Vipimo vya Kakhaliro Ivyo Mukurondezga

KASI ndimwe muntu uyo wakurongozgeka na vipimo viweme vya kakhaliro? Panji mukughanaghana kuti vipimo viwemi vya kakhaliro nvyakale comene? Fundo njakuti waliyose wa ise wakurongozgeka na vipimo vya kakhaliro, ivyo wakugomezga kuti nvyakuzirwa. Mwakuyana na The New Shorter Oxford English Dictionary, lizgu lakuti cipimo likung’anamura “dango ilo muntu wakujiŵikira; ilo wakuliwona kuti ndiwemi kwa iye.” Vipimo vikukhwaska vintu ivyo tikucita na ntowa iyo tirondezgenge mu umoyo withu. Vipimo vingagwira ncito nga ncirwero ico cikovwira muntu kumanya uko wakuruta, ceneico cikucemeka kam’pasi pa Cingelezi.

Mwaciyerezgero, Yesu wakalangura ŵarondezgi ŵake kuti ŵarondezgenge Dango Lakakhaliro, ilo likusangika pa Mateyu 7:12, leneilo likuyowoya kuti: “Vyose ivyo mukukhumba kuti ŵantu ŵamucitirani, vyeneivyo namwe muŵacitirenge.” Ŵarondezgi ŵa Confucius ŵakarondezganga vipimo vya mikhaliro yiweme nga ni lusungu, kujicefya, ncindi na kugomezgeka. Nanga ŵangaŵa ŵantu awo ŵakuleka kusopa ŵali na vipimo panji mikhaliro iyo yikumanyikwiska nkaro yawo.

Kasi Tikurondezga Vipimo vya Kakhaliro vya Mtundu Wuli?

Tikwenera kukumbukira kuti vipimo vya kakhaliro vingaŵa viwemi panji viheni. Mwaciyerezgero, mu virimika vyakujumpa 10 ivyo vyajumpa, ŵantu ŵanandi ŵakatoreka mtima na ukhaliro wakukhumba kuŵa nambala wanu. Nangauli ŵantu ŵanandi ŵangamanya makora cara mazgu agha panji ŵangaghanaghana kuti kacitiro aka kakuŵakhwaska cara, kweni ukhaliro wakukhumba kuŵa nambala wanu ni cipimo ico ŵanandi ŵakucirondezga peneapo ŵakukhumba cara kurondezga vipimo viŵemi vya kakhaliro. Kwali ŵakumanyikwa na mazgu agha panji cara, kukhumba kuŵa nambala wanu ncirongolero ca kujitemwa, kweneuko kanandi kukurongozgeka na kupenja vintu vyakuthupi mwakujumpizga. “Tiri na vipimo vya mitundu yiŵiri pera,” wakayowoya nteura murara wa wayilesi ya Kanema ku China. “Cipimo cakudanga ni kufiska khumbo lithu lakuŵa na vintu vinandi vyakuthupi. Caciŵiri nkusanga makopara ghanandi.”

Ukhaliro wakukhumba kuŵa nambala wanu ukuyana na magineti. Kasi magineti yikovwira wuli kam’pasi? Usange magineti yakhala mwakupambana na kam’pasi, kam’pasi yingagwira cara ncito yake mwakwenelera. Mu ntowa yakuyana waka, ukhaliro wakukhumba kuŵa nambala wanu ungananga mikhaliro yiwemi ya muntu mwa kumupangiska kucita vintu ivyo wakakhumba cara kucita.

Kasi mungazomerezga kuti ukhaliro wakukhumba kuŵa nambala wanu ukamba ni kale comene? Ukhaliro uwu ukamba kurongoreka m’munda wa Edeni panepapo ŵapapi ŵithu ŵakudanga ŵakaleka kurondezga cipimo ca mikhaliro ceneico Ciuta wakakhazikiska. Ici cikananga mikhaliro yawo yiweme. Nga ni ŵana ŵa Adamu na Heva, nase tikusuzgika na ukhaliro wakuyana waka, weneuwo sono ukumanyikwa kuti “ine danka” panji kuti ine nambala wanu—Genesis 3:6-8, 12.

Ukhaliro uwu wathandazgika comene mu nyengo yino, iyo ucimi wa Baibolo ukuti ni “mazuŵa gha ku umaliro,” “nyengo zinonono.” Ŵantu ŵanandi ‘mbakujitemwa.’ Ncambura kuzizwiska kuti nase tikusuzgika na ukhaliro wakukhumba kuŵa nambala wanu.—2 Timote 3:1-5.

Panji namwe mukukolerana na muwukirano wakucemeka Olaf, uyo wakalembera kalata ku muntavi unyake wa ku Europe wa Ŵakaboni ŵa Yehova kuti: “Ncakusuzga kusungilira mikhaliro yiweme, comene-comene ise ta ŵanici. Conde rutirizgani kutikumbuska kukhumbikwa kwa kuskepelera ku vipimo vya Baibolo.”

Olaf wakaghanaghana makora comene. Vipimo vya Ciuta vingatovwira ise, ŵarara panji ŵana, kusungilira mikhaliro yiwemi. Vingatovwiraso kutceŵa ukhaliro wakukhumba kuŵa nambala wanu. Usange mukukhumba kuti mumanye vinandi vyakukhwaskana na umo vipimo vya mu Baibolo vingamovwilirani, ŵazgani nkani yakurondezgapo.

[Vithuzithuzi pa peji 4]

Ŵantu ŵanandi lero ŵakupwererera cara vyakusoŵa vya ŵanji