Penjani Dankha Pambere Mundayambe Kupharazga
1. Mu cigaŵa ico muli viyowoyero vinandi, cifukwa wuli mpingo uliwose ukupharazgira ŵanthu ŵa ciyowoyero cawo?
1 Ŵasambiri ŵa Yesu ŵati ŵapokera mzimu utuŵa pa Pentekoste 33 C.E., ŵakamba “kuyowoya na malulimi ghakupambanapambana,” ku awo ŵakiza kufuma ku vyaru vinyake. (Mil. 2:4) Lekani ŵanthu 3,000 ŵakabapatizika. Ŵanthu ŵanandi awo ŵakaŵapo ŵakwenera kuti ŵakamanyanga Cigiriki panji Cihebere. Kweni Yehova wakasankha kuti uthenga upharazgike mu ciyowoyero cawo. Cifukwa cimoza ico Ciuta wakacitira nthena cikaŵa cakuti kanandi ŵanthu ŵakupulikiska para ŵapulika uthenga mu ciyowoyero cawo. Lero napo, para mu cigaŵa muli viyowoyero vinandi, mpingo uliwose ukupharazgira ŵanthu ŵa ciyowoyero cawo.—Wonani buku la Ŵakunozgeka, peji 107, ndime 1-2. Magulu gha viyowoyero vinyake ghakupika cigaŵa cakupharazgako yayi. Ŵakupharazga mu cigaŵa ca mpingo uwo ukovwira gulu ilo kweniso mu vigaŵa vya mipingo yinyake ya kufupi.
2. (a) Mphawuli apo cingaŵa cakwenelera kupenja? (b) Kasi mipingo yingawovwirana wuli? (c) Kasi tingacitaci usange tasanga munthu wakunweka wa ciyowoyero cinyake?
2 Usange mukukhala uko ŵanthu ŵakuyowoya ciyowoyero cimoza, mbwenu mungapharazga ku nyumba na nyumba. Kweni ndimo mungacitira yayi usange uko mukukhala kuli viyowoyero vinandi. Mipingo ya viyowoyero vinyake nayo yingaŵa kuti yikupharazga mu cigaŵa cenecico. Ŵabali ŵa mipingo yinyake ŵangatimanyiska para ŵasanga ŵanthu ŵa ciyowoyero cithu, kweni mulimo wakupenja ŵanthu aŵa ngwithu.(Wonani bokosi lakuti “Wovwiranani.”) Ipo mukwenera kupenja. Fumbilirani kuti musange awo ŵakuyowoya ciyowoyero cinu. Kasi mungapenja wuli ŵanthu awo ŵakuyowoya ciyowoyero cinu?
3. Kasi nyengo iyo mungamalira pakupenja ŵanthu ŵa ciyowoyero cinu yikuthemba pa vici?
3 Kunozga Ndondomeko ya Kupenja: Nyengo iyo mungamalira pakupenja ŵanthu awo ŵakuyowoya ciyowoyero cinu yikuthemba pa umo vinthu viliri mu cigaŵa cinu. Vikuthemba pa unandi wa ŵanthu awo ŵakuyowoya ciyowoyero cinu, na unandi wa ŵapharazgi mu mpingo winu. Uko kuli ŵanthu ŵacoko mungapenja nyengo yicoko waka, kweni uko kuli ŵanthu ŵanandi mungapenja kwa nyengo yitali. Ndipouli, nchakukhumbikwa kuŵa na ndondomeko pakupenja mwakuti ŵanthu ŵanandi ŵaŵe na mwaŵi wakucema pa zina la Yehova.—Rom. 10:13, 14.
4. (a) Kasi tingacita wuli mulimo wakupenja ŵanthu ŵa ciyowoyero cithu? (b) Kasi ni nthowa wuli zinyake za kusangira awo ŵakuyowoya ciyowoyero cithu?
4 Kuti tileke kupenja uko ŵanyithu ŵapenjako kale, ŵalara, comenecomene mulaŵiliri wa uteŵeti, ŵakwenera kunozga ndondomeko ya umo ŵangacitira pakupenja. (1 Kor. 9:26) Mu magulu gha viyowoyero vinyake, wupu wa ŵalara wa mpingo uwo ukovwira gulu ilo, ukwenera kusora mubali kuti walongozge pa mulimo uwu. Wakwenera kuŵa mulara panji muteŵeti wakovwira. Mipingo yinandi yikwamba dankha kumanya viwongo vya ŵanthu mu cigaŵa cawo. Nyengo zinyake ŵakupenja viwongo ivi mu buku la manambara gha foni panji pa intaneti. Pamanyuma ŵakwimba foni panji kuluta uko munthu wakukhala. Para ŵasanga kuti ngwaciyowoyero cawo, ŵakulemba adiresi yake. Nyengo zinyake wupu wa ŵalara wa mpingo uwo ukovwira gulu ilo, unganozga kuti mpingo wose ukawovwire pakupenja.—Wonani bokosi lakuti “Kasi Mungaŵasanga Wuli Ŵanthu ŵa Ciyowoyero Cinu.”
5. (a) Kasi ni vici vinyake ivyo ŵapharazgi ŵangacita pakupenja? (b) Kasi tingayowoyaci para tikupenja ŵanthu ŵa ciyowoyero cinyake?
5 Nyengo zose tikwenera kuŵa na cilato para tikupenja ŵanthu ŵa ciyowoyero cithu. Pakuti mulimo wakupenja nchigaŵa ca uteŵeti, tikwenera kuvwara makora. Ŵanandi ŵakuwona kuti nchakovwira kunozgekera ivyo ŵamuyowoya na kuyowoya ciyowoyero ico pakupenja. Ici cikuŵawovwira kuti ŵacimanye makora ciyowoyero kweniso kuti ŵayowoyenge mwakuthukutera. Tingalemba nyengo iyo tamalira pakupenja ŵanthu, kweni pakunozga mapu yayi nesi para tikulemba mazina gha ŵanthu. Para tasanga munthu uyo wakuyowoya ciyowoyero ico, tikwenera kumupharazgira na kumanyiska mulaŵiliri wa uteŵeti panji munthu munyake uyo wasankhika na iyo, mwakuti wakalembe zina lake. Mukwenera kucita nthena kwali munthu wazomera uthenga panji yayi. Nangauli mulimo wakupenja ngwakuzirwa, kweni tikwenera kucitaso nthowa zinyake zakupharazgira.—Wonani Bokosi lakuti “Ivyo Mungayowoya Pakupenja.”
6. Cifukwa wuli nchipusu yayi kupenja awo ŵali na suzgo ya kupulika?
6 Kupenja Awo Ŵali na Suzgo ya Kupulika: Para mukupenja awo ŵali na suzgo ya kupulika pakuŵa masuzgo ghanyake. Ntheura, tikwenera kufwilirapo. Munthu uyo wali na suzgo ya kupulika tingamumanya cifukwa ca ciwongo, kawonekero, nesi umo wavwalira yayi. Kweniso, ŵabali na ŵabwezi ŵake ŵangatibisa para tikuŵafumba. Pasi apa pali masacizgo agho ghangatovwira pakupenja ŵanthu ŵaciyowoyero cinyake.
7. (a) kasi mungacita wuli pakupenja ŵanthu awo ŵali na suzgo ya kupulika? (b) Tingacita wuli kuti ŵanthu ŵaleke kutikayikira?
7 Ŵapharazgi ŵa mipingo na magulu gha ciyowoyero ca mawoko ŵakukwaniska kupenja ŵanthu. Panyake uyo mukufumba wakumanya munthu munyake ku nchito, ku sukulu, panji mzengezgani uyo wali suzgo ya kupulika. Nyengo zinyake wali kuwona ciphambano mu msewu ico cikulongora uko kuli ŵana awo ŵali suzgo ya kupulika. Panji iyo wali na mubali wake uyo wali na suzgo ya kupulika. Manyani kuti nyengo zinyake ŵanji ŵangamukayikirani. Kweni pali ivyo imwe mungacita kuti munthu waleke kumukayikirani. Mungayowoya nayo mwaubwezi, mwakudumura, ndiposo mwanchindi. Ŵanji ŵakulongora DVD ya ciyowoyero ca mawoko para ŵakufumba munthu kuti waŵaphalire usange ŵakumanya uyo wali suzgo ya kupulika. Pamanyuma, ŵakumuphalira kuti ŵakhumbanga kudumbiskana nayo ivyo Baibolo likulayizga. Para munthu wakukhumba yayi kumuphalirani vinandi, panyake wangazomera kuti muleke kapepara kakucemera ŵanthu ku maungano kuti wapeleke kwa mubali panji mubwezi wake uyo wali na suzgo ya kupulika.
8. Kasi mpingo wapafupi ungawovwira wuli mpingo wa ciyowoyero ca mawoko?
8 Mpingo wa ciyowoyero ca mawoko ungapempha mpingo wapafupi kamoza panji kaŵiri pa cilimika kuti uŵawovwire kupenja awo ŵali na suzgo ya kupulika mu cigaŵa cawo. Uyo walongozgenge ungano wakunozgekera uteŵeti mu mpingo wa ciyowoyero ca mawoko, wakwenera kulongosora umo ŵabali ŵangacitira mulimo uwu na kuyezgelera. Gulu lililose likwenera kuŵa na mupharazgi wakufuma mu mpingo wa ciyowoyero ca mawoko.
9. Kasi mungacita wuli pakupenja ŵanthu awo ŵali na suzgo ya kupulika para mwaluta uko ŵakukumana?
9 Kweniso tingakapenja uko ŵanthu awo ŵali na suzgo yakupulika ŵakukumana. Kwali nkhu sukulu, uko ŵakuseŵelera, panji ku maofesi agho ghakovwira ŵanthu ŵanthena. Ŵapharazgi ŵakwenera kuvwara makora. Cingaŵa ciwemi kudumbiskana na munthu yumoza panji ŵaŵiri m’malo mwa kukumana na gulu lose nyengo yimoza. Usange vyenda makora, mungapana adiresi na manambara gha foni.
10. Kasi ku malo gha nchito na bizinesi, tingapenja wuli ŵanthu awo ŵali na suzgo ya kupulika?
10 Cinthu cinyake ico mungacita nkhujambura mapu ghakulongora uko kuli maofesi na malo ghanyake ghakucitirako bizinesi. Mapu ghanyake ghangalongora malo ghakumweskera mafuta galimoto. Mapu ghanyake ghangalongora uko kuli maresitiranti, mahotelo, na mabizinesi ghanyake. Usange pa mapu ghaliyose pali maofesi na mabizinesi ghakuyana, ŵapharazgi ŵangagwiliskira nchito nthowa yakuyana waka pakufumba. Ici cingawovwira kuti ŵazgoŵere na kuŵa ŵaluso. Ŵalendo ŵanyake awo ŵakwiza ku mahotelo ŵakuŵa na suzgo ya kupulika. Ntheura, tingamulongosolera uyo wakupokelera ŵalendo za mulimo withu. Pamanyuma tingamupa DVD panji tumapepara twakucemera ŵanthu ku maungano kuti uyo wakupokelera ŵalendo wapelekenge ku ŵalendo awo ŵali na suzgo iyi. Ku malo ghanyake gha nchito, tingafumba usange pa ofesi yawo pali ŵanthu awo ŵali na suzgo iyi. Usange mu cigaŵa cinu muli sukulu ya ŵanthu awo ŵali na suzgo iyi, mungapeleka DVD kuti ŵaŵike mu layibulare.
11. Cifukwa wuli mulimo wakupenja ŵanthu ngwakuzirwa comene?
11 Mulimo Wakuzirwa: Kupenja ŵanthu awo ŵakuyowoya ciyowoyero cithu ni mulimo ukuru ndipo ungaŵa wakuvuska. Kweniso, ŵanthu mu cigaŵa ŵakusamukasamuka. Ici cikupangiska kuti ciŵe cakusuzga kumanya ciŵelengero ca ŵanthu ŵa ciyowoyero cinu awo ŵali mu cigaŵa cinu. Nangauli vili nthena, mulimo wakupenja ŵanthu nchigaŵa cakuzirwa comene ca uteŵeti withu. Yehova, uyo wali kutipa mulimo wakupharazga, wakutemwera yayi. (Mil. 10:34) “Khumbo lake ndakuti ŵanthu ŵa mitundu yose ŵafike pa kumanya makora unenesko na kuponoskeka.” (1 Tim. 2:3, 4) Ipo, tiyeni tikolerane na Yehova na ŵapharazgi ŵanyithu pakupenja ŵanthu ŵa viyowoyero vyose awo ŵali na “mtima uwemi.”—Luka 8:15.
[Bokosi pa peji 5]
Wovwiranani
Usange ŵabali ŵa mpingo panji gulu la ciyowoyero cinyake ŵakukhumba wovwiri kuti ŵasange ŵanthu ŵa ciyowoyero cawo, mulaŵiliri wa uteŵeti wakumane na ŵalara ŵa mipingo ya pafupi ya viyowoyero vinyake. Cingaŵa ciwemi kupempha mipingo yapafupi, kweniso iyo mu cigaŵa cawo muli ŵanthu ŵanandi ŵa ciyowoyero ico. Ŵalara ŵa mipingo iyo yapempheka ŵakwenera kuphalira ŵapharazgi kuti para ŵasanga munthu wa ciyowoyero ico, ŵakwenera kulemba adiresi yake na kukapeleka kwa mulaŵiliri wa uteŵeti mwakuti wakapeleke ku mpingo panji gulu ilo likapempha wovwiri. Ŵalaŵiliri wa uteŵeti ŵa mipingo iyo yikukhwaskika ŵanozge ndondomeko yakuti ŵapharazge cigaŵa cose ico muli viyowoyero vinandi, na kulongozga ŵakunweka ku mpingo panji gulu lakwenelera.
Usange mupharazgi wasanga munthu wa ciyowoyero cinyake uyo ngwakunweka (panji uyo wali na suzgo ya kupulika), wakwenera kulemba mwaluŵiro fomu ya Weleraniko kwa Munthu Uyu (S-43) na kukapeleka kwa mulembi. Ici ciwovwirenge kuti wawovwirike mwaluŵiro.—Wonani km 5/11 peji 3.
[Bokosi pa peji 6]
Kasi Mungaŵasanga Wuli Ŵanthu ŵa Ciyowoyero Cinu
• Mungafumba awo mukusambira nawo Baibolo, ŵabali ŵawo, awo mukugwira nawo nchito, na ŵanji.
• Wonani mu buku la manambara gha foni kuti muwonemo viwongo ivyo vingaŵa vya ciyowoyero cinu. Buku ili mungalisanga pa intaneti panji ku kamupani ya telefoni.
• Fumbani mwavinjeru ku malayibulare, maofesi gha boma, makoleji, panji kulikose uko ŵakovwira ŵanthu.
• Penjani vimanyisko mu manyuzipepara vyakukhwaskana na vyakucitika ivyo ŵanthu ŵa viyowoyero vinyake ŵanozga.
• Mungaluta ku maofesi agho ghakovwira ŵanthu ŵa viyowoyero vinyake.
• Mungapempha ku ofesi yiliyose, ku yunivesite, pa siteji ya basi, panji kulikose uko kukusangika ŵanthu ŵanandi awo ŵakuyowoya ciyowoyero cinu kuti muŵe na thebulu ilo mungaŵikangapo mabuku ghithu.
• Para boma likuzomerezga, mungaŵa na pulogiramu ya pa kompyuta iyo yingamovwirani kupenja malo agho kukusangika ŵanthu ŵanandi.
[Bokosi pa peji 7]
Ivyo Mungayowoya Pakupenja
Kuti ŵanthu ŵaleke kumukayikirani, yowoyani mwaubwezi ndiposo mwakufwatuka. Cinyake ico cikovwira, nkhulongora mabuku gha ciyowoyero ca ŵanthu awo mukupenja.
Para mwatawuzgana, mungayowoya kuti: “Tikupenja ŵanthu awo ŵakuyowoya ․․․․․ kuti tidumbiskane nawo uthenga wa mu Baibolo. Kasi mukumanyapo waliyose uyo wakumanya ciyowoyero ici?”
Para mukupenja awo ŵali na suzgo ya kupulika mungayowoya kuti: “Monire. Nati nimulongorani DVD iyi? [Mungamulongora ndime yimoza ya mu burosha la Mungaŵa Bwezi la Ciuta pa DVD.] Ici nchiyowoyero ca mawoko ca kuno ku Malawi. Paliso mavidiyo ghanyake agho ghali kunozgeka kuti ghawovwire mwauzimu awo ŵali na suzgo ya kupulika. Kasi mukumanyapo waliyose uyo wali na suzgo iyi?” Usange uyo mukufumba vikumusuzga kukumbuka uyo wali na suzgo iyi, cingaŵa ciwemi kuzunura malo agho panji wakaŵawona. Mungazunura uko wakugwira nchito, ku sukulu, panji uko wakukhala.