“Kumbukani Awo Ŵakulongozga Pakati Pinu”

MAZGU agha ghali pa lemba la Ŵahebere 13:7, ndipo wakayowoya ni mpositole Paulosi. Kufuma mu 33 C.E, ŵapositole ŵakugomezgeka ŵa Fumu Yesu Khristu ndiwo ŵakaŵa mu wupu wakulongozga. Wupu uwu ukapelekanga ulongozgi ku mpingo Wachikhristu uwo ukaŵa kuti wamba waka. (Mil. 6:2-4) Kuzakafika mu 49 C.E., wupu wakulongozga uwu ukakura, ukaŵa na ŵanthu ŵanyake padera pa ŵapositole ŵa Yesu. Apo nkhani ya ukotoli yikadumulikanga mu Yerusalemu, mu wupu wakulongozga mukaŵa “ŵapositole na ŵalara.” (Mil. 15:1, 2) Wupu uwu ukadumbiskananga vinthu ivyo vikachitikiranga Ŵakhristu kulikose. Ŵakatumizganga makalata na kupeleka ulongozgi, ndipo ivi vikakhozganga mipingo na kovwira ŵasambiri kuti ŵawonenge vinthu mwakuyana. Mipingo yikalondezganga ulongozgi wa wupu wakulongozga, ndipo Yehova wakayitumbikanga.—Mil. 8:1, 14, 15; 15:22-31; 16:4, 5; Heb. 13:17.

² Ŵapositole ŵakati ŵafwa, ŵakugaluka ŵakatora malo mu mpingo. (2 Tes. 2:3-12) Nga umo Yesu wakayowoyera mu ntharika yake ya tirigu na duru, duru (Ŵakhristu ŵatesi) wakaseŵeka mukati mu tirigu (Ŵakhristu ŵakuphakazgika). Duru wakakulira lumoza na tirigu m’paka pa nyengo ya vuna, iyo ‘mbumaliro wa nyengo iyi.’ (Mat. 13:24-30, 36-43) Pa nyengo iyi, Mkhristu waliyose wakuphakazgika wakalutilira kuŵa paubwezi na Yesu, nangauli pa charu chapasi pakaŵavya wupu wakulongozga wakuti Yesu wawugwiliskire ntchito kupeleka ulongozgi ku ŵalondezgi ŵake. (Mat. 28:20) Kweni Yesu wakayowoyerathu kuti vinthu vizamusintha mu nyengo ya vuna.

³ “Kasi muzga wakugomezgeka na wavinjeru ni njani?” Yesu wakati wafumba fumbo ili, wakayowoya ntharika, iyo ntchimoza mwa “chimanyikwiro” cha “umaliro wa nyengo iyi.” (Mat. 24:3, 42-47) Yesu wakati muzga wakugomezgeka uyu wazamupelekanga chakurya chauzimu ku ŵanthu ŵa Chiuta “pa nyengo yakwenelera.” Mu nyengo ya Ŵakhristu ŵakwambilira, Yesu wakagwiliskira ntchito gulu la ŵanalume kuti ŵalongozgenge. Mu nyengo yaumaliro iyi, muzga wakugomezgeka uyo Yesu wakumugwiliskira ntchito nayo ni munthu yumoza yayi.

KASI “MUZGA WAKUGOMEZGEKA NA WAVINJERU” NI NJANI?

⁴ Kasi Yesu wakimika njani kuti wapelekenge chakurya ku ŵalondezgi ŵake? Yesu wakasankha Ŵakhristu ŵakuphakazgika kuti ŵachitenge ntchito iyi. Baibolo likuti iwo ‘mbasembe na mafumu’ awo ŵatumika ‘kukapharazga kutali makhaliro ghapachanya gha uyo waŵachema kufuma mu chisi kwiza ku ungweru wake wakuzizwiska.’ (1 Pet. 2:9; Mal. 2:7; Chivu. 12:17) Kasi Ŵakhristu wose ŵakuphakazgika awo ŵali pa charu chapasi ni muzga wakugomezgeka? Yayi. Apo Yesu wakaryeska mwamunthondwe ŵanalume 5,000, ndiposo ŵanakazi na ŵana, wakapeleka chakurya ku ŵasambiri ŵake, ndipo ŵasambiri ŵakapeleka ku mizinda. (Mat. 14:19) Yesu wakaryeska ŵanthu ŵanandi kwizira mu ŵasambiri ŵake ŵachoko waka. Mazuŵa ghano napo, Yesu wakupeleka chakurya chauzimu kwizira mu ŵanalume ŵachoko waka.

⁵ Ipo “muteŵeti mulara wakugomezgeka, uyo ngwavinjeru,” nkhagulu ka ŵabali ŵakuphakazgika awo ŵakunozga na kupeleka chakurya chauzimu mu nyengo yakuŵapo kwa Khristu. (Luka 12:42) Mu mazuŵa ghaumaliro agha, ŵabali ŵakuphakazgika awo ŵali mu gulu la “muzga wakugomezgeka na wavinjeru” ŵakuteŵetera lumoza pa ofesi yithu yikuru. Mazuŵa ghano, ŵabali ŵakuphakazgika aŵa ndiwo ni Wupu Wakulongozga wa Ŵakaboni ŵa Yehova.

⁶ Khristu wakugwiliskira ntchito wupu uwu kuti ulembe vya mauchimi gha mu Baibolo agho ghakufiskika, na kupeleka ulongozgi wa umo tingalondezgera malango gha mu Baibolo zuŵa na zuŵa. Chakurya chauzimu ichi chikusangika mu mipingo yose ya Ŵakaboni ŵa Yehova. (Yes. 43:10; Gal. 6:16) Kale, muzga wakugomezgeka, panji muteŵeti mulara ndiyo wakalaŵiliranga pa nyumba. Mazuŵa ghano napo, muzga wakugomezgeka na wavinjeru wali na udindo wa kulaŵilira nyumba yachipulikano. Ntheura wakulaŵilira katundu yose wa gulu, ntchito ya kupharazga, maungano gha dera na gha chigaŵa, wakwimika ŵalaŵiliri mu gulu, ndiposo wakulaŵilira ntchito ya kupanga mabuku ghakulongosora Baibolo. Muzga wakuchita ntchito zose izi kuti wawovwire ‘ŵateŵeti ŵa pa nyumba.’—Mat. 24:45.

⁷ Kasi ‘ŵateŵeti ŵa pa nyumba’ mbanjani? Ni awo ŵakupokera chakurya icho muzga wakunozga. Pakwamba, ŵateŵeti ŵa pa nyumba ŵakaŵa Ŵakhristu ŵakuphakazgika pera. Pamasinda, “mberere zinyake” nazo zikasazgika pa ŵateŵeti ŵa pa nyumba. (Yoh. 10:16) Magulu ghose ghaŵiri agha, ghakurya chakurya chauzimu icho muzga wakugomezgeka wakunozga.

⁸ Pa nyengo ya suzgo yikuru, apo Yesu wazamweruzgira ŵanthu ŵaheni, wazamwimika muzga wakugomezgeka “pa vinthu vyake vyose.” (Mat. 24:46, 47) Awo ŵali mu gulu la muzga wakugomezgeka ŵazamupokera njombe yawo ya kuchanya. Iwo pamoza na ŵanyawo awo ŵali mu gulu la 144,000, ŵamulamulira lumoza na Khristu kuchanya. Nangauli pa charu chapasi pazamuŵavya muzga wakugomezgeka na wavinjeru, Yehova na Yesu ŵazamupeleka ulongozgi ku ŵanthu kwizira mu “ŵakaronga.”—Sal. 45:16.

CHIFUKWA WULI TIKWENERA ‘KUKUMBUKA AWO ŴAKULONGOZGA’?

⁹ Pali vifukwa vinandi vyakugomezgera na ‘kukumbukira awo ŵakulongozga.’ Chifukwa wuli tikwenera kuchita nthena? Mpositole Paulosi wakati: “Ŵakulinda imwe nga ni awo ŵazamupatawura, mwakuti ŵachite ichi na chimwemwe na kukwenyelera yayi, chifukwa mungapwetekeka.” (Heb. 13:17) Tikwenera kupulikira na kujilambika kwa awo ŵakulongozga chifukwa ŵakutovwira na kutivikilira mwauzimu.

¹⁰ Pa 1 Ŵakorinte 16:14, Paulosi wakati: “Chilichose icho mukuchita, muchite na chitemwa.” Para ŵabali awo ŵakulongozga ŵakukaka fundo zakukhwaska ŵanthu wose ŵa Chiuta, ŵakuchita mwachitemwa. Pakuyowoya za chitemwa, lemba la, 1 Ŵakorinte 13:4-8 likuti: “Chitemwa chikuzikira ndipo ntchalusungu. Chitemwa chilije sanji. Chikujilumba yayi, chikujitukumura yayi, chikuchita mwambura kwenelera yayi, chikupenja vyake pera yayi, ndipo chikukwiya luŵiro yayi. Chitemwa chikusunga vyakusingo yayi. Chikusekelera na kwananga yayi, kweni chikusekelera na unenesko. Chikubenekelera vinthu vyose, chikupulikana vinthu vyose, chikugomezga vinthu vyose, chikuzizipizga vinthu vyose. Chitemwa chikumara yayi.” Tikwenera kujiwona kuti ndise ŵakuvikilirika, chifukwa ulongozgi uliwose uwo ŵakutipa awo ŵakutilongozga, ŵakutipa chifukwa chakuti ŵakutitemwa. Nakuti iwo ŵakutilongora umo Yehova wakutitemwera.

¹¹ Nga umo vikaŵira na Ŵakhristu ŵakwambilira, Yehova wakugwiliskira ntchito ŵanthu ŵakwananga kuti ŵalongozgenge ŵanthu ŵake. Kale Yehova wakagwiliskiranga ntchito ŵanthu nga ndise kuti ŵafiske khumbo lake. Wakaphalira Nowa kuti wapange chingalaŵa na kupharazga kuti charu chiparanyikenge. (Gen. 6:13, 14, 22; 2 Pet. 2:5) Yehova wakasora Mozesi kuti wafumiske ŵanthu ŵake mu Eguputo. (Eks. 3:10) Chiuta wakatuma ŵanthu ŵambura kufikapo kuti ŵalembe Baibolo. (2 Tim. 3:16; 2 Pet. 1:21) Nangauli mazuŵa ghano Yehova wakugwiliskira ntchito ŵanthu ŵambura kufikapo kuti ŵalongozge pa ntchito ya kupharazga na kusambizga, ise tikulutilira kugomezga gulu lake. Nakuti tikukhozgeka chifukwa tikumanya kuti para Yehova wangaleka kutovwira, gulu lake lingafiska yayi vyose ivyo likuchita. Muzga wakugomezgeka wakumana na masuzgo ghanandi ndipo walongora kuti wakulongozgeka nadi na mzimu wa Chiuta. Yehova watumbika chomene chigaŵa cha pa charu chapasi cha gulu lake. Ntheura tikuliwovwira gulu ili na mtima wose ndipo tikuligomezga.

KASI TIKULONGORA WULI KUTI TIKUGOMEZGA MUZGA?

¹² Awo ŵali na maudindo mu mpingo ŵakulongora kuti ŵakugomezga muzga para ŵakuzomera na kuchita ntchito zawo mwakugomezgeka. (Mil. 20:28) Ise ŵapharazgi ŵa Ufumu, tikupharazga nyumba na nyumba, tikuwelerako ku ŵanthu ŵakukhumba kumanya vinandi, na kusambira Baibolo na ŵanthu. (Mat. 24:14; 28:19, 20) Kuti tipindure mwakukwana na chakurya chauzimu icho muzga wakugomezgeka wakunozga, tikwenera kunozgekera makora na kuluta ku maungano gha mpingo, gha dera na gha chigaŵa. Tikusanguluskana na kukhozgana para tikuchezga na ŵabali ŵithu pa maungano agha.—Heb. 10:24, 25.

¹³ Para tikupeleka chuma chithu kuti chovwire gulu, tikulongora kuti tikuligomezga. (Zinth. 3:9, 10) Para tawona kuti ŵabali ŵithu ŵasuzgika, tikuŵawovwira mwaluŵiro. (Gal. 6:10; 1 Tim. 6:18) Tikuchita nthena chifukwa cha kutemwa ŵabali, ndipo nyengo zose tikupenja nthowa izo tingawongera Yehova na gulu lake chifukwa cha viwemi ivyo wakutichitira.—Yoh. 13:35.

¹⁴ Tikulongoraso kuti tikugomezga muzga para tikupulikira ulongozgi uwo wakutipa. Tikweneraso kupulikira ulongozgi uwo ŵalaŵiliri ŵa dera na ŵalara ŵakutipa. Ŵabali aŵa nawo “ŵakulongozga,” ntheura tikwenera kujilambika kwa iwo na kuŵapulikira. (Heb. 13:7, 17) Nanga ni para tindapulikiske chifukwa icho ŵalara ŵachitira vinthu vinyake, tikumanya kuti vinthu vingatiyendera makora para tingakolerana nawo. Yehova wakutitumbika para tikupulikira Mazgu ghake na gulu lake. Para tikupulikira, tikulongora kuti tikujilambika kwa Fumu, Yesu Khristu.

¹⁵ Tili na vifukwa vyakukwana vyakugomezgera muzga wakugomezgeka na wavinjeru. Satana, uyo ni chiuta wa charu chino, wakuchita vyose ivyo wangafiska kuti wakhozge soni zina la Yehova na gulu lake. (2 Kor. 4:4) Kupusikika yayi na mauchenjezi ghake. (2 Kor. 2:11) Satana wakumanya kuti “wali na nyengo yifupi” yakuti waponyeke mu chizongwe, lekani waŵikapo mtima kuti waguze ŵanthu ŵanandi kuŵafumiskako kwa Yehova. (Chivu. 12:12) Apo Satana wakuyezgayezga kupuluska ŵanthu, tiyeni tisendelere pafupi na Yehova. Tiyeni tiyigomezge na mtima wose nthowa iyo Yehova wakugwiliskira ntchito pakulongozga ŵanthu ŵake mazuŵa ghano. Para tikuchita nthena, tilutilirenge kuŵa ŵakukolerana na Ŵakhristu ŵanyithu pa charu chose.