Muŵenge Ŵakunweka na Ŵakhristu Ŵanyinu Awo Mbambuwu

MAZUŴA ghano, ŵanthu ŵa Ciuta ni mbumba yikuru comene yauzimu ya ŵabali na ŵadumbu. Mbumba iyi para tayikonkhoska tiwonenge kuti yikwambira pa ŵanalume na ŵanakazi ŵa mu nyengo zakale. Ŵanyake mwa ŵanthu aŵa ni Samuyeli, Davide, Samusoni, Rahabi, Mozesi, Abrahamu, Sara, Nowa, na Abelu. Ŵanyake mwa ŵanthu ŵa Yehova mbambuwu. Mwaciyelezgero, ku Mongolia ŵanthu ŵaŵiri awo ŵakadankha kusambira unenesko na kuŵa Ŵakaboni ŵa Yehova ŵakaŵa ŵambuwu. Kweniso cifukwa ca kugomezgeka kwa ŵabali ŵithu ŵambuwu ku Russia, tili kuwina mulandu mu Khoti Lakuwona vya Wanangwa wa Ŵanthu ku Europe (European Court of Human Rights.)

Mazuŵa ghano, “muzga wakugomezgeka na wakucenjera” wakutipa mabuku agho ghali pa ma DVD mu ciyowoyero ca mawoko, ndipo wanozga maungano gha mpingo, gha dera na gha cigaŵa mu ciyowoyero ici. (Mat. 24:45) Mabuku na maungano agha ghakuŵawovwira comene ŵambuwu.a Kasi muli kulangurukapo umo vikuŵira kuti wambuwu wasambire za Ciuta waunenesko na kukura mwauzimu kwambura vinthu ivi? Kasi muli kughanaghanirapo umo mungawovwilira ŵambuwu mu cikaya cinu?

Apo Kukaŵavya Vinthu Vyakuŵawovwira Pakusambira

Kasi muli kufumbapo ŵabali na ŵadumbu ŵacekuru awo mbambuwu umo ŵakamanyira Ciuta? Ŵangamuphalirani umo ŵakajipulikira ŵati ŵamanya kuti Ciuta wali na zina, umo umoyo wawo uli kusinthira cifukwa ca kumanya zina la Ciuta na umo fundo iyi yikaŵakhozgera kwa vilimika vinandi pambere kundize mavidiyo panji ma DVD ghakuŵawovwira kumanya vinthu vinandi vyauzimu. Ŵangamulongosolerani umo vikaŵiranga pa maungano Ghacikhristu kwambura munthu wakung’anamura kuya mu ciyowoyero ca mawoko. Munthu wakakhalanga pafupi nawo na kulemba pa pepara kuti waŵawovwire kumanya ivyo vikayowoyekanga. Ndimo mbali munyake wakasambilira unenesko kwa vilimika 7.

Ŵambuwu awo mbacekuru ŵakukumbuka makora ivyo vikacitikanga para ŵaluta kukapharazgira ŵanthu awo ŵalije suzgo la kuyowoya. Ku woko linyake ŵakakoleranga kapepara kakulembeka uthenga uwo ŵakapharazganga, ndipo ku linyake, Gongwe la Mulinda na Galamukani! Cikaŵanga cakusuzga comene kuti ŵambuwu ŵekhaŵekha ŵasambizgane uthenga wa mu Baibolo wakucita kulemba, weneuwo wose ŵakaupulikiskanga yayi. Ŵambuwu awo mbacekuru ŵakwenera kuti ŵakukumbuka umo ŵakagongoweranga cifukwa ca kuwona kuti ŵanthu ŵakaŵapulikiskanga yayi. Ŵakumanyaso umo vikuŵira para wamunthu ukutemwa comene Yehova, kweni ukutondeka kucita mwakuyana na umo ukumutemwera, cifukwa ca kughanaghana kuti undapulikiske makora nkhani yinyake.

Nangauli pakaŵa masuzgo agha, ŵabali na ŵadumbu ŵithu ŵambuwu ŵalutilira kugomezgeka. (Job 2:3) Ŵalutilira kulindilira Yehova. (Sal. 37:7) Nakuti panyengo yasono wakuŵatumbika comene, kuluska umo ŵeneko ŵakaghanaghaniranga.

Pulikani ivyo wakacita mbali munyake wambuwu, uyo wali na mwanakazi na ŵana. Pambere mabuku ghandambe kusangika mu ciyowoyero ca mawoko pa ma vidiyo, nyengo zose wakalongozganga pa sambiro la Baibolo la mbumba. Mwana wake mwanalume wakati: “Nyengo zose cikaŵanga cakusuzga kuti ŵadada ŵalongozge pa sambiro, cifukwa vyose ivyo ŵakasambizganga vikaŵa mu mabuku. Kanandi ŵakapulikiskanga yayi ivyo ŵaŵazga. Kweniso cifukwa ca ivyo ise taŵana tikacitanga, cikaŵa cakusuzga kuti ŵadada ŵalongozge makora sambiro. Para ŵandalongosore makora ivyo tikasambiranga, tikacimbiliranga kuŵaphalira kuti ŵabudiska. Nangauli pakaŵa masuzgo agha, ŵakalutilira kulongozga pa sambiro. Nyengo zinyake soni zikaŵakoranga cifukwa ca kuleka kupulikiska Cingelezi, kweni ŵakawonanga kuti cikaŵa cakuzirwa comene kusambira za Yehova.”

Munyake ni Richard, mbali wa vilimika 70, uyo wakukhala ku Brooklyn, mu msumba wa New York, U.S.A. Ngwambuwu ndiposo ngwacibulumutira. Ŵanthu ŵakumumanya kuti ni mbali uyo wakukhala bweka yayi ku maungano. Kuti wakafike ku maungano wakukwera sitima, ndipo wakupenda malo agho sitima yikwimilira mwakuti wamanye kuti wafika panji yayi. Nyengo yinyake kukalokwanga ciwuvi cakukhoma, mwakuti ŵabali ŵakasintha zuŵa lakucitira maungano. Ŵabali na ŵadumbu wose ŵakaphalirika kuti zuŵa la maungano lasintha, kweni Richard wakaphalirika yayi. Ŵabali ŵati ŵakumbuka kuti ŵakaluwa kumumanyiska Richard, ŵakamupenja kweni ŵakasanga kuti iyo wafika kale ku Nyumba ya Ufumu, wakulindilira mwakunweka kuti ŵabali ŵajure vijaro vya Nyumba ya Ufumu. Ŵabali ŵati ŵamufumba cifukwa ico wakendera na ciwuvi wakazgora kuti: “Nkhutemwa Yehova.”

Kasi Mungacita Wuli?

Kasi muli na ŵambuwu mu cigaŵa cinu? Kasi mungasambira ciyowoyero ca mawoko mwakuti muyowoyeskanenge nawo? Kanandi ŵambuwu ŵakuŵa ŵalusungu ndiposo ŵakuzika para ŵakusambizga ŵanji ciyowoyero cawo. Nyengo zinyake mungakumana nawo mu uteŵeti wa m’munda panji ku malo ghanyake. Kasi mungacita wuli? Yezgani kuyowoyeskana nawo. Yowoyani nawo mwa kucita vimanyikwiro, kulemba pa pepara panji pasi, kuŵalongora vithuzi, panji kuyezga nthowa zose. Nanga wangalongora kuti ngwambura kunweka na unenesko, phalirani Kaboni wa Yehova uyo wakumanya ciyowoyero ca mawoko kuti wazakakumane nayo. Munthu wambuwu wakukondwa na uthenga withu para ukuyowoyeka mu ciyowoyero ca mawoko.

Mutepanji mukusambira ciyowoyero ca mawoko ndipo mukuwungana mu mpingo wa ciyowoyero ici. Kasi mungacita wuli kuti mucimanye makora? Nangauli ŵanyake ŵangaŵa kuti mbambuwu yayi mu mpingo, cingaŵa ciwemi kuleka kuyowoya na mulomo. Para mungacita nthena vimovwiraninge kuti mughanaghanenge mu ciyowoyero ca mawoko. Nyengo zinyake mungatondeka kujikora na kwamba kuyowoya na mulomo. Ndipouli, para mukusambira ciyowoyero cilicose, mukwenera kulimbikira comene kuti mucimanye.

Para mukuyezgayezga kuyowoya na vimanyikwiro, mukulongora kuti mukutemwa ndiposo kucindika ŵabali na ŵadumbu ŵithu awo mbambuwu. Zuŵa lililose ŵambuwu ŵakwenera kuti ŵakukwenyelera cifukwa ca kuleka kupulikiska ivyo ŵanthu ŵakuyowoya ku nchito panji ku sukulu. Mbali munyake uyo ngwambuwu wakati: “Nyengo yose nkhuŵa pakati pa ŵanthu awo ŵakuyowoya na mulomo. Kanandi nkhuŵa na phukwa cifukwa ca kuwona kuti ŵakunipatura, ndipo nkhutopoka moyo. Nkhutondeka na umo ningalongosolera umo nkhujipulikira nyengo zinyake.” Para tili pa maungano tovwirenge ŵabali na ŵadumbu ŵithu awo mbambuwu kuti ŵaŵenge ŵakukondwa apo ŵakupokera cakurya cauzimu na kucezga.—Yoh. 13:34, 35.

Tingaŵaluwanga yayi ŵambuwu awo ŵakuwungana mu mipingo ya ŵanthu awo ŵakuyowoya. Ivyo vikuyowoyeka pa maungano ŵakucita kuŵang’anamulira. Kuti ŵawonenge makora vimanyikwiro vya ciyowoyero cawo, ŵabali na ŵadumbu aŵa ŵakukhala kunthazi. Para ŵakhala kunthazi ŵakuwona makora uyo wakuyowoya nkhani kweniso uyo wakung’anamura. Vyawoneka kuti para ŵabali na ŵadumbu aŵa ŵakhala kunthazi, mpingo ukuzgoŵera ndipo ukutimbanizgika yayi. Ndimo vikuŵiraso pa maungano gha dera na gha cigaŵa agho pakuŵa ŵambuwu. Ŵabali na ŵadumbu awo ŵakulimbikira kung’anamulira ŵambuwu ŵakwenera kuwongeka comene, cifukwa ŵakovwira kuti ŵabali aŵa ŵapulikiskenge.

Panji mu mpingo winu muli gulu la ŵambuwu awo ŵakucita kuŵang’anamulira maungano. Mungalongora wuli kuti mukuŵatemwa? Ŵacemerani ku nyumba yinu. Usange mungafiska, sambiraniko vimanyikwiro vinyake vya ciyowoyero ici. Mungawopanga yayi kuti mungatondeka kuyowoyeskana nawo. Nthowa yakuyowoyera nawo mwamuyisanga ndipo muzamuluwa yayi ivyo vizamucitika cifukwa ca kuŵalongora citemwa. (1 Yoh. 4:8) Tingasambirako vinandi ku Ŵakhristu ŵanyithu awo mbambuwu. Ŵakutemwa comene kucezga na ŵanthu, ŵakughanaghana comene ndipo ŵakuŵa na nkhani zakukondweska. Mbali munyake uyo ŵapapi ŵake mbambuwu wakati: “Umoyo wane wose nakhala na ŵambuwu, ndipo ŵanicitira vinandi vyakuti ningaŵawezgera yayi. Tingasambira vinandi comene ku ŵabali na ŵadumbu aŵa.”

Yehova wakuŵatemwa comene ŵasopi ŵake ŵakugomezgeka kusazgapo ŵambuwu. Cifukwa ca cipulikano cawo na kuzizipizga, gulu la Yehova ndisambazi. Mphanyi tose talutilira kunweka na Ŵakhristu ŵanyithu awo mbambuwu.

[Mazgu ghamusi]

[Cithuzithuzi pa peji 31]

Wambuwu wakukondwa na uthenga wa Ufumu para ukuyowoyeka mu ciyowoyero ca mawoko

[Vithuzithuzi pa peji 32]

Para tili pa maungano tikhozgenge Ŵakhristu ŵanyithu awo mbambuwu