Mafumbo Ghakufumira ku Ŵaŵazgi

Kasi Yesu wakang’anamurangaci apo wakamuphalira Nikodemo kuti: ‘Palije munthu wali kukwelera kucanya, kweni mweneuyo wakikha kucanya, ndiyo Mwana wa munthu’?—Yohane 3:13.

Pa nyengo iyi, Yesu wakaŵa kuti wacali pa caru capasi, ndipo wandakwelere kucanya. Nangauli vili nthena, ivyo tikumanya pakuyowoya za Yesu na ivyo wakayowoya vingatovwira kuti tipulikiske ico wakang’anamuranga.

Yesu “wakikha kucanya” uko wakakhalanga na Awiske pakuŵa munthu wauzimu. Kweni pa nyengo yakuŵikika, Ciuta wakawusamya umoyo wake kuya mu nthumbo ya Mariya kuti wababike nga ni munthu. (Luka 1:30-35; Ŵagalatiya 4:4; Ŵahebere 2:9, 14, 17) Pamanyuma pa nyifwa yake, Yesu wakeneranga kuwuskika nga nchilengiwa cauzimu na kuwelera kucanya kukakhala na Yehova. Ntheura nyengo yicoko waka pambere wandakomeke, Yesu wakalomba kuti: “Ŵadada, ndicindikani pamoza na Mwaŵene, na ucindami weneuwo nkhaŵa nawo pamoza namwe caru cikaŵa cindaŵeko.”—Yohane 17:5; Ŵaroma 6:4, 9; Ŵahebere 9:24; 1 Petros 3:18.

Apo Yesu wakayowoyanga na Nikodemo, uyo wakaŵa Mufarisi na musambizgi mu Israyeli, Yesu wakaŵa kuti wandawelere kucanya. Mbunenesko kuti pakaŵavya munthu uyo wakafwa na kukwelera kucanya. Yesu iyomwene wakayowoya kuti Yohane Mbapatizi wakaŵa mukuru pakuŵa mprofeti wa Ciuta, kweni “uyo ndi mucoko mu ufumu wa kucanya ndi mukuru kwakuluska iyo.” (Mateyu 11:11) Ndipo mpositole Petrosi wakalongosora kuti nanga ni Davide munthu wakugomezgeka wakafwa, ndipo wakaŵa kuti wacali mu dindi; Davide kuti wakakwelera kucanya cara. (Milimo 2:29, 34) Pakaŵa cifukwa ico Davide, Yohane Mbapatizi na ŵanalume ŵanyake ŵakugomezgeka awo ŵakafwa pambere Yesu wandafwe, ŵakakwelera kucanya cara. Ŵakafwa pambere Yesu wandajure nthowa yakuti ŵanthu ŵangawuskikira ku umoyo wakucanya. Mpositole Paulosi wakalemba kuti, Yesu pakuŵa mudangiliri, wakajura nthowa yiwemi na yamoyo yakuyira kucanya.—Ŵahebere 6:19, 20; 9:24; 10:19, 20.

Pakuti Yesu wakaŵa kuti wandafwe na kuwuskika, kasi wakang’anamurangaci apo wakaphaliranga Nikodemo kuti: “Palije munthu wali kukwera kucanya, kweni Mweneuyo wakikha kucanya, ndiyo Mwana wa munthu”? (Yohane 3:13) Tiyeni tiwone nkhani yose panji ivyo Yesu wakadumbiskananga na Nikodemo.

Apo muwusi wa Ciyuda yura wakiza kwa Yesu nausiku kuti waleke kumanyikwa na ŵanthu, Yesu wakamuphalira kuti: “Inya inya nadi Nkhukunenera, Kwambura kuti munthu wababikeso walive kumanya kuwona ufumu wa Ciuta.” (Yohane 3:3) Ndipo Nikodemo wakafumba kuti: ‘Kasi ici cingacitika wuli? Kasi munthu wangababika wuli kaciŵiri?’ Wakapulikiska yayi cisambizgo ici cakukhwaskana na kuŵa mu Ufumu wa Ciuta. Kasi pakaŵa nthowa yinyake iyo wakate wasambilire? Enya, kweni wakenera kusambira kwa ŵanthu ŵanyake cara, cifukwa pakaŵavya munthu munyake uyo wakakhalako kucanya mweneuyo wakenera kumulongosolera cilicose cakukhwaskana na kunjira mu Ufumu. Yesu pera ndiyo wakenera kulongosora makora. Ndiyo wakenera kusambizga Nikodemo na ŵanyake cifukwa Iyo wakikha kufuma kucanya ndipo wakaŵa wakukwana kusambizga ŵanthu za vinthu ivi.

Fumbo ilo tikudumbiskana mu nkhani iyi likutiphalira fundo yakuzirwa yakukhwaskana na kuŵazga Mazgu gha Ciuta. Nchamahara cara kukhuŵara na nkhani yinyake panji lemba cifukwa cakuti yikuŵa ngati njinonono kuyipulikiska. Ico Baibolo layowoya pa malo ghamoza tingacipulikiska mwakuyaniska na nkhani zinyake ndipo tiwone umo vikukolelerana. Mwakusazgirapo, kanandi ico cingatovwira kuti timanye makora ng’anamuro la nkhani iyo tikuwona nga njinonono nkhuwona nkhani yose, umo vinthu vikaŵira panji fundo iyo yikayowoyekanga.