Kasi Kuŵa na Cigaŵa Cinu Cakupharazgako Kuli na Uwemi Wuli?
1. Cifukwa wuli mukwenera kuŵa na cigaŵa cinu cakupharazgako?
1 Mu mipingo iyo yili na vigaŵa vikuru, munthu wangapempha kuti wapike cigaŵa cakuti ŵapharazgengeko pafupi na uko wakukhala. Cifukwa wuli mukwenera kuŵa na cigaŵa cinu cakupharazgako? Buku la Ŵakunozgeka pa peji 103 likuti: “Kuŵa na cigaŵa cakupharazgako pafupi kumovwiraninge kuti mugwiliskire nchito makora nyengo yinu mu uteŵeti. Ndiposo, nyengo zinyake mungacema mupharazgi munyake kuti wapharazge na imwe mu cigaŵa cinu.”
2. Kasi mungacita wuli kuti mukhozgere upharazgi wa pa gulu para muli na cigaŵa cinu cakupharazgako?
2 Kukhozgera Upharazgi wa pa Gulu: Usange muli na cigaŵa cakupharazgako kufupi na uko mukugwira nchito, mungapharazga pa nyengo yakupumura muhanya panji para mukuwera namise. Nyengo zinyake mungapharazga na munyinu uyo wakugwira nchito kufupi na imwe. Kweniso para muli na cigaŵa cakupharazgako kufupi na uko mukukhala, cingaŵa cipusu kuti imwe na mbumba yinu mupharazgenge namise. Usange muŵengepo yayi pa ungano wakunozgekera uteŵeti, cingaŵa ciwemi kulomba pambere mundambe kupharazga. (Fil. 4:6) Ndipouli, nchiwemi yayi kuti nyengo zose mulutenge pamwekha ku cigaŵa cinu nakuleka kukhozgera upharazgi wa pa gulu. Comene pa Cisulo na pa Sabata apo ŵabali na ŵadumbu ŵakukumana kuti ŵanozgekere uteŵeti, mukwenera kuŵapo kuti mukhozgere uteŵeti wa pa gulu.
3. Kasi kuŵa na cigaŵa cakupharazgako kuli na uwemi wuli?
3 Uwemi Wake: Usange muli na cigaŵa cakupharazgako, mungaluta kukapharazga nyengo yiliyose iyo mwakhumba. Mungapharazga kwa nyengo yitali na kucepeska nyengo yakwendera. Ici cingamovwirani kuti mucite upayiniya wakanyengo panji wanyengozose. Cikuŵa cipusu kuwelerako kwa ŵakunweka na kusambira nawo Baibolo cifukwa ŵakukhala pafupi. Ŵanandi ŵawona kuti kuŵa na cigaŵa cakupharazgako kukovwira kuti timanyane na awo tikuŵapharazgira kweniso kuti ŵambe kutigomezga, comenecomene para tapharazgako kwa nyengo yitali. Kasi para namwe mungaŵa na cigaŵa cinu cakupharazgako, cingamovwirani kuti mupharazgenge mwakukwana na mbumba yinu?—2 Tim. 4:5.