Nthowa Izo Tingapharazgira Makani Ghawemi

YESU wakalimbikiranga kupharazga makani ghawemi. Ntheura awo ŵakumulondezga ŵakwenera kutolerako. Wakamba ndiyo kuluta kukapharazga ku ŵanthu. Wakasambizganga ku nyumba zawo na ku malo ghanyake. (Mat. 9:35; Luka 8:1) Nyengo zinyake Yesu wakasambizganga munthu payekha, ŵasambiri ŵake kwaŵekha, ndiposo wumba wa ŵanthu. (Mrk. 4:10-13; 6:35-44; Yoh. 3:2-21) Wakapembuzganga ŵanthu na kuŵaphalira viwemi vyamunthazi, palipose apo mpata wasangika. (Luka 4:16-19) Wakalekanga yayi kupharazga nanga ni apo wakakhumbanga kupumura. (Mrk. 6:30-34; Yoh. 4:4-34) Para tikuŵerenga nkhani za uteŵeti wa Yesu, tikukhozgeka chomene, ndipo tikukhumba kuchita nga ndiyo. Ŵapositole nawo ndimo ŵakachitira.—Mat. 4:19, 20; Luka 5:27, 28; Yoh. 1:43-45.

² Mazuŵa ghano tili na mpata ukuru chomene wakuchitira ntchito ya kupharazga iyo Yesu wakambiska vyaka pafupifupi 2,000 ivyo vyajumpha.

KUPHARAZGA NYUMBA NA NYUMBA

³ Ŵakaboni ŵa Yehova ŵakuwona kuti kupharazga makani ghawemi gha Ufumu nyumba na nyumba nkhwakuzirwa chomene. Tikamba ni kale kupharazga nyumba na nyumba ndipo nthowa iyi ndiyo tikumanyikwa nayo. Ivyo vyachitika vikulongora kuti nthowa iyi njiwemi, chifukwa yikutovwira kuti tipharazgire ŵanthu ŵanandi mu nyengo yichoko. (Mat. 11:19; 24:14) Para tikupharazga nyumba na nyumba, tikulongora kuti tikutemwa Yehova na ŵazengezgani ŵithu.—Mat. 22:34-40.

⁴ Ŵakaboni ŵa Yehova ŵamba sono yayi kupharazga nyumba na nyumba. Mpositole Paulosi wakayowoya kuti wakasambizganga ŵanthu mu nyumba zawo. Apo wakalongosoleranga ŵalaŵiliri ŵa ku Efeso za uteŵeti wake, wakati: “Kufuma pa zuŵa lakwamba ilo nkhakandira mu chigaŵa cha Asiya . . . nkhalekapo yayi kumuphalirani chilichose chakumovwirani nesi kumusambizgani . . . ku nyumba na nyumba.” Paulosi wakachitira “ukaboni mwakukwana ku Ŵayuda na Ŵagiriki kuti ŵang’anamuke mtima na kuwelera kwa Chiuta, ndiposo kuti ŵaŵe na chipulikano mwa Fumu yithu Yesu.” (Mil. 20:18, 20, 21) Pa nyengo iyi, ŵalongozgi Ŵachiroma ŵakachiskanga ŵanthu kuti ŵasopenge vikozgo, ndipo ŵanandi ŵakawopanga “chomene ŵachiuta.” Ntheura ŵanthu ŵakakhumbikwiranga kupenja “Chiuta uyo wakalenga charu na vyose ivyo vilimo,” uyo “wakuphalira ŵanthu wose kulikose kuti ŵang’anamuke mtima.”—Mil. 17:22-31.

⁵ Sono ndipo ntchakukhumbikwa chomene kupharazgira ŵanthu makani ghawemi. Umaliro wa charu ichi uli pafupi chomene. Ntheura tikwenera kulimbikira chomene kupharazga. Nthowa yiwemi chomene yakupenjera ŵanthu awo ŵali na njara ya kumanya unenesko, nkhupharazga nyumba na nyumba. Nthowa iyi yichali yiwemi chomene nga umo vikaŵira mu nyengo ya Yesu na ŵapositole.—Mrk. 13:10.

⁶ Kasi mukulimbikira kupharazga nyumba na nyumba? Para ndimo mukuchitira, manyani kuti Yehova wakukondwa namwe. (Ezek. 9:11; Mil.20:35) Nyengo zinyake chingaŵa chipusu yayi kupharazga nyumba na nyumba. Mungaŵa kuti mukulwara panji ndimwe ŵachekuru, panji mungaŵa kuti mukupharazga mu chigaŵa icho ŵanthu ŵanandi ŵakukhumba yayi kuŵapharazgira. Boma lingakanizga ntchito yithu. Nyengo zinyake mungaŵa kuti muli na soni ndipo vikumusuzgani kwamba kuyowoyeskana na munthu wachilendo. Nyengo yiliyose para mukupharazga nyumba na nyumba mukuŵa na wofi. Kweni kugongowa yayi. (Eks. 4:10-12) Ndimoso viliri na ŵabali ŵinu mu vyaru vinandi.

⁷ Yesu wakalayizga ŵasambiri ŵake kuti: “Wonani, ine nili namwe mazuŵa ghose m’paka umaliro wa charu ichi.” (Mat. 28:20) Nase layizgo ili likutikhozga apo tikuchita ntchito ya kuzgora ŵanthu kuŵa ŵasambiri. Tikuwona kuti mazgu agho Paulosi wakayowoya ngaunenesko. Iyo wakati: “Mu vinthu vyose, nkhusanga nkhongono mwa uyo wakunipa nkhongono.” (Fil. 4:13) Mpingo ukuŵa na ndondomeko yakuti sabata yiliyose upharazgenge nyumba na nyumba. Namwe mulutenge nawo lumoza. Para mukupharazgira lumoza na ŵanyinu, ŵamukhozganinge na kumovwirani. Lombani Chiuta kuti wamovwirani kuzizipizga masuzgo ndipo limbikirani kupharazga makani ghawemi.—1 Yoh. 5:14.

⁸ Apo mukuphalirako ŵanthu makani ghawemi, mukuŵa na mwaŵi kuŵaphalira “chigomezgo icho muli nacho.” (1 Pet. 3:15) Muzamuwona mphambano iyo yilipo pakati pa awo ŵakulindilira kuti Ufumu uzamuŵachitira viwemi na awo ŵalije chigomezgo. (Yes. 65:13, 14) Muzamukondwa chomene kuti mukapulikira dango la Yesu lakuti “ungweru winu uŵale.” Kweniso muŵenge na mwaŵi kovwira ŵanthu kuti ŵamanye Yehova na unenesko uwo ungaŵawovwira kuzakasanga umoyo wamuyirayira.—Mat. 5:16; Yoh. 17:3; 1 Tim. 4:16.

⁹ Mpingo ukuŵa na ndondomeko yakuti upharazgenge nyumba na nyumba pa Chisulo na Sabata, kweniso mazuŵa ghanyake mu sabata. Mu vigaŵa ivyo ŵanthu ŵakusangika viŵi yayi pa nyumba namuhanya, mipingo yinyake yikupharazga namise. Ŵanthu ŵangatemwa kupokelera ŵalendo mise kuluska mulenji.

KUPENJA AWO MBAKWENELERA

¹⁰ Yesu wakaphalira ŵasambiri ŵake kuti ‘ŵakapenje’ awo mbakwenelera. (Mat. 10:11) Yesu wakapenjanga awo mbakwenelera ku nyumba na nyumba pera yayi. Wakapharazganga palipose apo mpata wasangika. (Luka 8:1; Yoh. 4:7-15) Ŵapositole nawo ŵakapharazgiranga ŵanthu ku malo ghakupambanapambana.—Mil.17:17; 28:16, 23, 30, 31.

¹¹ Mazuŵa ghano napo tikukhumba kupharazgira waliyose uthenga wa Ufumu. Tikwenera kupharazga nga umo Yesu na ŵasambiri ŵake ŵakachitiranga pakuzgora ŵanthu kuŵa ŵasambiri. Tikweneraso kumanya umo vinthu vyasinthira mu charu kweniso umo vinthu viliri mu chigaŵa chithu. (1 Kor. 7:31) Mwachiyelezgero, ŵanyake ŵakupharazga ku malo gha bizinesi ndipo vikuŵayendera makora. Mu vyaru vinandi, vikutiyenderaso makora para tikupharazga mu misewu, mu mapaki, pa siteji, panji kulikose uko ŵanthu ŵakusangika. Mipingo yinyake yikuyala mabuku pa mathebulu panji pa tumashelufu mu chigaŵa chawo. Ofesi yinganozgaso upharazgi wapadera mu matawuni ghakurughakuru. Ŵanthu ŵa mu mipingo yakupambanapambana ndiwo ŵangachita upharazgi uwu. Ntheura ŵanthu awo ŵakusangika yayi pa nyumba ŵangapulika makani ghawemi uko ŵakwenda.

¹² Para tasangana na munthu wakunweka, tingamulekera buku panji magazini. Kweniso tingamulekera foni nambara panji adiresi yithu na kupangana nayo ulendo wakuwelerako. Mungamuphaliraso kuti wakawone pa jw.org, panji mungamupa adiresi ya umo wangasangira mpingo wakufupi na uko wakukhala. Para mukupharazga ku malo uko kukusangika ŵanthu ŵanandi, mungachita vinandi mu uteŵeti.

¹³ Taŵakhristu tapika ntchito ya kupharazga makani ghawemi pera yayi. Tikweneraso kuwelerako kanandi waka kuti tovwire ŵanthu kupulikiska unenesko na kuti ŵambe kuchita makora mwauzimu. Ichi chovwirenge kuti ŵanthu aŵa ŵazakasange umoyo wamuyirayira.

KUWELERAKO

¹⁴ Yesu wakaphalira ŵalondezgi ŵake kuti: “Muzamuŵa ŵakaboni ŵane . . . ku vigaŵa vyakutali chomene vya charu chapasi.” (Mil. 1:8) Wakaŵaphaliraso kuti: “Ntheura, lutaninge mukazgore ŵanthu ŵa mitundu yose kuŵa ŵasambiri, . . . mukaŵasambizge kusungilira vinthu vyose ivyo namuphalirani.” (Mat. 28:19, 20) Para tikuwelerako ku ŵanthu awo taŵapharazgira, tingaŵa ŵakukondwa chomene. Ŵanthu awo ŵakanweka na makani ghawemi tati taŵapharazgira, ŵangakondwa para talutaso. Para mukuŵaphalira fundo zinyake za mu Baibolo, ŵambenge kugomezga Chiuta ndipo muŵawovwirenge kumanya kuti ŵakukhumbikwira kumanya Chiuta. (Mat. 5:3) Para mukuwelerako ku ŵanthu, mukwenera kunozgekera ivyo mwamudumbiskana. Kweniso para mukuluta pa nyengo iyo ŵasankha, ŵangazomera kuti musambirenge nawo Baibolo. Ichi ndicho ntchifukwa chikuru icho tikuwelerako ku ŵanthu. ‘Tikupanda’ waka mbuto zaunenesko yayi, ‘tikuzithiliraso.’—1 Kor. 3:6.

¹⁵ Ŵanyake vingaŵasuzga kuwelerako kwa munthu uyo ŵakamupharazgira. Nyengo zinyake mungaŵa kuti mukutemwa kupharazga mwakudumura. Kweni para mukughanaghana vya kudumbiskana na munthu nyengo yitali, mungawopa kuwelerako. Para mwanozgekera makora vikumovwirani kuti muleke kopa. Yezgani kulondezga masachizgo agho mukusambira pa maungano gha mukati mwa sabata. Mungapemphaso mupharazgi waluso kuti mwende nayo lumoza mu uteŵeti.

KUSAMBIZGA ŴANTHU BAIBOLO

¹⁶ Munthu munyake uyo wakaphendukira ku Chiyuda wakaŵerenganga Mazgu gha Chiuta mwakukwezga. Ndipo Filipu wakamufumba kuti: “Kasi mukupulikiska ivyo mukuŵerenga?” Munthu uyu wakazgora kuti: “Ningapulikiska wuli kwambura kuti munthu wanilongozge?” Chaputara 8 cha buku la Milimo chikutiphalira kuti Filipu wakamba kumupharazgira “makani ghawemi ghakuyowoya vya Yesu” pa ivyo munthu uyu wakaŵerenganga kale. (Mil. 8:26-36) Tikumanya yayi kuti Filipu wakadumbiskana nayo nyengo yitali wuli munthu yura, kweni wakalongosora makora makani ghawemi m’paka mwanalume yura wakagomezga, na kupempha kuti wabatizike. Munthu uyu wakazgoka msambiri wa Yesu Khristu.

¹⁷ Mazuŵa ghano ŵanthu ŵanandi ŵakulimanya makora yayi Baibolo. Lekani tikwenera kuwelerako kanandi waka na kusambira nawo Baibolo. Tingasambira nawo kwa masabata, myezi, chaka panji kujumpha apa kuti ŵaŵe na chipulikano na kuti ŵaŵe ŵakwenelera kubatizika. Mutumbikikenge para mukuzikira kweniso mukovwira mwachitemwa awo ŵakukhumba nadi kumanya unenesko kuti ŵaŵe ŵasambiri ŵa Yesu. Yesu wakati: “Uyo wakupeleka wakukondwa chomene kuluska uyo wakupokera.”—Mil. 20:35.

¹⁸ Pakusambizga ŵanthu Baibolo, mukwenera kugwiliskira ntchito mabuku ghakwenelera. Para mukulondezga ulongozgi na masachizgo agho tikusambira pa maungano gha mukati mwa sabata na kwendera lumoza na ŵapharazgi ŵaluso, vimovwiraninge kuti musambizge mwaluso ŵanthu Baibolo na kuŵawovwira kuti ŵaŵe ŵasambiri ŵa Yesu.

¹⁹ Para mukutondeka kwamba kusambira Baibolo na munthu, pemphani mulara panji Kaboni munyinu uyo wakusambizga mwaluso kuti wamovwirani. Masachizgo agho ghakuŵa mu kabuku ka Uteŵeti na Umoyo Wachikhristu, na viyezgelero ivyo vikuŵa pa ungano uwu navyo vingamovwirani. Gomezgani Yehova ndipo muphalirani kuti mukukhumba kusanga munthu wakuti mumusambizgenge Baibolo. (1 Yoh. 3:22) Para mungafiska, yezgani kusambizga munthu munyake padera pa wamunyumba yinu uyo mukumusambizga Baibolo. Para mukusambizga ŵanthu Baibolo, mukondwenge na uteŵeti.

KUŴACHEMERA KU GULU LA YEHOVA

²⁰ Para tikusambira Baibolo na ŵanthu na kuŵawovwira kuti ŵaŵe ŵasambiri ŵa Yesu Khristu, ŵakwamba kwiza ku mpingo. Para awo tikusambira nawo Baibolo ŵalimanya makora gulu la Yehova na kukolerana nalo, ŵangamba kuchita makora mwauzimu. Tikwenera kuŵasambizga kuti ŵalimanye gulu la Yehova na kuŵaphalira ivyo ŵangachita kuti ŵakolerane nalo. Pali mavidiyo na burosha lakuti Kasi Mbanjani Ŵakucita Khumbo la Yehova Mazuŵa Ghano? Ivi ndivyo vingaŵawovwira. Fundo zinyake izo zingaŵawovwira zili mu Mutu 4 wa buku lenelili.

²¹ Para mwayamba waka kusambira Baibolo na munthu, movwirani kumanya kuti mazuŵa ghano Yehova wakugwiliskira ntchito gulu lake kuti ndilo lichite ntchito ya kupharazga pa charu chapasi. Mulongosolerani kuti mabuku ghithu ngakuzirwa. Kweniso longosorani umo ghakupangikira na umo ŵabali na ŵadumbu awo ŵali kujipeleka kwa Chiuta ŵakuchitira pakugaŵira pa charu chose. Phalirani uyo mukusambira nayo Baibolo kuti walutenge ku maungano ku Nyumba ya Ufumu. Para wiza ku Nyumba ya Ufumu, mulongosorani ku ŵabali na ŵadumbu na kumulongosolera umo maungano ghakuchitikira. Para waluta ku ungano wa chigaŵa na wa dera, movwirani kuti wamanyane na ŵanthu ŵanandi. Pa nyengo iyi ndipo wajiwonerenge yekha umo ŵateŵeti ŵa Yehova ŵakutemwerana. Chitemwa ndicho ntchimanyikwiro cha Ŵakhristu ŵaunenesko. (Yoh. 13:35) Para ŵakunweka ŵawona na kwamba kuwonga ivyo gulu la Yehova likuchita, ŵakurenge mwauzimu ndipo ŵaŵenge paubwezi na Yehova.

KUGWILISKIRA NTCHITO MABUKU PAKUPHARAZGA

²² Ŵakhristu ŵakwambilira ŵakalimbikiranga kupharazga Mazgu gha Chiuta. Ŵakakoperanga Malemba kuti ŵaŵazgenge paŵekha kweniso kuti ŵasambirenge pa mpingo. Ŵakaphalirangako ŵanthu Mazgu gha Chiuta. Nangauli ivyo ŵakakopera vikaŵa vichoko, kweni vikaŵa vyakuzirwa chomene. (Kol. 4:16; 2 Tim. 2:15; 3:14-17; 4:13; 1 Pet. 1:1) Pakuti mazuŵa ghano kuli makina ghakupulintira, Ŵakaboni ŵa Yehova ŵakusindikizga Mabaibolo na vinthu vinyake vinandi vyakulongosora Baibolo. Ŵakusindikizga mathirakiti, maburosha, mabuku, na magazini mu viyowoyero vinandi.

²³ Para mukupharazga, gwiliskirani ntchito mabuku agho gulu likutipa kuti tisambizgirenge ŵanthu Baibolo. Para imwe mwawona kuti ivyo muli kuŵerenga mu mabuku gha Ŵakaboni ŵa Yehova vili kumovwirani, namwe muphalirengeko ŵanyinu.—Heb. 13:15, 16.

²⁴ Ŵanthu ŵanandi mazuŵa ghano ŵakuwona pa Intaneti kuti ŵamanye vinthu. Padera pa mabuku, paliso webusayiti ya jw.org/tum, iyo yikovwiraso chomene pakupharazga makani ghawemi. Ŵanthu ŵangaŵerenga panji kupulikizga Baibolo na mabuku ghithu mu viyowoyero vinandi pa kompyuta. Ŵanthu awo ŵakukana kuŵapharazgira na awo ŵakukhala ku malo agho ngakusuzga kufikako, ŵangamanya vinandi vya Ŵakaboni ŵa Yehova para ŵajura jw.org/tum. uku ŵali ku nyumba kwawo.

²⁵ Palipose apo mpata wasangika, tikuphalira ŵanthu kuti tili na webusayiti ya jw.org/tum. Para uyo tikumupharazgira wakukhumba kumanya ivyo tikugomezga, tingamulongora zgoro pa Intaneti, pa foni, panji pa kompyuta. Para takumana na munthu wa chiyowoyero chinyake, kwali ntcha mawoko, tingamuphalira kuti wakajure pa webusayiti yithu kuti wakasange Baibolo na mabuku gha chiyowoyero chake. Ŵapharazgi ŵanandi ŵakulongora ŵanthu mavidiyo agho ghali pa webusayiti yithu para ŵakupharazga.

KUPHARAZGA APO MPATA WASANGIKA

²⁶ Yesu wakaphalira awo ŵakamutegherezganga kuti: “Ndimwe ungweru wa charu. . . . Ungweru winu uŵale panthazi pa ŵanthu, mwakuti ŵawone milimo yinu yiwemi na kupeleka uchindami kwa Awiskemwe ŵakuchanya.” (Mat. 5:14-16) Ŵasambiri ŵakachita nga ni Yesu. Iyo wakati: “Ndine ungweru wa charu.” Yesu wakaŵaliska “ungweru wa umoyo,” ndipo Ŵakhristu nawo ndimo ŵakwenera kuchitira kuti ŵawovwire ŵanthu awo ŵakuŵapharazgira.—Yoh. 8:12.

²⁷ Mpositole Paulosi nayo wakatilekera chiyelezgero chakuti tilondezge. (1 Kor. 4:16; 11:1) Apo wakaŵa mu Ateni, zuŵa lililose wakapharazgiranga ŵanthu awo wakaŵasanganga mu musika. (Mil. 17:17) Ŵakhristu ŵa ku Filipi nawo ŵakasambirako kwa Paulosi. Lekani wakaŵalembera kuti nangauli ŵakakhalanga ‘pakati pa muwiro wakubendera na wakunyongoloka,’ ŵakaŵalanga nga “ni miliko mu charu.” (Fil. 2:15) Ivyo tikuyowoya na kuchita vingaŵaliska unenesko wa Ufumu ndipo para mpata wasangika tingapharazgira ŵanthu kwambura suzgo. Ŵanthu ŵanandi ŵangakopeka na unenesko para ŵawona kuti tikugomezgeka kweniso tili na nkharo yiwemi. Ndipo para tikuŵapharazgira makani ghawemi, ŵamanyenge kuti tikupambana na charu.

²⁸ Ŵakaboni ŵa Yehova ŵanandi ŵakupharazga makani ghawemi ku ŵanthu awo ŵakugwira nawo ntchito, awo ŵakusambira nawo sukulu, awo ŵakwera nawo basi panji galimoto, na ku malo ghanyake. Para tili paulendo, tingapharazgira awo takumana nawo mu nthowa. Para tikuchezga na ŵanthu nkhani yinyake, tikwenera kusangirapo mwaŵi kuŵapharazgira. Tikwenera kuŵa ŵakunozgeka kupharazgira ŵanthu palipose apo mpata wasangika.

²⁹ Para tikupharazga tikulumba Mlengi withu na kuchindika zina lake. Para tikukumbuka fundo iyi, tipharazgenge palipose apo mpata wasangika. Tikweneraso kovwira awo ŵakukhumba nadi kumanya Yehova kuti ŵamumanye na kumuteŵetera ndiposo kuti ŵaŵe na chipulikano mwa Yesu Khristu na kuzakasanga umoyo wamuyirayira. Para tikulimbikira kupharazga, Yehova wakukondwa chomene ndipo wakuwona kuti ivyo tikuchita mbuteŵeti wakupatulika.—Heb. 12:28; Chivu. 7:9, 10.

CHIGAŴA CHAKUPHARAZGAKO

³⁰ Yehova wakukhumba kuti uthenga wa Ufumu upharazgike pa charu chose. Ntheura ofesi yikupeleka vigaŵa vyakupharazgako ku mipingo na ŵanthu awo ŵakuteŵetera ku malo agho kukukhumbikwira ŵapharazgi ŵanandi. (1 Kor. 14:40) Ivi vikukolerana na ndondomeko iyo Chiuta wakapeleka ku Ŵakhristu ŵakwambilira. (2 Kor. 10:13; Gal. 2:9) Pakuti ntchito ya Ufumu njikuru chomene mu mazuŵa ghaumaliro agha, ntchito iyi yingenda makora chomene para mipingo yinganozga ndondomeko ya umo yipharazgirenge mu vigaŵa vyake.

³¹ Mulaŵiliri wa uteŵeti wakulemba vigaŵa vyose ivyo mpingo ukwenera kupharazgako. Muteŵeti wakovwira ndiyo wangagaŵira ŵanthu vigaŵa ivi.Pali mitundu yiŵiri ya vigaŵa. Vigaŵa vya gulu na vigaŵa vya munthu payekha. Para vigaŵa ni vichoko, ŵalaŵiliri ŵa gulu ŵangawona vigaŵa ivyo gulu lose lingapharazgangako. Kweni para vigaŵa ni vinandi, munthu ŵangamupa chigaŵa chake.

³² Para mupharazgi wali na chigaŵa chakupharazgako, wangaluta nyengo yiliyose para gulu lake lilije ndondomeko yakupharazga mukati mu sabata panji para iyo wangafiska yayi kuluta ku gulu. Ŵanyake ŵakusankha chigaŵa cha kufupi na uko ŵakugwira ntchito kuti ŵapharazgenge muhanya para ŵakupumura panji para ŵakuwera ku ntchito. Mabanja ghanyake ghakusankha chigaŵa chakufupi na uko ŵakukhala mwakuti ŵapharazgenge kumise. Para munthu wali na chigaŵa chakufupi na uko wakukhala, vikovwira kuti nyengo yinandi yimalirenge pa kupharazga m’malo mwa kwenda. Gulu nalo lingapharazga ku chigaŵa icho ntcha mupharazgi. Para mukukhumba kuŵa na chigaŵa chakupharazgako, mungapempha kwa muteŵeti wa vigaŵa.

³³ Kwali mulaŵiliri wa gulu ndiyo wapempha chigaŵa chakuti gulu lake lipharazgengeko, panji mupharazgi wapempha yekha, kweni waliyose wakwenera kuwoneseska kuti wapharazga pa nyumba yiliyose. Mulaŵiliri waliyose wa gulu panji mupharazgi uyo wapika chigaŵa, wakwenera kuwoneseska kuti chigaŵa chake chapharazgika mu myezi yinayi. Waliyose wakwenera kulondezga ulongozgi wakukhwaskana na vigaŵa vyakupharazgako. Para munthu wamara chigaŵa icho wakapika, wakwenera kuphalira muteŵeti wa vigaŵa . Kuyana na umo vinthu viliri, mulaŵiliri wa gulu panji mupharazgi wangasankha kutoraso chigaŵa chenechichi panji kupempha chinyake.

³⁴ Para mpingo ukuchita vinthu mwakukolerana, ukwaniskenge kupharazga chigaŵa chake chose. Kweniso vikovwira kuti ŵapharazgi ŵanandi ŵaleke kukakumana pa nyumba yimoza, chifukwa ŵanthu ŵangakhuŵara para vyaŵa nthena. Para tikuchita nthena tikulongora kuti tikughanaghanira ŵabali ŵithu na ŵanthu mu chigaŵa chithu.

KUPHARAZGIRA ŴANTHU ŴA VIYOWOYERO VYOSE

³⁵ Ŵanthu wose ŵakwenera kusambira za Yehova Chiuta, Mwana wake, na Ufumu wake. (Chivu. 14:6, 7) Tikukhumba kovwira ŵanthu ŵa chiyowoyero chilichose kuti ŵacheme pa zina la Yehova mwakuti ŵazakaponoskeke kweniso kuti ŵavware wunthu uphya. (Rom. 10:12, 13; Kol. 3:10, 11) Kasi pakuŵa masuzgo wuli para tikupharazga makani ghawemi mu chigaŵa icho muli ŵanthu ŵa viyowoyero vinandi? Kasi tingachita wuli na masuzgo agha kuti munthu waliyose wapulike uthenga wa Ufumu mu chiyowoyero chake?—Rom. 10:14.

³⁶ Mpingo uliwose ukupika chigaŵa cha chiyowoyero chake. Mu chigaŵa icho muli viyowoyero vinandi, mipingo yinandi yingapharazga mu chigaŵa ichi. Para vyaŵa nthena, ŵapharazgi ŵakwenera kupenja ŵanthu ŵa chiyowoyero cha mpingo wawo. Ŵakwenera kulondezgaso fundo iyi para ŵakuchemera ŵanthu ku Chikumbusko panji ku ungano. Kweni para ŵakupharazga uko kukusangika ŵanthu ŵanandi panji apo mpata wasangika, ŵangapharazgira waliyose na kugaŵira magazini gha chiyowoyero chilichose.

³⁷ Nyengo zinyake mipingo ya chiyowoyero chinyake yingatondeka kumalizga chigaŵa chawo icho chili kutali. Para vyaŵa nthena, ŵalaŵiliri ŵa uteŵeti ŵakwenera kudumbiskana umo ŵangapharazgira chigaŵa chose cha mipingo yawo. Ichi chovwirenge kuti munthu waliyose wapulike uthenga wa Ufumu kweniso kuti tileke kukakumana pa nyumba yimoza.—Zinth. 15:22.

³⁸ Kasi tikwenera kuchita wuli para tasanga munthu wa chiyowoyero chinyake? Tileke kumujumpha waka, kulindizga kuti munthu wa chiyowoyero chake ndiyo wazakamupharazgire. Ŵapharazgi ŵanyake para ŵamanya chiyowoyero chinyake icho ŵanthu ŵanandi ŵakuyowoya mu chigaŵa chawo, ŵakunozgekera kaupharazgi kafupi mu chiyowoyero icho. Tingamusambizga umo wangachitira kuti waŵerenge panji kukopera mabuku gha chiyowoyero chake pa webusayiti yithu ya jw.org/tum. panji kumulongora waka adiresi iyi.

³⁹ Para munthu uyo tamupharazgira wanweka, tikwenera kuyezga kumusangira munthu wakwenerera kuti wasambirenge nayo muchiyowoyero chake. Tingamuphaliraso mpingo wa chiyowoyero chake uwo uli kufupi na uko wakukhala. Para wakukhumba kuti munthu wa chiyowoyero chake wamusambizgenge, tingamulongosorera umo wangalembera fomu pa jw.org/tum. Ndipo ofesi yizamutuma mupharazgi, gulu, panji mpingo uwo ungamovwira.

⁴⁰ Tikwenera kulutilira kuluta kwa munthu uyu m’paka wazakatiphalire kuti munthu wa chiyowoyero chake wamba kwiza. Nyengo zinyake ofesi yingaphalira ŵalara kuti mupharazgi uyo wakuyowoya chiyowoyero cha munthu uyu wandasangike. Para vyaŵa nthena, mukwenera kuchita ivyo mungafiska kuti munthu uyu walutilire kunweka. Para vingachitika, tingasambira nayo Baibolo mu buku la mu chiyowoyero chake. Para tikumulongosolera makora vithuzithuzi na kumuphalira kuti waŵerengenge malemba agho ghali mu ndime vingamovwira kuti wamanyeko fundo zinyake za mu Baibolo. Nyengo zinyake mungapempha mubali wake uyo wakumanya chiyowoyero chinu na chake kuti wamung’anamuliraninge.

⁴¹ Kuti wamanye gulu la Chiuta, tikwenera kumuchemerako ku maungano, nangauli vinyake wamupulika yayi. Para malemba ghakuŵerengeka, tingamovwira kuti nayo wajurenge Baibolo la chiyowoyero chake para lilipo. Para wakuchezga na ŵabali na ŵadumbu ku maungano, wangakhozgeka ndipo wangamba kukura mwauzimu.

⁴² Tumagulu: Kagulu ka chiyowoyero chakuwaro kangapangika na ŵapharazgi ŵachoko waka awo ŵakupharazgira ŵanthu ŵa chiyowoyero chakuwaro, nangauli kagulu kangaŵa kuti kalije mulara panji muteŵeti wakovwira wakwenelera uyo wangalongozga maungano sabata yiliyose mu chiyowoyero chawo. Ofesi yingazomerezga mpingo kuti ulaŵilirenge kagulu ka chiyowoyero chakuwaro usange pali vyakukhumbikwa ivi:

1. (1) Usange kuli ŵanthu ŵanandiko awo ŵakuyowoya chiyowoyero chinyake padera pa chiyowoyero cha mpingo.

2. (2) Usange pali ŵapharazgi ŵachoko awo ŵakumanya panji ŵakukhumba kusambira chiyowoyero chakuwaro.

3. (3) Usange wupu wa ŵalara ngwakunozgeka kulongozga ntchito yakupharazga mu chiyowoyero chakuwaro.

Usange wupu wa ŵalara ngwakunozgeka kulaŵilira kagulu ka chiyowoyero chakuwaro, ŵalara ŵakwenera kudumbiskana na mulaŵiliri wa dera. Nyengo zinyake iyo wangaŵa kuti wakumanya mipingo yeneiyo yikughanaghana kupharazgira ŵanthu ŵa chiyowoyero chakuwaro. Iyo wangapeleka fundo zakovwira pakusankha mpingo uwo ungalaŵilira makora kagulu ka chiyowoyero chakuwaro. Para mpingo wasankhika, ŵalara ŵakwenera kulemba kalata ku Dipatimenti ya Uteŵeti yakupempha kuti mpingo wawo ulaŵilirenge kagulu ka chiyowoyero chakuwaro.

⁴³ Magulu: Ofesi yingazomerezga mpingo kuti ulaŵilirenge gulu la chiyowoyero chakuwaro usange pali vyakukhumbikwa ivi:

1. (1) Pali ŵanthu ŵanandi awo ŵakupulikizga uthenga wa mu Baibolo ndipo vikuwoneka kuti gulu likurenge.

2. (2) Pali ŵapharazgi ŵachoko waka awo ŵakumanya panji ŵakukhumba kusambira chiyowoyero chakuwaro icho ŵanthu ŵakuyowoya mu chigaŵa chawo.

3. (3) Pali mulara panji muteŵeti wakovwira wakwenelera uyo wangalongozga ungano umoza sabata yiliyose mu chiyowoyero chakuwaro panji kulongozga chigaŵa chimoza cha ungano sabata yiliyose, nga ni nkhani yachisanisani panyake Sambiro la Gongwe la Mulinda.

Usange vyakukhumbikwa ivi vilipo, wupu wa ŵalara ukwenera kulemba kalata yakulongosora fundo zose izi na kuyitumizga ku Dipatimenti ya Uteŵeti kupempha kuti mpingo wawo ngwakunozgeka kulaŵilira gulu la chiyowoyero chakuwaro. Usange mulara ndiyo walongozgenge gulu, wachemekenge “mulaŵiliri wa gulu,” kweni usange ni muteŵeti wakovwira, wachemekenge “muteŵeti wa gulu.”

⁴⁴ Para kagulu kapangika, wupu wa ŵalara wa mpingo uwo ukulaŵilira kagulu aka, ungasankha kuti kagulu aka kategherezgenge maungano ghanyake mu chiyowoyero cha mpingo uwo ukulaŵilira kagulu aka, kweniso kuti ŵakwenera kuchita ivi kalinga pa mwezi. Kagulu aka kangachitaso ungano wakunozgekera uteŵeti. Wose awo ŵali mu kagulu aka ŵali pasi pa wupu wa ŵalara ŵa mpingo uwo kakuwungana. Ŵalara ndiwo ŵakwenera kulongozga kagulu aka na kupeleka wovwiri uwo ukukhumbikwa. Para mulaŵiliri wa dera wiza pa mpingo uwo pali kagulu aka, wazamukumana nako na kulemba lipoti la umo kakwendera kweniso ivyo kakukhumbikwira ndipo wazamutumizga ku ofesi. Para pajumpha nyengo, kagulu aka kangaŵa mpingo. Yehova wangakondwa chomene usange wose ŵakulondezga ulongozgi wa gulu.—1 Kor. 1:10; 3:5, 6.

KUPHARAZGA NA ŴANYITHU

⁴⁵ Mkhristu waliyose wakwenera kupharazga makani ghawemi chifukwa wali kujipeleka kwa Yehova. Pali nthowa zinandi izo tingapharazgira, kweni taŵanandi tikutemwa kupharazga lumoza na ŵanyithu. (Luka 10:1) Lekani mipingo yikuŵa na ungano wakunozgekera uteŵeti kuumaliro wa sabata kweniso mukati mwa sabata. Nyengo ya holide nayo yikovwira kuti tipharazgenge lumoza na ŵanyithu. Komiti ya Uteŵeti ya Mpingo yikunozga ndondomeko ya upharazgi muhanya na namise. Kweni ŵakwenera kusankha malo na nyengo iyo njiwemi ku ŵapharazgi.

⁴⁶ Para tikupharazga lumoza na ŵanyithu, ‘tikukhwimiskana.’ (Rom. 1:12) Ndipo ŵapharazgi ŵaphya ŵangenda na ŵapharazgi ŵaluso kuti ŵasambireko vinandi. Ku malo uko nkhwakofya, vikuŵa makora kuti ŵapharazgi ŵaŵiri panji kujumpha apa ŵenderenge lumoza. Para nyengo zose mukupharazgira lumoza na ŵanyinu, mungawovwirana na kukhozgana. Nanga nipara mwendenge mwekha mu uteŵeti zuŵa ilo, mukwenera kuŵapo pa ungano wa uteŵeti chifukwa ungano uwu ukuŵa wakukhozga. Mungakhozgeka para mwamanya kuti ŵanyinu nawo ŵakupharazga mu chigaŵa icho. Para mpingo ukunozgekera uteŵeti zuŵa lililose, palije dango lakuti ŵapayiniya na ŵapharazgi ŵanyake ŵakwenera kuŵapo pa ungano uliwose. Kweni para ŵangafiska vingaŵa makora kuti mazuŵa ghanyake ŵalutenge ku ungano uwu.

⁴⁷ Mphanyi tose tachita nga ni Yesu na ŵapositole. Tikugomezga kuti Yehova watitumbikenge para tikulimbikira kupharazga makani ghawemi gha Ufumu iyo ni ntchito yakuzirwa chomene.—Luka 9:57-62.