Kasi Mungasenderera Kufupi na Ciuta Wambura Kuwoneka?

‘Kasi ndingapanga wuli ubwezi wapafupi na muntu mweneuyo nkumuwona cara?’ mungafumba nteura. Fumbo ili lingawoneka liweme. Kweni aghanaghanirani ici:

KASI kuwona kukovwira wuli kuti paŵe ubwezi wambura kumara? Kasi vintu vyambura kuwoneka na maso nvyakuzirwa nga ni umo viliri ivyo vikuwoneka na maso cara, mutepanji kuviruskaso? Inya nadi! Ndico cifukwa cake ŵantu ŵanyake ŵapanga ubwezi na ŵanji mwakulemberana makalata, kuphalirana ivyo ŵakutemwa, ivyo ŵakutinka, vilato vyawo, ivyo vikuŵakondweska, na mikhaliro yawo yinyake.

Ŵantu ŵaciburumutira nawo ŵakupereka ukaboni wakuti kuwona kuti ndiko kungapangiska ŵantu kuŵa paubwezi pera cara. Aghanaghanirani za Edward na Gwen, ŵakutorana ŵaciburumutira.a Edward wakakumana na Gwen pa sukulu ya ŵantu ŵaciburumutira, penepapo wose ŵakasambiranga. Edward wakadokera mikhaliro ya Gwen, comene-comene kugomezgeka kwake mu kayowoyero na vyakucita, ndiposo kutemwa ncito kwake. Ku cigaŵa cinyake, Gwen wakamba kutemwa Edward cifukwa, nga ni umo Gwen wakayowoyera, “wakaŵa na mikhaliro iyo nkasambizgika kuti njiweme.” Cibwezi cikayamba, ndipo panyuma pa virimika vitatu ŵakatorana.

“Para mukukhala pamoza,” wakayowoya nteura Edward, “uciburumutira ungatondekeska muntu cara kukorana ubwezi na munyake. Mungatondeka kuwonana, kweni maghanoghano nga ciburumutira cara.” Sono, panyuma pa virimika 57, ŵacali kutemwana comene. Iwo ŵakuyowoya kuti cisisi ca kukoleranako kwawo kukusazgapo pafupifupi vintu vinayi: (1) kumanya mikhaliro ya munyako, (2) kughanaghanira na kukondweskeka na mikhaliro iyo, (3) kuyowoyeskana makora, na (4) kucitira vintu pamoza.

Fundo zinayi izi ndi zakukhumbikwa comene kuti paŵe kukolerana kuweme, kwali pangaŵa pakati pa mabwezi, ŵakutorana, kweni kuruska vyose, pakati pa ŵantu na Ciuta.

[Mazgu ghamusi]