Kupharazga Mwakukolerana mu Chigaŵa Icho Muli Viyowoyero Vinandi

Kanandi ŵanthu ŵakutegherezga makora uthenga wa Ufumu para ŵakuwupulika mu chiyowoyero chawo. Lekani panji pa Pentekoste mu 33 C.E.,Yehova wakanozga ndondomeko yakuti “Ŵayuda ŵakutemwa kusopa awo ŵakafuma ku mtundu uliwose pa charu chapasi” ŵapulike makani ghawemi ‘mu chiyowoyero chakonkhera,’ nangauli vikuwoneka kuti ŵanyake ŵakayowoyanga chiyowoyero icho ŵanandi ŵakayowoyanga nga ni Chihebere panji Chigiriki. (Mil 2:5, 8) Mazuŵa ghano mu vigaŵa ivyo ŵanthu ŵakuyowoya viyowoyero vinandi, mipingo iyo yikuchita maungano mu viyowoyero vyakupambana yose yingapharazga mu chigaŵa chimoza. Kasi ŵapharazgi ŵa mu mipingo iyi ŵangachita wuli kuti ŵakoleranenge mwakuti ŵapharazgire waliyose mu chigaŵa kweni kwambura kukumana pa nyumba yimoza na kuleka kukhuŵazga mweneko nyumba?

• 

  Kudumbiskana (Zi 15:22): Ŵalaŵiliri ŵa uteŵeti ŵa mipingo yose ŵakwenera kukumana pamoza na kudumbiskana nthowa za umo ŵangapharazgira makani ghawemi mu ndondomeko. Para chigaŵa ntchichoko, mipingo iyo yikupharazga mu viyowoyero vinyake yingapempha kuti mujumphirenge nyumba izo ŵanthu ŵakuyowoya chiyowoyero cha mpingo wawo. Ndipouli, para mipingo ya chiyowoyero chinyake yikutondeka kumalizga chigaŵa chawo chifukwa chakuti ntchikuru, nyengo zinyake ŵangamuphalirani kuti mupharazgenge waka pa nyumba yiliyose. Kweni para mwasanga munthu wakunweka mukwenera kuŵamanyiska. (od 93 ¶37) Nyengo zinyake ŵangapempha mpingo winu kuti muŵawovwire kusanga ŵanthu awo ŵakuyowoya chiyowoyero cha mpingo wawo na kulemba maadiresi ghawo na kughatumizga. (km 7/12 5, bokosi) Kumbukani kuti nyengo zinyake mu nyumba yimoza mungakhala ŵanthu ŵakuyowoya viyowoyero vyakupambana. Ndondomeko ya kupharazgira mu chigaŵa yikwenera kukolerana na malango gha mu charu icho mukukhala.

• 

  Kukolerana (Efe 4:16): Londezgani ulongozgi uliwose uwo mulaŵiliri winu wa uteŵeti wamupani. Kasi mukusambira Baibolo na munthu uyo wakuyowoya chiyowoyero icho ntcha mpingo winu yayi? Msambiri wangakura luŵiro mwauzimu usange mwamupeleka ku mpingo wapafupi panji gulu ilo likuyowoya chiyowoyero chake kuti ndiwo ŵasambirenge nayo Baibolo.

• 

  Nozgekerani (Zi 15:28; 16:1): Para mu chigaŵa chinu mwiza munthu uyo wakuyowoya chiyowoyero chinyake, yezgayezgani kumupharazgira makani ghawemi. Munganozgekera na kufufuza viyowoyero ivyo ŵanthu ŵakuyowoya mu chigaŵa chinu na kupangirathu dawunilodi mabuku, Mabaibolo na mavidiyo mu foni yinu. Mungagwiliskiraso ntchito JW Language app kuti musambire umo ŵanthu ŵakutawuzgirana mu viyowoyero vinyake.