Chakuzizwiska Icho Chikachitika pa Nyanja Yiswesi

Farawo wakati wawona kuti Ŵaisrayeli ŵafuma mu Eguputo, wakaghanaghana kuti wabudiska kuŵazomerezga kuti ŵalutenge. Wakaphalira ŵankhondo ŵake kuti: ‘Nozgani magileta ghane ghose gha nkhondo, ndipo tiŵalondezge! Tachita makora yayi kuŵazomerezga kuti ŵalutenge.’ Farawo na ŵasilikari ŵake ŵakamba kulondezga Ŵaisrayeli.

Yehova wakalongozganga ŵanthu ŵake. Muhanya wakaŵalongozganga na bingu, ndipo nausiku wakaŵalongozganga na moto. Wakaŵalongozga m’paka pa Nyanja Yiswesi, ndipo wakaŵaphalira kuti ŵazenge misasa.

Ŵaisrayeli ŵakawona Farawo na ŵasilikari ŵake ŵakuŵalondezga. Kunthazi kwawo kukaŵa nyanja ndipo kumanyuma kwawo kukizanga ŵasilikari. Ŵaisrayeli ŵakamba kulilira Mozesi kuti: ‘Tose tifwenge! Mphanyi ukatileka waka mu Eguputo.’ Kweni Mozesi wakati: ‘Kopa chara. Mulindilire waka na kuwona umo Yehova watiponoskerenge.’ Mozesi wakagomezganga chomene Yehova, asi nthena?

Yehova wakaphalira Ŵaisrayeli kuti ŵabwangasure misasa iyo ŵakazenga. Mukati mu usiku uwu, Yehova wakaŵika bingu pakati pa Ŵaeguputo na Ŵaisrayeli. Ku chigaŵa icho kukaŵa Ŵaeguputo kukaŵa mdima. Kweni uko kukaŵa Ŵaisrayeli kukaŵa ungweru.

Yehova wakaphalira Mozesi kuti wanyoloskere woko lake pa nyanja. Yehova wakaputiska chimphepo chikuru usiku wose. Nyanja yikagaŵikana ndipo pakaŵa nthowa pakati. Ŵaisrayeli wose ŵakajumpha pakomira kuluta ku sirya linyake la nyanja. Maji ghakimilira uku na uku, ndipo iwo ŵakajumpha pakati.

Ŵasilikari ŵa Farawo ŵakamba kulondezga Ŵaisrayeli ndipo nawo ŵakanjira pa Nyanja. Yehova wakatimbanizga ŵasilikari ŵa Farawo. Matayala gha magileta ghawo ghakamba kukhulika. Ŵankhondo ŵakachemerezga kuti: ‘Tiyeni tifumemo muno! Yehova wakuŵalwera nkhondo.’

Yehova wakaphalira Mozesi kuti: ‘Nyoloskera woko lako pa nyanja.’ Nyengo yeneyiyo, maji ghakaweleraso ndipo ghakabizga ŵasilikari wose ŵa Ŵaeguputo. Farawo na ŵasilikari ŵake wose ŵakafwira papo. Pakaŵavya wakupona.

Ŵaisrayeli ŵakati ŵafika ku sirya linyake la nyanja, ŵakamba kwimba sumu ya kuwonga Yehova, ŵakati: ‘Yimbirani Yehova, pakuti wakwezgeka chomene. Waponya mu nyanja hachi na wakukwerapo wake.’ Apo ŵanthu ŵakayimbanga, ŵanakazi ŵakavinanga uku ŵakulizga tung’oma. Waliyose wakakondwa chomene chifukwa Yehova wakaŵaponoska.