Mafumbo Ghaumaliro Gha Awo Ŵakukhumba Kubatizika

Kanandi pa maungano gha dera na gha chigaŵa gha Ŵakaboni ŵa Yehova pakuŵa ubatizo. Paumaliro wa nkhani ya ubatizo, uyo wakuyowoya nkhani wazamupempha ŵanthu awo ŵabatizikenge kuti ŵimilire na kuzgora mafumbo ghaŵiri ghakulondezgapo agha mwakukwezga:

1. Kasi mwalapa zakwananga zinu na kujipeleka kwa Yehova, ndipo mukugomezga kuti muzamuponoskeka kwizira mwa Yesu Khristu?

2. Kasi mukumanya kuti para mwabatizika muŵenge Kaboni wa Yehova mwakukolerana na gulu lake?

Para awo ŵakukhumba kubatizika ŵazgora mafumbo agha, ndikuti ‘ŵazomera pakweru’ kuti ŵali na chipulikano mu sembe ya Yesu ndipo ŵajipeleka kwa Yehova na mtima wose. (Rom. 10:9, 10) Awo ŵakukhumba kubatizika ŵakwenera kulomba na kughanaghanirapo mafumbo agha kunyumba kuti ŵazakazgore kufumira pasi pamtima.

Kasi mwajipeleka kwa Yehova mu lurombo na kumulayizga kuti musopenge iyo pera na kuchita khumbo lake nyengo zose?

Kasi mwasimikizga nadi kuti mungabatizika pa ungano wasonosono?

Kasi pakuluta kukabatizika mukwenera kuvwara wuli? (1 Tim. 2:9; Yoh. 15:19; Fil. 1:10)

Awo ŵakuluta kukabatizika ŵakwenera kuvwara mwakwenelera, ndipo ŵakwenera kukumbuka kuti nyengo ya ubatizo njakuzirwa chomene. Mkhristu wakwenera yayi kuvwara malaya ghakulangara. Wakwenera kujipwelelera kweniso kuvwara makora. Ndipo wakwenera yayi kuvwara malaya agho ghali na malemba panji vimanyikwiro vya vinthu vinyake. Para ivyo tikuchita panyengo ya ubatizo vikulongora kuti nyengo iyi njakuzirwa, tipambanenge na umo ŵanthu ŵakucharu ŵakuchitira.

Kasi munthu wakwenera kulongora nkharo wuli para wakubatizika? (Luka 3:21, 22)

Ivyo Yesu wakachita apo wakabatizikanga ntchiyelezgero chiwemi ku Ŵakhristu mazuŵa ghano. Wakamanya kuti ubatizo ngwakuzirwa chomene. Ivyo wakachita ndivyo vikulongora. Ntheura, malo gha ubatizo ni malo ghakuyowoyerako milangwe yayi, kuskamba [kushuwa], panji kuchitirako vinthu vinyake ivyo vingayuyura ubatizo. Awo ŵabatizika waka, ŵakwenera yayi kukondwa mwakujumphizga nga umo ŵakuchitira awo ŵahozga bola. Nangauli nyengo ya ubatizo njakukondweska, kweni tikwenera kulongora ntchindi.

Kasi para mukukolerana na mpingo vingamovwirani wuli kuti mulutilire kuchita vinthu vyakulongora kuti muli kujipeleka kwa Yehova?

Chifukwa wuli para mwabatizika, mukwenera kulutilira kusambira pamwekha na kupharazga nyengo zose?

MAZGU KU ŴALARA

Para mupharazgi wambura kubatizika waphalira ŵalara kuti wakukhumba kubatizika, mukwenera kumuphalira kuti waweleremo mwakufwasa “Mafumbo gha Awo Ŵakukhumba Kubatizika,” pa peji 173-211. Wakweneraso kuŵazga chigaŵa chakuti “Mazgu kwa Mupharazgi Wambura Kubatizika,” pa peji 170, icho chikulongosora ivyo wangachita pakunozgekera kukumana na ŵalara. Nga umo chigaŵa ichi chikuyowoyera, panyengo iyo wakukumana na ŵalara wangabekera fundo izo wakalemba apo wakasambiranga payekha kweniso wangajura buku lake. Palije chifukwa chakuti munthu munyake waweleremo nayo mafumbo agha pambere wandakumane na ŵalara.

Munthu uyo wakukhumba kubatizika, wakwenera kuphalira mulaŵiliri wa milimo ya ŵalara. Ndipo para munthu uyu wamara kuŵazga mafumbo gha ubatizo, mulaŵiliri wa milimo ya ŵalara wazamusankha ŵalara ŵanyake kuti ŵakumane nayo na kuweleramo mafumbo agha. Kulindilira kuti mumanye dankha madeti gha ungano yayi kuti ndipo muzakadumbiskane nayo. Mungadumbiskana nayo chigaŵa chilichose pachekha. Mungatora ora limoza panji kujumphirapo pa chigaŵa chilichose. Kuchimbilira yayi pakuweleramo mafumbo agha. Ŵalara awo ŵasankhika kukakumana na munthu uyu ŵakwenera kukumana nayo mwaluŵiro. Para vingachitika, mulara waliyose wakwenera kuŵa na chigaŵa chake. Ndipo mungachita makora kwamba na kujara na lurombo pa chigaŵa chilichose.

Kanandi chikuŵa makora kudumbiskana na munthu waliyose payekha m’malo mwa gulu. Para mupharazgi wakuzgora yekha fumbo lililose, ŵalara ŵangamanya makora kuti wakapulikiska nadi ivyo wakasambira, ndipo ngwakwenelera kubatizika panji yayi. Kweniso uyo wakukhumba kubatizika wangafwatuka kuzgora para wali yekha. Awo mbakutorana mungadumbiskana nawo pamoza.

Para uyo wakukhumba kubatizika ni mwanakazi, ŵakwenera kukhala pa malo apo mphakuwonekera. Kweni ŵanthu ŵaleke kupulika ivyo ŵakudumbiskana. Para mukukhumba kuti paŵeso munthu munyake, wakwenera kuŵa mulara panji muteŵeti wakovwira, mwakuyana na chigaŵa icho mudumbiskanenge nga umo tiwonerenge mu ndime yakulondezgapo.

Mipingo iyo yili na ŵalara ŵachoko, ŵateŵeti ŵakovwira awo mbakwenelera ndiwo ŵangadumbiskana na munthu uyo wakukhumba kubatizika chigaŵa 1, chakuti “Ivyo Ŵakhristu Ŵakugomezga.” Kweni ŵalara ŵekha ndiwo ŵakwenera kudumbiskana nayo chigaŵa 2, chakuti “Umoyo Wachikhristu.” Para mu mpingo mulije ŵabali ŵakwenelera, mukwenera kuphalira mulaŵiliri wa dera. Ndipo iyo wapemphenge ŵalara ŵa mpingo wapafupi kuti ŵawovwirepo usange ŵangafiska.

Ŵalara ŵazamuwoneseska kuti munthu uyo wakukhumba kubatizika wapulikiska fundo zinandiko mu Baibolo. Ŵalara ŵazamuwonaso usange munthu uyu wakuwona kuti unenesko ngwakuzirwa kweniso wakuchindika gulu la Yehova. Para munthu wandapulikiske visambizgo vikuruvikuru vya mu Baibolo, ŵalara ŵazamunozga ndondomeko yakuti wawovwirikeso. Ndipo kunthazi wangazakaŵa wakwenelera kubatizika. Ŵanyake ŵakukhumbikwira nyengo yitaliko kuti ŵambe kulongora kuti ŵakutemwa kupharazga, panji kupulikira dango la Chiuta pa nkhani ya kujilambika. Ŵalara ndiwo ŵakwenera kuwona utali wa nyengo iyo ŵangadumbiskana chigaŵa chilichose kuti ŵamanye usange munthu uyu ngwakwenelera kubatizika. Nangauli mafumbo ghanyake mungadumbiskana nyengo yitali, apo ghanyake nyengo yichoko, kweni mukwenera kumara mafumbo ghose.

Paumaliro, ŵalara awo ŵadumbiskananga na uyo wakukhumba kubatizika ŵazamukumana kuti ŵawone usange munthu uyu ngwakwenelera kubatizika panji yayi. Kweni pakukaka fundo, ŵalara ŵazamuwona umo munthu waliyose wakasambilira unenesko, umo wakuchitira vinthu, kweniso umo vinthu viliri pa umoyo wake. Para mwaŵawovwira mwachitemwa, awo ŵakukhumba kubatizika ŵazamuŵa ŵakwenelera kuchita ntchito ya kupharazga makani ghawemi.

Pamanyuma, mulara yumoza panji ŵaŵiri ŵangakumanaso na munthu uyo wakukhumba kubatizika kuti ŵamuphalire usange ngwakwenelera kubatizika panji yayi. Para munthu uyu ngwakwenelera kubatizika, ŵalara ŵadumbiskane nayo chigaŵa chakuti “Mafumbo Ghaumaliro gha Awo Ŵakukhumba Kubatizika” pa peji 212-213. Para munthu uyu wandamalizge kusambira buku la Mungakondwa na Umoyo Kwamuyirayira!, ŵalara ŵakwenera kumuphalira kuti para wabatizika wakalutilire kusambira. Fundo izi mukwenera kudumbiskana nayo kwa maminiti 10 panji kukhilira pasi.

Para pajumpha chaka chimoza, ŵalara ŵaŵiri ŵangakumana nayo kuti ŵamukhozge kweniso ŵamovwire. Yumoza mwa ŵalara aŵa wakwenera kuŵa mulaŵiliri wa gulu lake la uteŵeti. Para munthu uyu ni mwana, ŵapapi ŵake awo mbakaboni ŵakwenera kuŵapo. Pakudumbiskana nayo, ŵalara ŵakwenera kumukhozga kweniso kuyowoya mwachitemwa. Ŵalara ŵazamumuphalira umo wakuchitira mwauzimu, na ivyo wangachita kuti walutilire kusambira payekha, kuŵazga Baibolo nyengo zose, kusopa pamoza na banja, kuluta ku maungano nyengo zose na kuzgorapo, kweniso kupharazga sabata yiliyose. (Efe. 5:15, 16) Para wachali wandamalizge kusambira buku la Mungakondwa na Umoyo Kwamuyirayira!, ŵalara ŵakwenera kupempha munthu munyake kuti wasambirenge nayo. Ŵalara ŵakwenera kumuwonga kufumira pasi pa mtima. Ŵangamupa ulongozgi pa vinthu vinyake ivyo wakutondeka kuchita makora kweniso ŵangasachizga ivyo vingamovwira kuti wachite makora.