Kasi Ndalama Zakwendeskera Ntchito za Ufumu Zikufuma Nkhu?

1, 2. (a) Kasi Mubali Russell wakazgora wuli wakati wafumbika umo ŵakusangira ndalama? (b) Kasi tisambirenge vichi mu Mutu uwu?

ZUŴA linyake muliska wa tchalitchi linyake wakafumba Mubali Charles T. Russell umo Ŵasambiri ŵa Baibolo ŵakasangiranga ndalama zakwendeskera milimo ya Ufumu.

Mubali Russell wakati: “Tikupokera zithero yayi.”

Muliska uyu wakafumbaso kuti: “Sono ndalama mukuzitora nkhu?”

Mubali Russell wakati: “Nanga ningamuphalirani uwo mbunenesko, mungagomezga yayi. Para ŵanthu ŵiza ku maungano ghithu, ŵakusanga kuti palije vyakwendeska mbale. Kweni para ŵanjira mu holo ŵakumanya ŵekha kuti pakukhumbikwa ndalama. Ntheura, ŵekha ŵakujifumba kuti, ‘Holo iyi yikukhumba ndalama, . . . Kasi ningawovwirapo wuli?’”

Muliska uyu wakagomezga yayi ivyo Mubali Russell wakayowoya.

Mubali Russell wakati: “Unenesko ngwenewuwu, nakuti nyengo zinyake ŵanthu ŵakanifumbanga ŵekha kuti, ‘Kasi ningawovwirapo wuli?’ Para munthu wali nazo ndalama ndipo wakukhumba kovwirapo, ni mwanangwa. Kweni para walije, palije chifukwa chakumuchichizgira kuti wapeleke.a

² Mubali Russell wakaneneskanga. Kwamba kale, ŵateŵeti ŵa Yehova ŵakupeleka vyawanangwa kuti viwovwire pa kusopa kwaunenesko. Mu Mutu uwu tiwonenge umo ŵakachitiranga kale pa nkhani iyi, kweniso umo tikuchitira sono. Apo tikuwona umo tikusangira ndalama zakwendeskera milimo ya Ufumu, waliyose wangachita makora kujifumba kuti: ‘Kasi ningawovwirapo wuli?’

‘Uyo Wakhumba Wize na Chakupeleka kwa Yehova’

3, 4. (a) Kasi ntchivichi chikulongora kuti Yehova wakuŵagomezga awo ŵakumusopa mwaunenesko? (b) Kasi Ŵaisrayeli ŵakawovwirapo wuli pa mulimo wa kupanga chihema?

³ Yehova wakuŵagomezga ŵanthu awo ŵakumusopa mwaunenesko. Wakumanya kuti para ŵapika mwaŵi wakuti ŵapelekepo vyawanangwa, ŵakukondwa ndipo ŵakupeleka na mtima wose. Tiyeni tiwone viyelezgero viŵiri vyamunyengo ya Ŵaisrayeli.

⁴ Yehova wati wafumiska Ŵaisrayeli mu Eguputo, wakaŵaphalira kuti ŵapange chihema chakusoperamo. Pakakhumbikwanga vinthu vinandi kuti ŵapange hema ili. Ntheura, Yehova wakaphalira Mozesi kuti ŵanthu ŵakaŵa ŵanangwa kovwirapo. Wakati: “Waliyose uyo wakhumba mu mtima wake wize na chakupeleka kwa Yehova.” (Eks. 35:5) Ŵanthu aŵa ŵakaŵa kuti ŵafuma waka ku wuzga uko ŵakagwiranga ntchito zinonono. Kweni kasi ŵakachita wuli? (Eks. 1:14) Ŵakawovwirapo na mtima wose. Ŵakapeleka siliva, golide, na vinthu vinyake vyakuzirwa ivyo ŵakwenera kuti ŵakafuma navyo ku Eguputo. (Eks. 12:35, 36) Ŵaisrayeli ŵakapeleka vinthu vinandi chomene kuluska ivyo vikakhumbikwanga. Ntheura “ŵakakanizgika kwiza na vinthu vinyake.”—Eks. 36:4-7.

5. Kasi Ŵaisrayeli ŵakachita wuli Davide wati waŵaphalira kuti ŵangawovwirapo pakuzenga tempile?

⁵ Vyaka 475, vikati vyajumphapo, Davide wakapeleka vyawanangwa kufuma mu nthamba zake. Wakavipeleka kuti viwovwire pakuzenga tempile lakusoperamo Yehova. Pamasinda, wakapeleka mwaŵi ku Ŵaisrayeli ŵanyake. Wakati: “Kasi ni njani uyo wajipeleka muhanya uno kuti wizenge na chawanangwa mu woko lake kwa Yehova?” Ntheura, ŵanthu ‘ŵakapeleka vyawanangwa kwa Yehova na mtima wakufikapo.’ (1 Mid. 29:3-9) Pakuti wakamanya uko kukafuma vyawanangwa ivi, Davide wakalomba kuti: “Vyose vikufuma kwa imwe, ndipo tamupani ivyo vikufuma mu woko linu.”—1 Mid. 29:14.

6. Chifukwa wuli ndalama zikukhumbikwa pa mulimo wa Ufumu, ndipo pali mafumbo wuli?

⁶ Mozesi na Davide ŵakachichizganga ŵanthu yayi kuti ŵapeleke vyawanangwa. Ŵanthu ŵakapelekanga ŵekha na mtima wose. Mazuŵa ghano ke? Tikumanya makora kuti milimo iyo yikuchitika mu gulu la Yehova, yikukhumba ndalama zinandi. Pakukhumbikwa ndalama zinandi kuti tipange na kutumizga mabuku. Kweniso pali ntchito ya kuzenga na kunozgaso malo ghakusoperapo, maofesi gha munthavi, na kovwira ŵabali ŵithu awo masoka ghaŵawira. Ntheura pali mafumbo ghaŵiri ghakuzirwa: Kasi ndalama izi zikufuma nkhu? Kasi Ŵakhristu ŵakwenera kuchichizgika kuti ŵapeleke?

“Tizamupempheskapo Yayi, Nesi Kuŵeyelera Ŵanthu Kuti Ŵawovwirepo”

7, 8. Chifukwa wuli ŵanthu ŵa Yehova ŵakupempheska yayi?

⁷ Mubali Russell na ŵanyake ŵakakana kutolera ivyo ŵavisopa ŵakuchita kuti ŵasange ndalama. Mu magazini ya The Watch Tower, iyo sono tikuti Gongwe la Mulinda, mukaŵa nkhani ya mutu wakuti “Do You Want ‘Zion’s Watch Tower’?” Mu nkhani iyi Russell wakati: “Tikugomezga kuti YEHOVA ndiyo wakutovwira kupanga magazini iyi. Ntheura tizamupempheskapo yayi, nesi kuŵeyelera ŵanthu kuti ŵawovwirepo. Usange uyo wakuti: “Siliva ndane ndipo golide nalo ndane” waleka kutovwira, tizamumanya kuti nyengo yakwana kuti tileke kupanga magazini iyi.” (Hag. 2:7-9) Sono pajumpha vyaka 130, ndipo gulu la Yehova lichali kufumiska magazini iyi kwambura suzgo.

⁸ Ŵanthu ŵa Yehova ŵakupempheska yayi. Ŵakwendeska mbale yayi, nesi kupeleka manevulupu kuti ŵanthu ŵaŵikengemo ndalama. Kweniso ŵakwenda mu nyumba za ŵanthu yayi, panji mu misewu, kupempheska ndalama. Ŵakulondezga fundo iyo yikaŵa mu Gongwe la Mulinda ilo likati: “Tikuwona kuti ntchakwenelera yayi kupempheska ndalama zakwendeskera mulimo wa Fumu, nga umo matchalitchi ghanyake ghakuchitira . . . Tikuwona kuti nkhwananga kupempheska munthowa yiliyose mu zina la Fumu yithu, nakuti nayo yingakondwa navyo yayi. Yingaŵatumbika yayi awo ŵapeleka, kweniso ntchito iyo ndalama izi zagwira.”b

“Waliyose Wachite Umo Wadumulira mu Mtima Wake”

9, 10. Chifukwa wuli tikupeleka vyawanangwa?

⁹ Pakuŵa Ŵakhristu ŵaunenesko, ntchakwenelera yayi kuti tipelekenge mwakuchichizgika. Tikukondwa kupeleka ndalama na vinthu vinyake mwakuti tikhozgere milimo ya Ufumu. Chifukwa wuli tikupeleka na mtima wose? Wonani vifukwa vitatu.

¹⁰ Chakwamba, tikupeleka vyawanangwa chifukwa chakuti tikutemwa Yehova, ndipo tikukhumba kuchita “vinthu ivyo vikumukondweska.” (1 Yoh. 3:22) Yehova wakukondwa na Mkhristu uyo wakupeleka na mtima wose. Tiyeni tiwone ivyo mpositole Paulosi wakayowoya pa nkhani iyi. (Ŵerengani 2 Ŵakorinte 9:7.) Mkhristu waunenesko wakuŵa mukaka yayi. M’malo mwake wakupeleka mwakuyana na umo “wadumulira mu mtima wake.”c Ichi chikung’anamura kuti wakudankha kughanaghanirapo pa icho chikukhumbikwa, na kuwona umo wangawovwilirapo. Munthu uyo wakuchita nthena, Chiuta wakukondwa nayo chifukwa “wakutemwa uyo wakupeleka mwakukondwa.” Mu Baibolo linyake ŵali kung’anamura kuti: “Chiuta wakutemwa ŵanthu awo ŵakutemwa kupeleka.”

11. Ntchivichi chikutituma kupeleka chawanangwa kwa Yehova na mtima wose?

¹¹ Chachiŵiri, tikupeleka kuti tiwonge Yehova chifukwa cha vitumbiko vinandi ivyo wali kutipa. Wonani fundo yakuzirwa iyo yili mu Dango la Mozesi. (Ŵerengani Dotoronome 16:16, 17.) Pakuluta ku viphikiro ivyo vikachitikanga katatu pa chaka, mwanalume waliyose wakeneranga kukapeleka chawanangwa “kuyana na thumbiko ilo Yehova” wamupa. Fundo iyi yikulongora kuti, pambere munthu waliyose wandanyamuke kuluta ku chiphikiro, wakeneranga kughanaghanirapo umo Yehova wamutumbikira. Ndipo pamasinda, wadumure mu mtima wake chawanangwa icho wangayegha. Mwakuyana waka, para nase taghanaghanirapo vitumbiko ivyo Yehova watipa, tikuchiskika kuti timupe chawanangwa kufumira pasi pa mtima. Para tamupa Yehova chawanangwa kufumira pasi pa mtima, tikulongora kuti tikuwonga vitumbiko ivyo watipa.—2 Kor. 8:12-15.

12, 13. Kasi vyawanangwa ivyo tikupeleka vikulongora wuli kuti tikutemwa Themba lithu Yesu, ndipo waliyose wangapeleka wuli?

¹² Chachitatu, vyawanangwa vithu vikulongora kuti tikutemwa Themba lithu Yesu Khristu. Vikulongora wuli? Wonani ivyo Yesu wakaphalira ŵalondezgi ŵake pa usiku wakuti machero wafwenge. (Ŵerengani Yohane 14:23.) Yesu wakati: “Usange munthu wakunitemwa, wasungilirenge mazgu ghane.” “Mazgu” ghanyake gha Yesu ni dango lakuti tipharazgenge makani ghawemi gha Ufumu pa charu chose. (Mat. 24:14; 28:19, 20) Para tikuchita vyose ivyo tingakwaniska pa mulimo wa kupharazga Ufumu, ndikuti tikupulikira “mazgu” agha. Tingapeleka nkhongono zithu, nyengo, na vinthu vinyake. Para tikuchita nthena tikulongora kuti tikutemwa Themba lithu Yesu Khristu.

¹³ Pakuti tikujilambika ku Ufumu wa Chiuta, tikupeleka ndalama na mtima wose kuti tikhozgere Ufumu uwu. Kasi tikupeleka wuli? Waliyose wakupeleka kuyana na umo wangafiskira. Ŵabali ŵithu ŵanandi mu charu ichi mbakavu. (Mat. 19:23, 24; Yak. 2:5) Ndipouli, ŵakukhozgeka kumanya kuti icho Yehova na Mwana wake ŵakukhumba, nkhupeleka na mtima wose.—Mrk. 12:41-44.

Kasi Tikupeleka Wuli Ndalama?

14. Kasi kale ŵakachitanga wuli pakugaŵira mabuku?

¹⁴ Kumasinda uku, ŵanthu ŵakapelekangapo ndalama para taŵapa mabuku. Ndalama iyi yikaŵanga yikuru viŵi yayi. Para ŵapharazgi ŵasanga munthu wakunweka, kweni walije ndalama yakuti wangapeleka, ŵakamupanga buku. Chilato chawo chikaŵa chakuti ŵanthu ŵaŵazge na kusanga nagho phindu.

15, 16. (a) Kasi Wupu Wakulongozga ukasintha vichi mu 1990 pa nkhani ya mabuku? (b) Kasi tikupeleka wuli vyawanangwa? (Wonaniso bokosi la mutu wakuti “Kasi Vyawanangwa Ivyo Tikupeleka Vikugwira Ntchito Wuli?”)

¹⁵ Mu 1990, Wupu Wakulongozga ukasintha nthowa yakugaŵira mabuku. Kwamba mu chaka ichi, ku United States, ŵanthu ŵakaphalirikanga kuti mabuku ghithu ghalije mtengo. Kalata yakuya ku mipingo yose mu charu ichi yikati “ŵapharazgi na ŵanthu ŵanyake ŵatorenge mabuku na magazini mwawanangwa. . . . Uyo wakukhumba kupeleka ndalama kuti wawovwirepo pa mulimo uwu wangapeleka. Kweni waliyose wangapoka mabuku, kwali wapelekapo ndalama kwali yayi.” Fundo iyi yikawovwira kumanya kuti waliyose wangapeleka chawanangwa icho wadumura. Kweniso ndivyo malemba ghakuyowoya, chifukwa ghakuti “tikusaska mazgu gha Chiuta yayi.” (2 Kor. 2:17) Pamasinda, ndivyo tikamba kuchita pa charu chose.

¹⁶ Kasi vyawanangwa vikupelekeka wuli? Mu Nyumba ya Ufumu ya Ŵakaboni ŵa Yehova mukuŵa mabokosi ghakuponyamo vyawanangwa. Ŵanthu ŵangaponyamo ndalama mu mabokosi agha, panji ŵangatuma ŵekha ku ofesi ya munthavi. Chaka chilichose mu Gongwe la Mulinda mukuŵa nkhani yakulongosora umo tingapelekera vyawanangwa ivi.

Kasi Ndalama Izi Zikugwira Ntchito Wuli?

17-19. Longosorani umo vyawanangwa vithu vikugwilira ntchito pa (a) mulimo wa pa charu chose, (b) mulimo wa kuzenga Nyumba za Ufumu pa charu chose, (c) mpingo.

¹⁷ Mulimo wa pa charu chose. Ndalama izi zikovwira pa mulimo wa kupharazga pa charu chose. Zinyake zikovwira pakupanga na kutumizga mabuku, kuzenga na kunozgaso maofesi, kweniso zikovwira pa masukulu agho ghakuchitika mu gulu. Ndalama izi zikovwiraso kupwelelera ŵamishonale, ŵalaŵiliri ŵakwendakwenda, na ŵapayiniya ŵapadera. Zinyake zikovwira para ŵabali ŵithu masoka ghaŵawira.d

¹⁸ Mulimo wa kuzenga Nyumba za Ufumu pa charu chose. Ndalama izi ofesi yikuzengera Nyumba za Ufumu. Kweniso zikovwira kuti tinozgere Nyumba za Ufumu para zanangika. Vyawanangwa ivyo ŵanthu ŵakupeleka vikovwira pa mulimo uwu.e

¹⁹ Vyakovwilira mpingo. Ndalama izi zikovwira kunozga Nyumba ya Ufumu. Ŵalara ŵangasachizga kuti ndalama zinyake ŵatumizge ku ofesi ya munthavi ya mu charu chawo kuti ziwovwire pa mulimo wa pa charu chose. Para vyaŵa nthena, ŵalara ŵakuphalira mpingo wose ivyo ŵakolerana. Para mpingo wazomerezga, ŵakutumizga ndalama izi. Mwezi uliwose mubali wa maakaunti wakulemba lipoti, na kuŵazgira mpingo wose.

20. Kasi tingalumba wuli Yehova na ‘vinthu vithu’?

²⁰ Para tikughanaghanira vyose ivyo vikumalira pa mulimo wakupharazga, na kuzgora ŵanthu kuŵa ŵasambiri pa charu chose, tikukhuŵilizgika kuti ‘tichindike Yehova na vinthu vithu.’ (Zinth. 3:9, 10) Vinthu vithu, ni vyose ivyo tingapeleka kuti viwovwire pa mulimo uwu. Wangaŵa katundu, nkhongono, na vinyake vyantheura. Tikukhumba kovwirapo mwakukwana na vinthu ivi. Ntheura tiyeni tiŵikepo mtima kupeleka chilichose icho tingakwaniska. Tikuchindika Yehova na vyawanangwa ivyo tikupeleka ndipo vikulongora kuti tikukhozgera Ufumu wake.