Vitumbiko vya Ufumu Vingaŵa Vinu

MPOSTOLE Wacikristu Paulos wakayowoyanga makora viyowoyero vinyake vyakumanyikwa comene mu nyengo yake. Iye wakasambira masambiro agho ghakuyana waka na agho ghakusambirika sono ku yunivesite. Iye wakacitanga vintu vyose ivyo Ŵaroma ŵakacitanga. (Milimo 21:37-40; 22:3, 28) Masambiro agha ghakatenge ghamovwirenge kuŵa musambazi ndiposo wakumanyikwa. Kweni iye wakati: ‘Vintu vyose ivyo nkatenge ndanduliremo, ndivyo ndapima kuti nvyambura candulo cifukwa ca Kristu . . . ndipo nkuvipima kuti vyose nvya ku cizara pera, mwakuti ndandule Kristu.’ (Ŵafilipi 3:7, 8) Ncifukwa wuli Paulos wakayowoya nteura?

Pakwamba iye wakamanyikwanga na zina lakuti Saulos wa ku Tarso ndiposo nga ni uyo wakazgikizganga “awo mba Ntowa,” kweni panyuma pakuwona Yesu mu ucindami, kwizira mu mboniwoni Paulos wakapulikana. (Milimo 9:1-19) Kwa Paulos, cakukumana naco pa ulendo wake wa ku Damaseko cikamupa cigomezgo cakuti Yesu wakaŵa Mesiya wakulayizgika, panji kuti Kristu, murongozgi wa Ufumu wamuntazi wakulayizgika. Ici cikapangiskaso Paulos kuti wasinte comene mu kacitiro kake ka vintu, nga ni umo wakayowoyera mu mazgu agho ghali pacanya apa. Mu kayowoyero kanyake, Paulos wakang’anamuka cifukwa cakuti wakaŵa munenesko mtima.—Ŵagalatiya 1:13-16.

Mu Baibolo verebu lakuti “ng’anamuka” kanandi likung’anamurika kufuma ku lizgu la Cigiriki leneilo likung’anamura “kumanya” ndipo likususkana na lizgu la “kumanyirathu.” Mwanteura kung’anamuka kukusazgapo kusinta kwa maghanoghano gha muntu, kacitiro ka vintu, panji vilato, kuleka kucita vintu ivyo wakacitanga kale vyambura kukondweska. (Milimo 3:19; Civumbuzi 2:5) Kuyowoya za Paulos, iye kuti wakawona cakucitika cakuzirwa ico cikamucitikira pa ntowa yakuya ku Damaseko nga ncakukumana naco cauzimu waka cara. Kweni cikamupangiska kuti wamanye kuti ivyo wakacitanga kale, peneapo wakamanyanga cara Kristu vikaŵa vyambura candulo. Iye wakamanyaso kuti usange wakukhumba kusanga candulo kufuma mu cimanyisko cipya cakuyowoya za Kristu, wakenera kucitapo kantu kuti wang’anamuke.—Ŵaroma 2:4; Ŵaefeso 4:24.

Kusinta Uko Kukiziska Vitumbiko

Paulos wakamanya Ciuta peneapo wakaŵa membara wa gulu la Ŵafarisi. Vigomezgo vyawo vikazikika comene pa vidokoni na mitheto ya ŵantu. Cifukwa ca sanko la cisopo, kuyezgayezga na mwampu wa Paulos vikapuruskika. Nangauli iye wakaghanaghananga kuti wakateŵeteranga Ciuta, iye wakalimbananga na Ciuta.—Ŵafilipi 3:5, 6.

Panyuma pa kumumanya makora Kristu, na ncito iyo wakucita pakukwaniriska vilato vya Ciuta, Paulos wakamanya kuti wakeneranga kupanga cakusanka: Kasi wakenera kurutilira kuŵa Mufarisi na kusangwa na mulimo wake na ncindi izo wakapokeranga, panji wakenera kuleka kucita ivyo wakacitanga na kwamba kucita vintu ivyo vikaŵa vyakuzomerezgeka na Ciuta? Cakukondweska ncakuti, Paulos wakasanka mwamahara, ndipo wakayowoya kuti: “Nkufwa soni na ivangeli cara: cifukwa ndi nkongono za Ciuta zakuponoskera yose uyo wakupulikana; Muyuda nanga, ndiposo Mugriki.” (Ŵaroma 1:16) Paulos wakasinta nakuŵa mupharazgi wa mwampu wa makani ghaweme ghakuyowoya za Kristu na Ufumu.

Vyaka vinandi vikati vyajumpapo, Paulos wakaphalira Ŵakristu ŵanyake kuti: “Mwa ŵabali, ine kuti ndacikora sono cara: kweni cintu cimoza ndico nkucita, nkuruwa ivyo viri kumanyuma, ndipo nkutambazukira ku ivyo viri kuntazi, nkucimbirira ku ciciri ku njombe ya ncemo yakucanya ya Ciuta mwa Kristu Yesu.” (Ŵafilipi 3:13, 14) Paulos wakasanga candulo na makani ghaweme cifukwa iye wakakhumbisiska comene kuleka kucita vintu ivyo vikamupatuskanga kwa Ciuta, ndipo na mtima wake wose wakayezgayezga kucita vintu ivyo vikaŵa vyakukolerana na khumbo la Ciuta.

Kasi Mungacitaci?

Mutepanji makani ghaweme gha Ufumu mwaghapulika waka sono-sono apa. Kasi mukusangwa na cilindizga ca kuzakakhala na umoyo wamuyirayira mu paradiso waurunji? Mukwenera kusangwa nadi cifukwa ise tose tili na khumbo la kawiro la kukhala na umoyo wamtende ndiposo wakuvikilirika. Baibolo likuphara kuti Ciuta wimika vya “muyirayira” mu mtima withu. (Mupharazgi 3:11) Mwanteura ncakawiro kwa ise kuŵa na cilindizga ca nyengo iyo ŵantu ŵazamukhala na umoyo wamuyirayira mwamtende ndiposo mwacimwemwe. Ndivyo makani ghaweme gha Ufumu ghakuyowoya.

Ndipouli, kuti muzakapokere umoyo wamuyirayira uwu, mukwenera kusanda kuti mumanye ivyo makani ghaweme ghakuyowoya. Mpostole Paulos wakaciska kuti: “Mupimiske [mwaŵene] ico ndi khumbo la Ciuta, ciweme na cakukondweska, na cakufikapo.” (Ŵaroma 12:2) Mwanteura, nga ni Paulos, panyuma pakumanya na kupulikiska, mukwenera kupanga cakusanka.

Nyengo zinyake, mungaŵa kuti muli na vigomezgo vinyake vyakukhwaskana na muntazi mwinu. Kweni kumbukirani kuti Saulos wakaŵa na vigomezgo vyake vyakukhwaskana na khumbo la Ciuta peneapo wakaŵa wandaŵe mpostole Paulos. Mu malo mwa kulindizga kuti Ciuta wamuvumbulirani vintu mu ntowa yakuziziswa, kasi mwalekeraci kughanaghanira za nkani iyi mwakupwererera? Jifumbani kuti: ‘Kasi nkumanya nadi cilato ca Ciuta kurazga ku ŵantu na caru capasi? Kasi ningasimikizga wuli kuti cigomezgo cane ncaunenesko? Para ningasanda Mazgu gha Ciuta Baibolo, kasi ukaboni wakuti cigomezgo cane ncaunenesko ungasangika nadi?’ Ncakuzirwa comene kusanda cigomezgo cinu mu ntowa ya nga ni iyi. Nakwenenako, mukwenera kucita nteura cifukwa Baibolo likutiphalira kuti: “Pimani vintu vyose; koreskani ico nciweme.” (1 Ŵatesalonika 5:21) Kuzomerezgeka na Ciuta ndico cintu cakuzirwa comene.—Yohane 17:3; 1 Timote 2:3, 4.

Ŵarongozgi ŵa visopo ŵangatilayizga umoyo wa muntazi wamuyirayira. Kweni layizgano ilo lingatovwira kusanga vitumbiko vya Ufumu wa Ciuta pekha usange ndakuzikika pa visambizgo vya mu Baibolo. Pa Cisambizgo cake cakumanyikwa comene ca pa Lupiri, Yesu wakayowoya mwanteura: “Kuti ndi yose wakunena nane, Fumu, Fumu, uyo wati wanjirenge mu Ufumu wa kucanya cara; kweni uyo wakucita khumbo la Ŵadada ŵa kucanya ndiyo.”—Mateyu 7:21.

Wonani kuti Yesu wakadidimizgapo comene pa kucita khumbo la Ŵadada ŵake kuŵa cintu cakuzirwa comene kuti tizakasange vitumbiko vya Ufumu wa Ciuta. Mwanteura, kuŵa na kawonekero ka kutemwa Ciuta kukung’anamura cara kuti muli wakuzomerezgeka na Ciuta. Ndiposo Yesu wakarutirizga kuyowoya kuti: “Ŵanandi ŵati ŵanenenge nane pa zuŵa leneilo, ‘Fumu, Fumu, asi tikapharazganga mu zina linu, ndipo mu zina linu asi tikafumyanga mizimu yiheni, ndipo mu zina linu asi tikacitanga vya nkongono vinandi?’ Penepapo nditi ndiŵafiskirenge kuti, ‘Nkamumanyani cara: fumaniko kwa ine, imwe mukucita ucikanamarango.’” (Mateyu 7:21-23) Mwakuwonekerathu, cintu cakuzirwa comene ncakuti tikwenera kuwoneseska kuti tikupulikiska makora ivyo makani ghaweme ghakuyowoya na kucita mwakuyana na igho.—Mateyu 7:24, 25.

Mungasanga Covwiro

Kwa vyaka 100 ivyo vyakujumpa, Ŵakaboni ŵa Yehova ŵaŵa ŵakupharazga makani ghaweme gha Ufumu wa Ciuta. Kwizira mu mabuku na magazini ndiposo na uthenga wa pa mlomo, ŵakovwira ŵantu pacaru cose kuti ŵamanye makora za Ufumu, vitumbiko ivyo Ufumu uzamwiziska na ivyo tikwenera kucita kuti tisange vitumbiko ivyo.

Tikumupempani kuti mutegherezgenge ku makani agho ghakupharazgika na Ŵakaboni ŵa Yehova. Mwa kutegherezga na kugwiriskira ncito ivyo makani ghaweme ghakuyowoya, muzamusanga vitumbiko vinandi—panyengo yino pera cara, kweniso na muntazi apo Ufumu wa Ciuta wuzamuwusa caru cose capasi.—1 Timote 4:8.

Citanipo kantu sono, cifukwa Ufumu wa Ciuta waneng’enera.

[Vithuzithuzi pa peji 7]

Kwizira mu mabuku na magazini ndiposo na uthenga wa pa mlomo, Ŵakaboni ŵa Yehova ŵakupharazga makani ghaweme gha Ufumu wa Ciuta