Wakaŵa Wamtafu Kweni Paumaliro Wakapulikira

KASI nawe uli kucitapo mtafu?—a Utepanji uli kuwonelerapo vidiyo iyo ŵapapi ŵako ŵakakukanizga. Ukati waghanaghanirapo panji pamasinda ukadandaura kuti ukaleka kupulikira. Munthu munyake uyo nayo pakwamba wakakana kupulikira kweni pamasinda wakapulikira wakaŵa Namani. Tiye tiwone ico cikamovwira kuti wamarane na suzgo ili.

Yelezgera kuti nase tikaŵako vilimika 3,000 ivyo vyajumpha. Namani wakaŵa mulara wa ŵasilikari Ŵasiriya ndipo wakaŵa munthu wakuzirwa. Iyo ndiyo wakaphaliranga ŵasilikari cakucita ndipo ŵakapulikiranga. Kweni Namani wakakoleka na nthenda yakofya ya vyoni. Cifukwa ca vyoni wakawonekanga wakunyanyiska comene ndipo wakwenera kuti wakapulikanga vyakuŵinya.

Muwoli wa Namani wakaŵa na kamsungwana kanchito ka ku Israyeli. Zuŵa linyake kamsungwana aka kakaphalira muwoli wa Namani uyu za Elisha wa ku caru ca kwake. Kakati Elisha uyu wangamucizga Namani. Namani wakati wapulika, nyengo yeneyiyo wakakhumba kuluta kwa Elisha. Wakanyamura vyawanangwa vinandi na kwamba ulendo pamoza na ŵasilikari ŵake. Namani wakaluta kwa Themba la Israyeli na kuliphalira cifukwa ico wizira.

Elisha wakapulika ndipo wakatuma uthenga kwa themba kuti Namani wize kwa iyo. Namani wati wafika ku nyumba ya Elisha, Elisha wakatuma waka thenga kuti likaphalire Namani kuti wakageze ku Mlonga wa Yorodani kankhondi na kaŵiri. Elisha wakati para Namani wacita nthena wacirenge. Kasi ukughanaghana kuti Namani wakajipulika wuli?—

Wakakwiya. Wakacita mtafu na kukana kupulikira nchimi ya Ciuta. Wakaphalira ŵasilikari ŵake kuti milonga yakwawo ‘njiwemi kugezamo kuluska maji ghose.’ Namani wakamba kuwelera kwawo. Kweni kasi ukumanya ico ŵasilikari ŵake ŵakamufumba?— Ŵakati: “Kasi nchimi yimutumaninge kucita cinthu cikuru asi mphanyi mwacita?” Ipo mwalekeraci kupulikira kucita cinthu cipusu ici, kugeza na kutozgeka?

Namani wakapulikira ndipo wakacita ivyo ŵasilikari ŵake ŵakayowoya. Wakanjira mu maji na kufuma kwa nyengo zakukwana 6. Kweni apo wakafumanga mu maji kanambara 7 wakazizwa kuwona kuti vyoni vyamara. Wakacira. Nyengo yeneyiyo wakalutaso ku nyumba ya Elisha iyo yikaŵa pamtunda wa makilomita 48 kuti wakamuwonge. Wakakhumbanga kupa Elisha vyawanangwa vyapacanya, kweni Elisha wakakana kutorapo nanga nchimoza.

Ntheura, Namani wakapempha cinthu cinyake kwa Elisha. Kasi ukucimanya ico wakapempha?— Wakapempha kuti wayegheko “dongo,” pa nyuru ziŵiri na kuluta nalo kwawo. Kasi ukumanya cifukwa ico wakapemphera dongo?— Namani wakakhumbanga kuti wakapeleke sembe pa dongo la ku Israyeli ilo nda ŵanthu ŵa Ciuta. Namani wakalayizga kuti wasopengeso ciuta munyake cara padera pa Yehova. Wakaleka nkhwesa ndipo wakaŵa wakukhumbisiska kupulikira Ciuta waunenesko.

Kasi wawona umo ungaŵira nga ni Namani?— Usange ndiwe wamtafu nga ndiyo nawe ungasintha. Para ungazomera kuti ŵakovwire, mbwenu uŵenge muwemi waka.