SAMBIRO 56
Lutilirani Kukolerana mu Mpingo
Para tili na Ŵakhristu ŵanyithu, nase tikujipulika nga Themba Davide ilo likati: “Ntchiwemi na chakukondweska nadi kuti ŵabali ŵakukhala pamoza mwakukolerana!” (Salimo 133:1) Vikuchitika mwangozi waka yayi kuti tikoleranenge. Waliyose wa ise wakwenera kuchitapo kanthu kuti tilutilire kukolerana.
1. Kasi ŵanthu ŵa Chiuta ŵakumanyikwa na vichi?
Para mungachita maungano na mpingo wa mu charu chinyake, panji mungapulika yayi chiyowoyero. Kweni pali vinthu vinyake ivyo vingamupangiskani kuti mujipulike nga kuti muli mu mpingo winu. Chifukwa wuli? Chifukwa ntchakuti tose, kulikose uko tili, tikusambira vyakuyana. Ndipo tikuyezgayezga kutemwana. Kulikose uko tingaŵa, tose tikuchema pa “zina la Yehova, na kumuteŵetera na mtima umoza.”—Zefaniya 3:9.
2. Kasi mungachita wuli kuti mukhozgere umoza?
“Mutemwanenge chomene kufumira mu mtima.” (1 Petrosi 1:22) Kasi mungalondezga wuli ulongozgi uwu? Lekani kukhalira waka kuwona ivyo ŵanyinu ŵakubudiska, kweni muwonenge viwemi ivyo ŵakuchita. Mungachezganga waka na ŵa nthanga zinu pera yayi panji awo mukuyana waka vyakuchita, kweni muchezgenge na ŵabali na ŵadumbu ŵakupambanapambana kuti muŵamanye makora. Tikweneraso kuchita chilichose icho tingafiska kuti tileke kuŵa na sankho.—Ŵazgani 1 Petrosi 2:17.a
3. Kasi mungachita wuli para mwapambana maghanoghano na Mkhristu munyinu?
Nangauli tikukolerana kweni ndise ŵambura kufikapo. Nyengo zinyake tikukhuŵazga ŵanyithu. Baibolo likuti: “Lutilirani . . . kugowokerana. . . . Nga umo Yehova wakamugowokelerani na mtima wose ndimo namweso muchitirenge.” (Ŵazgani Ŵakolose 3:13.) Tikumubudira Yehova kanandi waka, kweni wakulutilira kutigowokera. Ntheura nayo wakukhumba kuti tigowokerenge ŵanyithu. Para mwamanya kuti mwabudira munyinu, chitanipo kanthu mwaluŵiro kuti muwezgerepo mtende.—Mateyu 5:23, 24.b
MANYANI VINANDI
Wonani ivyo mungachita kuti mu mpingo muŵe mtende na umoza.
Kasi mungachita wuli kuti muwezgerepo mtende?
4. Mazgani sankho
Tose tikukhumba kutemwa ŵabali na ŵadumbu ŵithu. Kweni kanandi vikutisuzga kutemwa munthu uyo tikupambana nayo mtundu panji chiyowoyero. Kasi ntchivichi chingatovwira kuti titemwenge munthu waliyose? Ŵazgani Milimo 10:34, 35, kufuma apo dumbiskanani mafumbo agha:
Yehova wakupokelera ŵanthu ŵa mtundu uliwose kuti ŵaŵe Ŵakaboni ŵake. Kasi mungachita wuli kuti mutemwenge ŵanthu ŵa mitundu yose nga umo Yehova wakuchitira?
Kasi ni vinthu wuli ivyo vikupangiska kuti ŵanthu ŵasankhanenge uko mukukhala, ivyo mukwenera kugega?
Ŵazgani 2 Ŵakorinte 6:11-13, kufuma apo dumbiskanani fumbo ili:
Kasi mungachita wuli kuti mutemwenge ŵabali na ŵadumbu awo mukupambana nawo mitheto, mtundu, kweniso vyakuchita?
5. Mugowokenge na mtima wose ndipo wezgeranipo mtende
Yehova wakutigowokera na mtima wose nangauli iyo wakutibudira yayi. Ŵazgani Salimo 86:5, kufuma apo dumbiskanani mafumbo agha:
Kasi Yehova wakutigowokera kufika mpha?
Chifukwa wuli mukuwonga kuti Yehova wakutigowokera?
Kasi ni vinthu wuli ivyo vingapangiska kuti tileke kukolerana na ŵanyithu?
Kasi tingamuyezga wuli Yehova na kulutilira kukolerana na ŵabali na ŵadumbu ŵithu? Ŵazgani Zintharika 19:11, kufuma apo dumbiskanani fumbo ili:
Kasi mungachita wuli kuti munozge vinthu para munthu wamukwiyiskani panji wamubudirani?
Nyengo zinyake tikubudira ŵanyithu. Kasi tikwenera kuchita wuli para taŵabudira? Wonelerani VIDIYO, kufuma apo dumbiskanani fumbo ili.
kuyana na ivyo mwawona mu vidiyo, kasi mudumbu wakachita wuli kuti wawezgerepo mtende?
6. Wonani vinthu viwemi ivyo ŵabali na ŵadumbu ŵakuchita
Para taŵamanya makora ŵabali na ŵadumbu ŵithu, tikumanya vinthu ivyo ŵakuchita makora na ivyo ŵakubudiska. Kasi tingachita wuli kuti tiwonenge waka viwemi ivyo ŵakuchita makora? Wonelerani VIDIYO, kufuma apo dumbiskanani fumbo ili.
Kasi ntchivichi chingamovwirani kuti muwonengemo waka viwemi mu ŵabali na ŵadumbu?
Yehova wakuŵika waka mtima pa vinthu viwemi ivyo tikuchita. Ŵazgani 2 Midauko 16:9a, kufuma apo dumbiskanani fumbo ili:
Kasi mukujipulika wuli kumanya kuti Yehova wakuŵika waka mtima pa vinthu viwemi ivyo mukuchita?
Mphete yagolide yikulutilira kuŵa yakuzirwa nanga yingaŵa yakubanthuka pachoko waka. Mwakuyana waka nangauli ŵabali na ŵadumbu mbambura kufikapo kweni mbakuzirwa mu maso gha Yehova
IVYO ŴANYAKE ŴAKUYOWOYA: “Munthu wakwenera kuphepiska dankha kuti nimugowokere.”
Chifukwa wuli tikwenera kuŵikapo mtima kugowokera ŵanyithu?
MWAKUDUMURA
Mungawovwira kuti mpingo ulutilire kukolerana para mukugowokera kweniso kutemwa ŵabali na ŵadumbu wose.
Kuweleramo
Kasi mungamazga wuli sankho?
Kasi mungachita wuli para mwapambana maghanoghano na Mkhristu munyinu?
Chifukwa wuli mukwenera kuyezga Yehova pa nkhani ya kugowokera ŵanyinu?
SANGANI FUNDO ZAKUSAZGIKIRA
Wonani umo ntharika ya Yesu yingatovwilira kuti tileke kweruzga ŵanyithu.
Kasi tikwenera kuphepiska nangauli tingawona kuti ndise yayi tabuda?
“Kuphepiska—Nthowa Yakupangira Mtende” (Gongwe la Mulinda, Novembala 1, 2002)
Wonani ivyo vyawovwira ŵanji kuti ŵaleke mtima wa sankho.
Wonani ivyo mungachita para mwapambana maghanoghano na munyinu kuti mu mpingo mulutilire kuŵa mtende.
“Kasi Tingamazga Wuli Mphindano Mwachitemwa?” (Gongwe la Mulinda, Meyi 2016)
a Mazgu Ghakuumaliro 6 ghakulongosora umo chitemwa chikovwilira Ŵakhristu kuti ŵaleke kuthandazga matenda ghakwambukira.
b Mazgu Ghakuumaliro 7 ghakulongosora ivyo tingachita para tapambana maghanoghano na munyithu pa nkhani za bizinesi kweniso vya malango.