Kasi Ŵana Ŵakwenera Kubapatizika?

MKHRISTU munyake wa ku Philippines zina lake Kalosi,a wakati: “Nakondwa comene kuti sono mwana wane ni muteŵeti wa Yehova, ndipo nkhumanya kuti nayo wakondwa.” Dada munyake wa ku Greece wakati: “Ine na muwoli wane tikukondwa comene kuti ŵana ŵithu ŵatatu ŵakabapatizika ŵacali ŵana. Ŵakukura mwauzimu ndipo ŵakukondwa kuteŵetera Yehova.”

Ŵapapi Ŵacikhristu ŵakuŵa na cimwemwe cikuru para ŵana ŵawo ŵabapatizika, kweni nyengo zinyake ŵakwenjerwaso comene. Mama munyake wakati: “Nkhaŵa wakukondwa comene kweni nkhaŵaso wakwenjerwa comene.” Cifukwa wuli mama uyu wakayowoya nthena? Iyo wakati: “Nkhamanyanga kuti mwana wane wafika pa msinkhu wakujipatawulira yekha kwa Yehova.”

Ŵana wose ŵakwenera kuŵa na cilato ca kuteŵetera Yehova nga Mbakaboni ŵakubapatizika. Ndipouli, ŵapapi ŵanyake ŵangajifumba kuti, ‘Nkhumanya kuti mwana wane wakucita makora mwauzimu, kweni kasi ngwakukhwima mwakuti wangakana nkharo ziheni na kulutilira kuŵa wakutowa pamaso pa Yehova?’ Ŵanji ŵangajifumba kuti, ‘Kasi mwana wane walutilirenge kuteŵetera Ciuta mwacimwemwe ndiposo mwamwamphu para wangayezgeka na mzimu wakutemwa vinthu vyakuthupi?’ Ipo kasi ni fundo wuli za mu Baibolo izo zingawovwira ŵapapi kumanya usange ŵana ŵawo mbakunozgeka kubapatizika?

Cakukhumbikwa Comene Nkhuŵa Msambiri

Padera pa kuwona waka vilimika kuti mwana wangabapatizika, Mazgu gha Ciuta ndigho ghangamulongorani usange mwana winu ngwakwenelera kubapatizika. Yesu wakaphalira ŵalondezgi ŵake kuti: “Mukazgore ŵanthu ŵa mitundu yose kuŵa ŵasambiri, [na] kuŵabapatiza.” (Mat. 28:19) Ntheura, ŵasambiri ŵa Khristu ndiwo ŵakwenera kubapatizika.

Kasi mazgu ghakuti msambiri ghakung’anamuraci? Buku la Insight on the Scriptures likuti: “Mazgu agha comene ghakuyowoya za wose awo ŵakugomezga na kulondezga visambizgo vya Khristu.” Kasi ŵana nawo ŵangaŵa ŵasambiri ŵa Khristu? Pakuyowoya za iyomwene, kweniso mukuru wake, na munung’una wake, mudumbu munyake uyo wakacitapo umishonale kwa vilimika vyakujumpha 40 ku Latin America, wakati: “Tikaŵa ŵakukhwima makora mwakuti tikamanyanga kuti tikukhumba kuteŵetera Yehova na kukhala mu Paradiso. Kujipatulira kukatovwira kuti tiŵe ŵakukhora para tikulimbana na viyezgo vya uwukirano. Tikudandawura yayi kuti tikajipatulira kwa Ciuta apo tikaŵa ticali ŵana.”

Kasi mungamanya wuli kuti mwana winu ni msambiri wa Khristu? Baibolo likuti: “Nanga ndi mwana wakumanyikwa na milimo yake; kuti ico wacicita panji nchikhovu na cakunyoloka.” (Zinth. 20:11) Wonani vinthu vinyake ivyo vingalongora kuti mwana ni msambiri.—1 Tim. 4:15.

Ivyo Vikulongora Kuti Ni Msambiri

Kasi mwana winu wakumupulikirani? (Kol. 3:20) Kasi wakucita milimo iyo mukumutuma pa nyumba? Baibolo likuti Yesu apo wakaŵa na vilimika 12, “wakalutilira kujilambika” ku ŵapapi ŵake. (Luka 2:51) Nangauli mazuŵa ghano palije mwana uyo wangapulikira ŵapapi ŵake mwakufikapo, kweni Ŵakhristu ŵaunenesko ŵakwenera ‘kulondezga mendero gha Yesu mwakugomezgeka.’ Ntheura, ŵana awo ŵakukhumba kubapatizika ŵakwenera kumanyikwa kuti ŵakupulikira ŵapapi ŵawo.—1 Pet. 2:21.

Wonani mafumbo ghakulondezgapo agha: Kasi mwana winu ‘wakulutilira kupenja dankha Ufumu’? (Mat. 6:33) Kasi wakukhumbisiska kuphalirako ŵanji makani ghawemi, panji mukucita kumukoserezga kuti walute mu uteŵeti? Pakuŵa mupharazgi wambura kubapatizika, kasi wakumanya udindo wake? Kasi wali na khumbo la kuwelerako ku ŵakunweka awo wakuŵapharazgira? Kasi wakujiphara ku ŵanyake ŵa ku sukulu panji ku ŵasambizgi kuti ni Kaboni wa Yehova?

Kasi maungano gha mpingo ngakuzirwa kwa iyo? (Sal. 122:1) Kasi wakuzgorapo pa Sambiro la Gongwe la Mulinda na pa Sambiro la Baibolo la Mpingo? Kasi wakudumba nkhani izo wakupika mu Sukulu ya Uteŵeti wa Ciuta?—Heb. 10:24, 25.

Kasi mwana winu wakuŵambara mendezgano ghaheni ku sukulu na kulikose uko wakuŵa? (Zinth. 13:20) Pa nkhani ya vyakusanguluska nga ni sumu, mafilimu, mapulogiramu gha pa TV, mavidiyo, na Intaneti, kasi ivyo wakutemwa vikuŵa vyamtundu wuli? Kasi ivyo wakuyowoya na kucita vikulongora kuti wakukhumba kulondezga fundo za mu Baibolo?

Kasi mwana winu wakulimanya makora Baibolo? Kasi wangayowoya mu mazgu ghake na ghake ivyo wakusambira pa Nyengo Yakusopera ya Mbumba? Kasi wangalongosora visambizgo vyakwambilira vya mu Baibolo? (Zinth. 2:6-9) Kasi wakunweka kuŵazga Baibolo na mabuku gha muzga wakugomezgeka na wakucenjera? (Mat. 24:45) Kasi wakufumba mafumbo ghakukhwaskana na visambizgo vya Baibolo ndiposo mavesi agho wandaghapulikiske?

Mafumbo agha ghangamovwirani kumanya umo mwana winu wakukulira mwauzimu. Para mwaghasanda, muwonenge apo mwana winu wangakhumbikwira kugwilirapo nchito pambere wandabapatizike. Kweni usange ivyo wakucita vikulongora kuti ni msambiri ndipo wajipatulira nadi kwa Ciuta, mungamuzomerezga kuti wabapatizike.

Ŵana Ŵangalumba Yehova

Ŵateŵeti ŵanandi ŵa Ciuta ŵakalongora kugomezgeka pa nyengo iyo ŵakaŵa ŵawukirano panji pambere ŵandafike pa uwukirano. Ghanaghanirani za Yosefe, Samuyeli, Yosiya, na Yesu. (Gen. 37:2; 39:1-3; 1 Sam. 1:24-28; 2:18-20; 2 Mid. 34:1-3; Luka 2:42-49) Kweniso ŵana ŵasungwana ŵanayi ŵa Filipu, awo ŵakacimanga, ŵakwenera kuti ŵakasambizgika makora kufuma pa wanici.—Mil. 21:8, 9.

Mbali munyake wa ku Greece wakati: “Nkhabapatizika apo nkhaŵa na vilimika 12. Nindadandawurepo cifukwa ca ico nkhasankha. Kufuma nyengo iyo nkhabapatizikira, pajumpha vilimika 24, ndipo nacita uteŵeti wanyengozose kwa vilimika 23. Kutemwa Yehova nyengo zose kukanovwiranga kutonda masuzgo agho ghakwiza cifukwa ca uwukirano. Apo nkhabapatizikanga nkhamanyanga Malemba nga umo nkhughamanyira sono yayi. Kweni nkhamanyanga kuti nkhutemwa Yehova ndipo nkhukhumba kumuteŵetera kwamuyirayira. Ndine wakukondwa cifukwa cakuti Yehova wanovwira kuti nilutilire kumuteŵetera.”

Munthu uyo walongora kuti ni msambiri wakwenera kubapatizika, kwali ni mulara panji mwana. Mpositole Paulosi wakalemba kuti: “Na mtima munthu wakupulikana mwakuti waŵe murunji, kweni na mulomo munthu wakuzomera pakweru kuti waponoskeke.” (Rom. 10:10) Para mwana uyo ni msambiri wa Khristu wabapatizika, ndikuti iyo na ŵapapi ŵake ŵafiska cinthu cakuzirwa comene. Paŵavye cinthu cakuti cimutondeskeni imwe panji ŵana ŵinu kusanga cimwemwe ico cikuŵapo para munthu wabapatizika.

[Mazgu ghamusi]

[Bokosi pa peji 5]

Kuwona Ubapatizo Mwakwenelera

Ŵapapi ŵanyake ŵakuwona kuti para ŵana ŵawo ŵabapatizika, vinthu vinyake viŵayenderenge makora yayi. Kweni kasi mbunenesko kuti para munthu wabapatizika ndipo wakucita uteŵeti wakupatulika ndikuti vinthu vimwenderenge makora yayi? Cara. Lemba la Zintharika 10:22 likuti: “Thumbiko la Yehova likusambazga, ndipo kuti wakusazgako citima cara.” Kweniso Paulosi wakalembera Timote kuti: “Nadi, kusopa Ciuta mwakujipeleka uku pamoza na kukhorwa, ni nthowa yakusangira candulo cikuru.”—1 Tim. 6:6.

Mbunenesko, kuti nchipusu yayi kuteŵetera Yehova. Yeremiya wakakumana na masuzgo ghanandi mu uteŵeti wake. Kweni pakuyowoya za uteŵeti wake wakupatulika, wakati: “Mazgu ghinu ghakaŵa kwa ine cimwemwe na kusekelera mu mtima wane; pakuti nkhucemeka na zina linu A Yehova, Ciuta wa mipingo.” (Yer. 15:16) Yeremiya wakamanyanga kuti wakasanga cimwemwe cifukwa ca kuteŵetera Ciuta. Mu caru ca Satana muli masuzgo pera. Ŵapapi ŵakwenera kovwira ŵana ŵawo kuti ŵamanye fundo iyi.—Yer. 1:19.

[Bokosi/Cithuzithuzi pa peji 6]

Kasi Mwana Wane Waleke Dankha Kubapatizika?

Nyengo zinyake nanga nipara mwana wangaŵa wakwenelera kubapatizika, ŵapapi ŵake ŵangamuyimiska dankha. Cifukwa wuli ŵangacita nthena?

Mupapi wangati, nkhopa kuti para mwana wane wabapatizika, nyengo zinyake wangacita kwananga kukuru ndipo wangasezgeka mu mpingo. Kasi mbunenesko kuti mwana uyo wandabapatizike para wangacita kwananga ndikuti wakuŵavya mulandu pamaso pa Ciuta? Solomoni wakaphalira ŵawukirano kuti: “Manya kuti cifukwa ca vyose ivi [ivyo ukucita] Ciuta tiwakutolere ku kweruzgika.” (Muph. 11:9) Paulosi wakayowoyapo yayi za msinkhu wa munthu apo wakayowoya kuti: “Waliyose wa ise wazamujipatawulira iyomwene kwa Ciuta.”—Rom. 14:12.

Kwali munthu ngwakubapatizika panji yayi, kweni waliyose wazamujipatawulira kwa Ciuta. Kumbukani kuti Yehova wakuvikilira ŵateŵeti ŵake ndipo ‘wakuzomerezga cara kuti ŵayezgeke kujumpha ico ŵangazizipizga.’ (1 Kor. 10:13) Ŵana nawo ŵawonenge kuti Ciuta wakuŵawovwira, cikuru ‘ŵakusungilira maghanoghano ghawo’ na kulimbana na viyezgo. (1 Pet. 5:6-9) Mama munyake wakalemba kuti: “Ŵana awo mbakubapatizika ŵali na vifukwa vinandi vyakukhalira kutali na vinthu viheni vya mu caru. Mwana wane, uyo wakabapatizika apo wakaŵa na vilimika 15, wakuwona kuti ubapatizo nchivikiliro. Iyo (mwana) wakati: ‘Ukughanaghanako yayi kucita vinthu ivyo vikupambana na dango la Yehova.’ Ubapatizo ukovwira comene kuti munthu wacite urunji.”

Usange ŵana ŵinu mwaŵasambizga kopa Yehova kwizira mu mazgu na vyakucita vinu, mungaŵa na cigomezgo cakuti ŵalutilirenge kucita nthena para ŵabapatizika. Lemba la Zintharika 20:7 likuti: “Murunji wakwenda mu ukongorekwa wake, na ŵana ŵake ŵakutumbikika panyuma pake.”

Nkhukhumba kuti mwana wane wafiske dankha vinthu vinyake. Ŵana ŵakwenera kusambira kugwira nchito mwakuti para ŵakura ŵazakajovwirenge ŵekha. Kweni nchakofya kukhuŵilizga ŵana kuti ŵaŵikenge umoyo wawo wose pa masambiro na ndalama m’malo mwa vinthu vyauzimu. Pakuyowoya za mbuto iyo yikutondeka kukura, Yesu wakati: “Iyo yikaseŵeka pakati pa minga, uyu ni mweneuyo wakupulika mazgu, kweni vyenjezgo vya mgonezi uno na nkhongono yakupusika ya usambazi vikufyolonganiska mazgu, ndipo wakuŵa wambura vipambi.” (Mat. 13:22) Usange mupapi wakuŵikira mwana vilato vya ku caru ivyo vikupepuska vinthu vyauzimu, mwana wangaŵavya khumbo lakuteŵetera Ciuta.

Pa nkhani ya ŵana awo mbakwenelera kubapatizika, kweni ŵapapi ŵawo ŵakuŵakanizga, mulara munyake wakati: “Mwana para wakanizgika kubapatizika wangawelera nyuma mwauzimu ndipo wangamba kugongowa.” Mulaŵiliri wakwendakwenda munyake wakalemba kuti: “Mwana wangamba kujiwona kuti ngwambura kuvikilirika mwauzimu panji ngwakutondeka. Wangamba kukhumba kucita vinthu vya caru na cilato cakuti wajiwonenge kuti ngwambura kutondeka .”

[Cithuzithuzi]

Kasi masambiro gha ku yunivesite ghakwenera kuŵa pakwamba?

[Cithuzithuzi pa peji 3]

Ivyo vingalongora kuti mwana ni msambiri

[Vithuzithuzi pa peji 3]

Kunozgekera maungano na kuzgorapo

[Cithuzithuzi pa peji 4]

Kupulikira ŵapapi

[Cithuzithuzi pa peji 4]

Kupharazga

[Cithuzithuzi pa peji 4]

Kulomba payekha