BOKOSI 1B
Ivyo Vili mu Buku la Ezekiyeli
Tingayowoya kuti buku la Ezekiyeli lili kugaŵika nthe:
CHAPUTARA 1 M’PAKA 3
Mu 613 B.C.E., apo Ezekiyeli wakakhalanga na Ŵayuda awo ŵakaŵa ŵazga ku Babuloni, Yehova wakamulongora mboniwoni ndipo wakamutuma kuti wakachime ku Ŵayuda awo ŵakakhalanga mumphepete mwa mlonga wa Kebara.
CHAPUTARA 4 M’PAKA 24
Pakati pa 613 na 609 B.C.E., Ezekiyeli wakayowoya uchimi wakukhwaskana na kweruzgika kwa Yerusalemu na ŵanthu ŵake ŵakugaluka kweniso ŵakusopa vikozgo.
CHAPUTARA 25 M’PAKA 32
Kwambira mu 609 B.C.E., Ŵababuloni ŵakamba kuwukira Yerusalemu kaumaliro, ndipo Ezekiyeli wakaleka kuyowoya uthenga wa cheruzgo cha Yerusalemu, wakamba kuyowoya vya mitundu yinyake yapafupi—Amoni, Edomu, Eguputo, Mowabu, Filisitiya, Sidoni, na Ture.
CHAPUTARA 33 M’PAKA 48
Pakuti Yerusalemu na tempile lake vikaŵa vyakubwanganduka, kwambira mu 606 B.C.E., Ezekiyeli wakamba kuyowoya uthenga wa chigomezgo—nkhani yakukondweska yakuti ŵanthu ŵazamwambaso kusopa kutuŵa.
Buku la Ezekiyeli lili kulembeka mu ndondomeko iyo vinthu vikachitikira kweniso kuyana na mutu wa nkhani. Mauchimi ghakuyowoya vya kuparanyika kwa Yerusalemu na tempile lake ndigho ghakamba kuyowoyeka pambere mauchimi ghakuyowoya vya kuwezgerapo kusopa kutuŵa ghandayowoyeke. Ichi ntchakupulikikwa, chifukwa mauchimi ghakuyowoya vya kuwezgerapo kusopa kutuŵa ghakulongora kuti kusopa uku kukalekeka pa tempile.
Chinyake ntchakuti mauchimi gha Ezekiyeli ghakususka mitundu iyo yikazingilizga Israyeli (chaputara 25 m’paka 32) ghali kulembeka pakati pa mauthenga gha cheruzgo pa Yerusalemu na mauchimi ghakuyowoya vya kuwezgerapo kusopa kutuŵa. Munthu munyake wakusanda Baibolo wakayowoyapo pa mauthenga gha cheruzgo cha mitundu yinyake agho Ezekiyeli wakalemba, wakati: “Ghali kuŵikika pa malo ghawemi chomene, chifukwa kukwamba wakulongosora vya ukali wa Chiuta pa ŵanthu ŵake, ndipo kuumaliro Chiuta wakulongora lusungu ŵanthu ŵake, chifukwa chilango cha ŵalwani ŵawo ntchigaŵa cha kuwombora ŵanthu ŵake.”