Bokosi La Fumbo
◼ Para munthu wazomerezgeka kuti waŵe mupharazgi wambura kubapatizika, kasi pakwenera kujumpha nyengo yitali wuli kuti wabapatizike?
Pa vinthu vyose ivyo munthu wakusankha kucita, ubapatizo ndiwo ngwakuzirwa comene. Ntheura, pambere munthu wandazomerezgeke kuti wabapatizike, wakwenera kumanya ivyo Ciuta wakukhumba kwa iyo. Nakuti wakwenera kulongora kuti wambapo kale kucita vinthu mwakuyana na ivyo Ciuta wakukhumba.
Ŵakhristu ŵakulangurika kuti ŵangasurangako cara kuwungana pamoza. Mwantheura, mupharazgi wambura kubapatizika wakwenera kulongora kuti wakutemwa maungano gha mpingo. (Heb. 10:24, 25) Kweniso ŵakwenera kuzgorapo pa maungano. Wangalembeska mu Sukulu ya Uteŵeti wa Ciuta, nangauli ndico cingapangiska kuti wazomerezgeke kuti wabapatizike yayi.
Kweniso, Ŵakhristu ŵali kupika mulimo wakupharazga makani ghawemi na kuzgora ŵanthu kuŵa ŵasambiri. Mwantheura, mupharazgi wambura kubapatizika wakwenera kupharazga mwamwamphu pambere wandabapatizike. (Mat. 24:14; 28:19, 20) Kasi wakwenera kupharazga kwa myezi yilinga pambere wandabapatizike? Wakwenera kupika nyengo yakukwana yakuti walongore usange ngwakukhumbisiska kupharazga mwamwamphu mwezi wuli wose. (Sal. 78:37) Kweni pangajumphanga nyengo yitali comene yayi kufuma apo wakaŵira mupharazgi. Nyengo zinyake pangajumpha myezi yicoko waka. Kasi wakwenera kupeleka maora ghalinga? Palije dango lakuŵikika. Ŵalara ŵakwenera kughanaghanira umo vinthu viliri na mupharazgi waliyose.—Luka 21:1-4.
Usange ŵalara (panji ŵateŵeti ŵakovwira para pa mpingo pali ŵalara ŵacoko) ŵakukumana na munthu uyo wakukhumba kubapatizika, ŵakwenera kukumbuka kuti ŵanthu ŵakupambana. Mwantheura, umanyi ngwakukhumbikwa kuti ŵawone usange munthu ngwakwenelera kubapatizika panji yayi. Ŵakwenera kuwona usange wakukhumba nadi kuŵa Kaboni wa Yehova ndipo wakuwona kuti ni mwaŵi ukuru kukolerana na gulu la Yehova na kucitako mulimo wakupharazga. Ŵalara ŵangamanya kuti wandakure mwauzimu nesi kumanya vinandi kuti waŵe mupharazgi waluso. Usange ŵalara ŵawona kuti munthu ngwambura kwenelera kuti wabapatizike, ŵakwenera kumuphalira mwalusungu vifukwa vya mu Malemba na kumovwira mwauzimu.