Kasi Mungachita Wuli Kuti Musange Chandulo Para Mukuŵerenga Baibolo?

Kasi muli kughanaghanapo vyakuchita chinthu chinyake chikuru chomene, kweni mukawona kuti mungakwaniska yayi chifukwa ntchakusuzga? Kuti chimuŵirani chipusu, panji mukaghanaghana kuti muchite pachokopachoko. Ndimo viliriso na kuŵerenga Baibolo. Nyengo zinyake mungajifumba kuti, ‘Kasi nambirenge mpha?’ Mu sambiro ili, tidumbiskanenge vinthu vinyake ivyo mungachita kuti mukondwenge para mukuŵerenga na kusambira Baibolo.

1. Chifukwa wuli mukwenera kuŵerenga Baibolo nyengo zose?

Munthu uyo nyengo zose wakuŵerenga Baibolo, panji kuti “dango la Yehova,” wakuŵa wakukondwa ndipo vinthu vikumwendera makora. (Ŵazgani Salimo 1:1-3.) Panji mungamba kuŵerenga kwa maminiti ghachoko waka zuŵa lililose. Para mwamba kughapulikiska Mazgu gha Chiuta, vimunozgeraninge ndipo mukondwenge chomene para mukuŵerenga Baibolo.

2. Kasi ntchivichi chingamovwirani kuti musange chandulo para mukuŵerenga Baibolo?

Kuti musange chandulo para mukuŵerenga Baibolo, mukwenera kuyima dankha na “kughanaghanirapo.” (Joshuwa 1:8) Apo mukuŵerenga, jifumbani kuti: ‘Kasi mavesi agha ghakunisambizga vichi vya Yehova Chiuta? Kasi ningaghalondezga wuli? Kasi ningawovwira nagho wuli ŵanyake?’

3. Kasi mungachita wuli kuti musange nyengo yakuŵerengera Baibolo?

Kasi vikumusuzgani kusanga nyengo yakuŵerengera Baibolo? Taŵanandi vikutisuzga. Yezgani ‘kugwiliskira ntchito makora nyengo yinu.’ (Ŵaefeso 5:16) Mungachita makora kupatura nyengo yakuŵerengera Baibolo zuŵa lililose. Ŵanyake ŵakutemwa kuŵerenga Baibolo mulenjilenji. Ŵanyake ŵakutemwa kuŵerenga muhanya para ŵakupumura. Apo ŵanyake ŵakutemwa kuŵerenga mise pambere ŵandagone. Kasi kwa imwe nyengo yiwemi yingaŵa nji?

MANYANI VINANDI

4. Manyani ivyo mungachita kuti mukondwenge pakuŵerenga Baibolo

Nyengo zinyake chingaŵa chakusuzga kuti mwambe kuŵerenga Baibolo. Ndipouli, usange namwe ‘munganwekera’ kusambira Baibolo, vingamba kumunozgerani nga umo mungayambira kutemwa chakurya icho nkhakwamba kuryapo. Ŵazgani 1 Petrosi 2:2, kufuma apo dumbiskanani fumbo ili:

• Kasi mukughanaghana kuti namwe vingamba kumunozgerani kuŵerenga Baibolo zuŵa lililose?

Wonelerani VIDIYO iyo yikulongora ivyo ŵanyake ŵakachita kuti ŵambe kutemwa kuŵerenga Baibolo. Kufuma apo dumbiskanani mafumbo agha.

VIDIYO: Ŵachinyamata, Temwani Mazgu gha Chiuta (5:33)

• Kuyana na ivyo mwawona mu vidiyo, kasi ŵachinyamata ŵakatonda masuzgo wuli?

• Kasi ntchivichi chikaŵawovwira kuti ŵalutilire kuŵerenga Baibolo?

• Kasi ŵakachita wuli kuti ŵakondwenge pakuŵerenga Baibolo?

Ivyo vingamovwirani kuti mwambe kuŵerenga Baibolo:

• Sankhani Baibolo ilo lili kung’anamulika makora. Yezgani kuŵerenga Baibolo la Mang’anamuliro gha Charu Chiphya usange lilimo mu chiyowoyero chinu.

• Mungamba kuŵerenga nkhani izo mukuwona kuti zingamukondweskani chomene. Wonani masachizgo ghanyake mu tchati chakuti “Yambanipo Kuŵerenga Baibolo.”

• Manyani apo mwalekezgera kuŵerenga. Wonani masachizgo ghanyake pa tchati cha mutu wakuti “Manyani Apo Mwalekezgera Kuŵerenga Baibolo” mu buku ili.

• Gwiliskirani ntchito JW Library^® app. Mungaŵerenga na kutegherezga Baibolo pa foni yinu, pa tabuleti, panji pa vinthu vinyake.

• Gwiliskirani ntchito vyakusazgirapo mu Baibolo la Mang’anamuliro gha Charu Chiphya. Muli mapu, matchati, na mang’anamuliro gha mazgu gha mu Baibolo, ndipo ivi vingamovwirani kuti mukondwenge pakuŵerenga Baibolo.

5. Munozgekerenge

Ŵazgani Salimo 119:34, kufuma apo dumbiskanani fumbo ili:

• Chifukwa wuli ntchakuzirwa kulomba dankha pambere mundambe kuŵerenga panji kunozgekera ivyo musambirenge?

Kasi mungachita wuli kuti musangenge chandulo na ivyo mukuŵerenga pa chigaŵa chilichose? Apo mukunozgekera sambiro lililose, yezgani nthowa izi:

1. Ŵerengani dankha ndime zakwambilira.

2. Ŵerengani malemba ghose na kuwona umo ghakukolerana na nkhani iyo.

3. Gwarani mzere kusi kwa mazgoro gha mafumbo; ivi vizamumovwirani para mukusambira na msambizgi winu.

Kasi mukumanya?

Ŵakaboni ŵa Yehova ŵagwiliskirapo ntchito Mabaibolo ghakupambanapambana. Kweni Baibolo la Malemba Ghakupatulika mu Mang’anamuliro gha Charu Chiphya ndilo ŵakulitemwa chomene, chifukwa likuneneska, ndakupulikikwa makora ndipo mukusangika zina la Chiuta.—Wonani nkhani ya pa Intaneti ya mutu wakuti “Kasi Ŵakaboni ŵa Yehova Ŵali na Baibolo Lawo?”

MWAKUDUMURA

Kuti musange chandulo na ivyo mukuŵerenga mu Baibolo, patulani nyengo, lombani kuti mupulikiskenge ivyo mukuŵerenga, ndipo munozgekerenge ivyo muzamusambira.

Kuweleramo

• Kasi ntchivichi chingamovwirani kuti musangenge chandulo na ivyo mukuŵerenga mu Baibolo?

• Kasi mphawuli apo chingaŵa chiwemi kuŵerenga na kusambira Baibolo?

• Chifukwa wuli mukwenera kunozgekera sambiro la Baibolo?

SANGANI FUNDO ZAKUSAZGIKIRA

Weleranimo fundo zinyake izo zingamovwirani kuti musange chandulo para mukuŵerenga Baibolo.

“Kasi Mungachita Wuli Kuti Mupulikiskenge Baibolo?” (Gongwe la Mulinda Na. 1 2017)

Wonani vinthu vitatu ivyo vingamovwirani pakuŵerenga Baibolo.

“Kasi Baibolo Linganovwira Wuli?—Chigaŵa 1: Limanya Makora Baibolo Lako” (Nkhani ya pa Intaneti)

Wonani ivyo mungachita kuti mukondwenge pakuŵerenga Baibolo.

“Kasi Baibolo Linganovwira Wuli?—Chigaŵa 2: Ivyo Ungachita Kuti Ukondwenge Para Ukuŵazga Baibolo” (Nkhani ya pa Intaneti)

Pemphani masachizgo ku awo ŵaŵerenga Baibolo kanandi waka.

Mungasanga Chandulo Para Mukusambira Pamwekha (2:06)