Yowoyani Viyelezgero Kuti Musambizge Fundo Zikuru

Para tikupanga maulendo ghakuwelerako, panji tikuchitiska masambiro gha Baibolo, tikwenera kuŵawovwira ŵanthu kuti ŵapulikiske fundo zikuru. Tikwenera kuyowoya viyelezgero pakudidimizga fundo zikuru izi. Para tichitenge nthena, ŵanthu ziŵafikenge pamtima ndipo chiŵenge chipusu kuti ŵazikumbukenge.

Para mukunozgekera ulendo wakuwelerako panji sambiro la Baibolo, sankhani fundo zikuru izo mukukhumba kuti mukazilongosore mwakupulikikwa makora. Pamanyuma sankhani viyelezgero vipusu vyakukhwaskana na ivyo ŵanthu ŵakukumana navyo pa umoyo wawo wa zuŵa na zuŵa. (Mt 5:14-16; Mrk 2:21; Lu 14:7-11) Mughanaghanirengeso vinthu ivyo ŵategherezgi ŵinu vili kuŵachitikirapo panji umo ŵali kukulira, kweniso ivyo ŵakuchita pasono. (Lu 5:2-11; Yoh 4:7-15) Muzamuŵa ŵakukondwa para mukuwona ŵanthu ŵakupulikiska fundo za mu Baibolo.

WONELERANI VIDIYO YA MUTU WAKUTI MUKONDWENGE PAKUZGORA ŴANTHU KUŴA ŴASAMBIRI—SAZGIRANIKO LUSO LWINU—YOWOYANI VIYELEZGERO KUTI MUSAMBIZGE FUNDO ZIKURU, NDIPO PAMANYUMA ZGORANI MAFUMBO AGHA:

• 

  Chifukwa wuli awo tikusambira nawo Baibolo ŵangakhumbikwira kuŵawovwira kuti ŵapulikiske mavesi gha mu Baibolo?

• 

  Kasi Neeta wakayowoya chiyelezgero wuli kuti walongosore fundo ya pa Ŵaroma 5:12?

• 

  Kasi viyelezgero viwemi vingawovwira wuli awo tikuŵapharazgira?

• Chifukwa wuli mu uteŵeti tikwenera kugwiliskira ntchito mavidiyo na vinthu vinyake ivyo gulu la Yehova likutipa?