵangatondeka kufiska ora limoza chifukwa cha masuzgo gha nyengo yichoko, kwali ni mwezi umoza panji kujumpha apa, ndipo ŵangenda yayi chifukwa cha ulwari ukuru panji kupwetekeka, nawo ŵangapeleka lipoti la maminiti 15. Kweni ŵekha awo mbakusuzgika chomene ndiwo ŵakwenera kupeleka maminiti 15. Komiti ya uteŵeti yizamuwona para mupharazgi ngwakwenelera kuŵa pa gulu ili.
KADI LA MPINGO LAKULEMBAPO MULIMO WA MUPHARAZGI
30 Lipoti linu la uteŵeti wa m’munda la mwezi uliwose likulembeka pa Kadi la Mpingo Lakulembapo Mulimo wa Mupharazgi. Makadi agha nga mpingo. Para mukukhumba kusamira ku mpingo unyake, phalirani ŵalara. Mulembi wa wazamutumizga kadi la mpingo lakulembapo mulimo winu pamoza na kalata yakumulongosorani ku mpingo winu wasono. Ivi vikovwira kuti ŵalara ŵa mu mpingo winu wasono ŵamupokelerani na kumovwirani mwauzimu. Para mufumengepo pa mpingo winu kwa kanyengo kachoko waka panji kwa myezi yitatu, lutilirani kutumizga malipoti ghinu ku mpingo winu wakale.
CHIFUKWA WULI TIKUPELEKA MALIPOTI?
31 Kasi nyengo zinyake mukuluwa kupeleka malipoti gha uteŵeti? Nyengo zinyake tose tikukhumbikwira kukumbuskika. Para tikumanya kuti malipoti ghakuzirwa, chiŵenge chipusu kukumbuka kupeleka.
32 Ŵanyake ŵakuti: “Yehova wakumanya kale kuti nkhupharazga, ntheura palije chifukwa chakuti nipelekenge lipoti ku mpingo.” Yehova wakumanya nadi ivyo tikuchita, ndipo wakumanyaso usange tikumuteŵetera na mtima wose panji yayi. Kweni kumbukani kuti Yehova wakalemba unandi wa mazuŵa agho Nowa ŵakakhalira mu chingalaŵa ndiposo vyaka ivyo ŵana ŵa Israyeli ŵakenda mu mapopa. Chiuta wakasungaso chiŵelengero cha ŵanthu awo ŵakaŵa ŵakugomezgeka na ŵambura kugomezgeka. Wakalemba umo Ŵaisrayeli ŵakapokera charu cha Kenani na ivyo ŵeruzgi ŵakugomezgeka mu Israyeli ŵakachita. Chiuta wakalemba milimo yinandi iyo ŵateŵeti ŵake ŵakachita. Wakatuma ŵanthu kuti ŵalembe ivyo vikachitika mwakuti ise timanye kuti iyo wakukhumba tipelekenge lipoti launenesko.
33 Ivyo vili kulembeka mu Baibolo, ghakaŵa malipoti ghambura kubudika ndipo ŵanthu ŵa Yehova ndiwo ŵakavisunga. Nkhani zinandi mu Baibolo zikuzunura manambara. Wonani nkhani zinyake mu malemba agha: Genizesi 46:27; Ekisodo 12:37; Ŵeruzgi 7:7; 2 Mathemba 19:35; 2 Midauko 14:9-13; Yohane 6:10; 21:11; Milimo 2:41; 19:19.
34 Nangauli tikulemba vyose yayi ivyo tikuchita pakusopa Yehova, kweni malipoti agho tikupeleka ngakuzirwa chomene mu gulu la Yehova. Mu nyengo ya Yesu, ŵapositole ŵakati ŵawerako uko ŵakapharazganga, ŵakaphalira Yesu “vyose ivyo ŵakachita na kusambizga.” (Mrk. 6:30) Nyengo zinyake malipoti ghakulongora apo pakukhumbikwira wovwiri. Malipoti ghangalongora kuti kunyake uteŵeti ukwenda makora apo kunyake kukukhumbikwira wovwiri. Nyengo zinyake ŵapharazgi ŵangakhumbikwira waka kukhozgeka panji pangaŵa masuzgo agho ghakukhumbikwira kumazga. Ŵalaŵiliri ŵazamuwona malipoti na kuyezgayezga kunozga ivyo vikutondeska ŵapharazgi panji mpingo kukura mwauzimu.
35 Malipoti ghakovwiraso gulu la Yehova kumanya uko kukukhumbikwira ŵapharazgi ŵanandi. Ghakovwira kumanya uko ntchito yikwenda makora na uko yikuleka kwenda makora. Malipoti ghakovwiraso gulu la Yehova kumanya mabuku agho ghakukhumbikwa kuti ŵanthu ŵasambire unenesko. Kweniso kuti gulu lipangenge mabuku agho ngakwenelera kupharazgira ku chigaŵa chilichose.
36 Taŵanandi tikukhozgeka na malipoti. Tikukondwa para tikupulika umo ŵabali ŵithu ŵakuchitira ntchito ya kupharazga makani ghawemi pa charu chose. Malipoti agho ghakulongora kuti ŵapharazgi ŵakusazgikira ghakutovwira kumanya kuti gulu la Yehova likukura. Vinthu viwemi ivyo vikuchitikira ŵabali ŵithu awo ŵakupharazga vikutipa nkhongono kuti nase tipharazgenge na mtima wose. (Mil. 15:3) Ntchakuzirwa kupeleka malipoti gha uteŵeti mwakugomezgeka, ndipo tikulongora kuti tikutemwa ŵabali ŵithu kulikose uko ŵali. Para tikuchita nthena, tikulongora kuti tikulondezga ivyo gulu la Yehova lanozga.—Luka 16:10; Heb. 13:17.
ŴANI NA VILATO
37 Tikwenera yayi kuyaniska uteŵeti withu na wa ŵanyithu. (Gal. 5:26; 6:4) Vinthu pa umoyo vikupambana. Kweni Chiuta wangatitumbika chomene para tikuchita ivyo tingafiska. Ndipo para tachita nthena, tiŵenge ŵakukondwa.
38 Ukaboni ukulongolerathu kuti Yehova wakwendeska luŵiro chomene ntchito ya kuwunganya ŵanthu awo wazamuŵaponoska pa “suzgo yikuru.” Tili mu nyengo iyo uchimi wa Yesaya ukufiskika. Uchimi uwu ukuti: “Muchoko chomene wazamuŵa chikwi ndipo muchoko wazamuzgoka mtundu wankhongono. Ine Yehova, nizamuchifiska luŵiro mu nyengo yake.” (Chivu. 7:9, 14; Yes. 60:22) Tili na mwaŵi wapadera chomene kupharazga makani ghawemi mu nyengo yaumaliro iyi.—Mat. 24:14.