Umo Mpingo Ukulongozgekera

PAULOSI wakayowoya fundo yakuzirwa chomene yakuyowoya za Chiuta mu kalata yakwamba iyo wakalembera Ŵakorinte. Wakati: “Chiuta ni Chiuta wautimbanizgi yayi, kweni wamtende.” Wakayowoyaso za maungano gha mpingo, wakati: “Vinthu vyose vichitike mwakwenelera ndiposo mu ndondomeko.”—1 Kor. 14:33, 40.

² Kukwambilira kwa kalata iyi, Paulosi wakapeleka ulongozgi ku mpingo wa Korinte chifukwa ukaŵa wakugaŵikana. Paulosi wakachiska ŵabali aŵa kuti ‘ŵayowoyenge mwakuzomerezgana’ ndiposo kuti ŵaŵe ‘ŵakukolerana pakuŵa na mtima umoza na kaghanaghaniro kamoza.’ (1 Kor. 1:10, 11) Wakaŵapaso ulongozgi pa nkhani izo zikatimbanizganga mtende wa mpingo. Paulosi wakayaniska mpingo na thupi kuti walongore kukhumbikwa kwa mtende na kukolerana. Wakachiska wose mu mpingo kuti ŵatemwanenge na kovwirana. (1 Kor. 12:12-26) Ŵakhristu aŵa ŵakeneranga kuchita vinthu mu ndondomeko kuti ŵaŵe ŵakukolerana.

³ Kasi mpingo wa Ŵakhristu ŵaunenesko ukalongozgekanga wuli? Kasi ni njani uyo wakawulongozganga? Kasi mpingo ukaŵa wuli? Mbanjani awo ŵakapika maudindo? Baibolo lingatovwira kuti timanye mazgoro gha mafumbo agha.—1 Kor. 4:6.

MPINGO UKALONGOZGEKANGA NA CHIUTA

⁴ Mpingo Wachikhristu ukamba pa Pentekoste mu 33 C.E. Kasi mpingo ukalongozgekanga wuli? Ukalongozgekanga na Chiuta (panji kuti boma la Chiuta ndipo mu Chigiriki ni the·osʹ, kraʹtos). Mazgu Ghachigiriki agha ghakusangika pa 1 Petrosi 5:10, 11. Baibolo likulongosora ivyo vikachitika mu Yerusalemu pafupifupi vyaka 2,000 ivyo vyajumpha. Vinthu ivi mbukaboni wakuti Chiuta ndiyo wakambiska mpingo wa Ŵakhristu ŵakuphakazgika. (Mil. 2:1-47) Mpingo ukaŵa nyumba yake panji kuti mbumba yake. (1 Kor. 3:9; Efe. 2:19) Umo mpingo ukulongozgekera mazuŵa ghano, vikuyana waka na kale.

⁵ Apo mpingo ukambanga, ukaŵa na ŵasambiri 120. Iwo ŵakaphakazgika na mzimu utuŵa, ndipo uchimi wa pa Joyeli 2:28, 29 ukafiskika. (Mil. 2:16-18) Mpingo wa Ŵakhristu ŵakuphakazgika ukakura chifukwa ŵanthu ŵanyake 3,000 ŵakabatizika pa zuŵa lenelira. Ŵakazomera mazgu ghakuyowoya vya Khristu ndipo “ŵakalutilira kusambira ku ŵapositole.” Pamanyuma, “zuŵa na zuŵa Yehova wakasazgirangako kwa iwo awo wakaŵaponoskanga.”—Mil. 2:41, 42, 47.

⁶ Mpingo ukakura chomene mu Yerusalemu, mwakuti wasembe mukuru wa Ŵayuda wakadandawura kuti ŵasambiri ŵa Yesu ŵazuzga Yerusalemu na chisambizgo chawo. Ŵasembe ŵanandi awo ŵakaŵa Ŵayuda ŵakazgoka ŵasambiri ndipo ŵakakolerana na mpingo mu Yerusalemu.—Mil. 5:28; 6:7.

⁷ Yesu wakati: “Muzamuŵa ŵakaboni ŵane mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:8) Ivyo Yesu wakayowoya vikachitika nadi. Stefano wakati wakomeka, ŵasambiri awo ŵakakhalanga mu Yerusalemu ŵakamba kuŵasuzga chomene ndipo ŵakachimbilira ku Yudeya na Samariya. Kweni kulikose uko ŵakayanga ŵakalutilira kupharazga makani ghawemi na kuzgora ŵanthu ŵanandi kuŵa ŵasambiri. Ndipo ŵanyake awo ŵakazomera makani ghawemi ŵakaŵa Ŵasamariya. (Mil. 8:1-13) Pamanyuma, makani ghawemi ghakapharazgika ku ŵanthu ŵambura kukotoleka, awo ŵakaŵa Ŵayuda yayi. (Mil. 10:1-48) Ntchito ya kupharazga yikawovwira kuti paŵe ŵasambiri ŵanandi ndiposo kuti mipingo yiphya yipangike kuwaro kwa Yerusalemu.—Mil. 11:19-21; 14:21-23.

⁸ Kasi pakaŵa ndondomeko wuli iyo yikawovwiranga mpingo uphya uliwose kuti ulongozgekenge na boma la Chiuta? Mzimu wa Chiuta ukawovwira kuti paŵe ŵalara kuti ŵapwelelerenge mberere. Paulosi na Baranaba ŵakimika ŵalara mu mipingo iyo ŵakendera pa ulendo wawo wakwamba wa umishonale. (Mil. 14:23) Luka wakalemba ivyo Paulosi wakaphalira ŵalara ŵa mpingo wa Efeso. Paulosi wakati: “Muŵe maso na kulaŵilira mskambo wose, uwo mzimu utuŵa wamwimikani kuŵa ŵalaŵiliri pakati pake, kuti muliske mpingo wa Chiuta uwo wakawugura na ndopa za Mwana wake.” (Mil. 20:17, 28) Ŵanalume aŵa ŵakimikika kuŵa ŵalara chifukwa ŵakachitanga ivyo Malemba ghakuyowoya. (1 Tim. 3:1-7) Tito, uyo wakaŵa wantchito munyake na Paulosi, wakapika mazaza kuti wimikenge ŵalara mu mipingo ya ku Kerete.—Tito 1:5.

⁹ Apo mipingo yinandi yikapangikanga, ŵapositole na ŵalara mu Yerusalemu ndiwo ŵakalaŵiliranga mpingo wose Wachikhristu. Ŵakateŵeteranga nga ni wupu wakulongozga.

¹⁰ Mu kalata iyo mpositole Paulosi wakalembera mpingo wa Efeso, wakati mpingo ungalutilira kuŵa wakukolerana para Ŵakhristu ŵakulongozgeka na mzimu wa Chiuta na kulondezga Yesu Khristu uyo ni mutu wa mpingo. Paulosi wakachiska Ŵakhristu ŵa mu Efeso kuti ŵaŵe ŵakujiyuyura, na kusungilira “umoza wa mzimu,” mikhaliro iyo yikovwira mpingo kuŵa wakukolerana. (Efe. 4:1-6) Pamanyuma, wakayowoya mazgu gha pa Salimo 68:18, na kulongosora kuti Yehova wakaŵika ndondomeko yakuti ŵanalume ŵakwenelera ŵateŵetenge mu mpingo nga mbapositole, ntchimi, ŵapharazgi, ŵaliska, na ŵasambizgi. Ŵanalume aŵa, awo ni vyawanangwa vyakufuma kwa Yehova, ŵakovwira mpingo kuti uŵe na chipulikano chakukhora icho chikukondweska Chiuta.—Efe. 4:7-16.

MIPINGO YIKUCHITA NGA MBAPOSITOLE

¹¹ Mazuŵa ghano, mipingo yose ya Ŵakaboni ŵa Yehova yikulongozgeka nga umo vikaŵira mu nyengo ya ŵapositole. Mipingo yose yikupanga mpingo umoza wa pa charu chose uwo ukulongozgeka na Ŵakhristu ŵakuphakazgika. (Zek. 8:23) Yesu Khristu ndiyo wakovwira kuti viŵe nthena. Nga umo wakalayizgira, walutilira kuŵa na ŵasambiri ŵake ŵakuphakazgika “mazuŵa ghose m’paka umaliro wa charu ichi.” Mpingo ukulutilira kukura, ndipo ŵanthu awo ŵakwiza mu mpingo ŵakuzomera makani ghawemi gha Chiuta, ŵakujipeleka na umoyo wose kwa Yehova, ndipo ŵakubatizika na kuŵa ŵasambiri ŵa Yesu. (Mat. 28:19, 20; Mrk. 1:14; Mil. 2:41) Ŵakuzomera kuti “muliska muwemi,” Yesu Khristu, ndiyo ni Mutu wa mpingo, uwo wuli na Ŵakhristu ŵakuphakazgika kweniso ŵa “mberere zinyake.” (Yoh. 10:14, 16; Efe. 1:22, 23) “Mskambo” wose ukukolerana chifukwa ukumanya kuti Khristu ndiyo ni mutu wawo, ndipo ukupulikira ulongozgi wa “muzga wakugomezgeka na wavinjeru,” uyo Khristu wali kumwimika. Tiyeni tilutilire kugomezga na kuthemba chomene “muzga wakugomezgeka na wavinjeru.”—Mat. 24:45.

NTCHITO YA MAWUPU

¹² Gulu lili na mawupu ghanyake agho ghakovwira pa ntchito ya kupeleka chakurya chauzimu pa nyengo yakwenelera, kweniso kuti makani ghawemi ghapharazgike pambere umaliro undize. Mawupu agha ngakuzomerezgeka na malango gha vyaru vyakupambanapambana ndipo ghakugwira ntchito mwakukolerana. Ghakovwira chomene pa ntchito ya kupharazga makani ghawemi pa charu chose chapasi.

OFESI YA MUNTHAVI

¹³ Pa ofesi, pakuŵa Komiti ya Munthavi ndipo yikuŵa na ŵalara ŵatatu panji kujumpha apa. Iwo ŵakulaŵilira ntchito ya kupharazga mu charu chawo panji mu vyaru vinyake ivyo vili pasi pa ofesi yawo. Mubali yumoza mu komiti iyi wakuŵa mulaŵiliri wa milimo ya Komiti ya Munthavi.

¹⁴ Mipingo yose iyo ofesi yikulaŵilira yikuŵa mu madera. Ukuru wa madera ukupambana. Vikuŵa nthena chifukwa cha kupambana kwa malo, chiyowoyero, ndiposo unandi wa mipingo. Mulaŵiliri wa dera wakwimikika kuti wateŵetere mipingo mu dera lililose. Ofesi ndiyo yikupeleka ulongozgi wa umo mulaŵiliri wa dera wangagwilira ntchito yake.

¹⁵ Mipingo yikukolerana na ndondomeko iyo gulu lili kunozga kuti waliyose wapindure. Yikukolerana na ŵalara awo ŵimikika kuti ŵalaŵilirenge mu maofesi, madera, na mu mipingo. Mipingo yikupokera chakurya icho muzga wakugomezgeka na wavinjeru wakupeleka pa nyengo yakwenelera. Ndipo muzga wakugomezgeka wakupulikira chomene ulongozgi wa Yesu, fundo za mu Baibolo, kweniso wakulongozgeka na mzimu utuŵa. Nase tikuteŵetera mwakukolerana nga umo vikaŵira na Ŵakhristu ŵakwambilira, ndipo tose tikujiwonera tekha kuti, ‘mipingo yikulutilira kukhozgeka mu chipulikano ndipo zuŵa lililose ŵanthu ŵakusazgikira mu mpingo.’—Mil. 16:5.