Vyakusazgirapo

Uthenga ku Ŵapapi Awo Mbakhristu:

Pakuŵa mupapi, mukukhumba kovwira ŵana ŵinu kuti ŵatemwenge Yehova na kujipeleka kwa iyo. Kasi mungaŵawovwira wuli kuti ŵabatizike? Kasi ŵakwenera kuŵa na vyaka vilinga kuti ŵaŵe ŵakwenelera kubatizika?

Yesu wakaphalira ŵalondezgi ŵake kuti: “Mukazgore ŵanthu ŵa mitundu yose kuŵa ŵasambiri, mukaŵabatize.” (Mat. 28:19) Kuyana na mazgu agha, kuti munthu wabatizike wakwenera kuwa dankha msambiri. Wakweneraso kupulikiska na kugomezga ivyo Khristu wakasambizga na kuchita ivyo wasambira. Ndivyo ŵana ŵakwenera kuchita kuti ŵaŵe ŵakwenelera kubatizika.

Imwe mukwenera kuŵa chakuwonerapo chiwemi ku ŵana ŵinu ndipo muŵasambizge vya Yehova. (Doto. 6:6-9) Mukwenera kusambira nawo buku la Mungakondwa na Umoyo Kwamuyirayira! Para mwachita nthena, ŵamanyenge visambizgo vikuruvikuru vya mu Baibolo na kuvilondezga. Ndipo muŵawovwirenge kuti ŵaghanaghanirengepo fundo za mu Baibolo. Ŵawovwirani kuti ŵalongosorenge vigomezgo vyawo mu mazgu ghawo na ghawo. (1 Pet. 3:15) Ŵana ŵinu ŵangaŵa ŵakwenelera kubatizika para mwaŵawovwira kumanya makora unenesko, para ŵakusambira paŵekha, ŵakusangika pa kusopa kwa mbumba, ŵakuluta ku maungano, ndiposo para ŵakwendezgana na ŵabwezi ŵawemi. Ŵawovwirani kuti ŵasankhirethu uteŵeti uwo ŵakukhumba kuzakachita.

Lemba la Zintharika 20:11 likuti: “Nanga ni mwana wakumanyikwa na milimo yake, usange nkharo yake njiwemi na yakwenelera.” Kasi ni vinthu wuli ivyo ŵana ŵangachita kulongora kuti mbasambiri ŵa Yesu ndipo mbakwenelera kubatizika?

Mwana uyo wakukhumba kubatizika wakwenera kuŵa na mbiri yakuti wakupulikira ŵapapi ŵake. (Mil. 5:29; Kol. 3:20) Baibolo likuti apo Yesu wakaŵa na vyaka 12, “wakalutilira kujilambika [ku ŵapapi ŵake].” (Luka 2:51) Lekani kukhazga kuti mwana wachitenge makora vinthu vyose. Kweni mwana uyo wakukhumba kubatizika wakwenera kuyezgayezga kuchita nga ni Yesu pa nkhani ya kupulikira ŵapapi.

Kweniso wakwenera kulongora kuti wakutemwa kusambira Baibolo. (Luka 2:46) Kasi mwana winu wakutemwa kuwungana na kuzgorapo? (Sal. 122:1) Kasi wakutemwa kuŵazga Baibolo na kusambira payekha nyengo zose?—Mat. 4:4.

Mwana uyo wakukhumba kubatizika wakwenera kuŵika vya Ufumu pakwamba. (Mat. 6:33) Wakwenera kumanya kuti wakwenera kupharazga nyengo zose. Wakuchitako upharazgi wakupambanapambana, ndipo wakuchita soni yayi kuphalira ŵasambizgi ŵake na ŵanyake ku sukulu kuti ni Kaboni wa Yehova. Para wapika vyakuchita mu Ungano wa Uteŵeti na Umoyo Wachikhristu wakuwoneseska kuti wachita.

Wakuyezgayezga kuŵa na nkharo yituŵa ndipo wakwendezgana na ŵanthu ŵaheni yayi. (Zinth. 13:20; 1 Kor. 15:33) Sumu izo wakutemwa kupulikizga, mavidiyo agho wakuwonelera, mapulogiramu gha pa TV agho wakutemwa, magemu gha pa TV panji pa kompyuta kweniso ivyo wakutemwa kuwonelera pa Intaneti, ndivyo vingalongora kuti wali na nkharo yituŵa.

Ŵana ŵanandi ŵakupulikira para ŵapapi ŵawo ŵakuŵasambizga ndipo ŵakutora unenesko kuŵa wawo. Ntheura ŵakuŵa ŵakwenelera kubatizika. Mphanyi Yehova wamutumbikani apo mukovwira ŵana ŵinu kuti ŵabatizike na kuŵa ŵabwezi ŵa Yehova.

Uthenga kwa Mupharazgi Wambura Kubatizika:

Para ndimwe mupharazgi wambura kubatizika muli na mwaŵi wapadera chomene kuteŵetera na mpingo. Tikumuwongani chomene chifukwa chakuti mwakura mwauzimu. Mwamumanya makora Chiuta chifukwa chakuti mwasambira Mazgu ghake ndipo mwalongora kuti mukugomezga ivyo Chiuta wali kulayizga.—Yoh. 17:3; Heb. 11:6.

Apo mukaŵa kuti mundambe kusambira na Ŵakaboni ŵa Yehova, panyake mukaŵa mu tumawupu twa visopa panji yayi. Panji mukachitapo vinthu vinyake ivyo vikukolerana yayi na ivyo Baibolo likusambizga. Kweni sono muli kulapa, kulongora kuti mukudandawura na ivyo mukachita kumanyuma. Kweniso mwasintha, kulongora kuti mwaleka kuchita viheni ndipo mwaŵikapo mtima kuti muchite icho ntchiwemi pamaso pa Chiuta.—Mil. 3:19.

Panji ‘mwamanya malemba ghatuŵa kufuma pa ubonda,’ lekani mundachiteko vinthu viheni panji zakwananga zikuru. (2 Tim. 3:15) Mwamanya umo mungachitira para ŵanyinu ŵakumuchichizgani kuti muchite viheni ivyo vingakwiyiska Yehova. Mwalongora kuti muli kukoleska kusopa kwaunenesko ndipo mukuphalirako ŵanthu ivyo mukugomezga. Mwamanya umo mungapharazgira. Ndipo sono mwasankha kuŵa mupharazgi wambura kubatizika kuti muteŵetere Yehova.

Kwali ŵakamba kumusambizgani vya Yehova kwamba pa ubonda, panji mwati mwakura, kweni sono mukukhumba kuchita vinthu viŵiri vyakuzirwa. Vinthu ivi nkhujipeleka na kubatizika. Pakujipeleka kwa Yehova mukumulomba na kumuphalira kuti mwasankha kuti mumuteŵeterenge muyirayira. (Mat. 16:24) Ndipo mukubatizika kulongora kuti mwajipeleka kwa Yehova. (Mat. 28:19, 20) Para mwajipeleka na kubatizika, Yehova Chiuta wamuŵikaninge kuŵa muteŵeti wake. Uwu ni mwaŵi wapadera chomene.

Nga umo mukasambilira kale mu Baibolo, mukumanenge na masuzgo. Kumbukani kuti Yesu wakati wabatizika waka, “mzimu ukamulongozgera ku mapopa kuti wakayezgeke na Dyabulosi.” (Mat. 4:1) Namwe manyani kuti muyezgekenge para mwaŵa waka msambiri wa Khristu. (Yoh. 15:20) Viyezgo vizenge munthowa zakupambanapambana. Ŵabali ŵinu awo Mbakaboni yayi ŵangamususkani. (Mat. 10:36) Ŵanyinu ku sukulu, ku ntchito, na ŵabwezi ŵinu ŵakale ŵangamunyozani. Nyengo zose kumbukani mazgu gha Yesu agho ghali pa Mariko 10:29, 30, agho ghakuti: “Nadi nkhumuphalirani, palije uyo wasida nyumba panji ŵakuru panji ŵanung’una panji ŵadumbu panji nyina panji wiske panji ŵana panji minda chifukwa cha ine na chifukwa cha makani ghawemi uyo walekenge kusanga vyakusazgikira 100 mu nyengo yino, nyumba, ŵakuru panji ŵanung’una, ŵadumbu, anyina, ŵana, na minda, pamoza na nthambuzgo, ndipo mu nyengo iyo yikwiza umoyo wamuyirayira.” Ntheura lutilirani kulimbikira kuti muŵe paubwezi na Yehova na kulondezga nthowa zake zaurunji nyengo zose.

Para mukukhumba kubatizika phalirani mulaŵiliri wa milimo ya ŵalara. Mafumbo agho ghali kunthazi uku, ndigho ŵalara ŵazamumufumbani kuti ŵamanye usange ndimwe ŵakwenelera nadi kubatizika. Apo mukusambira pamwekha mungambirapothu kuweleramo mafumbo agha.

Apo mukunozgekera kuzakadumbiskana na ŵalara, ŵazgiranithu malemba agho mazgu ghake ghalembeka na agho ghandalembeke na kughanaghanirapo. Mungalemba fundo zinu mu buku ili panji pa malo ghanyake. Panyengo iyo ŵalara ŵazamumufumbani mafumbo mungazakayegha apo mukalemba fundo zinu na kuwonapo. Kweniso mungazakajura buku linu. Para fumbo linyake mundalipulikiske, fumbani uyo wakumusambizgani Baibolo panji ŵalara.

Panyengo iyo muzamudumbiskana na ŵalara, kuzakazgora mazgoro ghatali yayi panji ghakuzingilira. Muzakazgorenge waka zgoro lipusu, lakudunjika, na kuyowoya mu mazgu ghinu na ghinu. Pakuzgora mafumbo ntchiwemi kuti muzakazunurenge lemba limoza panji ghaŵiri agho ghakukhozgera zgoro linu.

Para mundamanye makora visambizgo vikuruvikuru vya mu Baibolo, ŵalara ŵazamumuphalirani kuti mukalutilire kusambira kuti mazgoro ghinu ghazakalongorenge kuti mukupulikiska Malemba kweniso kuti muyowoyenge mu mazgu ghinu na ghinu. Para mwachita nthena, kunthazi mungazakaŵa ŵakwenelera kubatizika.

[Mazgu ku ŵalara ŵa mpingo: Ulongozgi wa umo mungachitira pakudumbiskana na awo ŵakukhumba kubatizika uli pa peji 208-212.]