SAMBIRO 8

Viyelezgero Ivyo Vikusambizga

Mateyu 13:34, 35

FUNDO YIKURU: Lutilirani kusazgirako luso lwinu lwakusambizga na viyelezgero vipusu kweniso ivyo vingawovwira ŵategherezgi kusambira fundo zakuzirwa.

UMO MUNGACHITIRA:

Sankhani viyelezgero vipusu. Nga ni Yesu, gwiliskirani ntchito tunthu tuchokotuchoko kuti mulongosore vinthu vikuru, na vinthu vipusu kuti mulongosore vinthu vinonono. Kusazgirako fundo zambura kukhumbikwa yayi chifukwa zingatimbanizga chiyelezgero chose. Woneseskani kuti chiyelezgero chinu chikukolerana nadi na ivyo mukusambizga. Ivi vikovwira kuti ŵategherezgi ŵaleke kutimbanizgika nacho.

Ŵani maso. Wonani malo agho muli, ŵazgani mabuku ghithu, na kutegherezga ku ŵasambizgi ŵaluso. Apo mukuchita nthena, wonani viyelezgero ivyo mungagwiliskira ntchito kuti namwe musazgireko luso lwinu lwakusambizga. Mulembenge viyelezgero ivi na kuvisunga.
Ghanaghanirani ŵategherezgi ŵinu. Sankhani viyelezgero ivyo ŵategherezgi ŵinu ŵangavimanya makora ndipo ŵanganweka navyo. Woneseskani kuti viyelezgero ivi vileke kulengeska panji kukwiyiska ŵategherezgi ŵinu.
Sambizgani fundo yikuru. Ŵikanipo mtima kulongosora fundo zikuru, zichoko yayi. Woneseskani kuti ŵategherezgi ŵinu ŵamukumbuka vyose viŵiri, chiyelezgero kweniso ivyo ŵasambira mu chiyelezgero chinu.