Wankhondo na Kasungwana

Mu charu cha Siriya, mukaŵa kasungwana ka Chiisrayeli, ako kakaŵa kutali na kwawo. Iko kakakoleka na ŵasilikari ŵa Siriya, ndipo kakaŵa kantchito ka mwanakazi wa Namani. Namani wakaŵa mulongozgi wa ŵankhondo. Kasungwana aka kakasopanga Yehova nangauli ŵanthu awo kakakhalanga nawo, ŵakasopanga Yehova yayi.

Namani wakakoleka na nthenda ya vyoni, ndipo nyengo zose wakapulikanga vyakuŵinya. Kasungwana kara kakakhumbanga chomene kuti kamovwire. Kakaphalira mwanakazi wa Namani kuti: ‘Nkhumanya uyo wangachizga afumu ŵinu. Ŵalute ku Israyeli, kwa ntchimi ya Yehova, zina lake Elisha. Wangakaŵachizga afumu ŵinu.’

Mwanakazi wa Namani wakamuphalira mfumu wake ivyo kasungwana kakayowoya. Namani wakaŵa wakunozgeka kuchita chilichose kuti wachire. Ntheura wakaluta ku nyumba ya Elisha ku Israyeli. Namani wakakhazganga kuti Elisha wamupokelerenge nga ni munthu wakuzirwa. Kweni m’malo mwakuti wayowoye nayo yekha, Elisha wakatuma muteŵeti wake kuti wakamutawuzge Namani na kumuphalira kuti: ‘Luta ukageze mu Mlonga wa Yorodani maulendo 7, ndipo uchirenge.’

Namani wakakhuŵara chomene wati waphalirika nthena. Iyo wakati: ‘Ine natenge ntchimi iyi yichemenge pa zina la Chiuta wake na kwendeska woko lake pa vyoni vyane na kunichizga. M’malo mwake, wakuniphalira kuti nkhageze mu mlonga wa ku Israyeli. Tili na milonga yiwemi mu Siriya. Walekerachi kunituma waka kuti nkhageze mu milonga yithu?’ Namani wakakwiya chomene, ndipo wakawukapo pa nyumba ya Elisha.

Ŵateŵeti ŵake ŵakamovwira Namani kuti waghanaghanirepo makora ivyo wakaphalirika na Elisha. Ŵakati kwa Namani: ‘Asi mungachita chilichose kuti muchire? Ivyo ntchimi iyi yamuphalirani kuchita ni vipusu waka. Mwalekerachi kuchita waka?’ Namani wakaŵapulikira ŵateweti ŵake. Wakaluta ku Mlonga wa Yorodani na kubira mu maji maulendo 7. Apo wakazuwukanga ulendo wa nambara 7, Namani wakawona kuti wachira. Wakawonga chomene, ndipo wakalutaso kwa Elisha kuti wakamuwonge. Namani wakati: ‘Sono namanya kuti Yehova ndiyo ni Chiuta waunenesko.’ Kasi ukughanaghana kuti kasungwana ka Chiisrayeli kara kakajipulika wuli kuwona kuti Namani wachira?