‘Yehova Wangweluskira Cisko Cake pa Iwo’
PA CISKO ca munthu waliyose pali tuminofu twakukwana 30 uto tukugwira nchito zakupambanapambana. Pa tuminofu 30, 14 tukugwira nchito para mukumwemwetera. Kasi mukughanaghana kuti tiŵavyenge tuminofu utu mphanyi vikuŵa vyakukondweska para tikuyowoyeskana na ŵanyithu? Nchakukayikiska. Kweni ku ŵambuwu, tuminofu utu tukugwira nchito zinandi padera pa kovwira pakuyowoyeskana na ŵanyawo. Para tuminofu utu tukugwira nchito lumoza na majesica, tukovwira comene pakuyowoya fundo ndiposo maghanoghano. Ŵanthu ŵanandi ŵakuzizwa na umo awo ŵakuyowoya ciyowoyero ca mawoko ŵakulongosolera fundo mwakupulikikwa makora.
Mazuŵa ghano ŵambuwu ŵawona cisko cakuzura na mazgu ghakovwira kuluska cisko cilicose. Mwauzimu ŵawona cisko, panji kuti “pamaso pa Yehova.” (Cit. 2:19) Ivi vyacitika mwamwaŵi waka yayi. Yehova wakulongora citemwa cikuru ku ŵambuwu. Ndimo wakacitira mu nyengo ya Ŵaisrayeli ŵakale. (Lev. 19:14) Lero napo wakulongoraso kuti wakutemwa ŵanthu aŵa. “Khumbo lake ndakuti ŵanthu ŵa mitundu yose ŵafike pa kumanya makora unenesko na kuponoskeka.” (1 Tim. 2:4) Ŵambuwu ŵanandi ŵawona cisko ca Ciuta mwa kusambira unenesko wakuyowoya za iyo. Pakuti ŵakupulika yayi, kasi vyaŵa wuli kuti ŵasambire unenesko? Pambere tindazgore fumbo ili tiyeni tisande cifukwa ico ciyowoyero ca mawoko nchakuzirwa ku ŵanthu aŵa.
Kuwona Nkhupulika
Ŵanthu ŵanandi ŵali na maghanoghano ghakubudika ghakukhwaskana na ŵambuwu ndiposo ciyowoyero cawo. Ntheura, tikukhumba mupulikiske makora za ŵanthu aŵa. Ŵambuwu ŵangendeska galimoto. Cikuŵa cakusuzga comene kuti ŵanthu aŵa ŵamanye ico munthu wakuyowoya mwa kulaŵiska umo milomo yikucitira. Pa caru capasi pali viyowoyero vya mawoko vinandi comene. Nakuti vimanyikwiro ivyo ŵakulongora vikupambana kuyana na cigaŵa ico munthu wakufuma.
Kasi ŵanthu aŵa ŵangaŵazga? Ŵanyake ŵakuŵazga makora, kweni ŵanandi ŵakusuzgika comene. Cifukwa wuli ŵakusuzgika kuŵazga? Cifukwa nchakuti ivyo ŵanthu ŵakulemba vikukolerana na ivyo ŵakuyowoya. Ghanaghanirani umo mwana uyo wakupulika wakusambilira ciyowoyero. Para wababika waka, wakukhala na ŵanthu awo ŵakuyowoya ciyowoyero ca ku cigaŵa ico. Pakujumpha nyengo yitali yayi, nayo wakwamba kuyowoya. Ivi vikucitika mwakawiro, cifukwa ca kupulika ivyo ŵanthu ŵakuyowoya. Ntheura para ŵana ŵamba kuŵazga ndikuti ŵakuyaniska waka ivyo vyalembeka na ivyo ŵakuvimanya kale, vyeneivyo vikuyowoyeka.
Sono jitorani kuti muli ku caru cacilendo ndipo muli mu cipinda cakupangika na magalasi. Cipinda ici nchakujarika makora, ndipo mukupulika cilicose yayi ico cikucitika kuwaro. Kweniso mundapulikepo umo ŵenecaru ŵakuyowoyera. Zuŵa lililose ŵakwiza na kuyezga kuyowoya namwe pa gilasi. Mukupulika yayi ivyo ŵakuyowoya, kweni mukuwona waka umo milomo yawo yikucitira. Cifukwa ca kumanya kuti mukupulika yayi ivyo ŵakuyowoya, ŵakuvilemba pa pepara na kumulongorani kuti muŵazge. Ŵakughanaghana kuti mumanyenge ivyo ŵalemba. Kasi mungacita wuli? Mungawona kuti kuyowoyeskana mu nthowa iyi kungaŵa kwakusuzga comene. Cifukwa wuli? Cifukwa ivyo vyalembeka pa pepara vyalembeka mu ciyowoyero ico mundacipulikepo. Umu ndimo vilili na ŵambuwu ŵanandi.
Ciyowoyero ca mawoko ndico cikovwira kuti ŵanthu aŵa ŵapulikanenge. Munthu wakucita vimanyikwiro mwa kugwiliskira nchito mawoko, mulomo, na mutu, mwakuti ŵanji ŵamanye ivyo wakuyowoya. Wakulondezga malango gha ciyowoyero ici pakusunkhunya thupi ndiposo umo wakucitira na cisko cake. Ntheura, awo ŵakumanya ciyowoyero ici, para ŵawona ŵakupulika ivyo munyawo wakuyowoya.
Ndipo nadi, cilicose ico wangacita na mawoko, thupi ndiposo cisko para wakuyowoya cili na ng’anamuro. Ŵakuŵa na cilato pa umo ŵakucitira vimanyikwiro na cisko cawo, kuti ŵakucita mwakuti ŵasekeske waka ŵanthu yayi. Vimanyikwiro ivi ni vyakuzirwa comene pa malango gha ciyowoyero ca mawoko. Mwaciyelezgero, kufumba fumbo uku wakulaŵisiska kwambura kuphayira, kungang’anamura kuti fumbo ili likukhumba kuti muzgore yayi, kweni kuti mughanaghanirepo waka. Kufumba fumbo uku wakuŵa nga wakulaŵiska pasi kungang’anamura kuti wakufumba kuti, njani?, vici?, nkhu?, pauli?, cifukwa wuli? panji wuli? Umo mulomo ukucitira ungalongora ukuru wa cinthu panji ico cacitika. Umo wakucitira na mutu wake, matama, umo wakukwezgera mucanya ciŵegha, ndiposo umo wakuphayilira vyose vili na ng’anamuro.
Para vimanyikwiro ivi vikugwira nchito lumoza vikovwira awo ŵakuwona kumanya ivyo vikuyowoyeka. Kugwiliskira nchito vimanyikwiro vyakupambanapambana ivi kukovwira awo ŵakumanya ciyowoyero ca mawoko kulongosora cilicose ico ŵakukhumba kuti ŵanthu ŵamanye, kwali ni nkhani yakukondweska, kulongosora vya citemwa, vinthu ivyo tingaviwona panji kuvikhwaska yayi.
Vyakupharazga vya Ciyowoyero ca Mawoko Vikovwira Comene
Para fundo zakukhwaskana na Yehova zikulongoreka mu vimanyikwiro, wambuwu, wakupulika uthenga ndipo ‘wakupulikana’ mwa Mweneko wa uthenga. Lekani Ŵakaboni ŵa Yehova ŵakuyezgayezga kupharazgira ŵambuwu pa caru cose. (Rom. 10:14) Panyengo yasono pali magulu 58 gha ŵanthu awo ŵakung’anamulira vinthu mu ciyowoyero ca mawoko. Ndipo pali vyakupharazga ivyo vyang’anamulika kufuma ku Cingelezi kuya mu viyowoyero 40 vya mawoko vyeneivyo vikusangika pa ma DVD. Kasi mulimo uwu wawovwira?
Jeremy, uyo ŵanyina na ŵawiske mbambuwu wakati: “Nkhukumbuka apo ŵadada ŵakatora nyengo yitali kuti ŵapulikiske ndime zicoko waka izo ŵakaŵazganga mu Gongwe la Mulinda. Ŵati ŵamara kuŵazga, ŵakakondwa comene ndipo ŵakayowoya mu vimanyikwiro kuti, ‘Namanya ng’anamuro lake! Namanya ng’anamuro lake!’ Ŵakanilongosolera ng’anamuro la ivyo ŵakaŵazga. Panyengo iyo nkhaŵa na vilimika 12. Nane nkhati naŵazga ndime zira mwaluŵiroluŵiro, nkhaŵaphalira mu vimanyikwiro, nkhati, ‘Ŵadada ndivyo ndime izi zikung’anamura yayi, zikung’anamura . . . ’ Ŵakanisinizga kuti nikhale cete, ndipo ŵakalutaso kukaŵazga kuti ŵakapulikiske makora ivyo ndime izo zikang’anamuranga. Nizamuluwa yayi umo ŵakadandaulira, ndiposo umo ine nkhakhwaskikira apo nkhaŵawona ŵakulutaso kukaŵazga. Kweni vyakupharazga vya ciyowoyero ca mawoko vya pa DVD vyawovwira comene kuti ŵapulikiskenge makora uthenga. Para ŵakulongosora za Yehova mwakukondwa nkhuwonga comene.”
Wonaniso ivyo vikacitikira mbumba yinyake ku Chile iyo yikayowoya na Jessenia, msungwana uyo ngwambuwu. Ŵanyina ŵa Jessenia ŵakati ŵazomerezga kuti ŵamulongore Buku Lane la Nkhani za mu Baibolo ilo lili pa DVD ya ciyowoyero ca mawoko ca ku Chile, iwo ŵakati: “Jessenia wakati wamba kuwonelera DVD iyi wakamba kuseka pamasinda na kwamba kulira. Ŵati ŵamufumba ico cikacitiska kuti walirenge, wakazgora kuti cikaŵa cifukwa cakuti ivyo wakawoneleranga vikamukondweska. Ŵanyina ŵakamanya kuti wakupulikiska vyose ivyo vikaŵa mu DVD.”
Mwanakazi munyake uyo wakukhala mu cigaŵa cinyake ca ku mizi ku Venezuela wakaŵa na mwana yumoza ndipo wakaŵaso na nthumbo. Iyo na mfumu wake ŵakaghanaghana kuti ŵafumye nthumbo yira pakuwona kuti ŵangakwaniska yayi kupwelelera mwana munyake cifukwa ca ukavu. Zuŵa linyake, Ŵakaboni ŵa Yehova ŵakafika pa nyumba ya mbumba iyi na kuŵalongora sambiro 12 mu burosha la Kasi Nchici Ico Ciuta Wakukhumba kwa Ise?, ilo lili pa DVD mu ciyowoyero ca mawoko ca ku Venezuela. Sambiro ili likulongosora umo Ciuta wakuwonera kufumya nthumbo ndiposo kukoma munthu. Pamasinda mwanakazi yura wakaphalira Ŵakaboni ŵara kuti wakakondwa comene na ivyo wakasambira. Wakayowoya kuti wakafumya yayi nthumbo cifukwa ca ivyo ŵakasambira mwa kuwonelera DVD ya mu ciyowoyero ca mawoko. Mwana uyo wakaŵa kuti wandababike wakapona cifukwa ca burosha la mu ciyowoyero ca mawoko ilo lili pa DVD.
Mudumbu Lorraine, uyo ngwambuwu wakati: “Kusambira Baibolo kwaŵa nga nkhuunganiska pamoza fundo izo ni zakusuzga kupulikiska. Nkhamanyanga vinandi yayi vyakukhwaskana na Baibolo. Kweni sono nkhupulikiska cifukwa cakuti unenesko wa mu Baibolo ukusangika mu ciyowoyero ca mawoko.” George, uyo ngwambuwu, mweneuyo waŵa Kaboni kwa vilimika 38 wakati: “Munthu wakucindikika ndiposo wakuŵa wakukhorwa para wakupulikiska vinthu pa iyomwene. Nkhuwona kuti ma DVD gha mu ciyowoyero ca mawoko ghakunovwira comene kuti niŵe paubwezi na Yehova.”
“Ungano wa mu Ciyowoyero Cane!”
Padera pa vyakupharazgazgira vya ciyowoyero ca mawoko, Ŵakaboni ŵa Yehova ŵali kunozga kuti maungano ghacitikenge mu ciyowoyero ici. Pasono pa caru cose pali mipingo ya ciyowoyero ici yakujumpha 1,100. Ŵambuwu ŵakusambizgika unenesko mu ciyowoyero cawo. Ŵakusambizgika unenesko uwu mwanchindi ndiposo mwakuyana na vinthu ivyo ŵangavipulikiska.
Kasi mipingo ya mu ciyowoyero ici yawovwira nadi? Wonani ivyo vikacitikira Cyril, uyo wakabapatizika mu 1955, na kuŵa yumoza wa Ŵakaboni ŵa Yehova. Kwa vilimika vinandi wakaŵazganga mabuku gha muzga na kusangika pa maungano Ghacikhristu nyengo zose. Nyengo zinyake pakaŵanga ŵanthu awo ŵakang’anamuliranga ivyo vikayowoyekanga pa maungano agha mu ciyowoyero ca mawoko. Para palije ŵakung’anamulira, wakagomezganga ŵanthu awo ŵakalembanga manotisi. Mpingo wa ciyowoyero ca mawoko wakwamba ukamba ku New York ku United States mu 1989, wati waŵa yumoza wa Ŵakaboni ŵa Yehova kwa vilimika 34. Kasi Cyril wakajipulika wuli apo wakawungananga na mpingo uwu? Iyo wakati: “Vikaŵa nga nafuma mu cisi ca zani muwone, kuya ku ungweru. Ukaŵa ungano wa mu ciyowoyero cane!”
Ku mipingo ya ciyowoyero ca mawoko ya Ŵakaboni ŵa Yehova ndiko ŵambuwu ŵakuluta nyengo na nyengo kuti ŵakasambire za Ciuta ndiposo kumusopa. Ndiko ŵanthu ŵa Ciuta ŵakukhozgana na kuciskana. Nangauli ŵanthu aŵa ŵakuŵa ŵakufwatuka yayi pakati pa ŵanthu awo ŵalije suzgo la kupulika, kweni ŵakuŵa ŵakufwatuka kuyowoya ndiposo kucezga na ŵanyawo para ŵafika ku mipingo ya ciyowoyero cawo. Mu mipingo iyi, ŵambuwu ŵangasambira, kukura mwauzimu ndiposo kuteŵetera Yehova na mtima wose. Ŵanandi mbapharazgi ŵa nyengo zose. Ŵanji ŵasamira ku vyaru vinyake mwakuti ŵakawovwire ŵambuwu kuti ŵamanye Yehova. Ŵabali awo mbambuwu ŵakusambira umo ŵangasambizgira mwaluso, umo ŵangacitira vinthu pa mpingo, umo ŵangapwelelera ŵabali na ŵadumbu, ndipo pamasinda ŵanandi ŵakuŵa ŵakwenelera kuŵa ŵalara panji ŵateŵeti ŵakovwira.
Ku United States kuli mipingo ya ciyowoyero ca mawoko yakukwana 100 ndiposo tumagulu 80. Ku Brazil kuli mipingo pafupifupi 300 ndiposo tumagulu 400. Ku Mexico kuli mipingo pafupifupi 300 ya ciyowoyero ici. Ku Russia kuli mipingo pafupifupi 30 ya ciyowoyero ca mawoko ndiposo magulu 113. Ivi ni viyelezgero vicoko waka vya ivyo vikucitika pa caru cose.
Ŵakaboni ŵa Yehova ŵakuŵaso na maungano gha dera ndiposo gha cigaŵa agho ghakucitika mu ciyowoyero ca mawoko. Cilimika camara kukacitika maungano gha cigaŵa 120 gha mu ciyowoyero ici pa caru cose. Maungano agha ghakovwira Ŵakaboni ŵa Yehova awo mbambuwu kujipulika kuti nawo nchigaŵa ca ŵabali na ŵadumbu awo ŵakusanga candulo na cakurya cauzimu ca pa nyengo yake.
Leonard uyo ngwambuwu waŵa yumoza wa Ŵakaboni ŵa Yehova kwa vilimika vyakujumpha 25. iyo wakati: “Nyengo zose nkhamanyanga kuti Yehova ndiyo Ciuta waunenesko. Kweni nkhapulikiskanga yayi cifukwa ico wazomerezgera kuti ŵanthu ŵalutilire kusuzgika. Nyengo zinyake ivi vikanikwiyiskanga comene. Kweni pa nkhani yinyake ya pa ungano wa cigaŵa wa mu ciyowoyero ca mawoko nkhapulikiska. Nkhani yikati yamara, muwoli wane wakanisinizga na kunifumba kuti, ‘Asi sono mwapulikiska?’ Nkhamuzgora na mtima wose kuti napulikiska! Nili wakuwonga comene kuti kwa vilimika 25 nindamutaye Yehova. Nyengo zose nkhumutemwa nangauli pakwamba nkhamupulikiskanga yayi. Kweni sono nkhumupulikiska.”
Kuwonga Kufumira Pasi pa Mtima
Kasi ŵambuwu ŵawona mazgu wuli pa cisko ca Yehova ŵati ŵasambira vya iyo? Ŵawona citemwa, ciwuravi, urunji, kugomezgeka, lusungu lwacitemwa na vinyake vinandi.
Pa caru cose, Ŵakaboni ŵa Yehova awo mbambuwu ŵakuwona cisko ca Yehova, ndipo ŵalutilirenge kuciwona. Cifukwa cakuti wakuŵatemwa ŵanthu aŵa, ‘wangweluskira cisko cake pa iwo.’ (Maŵa. 6:25) Ŵambuwu mbakuwonga comene kuti ŵamanya Yehova.
[Vithuzithuzi pa peji 24, 25]
Pa caru cose pali mipingo ya ciyowoyero ca mawoko yakujumpha 1,100
[Vithuzithuzi pa peji 26]
Yehova wangweluskira cisko cake pa ŵambuwu