Kovwira Ŵanthu Ŵambura Kulaŵiska Kuti Ŵamanye Yehova

1. Kasi Yesu wakalongora wuli lusungu ku ŵanthu ŵambura kulaŵiska?

¹ Kukakhala mazuŵa ghachoko waka kuti Yesu wafwe. Apo Yesu wakafumanga mu msumba wa Yeriko, ŵanthu ŵaŵiri ŵambura kulaŵiska ŵakachemerezga kuti: ‘Fumu, muŵe nase na chisungusungu!’ Nangauli Yesu wakaghanaghananga za viyezgo ivyo wakaŵa pafupi kukumana navyo, kweni wakimilira, wakaŵachema na kuŵachizga. (Mat. 20:29-34) Kasi tingalongora wuli lusungu ku ŵanthu ŵambura kulaŵiska nga umo wakachitira Yesu?

2. Kasi ku malo agho kukusangika ŵanthu ŵanandi, nga nkhu msika, tingachita wuli pakupharazgira munthu wambura kulaŵiska?

² Ŵawovwirani: Para mwakumana na munthu wambura kulaŵiska, kwali nkhu msika, muphalirani zina linu ndiposo kuti muli ŵakunozgeka kumovwira. Pakuti ŵanthu ŵanandi ŵakuŵayuzga ŵanthu aŵa, nyengo zinyake wangamukayikirani pakwamba. Kweni wangafwatuka namwe para mungalongora kuti mukumughanaghanira. Kumbukani kuti uchibulumutira ulipo wakupambanapambana. Kumanya umo uchibulumutira wake uliri kungamovwirani kuti mupeleke wovwiri wakwenelera. Para mwamovwira, mungamuphalira kuti mukusambizga ŵanthu Baibolo. Mupemphani kuti mumuŵazgire lemba, nga ni Salmo 146:8, panji Yesaya 35:5, 6. Para wakuŵazga mabuku gha ŵanthu ŵambura kulaŵiska, mufumbani usange wangatemwa mabuku agho ghangamovwira kuti wamanye vinandi vyakukhwaskana na Baibolo. Mungamovwiraso kukopera mabuku na vinyake vyakutegherezga pa jw.org/tum. Usange wali na kompyuta iyo yili na pulogiramu yakuŵazga mazgu agho ghali pa sikilini, mbwenu wangakondwa chomene usange mungamukopelera nkhani zakulembeka pa jw.org/tum. Mungakoperaso mabuku agho ghali mu fomati yakuchemeka kuti RTF.—Wonani bokosi lakuti “Pakovwira Munthu Wambura Kulaŵiska . . .”

3. Kasi tingapenja wuli ŵanthu ŵambura kulaŵiska mu chigaŵa chithu?

³ Penjani Ŵanthu Ŵambura Kulaŵiska: Ni nyengo zose yayi apo tikukumana na ŵanthu ŵambura kulaŵiska para tikupharazga ku nyumba na nyumba, chifukwa ŵanandi ŵakufwatuka yayi kuyowoya na ŵalendo. Ntheura pakukhumbikwira kuyezgayezga chomene kuti ‘tipenje’ ŵanthu aŵa mwakuti tiŵapharazgire. (Mat. 10:11) Kasi mukugwira ntchito, panji kusambira sukulu na munthu wambura kulaŵiska? Yambani ndimwe kumuyowoyeska. Usange mu chigaŵa chinu muli sukulu ya ŵanthu ŵambura kulaŵiska, mungakapeleka mabuku gha ŵanthu aŵa kuti ŵakaŵike mu layibulare ya sukulu iyi. Kasi mukumanyapo munthu uyo wali na mubali wake wambura kulaŵiska? Kasi mu chigaŵa chinu muli mawupu agho ghakovwira ŵanthu ŵambura kulaŵiska, panji malo agho kukukhala ŵanthu ŵambura kulaŵiska? Mulongosolerani mubali wake, wakupokelera ŵalendo, panji uyo wakulaŵilira malo agha kuti Ŵakaboni ŵa Yehova mbakukhumbisiska kovwira ŵanthu ŵambura kulaŵiska. Muphalirani kuti usange wangatemwa, mungamupa mabuku gha ŵanthu ŵambura kulaŵiska panji mabuku agho ŵangategherezga. Mulongorani layizgo la mu Baibolo lakuti sonosono apa Chiuta wamazgenge uchibulumutira kwamuyirayira. Panji mungamulongoraso vidiyo ya mutu wakuti, Kuŵavyenge Baibolo Ili Mphanyi Nili Wakuzgeŵa (Without It, I Would Feel Lost), iyo yili pa jw.org. Vidiyo iyi yikulongosora vya munthu wambura kulaŵiska uyo wasanga chandulo na Baibolo la ŵanthu ŵambura kulaŵiska. Para mungamulongosolera makora chifukwa icho mwizira, wangamuzomerezgani kuti mukumane na ŵanthu ŵambura kulaŵiska.

4. Kasi ivyo vikachitikira Janet vikutisambizga vichi?

⁴ Mudumbu wambura kulaŵiska zina lake Janet wakaluta ku malo agho kukukhala ŵanthu ŵambura kulaŵiska. Wakamba kudumbiskana na mwanakazi wachiwukirano. Janet wakamuphalira kuti, “Yesu wakachizganga ŵanthu ŵambura kulaŵiska kuti walongore kuti kunthazi wazamuchizga ŵanthu wose ŵambura kulaŵiska.” Ŵakadumbiskana lemba la Uvumbuzi 21:3, 4, ndipo Janet wakalongosora umo Ufumu wa Chiuta uzamufiskira layizgo ili. Mwanakazi yura wakakhala dankha chete, pamanyuma wakati, “Nindapulikepo mazgu agha kwa munthu wambura kulaŵiska. Ŵanthu ŵanandi awo ŵakulaŵiska ŵakughanaghana kuti ŵanthu wose ŵambura kulaŵiska ŵakutondeka kulaŵiska chifukwa cha zakwananga zawo panji za ŵapapi ŵawo.” Janet wakatumizgira mwanakazi uyu adiresi ya pa Webusayiti yakusangira buku la Baibolo Likusambizgaci? Panyengo yasono Janet wakusambira Baibolo na munthu uyu kaŵiri pa sabata.

5. Nangauli tingachizga yayi ŵanthu ŵambura kulaŵiska nga umo wakachitiranga Yesu, kasi pangaŵa vyandulo wuli usange tingalongora kuti tikuŵaghanaghanira?

⁵ Mbunenesko kuti tingachizga yayi ŵanthu ŵambura kulaŵiska nga umo wakachitiranga Yesu. Kweni tingawovwira ŵanthu awo chiuta wa mgonezi uno waŵabulumutizga maghanoghano kuti ŵaleke kupulikiska unenesko wa mu Baibolo. Ŵanji mwa ŵanthu aŵa mbachibulumutira mwakuthupi. (2 Kor. 4:4) Yesu wakachizga ŵanalume ŵaŵiri pafupi na Yeriko chifukwa chakuti wakaŵachitira ‘chitima.’ (Mat. 20:34) Usange nase tingalongora kuti tikughanaghanira ŵanthu ŵambura kulaŵiska nga umo wakachitiranga Yesu, tingawovwira ŵanthu kuti ŵamanye Yehova, uyo wamazgenge uchibulumutira kwamuyirayira.