Kasi Yerusalemu Wakimiranga Chikhristu Chautesi?

Kale mu mabuku ghithu tikatenge Yerusalemu wakugaluka wakwimira Chikhristu chautesi. Tikatenge vinthu ivyo vikachitikanga mu Yerusalemu, nga nkhusopa vikozgo na vimbundi, vikuyana waka na ivyo vikuchitika mu Chikhristu chautesi. Kweni sono mu mabuku ghithu, kusazgapo ili, tili kuleka kulongosora kuti uchimi unyake ukwimira chinthu chinyake, pekha usange ndivyo Baibolo likuyowoya. Kasi pali chifukwa chakupulikikwa cha mu Malemba chakuyowoyera kuti Yerusalemu wakimiranga Chikhristu chautesi? Yayi.

Wonani fundo iyi: Yerusalemu likaŵa likuru la kusopa kutuŵa, ndipo pamanyuma ŵanthu ŵake ŵakagaluka. Kweni Chikhristu chautesi chindakhozgerepo kusopa kutuŵa. Kufuma waka apo chikambira m’ma 300 C.E., nyengo zose chikusambizga vyautesi.

Chinyake ntchakuti Ŵababuloni ŵakati ŵaparanya Yerusalemu, Yehova wakawezgerapo msumba uwu ndipo ukaŵaso likuru la kusopa kutuŵa. Kweni Chikhristu chautesi Chiuta wandachitemwepo, ndipo para chazakaparanyika pa suzgo yikuru, chizamwambiraso yayi.

Ipo fundo njakuti wuli? Apo tikusanda mauchimi gha mu Baibolo agho ghakafiskika pa Yerusalemu wakugaluka, tingayowoya kuti, ‘Ivi vikuyana waka na ivyo tikuwona mu Chikhristu chautesi.’ Kweni palije ukaboni mu Malemba wakuti Yerusalemu wakimiranga Chikhristu chautesi.