Kovwirapo pa Ntchito ya Ufumu pa Mpingo Winu na pa Charu Chose

ŴAKABONI ŴA YEHOVA ŵakufiska uchimi wa Yesu wakuyowoya za mazuŵa ghaumaliro. Ŵakupharazga makani ghawemi “ku vigaŵa vyakutali chomene vya charu chapasi.” (Mil. 1:8; Mat. 24:14) Ŵakumalira nyengo na nkhongono zawo kuti ŵaphalireko ŵanyawo vinthu vya Ufumu. Pakuti ŵakugomezga kuti Yehova wakovwira awo wakugwira nawo ntchito, ŵakulutilira kuŵika vya Ufumu pa malo ghakwamba. (Mat. 6:25-34; 1 Kor. 3:5-9) Yehova wakuŵa nawo ndipo wakuŵatumbika.

KOVWIRAPO PA NTCHITO YA UFUMU PA CHARU CHOSE

² Ŵanthu ŵakuwona umo tikupharazgira makani ghawemi kweniso kuti tikugaŵira Baibolo na mabuku ghakulongosora Baibolo kwaulere. Ntheura ŵanyake ŵakufumba kuti: “Kasi ndalama zakuchitira ntchito yose iyi zikufuma nkhu?” Pakupanga Mabaibolo na mabuku, pakukhumbikwira ndalama zinandi nadi. Ndalama zinandi zikugwiraso ntchito pakuzenga na kupwelelera Nyumba za Beteli izo mukukhala ŵateŵeti awo ŵakusindikizga mabuku, awo ŵakulaŵilira ntchito ya kupharazga, na ŵateŵeti ŵanyake awo ŵakovwira pa ntchito ya kupharazga makani ghawemi. Zinyakeso zikovwira ŵalaŵiliri ŵa dera, ŵamishonale, ŵapayiniya ŵapadera, na ŵabali awo ŵakuchita uteŵeti wanyengozose. Ntchito ya kupharazga yikurya ndalama zinandi, kwali mpha mpingo withu panji pa charu chose. Kasi ndalama izi zikufuma nkhu?

³ Ŵanthu ŵanandi awo ŵakumanya kuzirwa kwa ntchito ya kusambizga Baibolo iyo Ŵakaboni ŵa Yehova ŵakuchita pa charu chose, ŵakupeleka ndalama kuti ziwovwire pa ntchito iyi. Kweni ndalama zinandi izo zikovwira pa ntchito iyi tikupeleka ndise Ŵakaboni. Ndipo taŵanyake tikutumizga vyawanangwa ku ofesi yithu. Tikupeleka vyawanangwa na mtima wose nga umo ŵakachitira Ŵaisrayeli apo ŵakapeleka vyawanangwa kuti viwovwire pa ntchito ya kuzenga malo ghakusoperapo Yehova. (Eks. 35:20-29; 1 Mid. 29:9) Ŵanthu ŵanyake ŵakulemba wilu kuti para iwo ŵafwa, chuma chawo litole gulu. Vyawanangwa vinyake munthu wangapeleka yekha, ndipo kanandi ndalama izo ŵanthu, mipingo, na madera ŵakupeleka zikuŵa zichoko. Kweni para ŵasazga pamoza vyawanangwa vyose ivi, vikuŵa vinandi ndipo vikovwira kuti ntchito ya kupharazga yende makora.

⁴ Ŵakaboni ŵa Yehova ŵakumanya kuti ŵakukhumbikwira kupeleka ndalama na vinthu vinyake kuti viwovwire pa ntchito ya kupharazga. Yesu na ŵasambiri ŵake ŵakaŵa na bokosi ilo ŵakasungangamo ndalama zakuti ŵagulirenge vinthu. (Yoh. 13:29) Baibolo likutiphalira za ŵanakazi ŵanyake awo ŵakawovwira Yesu na ŵasambiri ŵake. (Mrk. 15:40, 41; Luka 8:3) Mpositole Paulosi wakawonga wovwiri uwo ŵakamupa ŵanthu awo ŵakakhumbanga kuti makani ghawemi ghathandazgike, ndiposo awo nawo ŵakakhumbanga kuchitako uteŵeti. (Fil. 4:14-16; 1 Tes. 2:9) Ŵakaboni ŵa Yehova ŵakuchita nga mbanthu ŵakale awo ŵakalimbikiranga uteŵeti ndiposo ŵakaŵa na mtima wakupeleka. Lekani ŵanthu ŵa mtima uwemi ŵakusanga “maji gha umoyo kwawanangwa.”—Chivu. 22:17.

KOVWIRA MPINGO WINU

⁵ Ndalama izo zikovwira pa mpingo nazo ŵanthu ŵakupeleka mwawanangwa. Pakuŵavya zithero, mapangano, panji kupempheska ndalama. Kweni pa maungano pakuŵa mabokosi ghakuti munthu waliyose wangaŵikamo ndalama izo ‘wadumura mu mtima wake.’—2 Kor. 9:7.

⁶ Ndalama izo ŵanthu ŵakupeleka mwawanangwa zikovwira pakupwelelera Nyumba ya Ufumu. Wupu wa ŵalara ungasankha kuti ndalama zinyake zitumizgike ku ofesi ya Ŵakaboni ŵa Yehova kuti zovwire pa ntchito ya kupharazga pa charu chose. Mpingo ndiwo ukuzomerezga ndalama izo zingatumizgika. Mu nthowa iyi, mipingo yinandi yikupeleka vyawanangwa nyengo zose kuti viwovwire pa ntchito ya kupharazga pa charu chose. Para ŵanthu ŵakumanya kale kuti pa mpingo pakukhumbikwa ndalama kuti zovwire pa vinthu vinyake, kupharazga pafupipafupi yayi kuti ŵanthu ŵapeleke ndalama.

KUSUNGA VYAWANANGWA

⁷ Para maungano ghamara, ŵabali ŵaŵiri ŵakutora ndalama mu mabokosi gha vyakupeleka na kulemba unandi wake. (2 Mathe. 12:9, 10; 2 Kor. 8:20 ) Wupu wa ŵalara ukupanga ndondomeko yiwemi yakuti ndalama izi zisungike makora m’paka zitumizgike ku ofesi, panji zigwire ntchito pa mpingo. Mwezi uliwose mubali uyo wakusunga ndalama za mpingo wakulemba unandi wa ndalama izo zapelekeka na izo zagwira ntchito. Para walemba, lipoti likupharazgika ku mpingo. Myezi yitatu yiliyose, mulaŵiliri wa milimo ya ŵalara wakupempha mulara munyake kuti waweleremo umo ndalama za mpingo zagwilira ntchito.

NDALAMA ZAKWENDESKERA DERA

⁸ Ndalama izo zikovwira pa maungano gha dera na ntchito zinyake izo zikuchitika mu dera, ŵakupeleka Mbakaboni ŵa Yehova ŵa dera ilo. Pa maungano gha dera pakuŵaso mabokosi gha vyakupeleka kuti ŵabali ŵaponyengemo ndalama zakovwira dera lawo. Nyengo zinyake mpingo ungapeleka ndalama zakuti zovwirepo.

⁹ Dera likwenera kulipira vinthu vyose ivyo vikukhumbikwira ndalama, ndipo para ndalama zinyake zakhalako lingatumizga ku mulimo wa pa charu chose. Para ku akaunti ya dera kuli ndalama zichoko izo zingakwana yayi kulipilira vinthu ivyo vikagwiliskirika ntchito pa ungano uwo ukachitika panji uwo uchitikenge, mulaŵiliri wa dera waphalire mipingo kuti yipeleke ndalama. Mawupu ghose gha ŵalara ghadumbiskanenge nkhani iyi na kukolerana unandi wa ndalama izo mpingo wawo ungakwaniska kupeleka ku dera. Pamanyuma, ŵaphalire mpingo kuti uzomerezge.

¹⁰ Para ku akaunti ya dera kulije ndalama zakukwana, ŵalara ŵangakumana pa zuŵa la ungano wa dera kuti ŵadumbirane. Ŵalara ŵakwenera kuzomerezga ndalama zinyake zose izo zikwenera kugwira ntchito kupaturako izo zikugwira ntchito mwezi uliwose nga ni zakulipilira mabilu. Nyengo zose ŵalara ŵakwenera kuzomerezga ndalama zose izo zigwirenge ntchito mu dera ndipo zikwenera kulembeka.

¹¹ Nyengo zose pakwenera kuŵa ndondomeko ya kuwona umo ndalama za dera zikugwilira ntchito (kuchita oditi.)

KOVWIRA ŴAKAVU

¹² Ndalama izo zikaponyekanga mu bokosi ilo Yesu na ŵasambiri ŵake ŵakasunganga, ŵakawovwilirangaso ŵakavu. (Mrk. 14:3-5; Yoh. 13:29) Ŵakhristu ŵachali na udindo wa kovwira ŵakavu. Yesu wakati: “Ŵakavu muŵenge nawo nyengo zose.” (Mrk. 14:7) Kasi Ŵakaboni ŵa Yehova ŵakovwira wuli ŵakavu mazuŵa ghano?

¹³ Nyengo zinyake ŵabali mu mpingo ŵangasoŵa vinthu vyakuthupi chifukwa cha uchekuru, ulwari, panji masuzgo ghanyake agho ghangaŵawira. Ŵabali ŵa uyo wasuzgika na ŵanji awo ŵawona kuti munyawo wakusuzgika ŵamovwire. Fundo iyi yikukolerana na mazgu gha mpositole Yohane ghakuti: “Uyo wali na vinthu vyakukhumbikwa pa umoyo mu charu chino, ndipo wakuwona mubali wake wakusoŵa pakukora, kweni wakuleka kumulengera lusungu, kasi wakumutemwa wuli Chiuta? Mwatwana tingatemwananga na mazgu pera yayi nesi lulimi, kweni mu milimo na unenesko.” (1 Yoh. 3:17, 18; 2 Tes. 3:6-12) Ŵakhristu ŵaunenesko ŵakovwiraso ŵanyawo awo ŵakukhumbikwira wovwiri wakuthupi.—Yak. 1:27; 2:14-17.

¹⁴ Mu kalata yakwamba iyo Paulosi wakalembera Timote, wakalongosora umo tingawovwilira ŵakavu. Mungaŵazga ulongozgi uwu pa 1 Timote 5:3-21. Mkhristu waliyose wali na udindo ukuru wa kupwelelera ŵamumbumba yake. Ŵachekuru panji ŵalwari ŵakwenera kovwirika na ŵana ŵawo, ŵazukuru, panji ŵabali ŵawo. Nyengo zinyake mawupu gha boma panji ghanyake, ghakovwira ŵanthu. Ntheura ŵabali ŵa awo mbakavu panji ŵanthu ŵanyake ŵangaŵapemphera wovwiri ku mawupu agha. Nyengo zinyake mpingo ndiwo ungawovwira ŵabali na ŵadumbu ŵakugomezgeka awo ŵateŵetera nyengo yitali. Para Mkhristu walije ŵabali awo ŵangamovwira, panji kulije mawupu ghakuti ghamovwire, mbwenu wupu wa ŵalara ungazomerezga kuti mpingo umovwire. Ŵakhristu ŵakukondwa kovwira ŵanyawo awo ŵakusuzgika.

¹⁵ Ŵabali ŵithu ŵanandi ŵangaŵa ŵakavu chifukwa cha kuzikizgika, nkhondo, vindindindi, kututuka kwa maji, njara panji masoka ghanyake agho ghazara sono mu nyengo zakusuzga izi. (Mat. 24:7-9) Nyengo zinyake mipingo ya uko kuli suzgo yingaŵavya wovwiri wakuti yipeleke. Para vyaŵa nthena, Wupu Wakulongozga ukupempha ŵabali ku chigaŵa chinyake kuti ŵawovwirepo. Ndivyo ŵakachita Ŵakhristu ŵa ku Asiya. Ŵakapeleka vyakurya ku ŵabali ŵa ku Yudeya pa nyengo ya njara. (1 Kor. 16:1-4; 2 Kor. 9:1-5) Para nase tikuchita nthena, tikulongora kuti tikutemwa ŵabali, ndiposo kuti ndise nadi ŵasambiri ŵa Yesu Khristu.—Yoh. 13:35.

KUGAŴIRA MABUKU

¹⁶ Mabaibolo na mabuku ghakulongosora Baibolo agho tikugaŵira ghakovwira chomene pakupharazga uthenga wa Ufumu. Kanandi wupu wa ŵalara ukusankha muteŵeti wakovwira kuti wapwelelerenge mabuku. Ŵabali awo ŵakupwelelera mabuku ŵakuchita ntchito yawo na mtima wose. Ŵakuwoneseska kuti pa mpingo pali mabuku ghakukwana.

¹⁷ Taŵakhristu tikumanya kuti nyengo yithu, maghanoghano na nkhongono zithu, maluso na vyuma vithu, nanga ungaŵa umoyo withu, ni vyawanangwa vyakufuma kwa Chiuta vyakuti tivigwiliskire ntchito pakumuteŵetera. (Luka 17:10; 1 Kor. 4:7) Para tikugwiliskira ntchito makora vyuma vithu, tikulongora kuti tikumutemwa chomene Yehova. Khumbo lithu ndakuti timuchindike Yehova na vyuma vithu. Ndipo chifukwa chakuti tili kujipeleka kwa iyo na mtima wose, tikumanya kuti wakukondwa na chawanangwa chilichose icho tikumupa. (Zinth. 3:9; Mrk. 14:3-9; Luka 21:1-4; Kol. 3:23, 24) Yesu wakati: “Mukapokera kwawanangwa, pelekani kwawanangwa.” Para tajipeleka kweniso kupeleka vyuma vithu kuti viwovwire pa kuteŵetera Yehova, tikuŵa ŵachimwemwe chomene.—Mil. 20:35.