Ivyo Vingatovwira Kuti Tiŵe Ŵaluso mu Uteŵeti—Kupharazgira Munthu Uyo Wakuyowoya Chiyowoyero Chinyake

Chifukwa Wuli Nkhwakuzirwa? Yehova wakukhumba kuti “mu mtundu uliwose” ŵanthu ŵamanye unenesko. (Mil. 10:34, 35) Ntheura, Yesu wakati makani ghawemi ghazamupharazgika ‘mu charu chose’ ndiposo “ku mitundu yose.” (Mat. 24:14) Zekariya wakachima kuti ŵanthu “ŵa mafuko gha kayowoyero kose” ŵazamuzomera unenesko. (Zek. 8:23) Kuyana na mboniwoni iyo mpositole Yohane wakawona, awo ŵazamupona pa suzgo yikuru ŵazamufuma “mu mitundu yose na mafuko na ŵanthu na malulimi.” (Uvu. 7:9, 13, 14) Kuyana na fundo izi, para takumana na munthu uyo wakuyowoya chiyowoyero chinyake mu chigaŵa chithu, tikwenera kumupharazgira.

Umo Tingachitira:

Nozgekerani. Yeghani kabuku kakuti Makani Ghawemi ku Ŵanthu ŵa Mitundu Yose para mukuluta ku upharazgi. Umanyani makora ulongozgi uwo uli pa mutu wakuti “Umo Mungawovwilira Awo Ciyowoyero Cawo Mukuleka Kucimanya,” pa peji lachiŵiri mu kabuku aka. Manyani viyowoyero ivyo ŵanthu ŵakuyowoya mu chigaŵa chinu, na kukopera mavidiyo panji mabuku gha viyowoyero ivyo pa jw.org/tum na foni yinu, tabuleti panji vinyake. Sambirani mazgu ghachoko waka gha viyowoyero ivyo pa Pulogiramu Yakusambizga Chiyowoyero ya Ŵakaboni ŵa Yehova. Usange mipingo ya viyowoyero vyakupambanapambana yikupharazga mu chigaŵa chimoza, mukwenera kuyegha mabuku gha chiyowoyero chinu pera para mukupharazga ku nyumba na nyumba. Kweni para mukupharazga mu misewu, mu misika na kunyake uko kukusangika ŵanthu ŵanandi, mungayegha mabuku gha viyowoyero vyose.
Para mwakumana na munthu uyo wakuyowoya chiyowoyero chinyake, chitani ivyo mungafiska kuti mumuphalireko ‘vinthu vikuru vya Chiuta’ mu chiyowoyero chake. (Mil. 2:11) Muphalirani kuti wajure pa jw.org kuti wasambire vinandi mu chiyowoyero chake. Para ngwakunweka, lembani fomu yakuti Weleraniko kwa Munthu Uyu (S-43) na kupeleka kwa mulembi. Lutilirani kumwendera munthu uyu m’paka mupharazgi wa chiyowoyero chake wasangike.

Yezgani Sachizgo Ili Mwezi Uno:

Pa Nyengo Yakusopera ya Mbumba, yezgelerani umo mungapharazgira kwa munthu uyo wakuyowoya chiyowoyero chinyake.