Cifukwa Wuli Tikwenera Kumumanya Cimikana na Khristu?

Kale, mpositole munyake wakalemba kuti: ‘Mukapulika kuti cimikana na Khristu wakwiza.’ (1 Yohane 2:18) Mazgu agha ngakutora mtima comene. Kwa vilimika vinandi, ŵanthu ŵayezga kughanaghanira ivyo mazgu agha ghakung’anamura. Kasi cimikana na Khristu ninjani? Wizenge pauli? Kasi wazamucitaci para wiza?

ŴANTHU awo ŵacemekapo kuti mbacimikana na Khristu mbanandi comene. Kale, ŵanyake awo ŵakacemekanga kuti “cimikana na Khristu” ŵakaŵa Ŵayuda, ŵapapa ŵa Katolika, na mafumu gha Ŵaroma. Mwaciyelezgero, apo Fumu Frederick Waciŵiri (1194-1250) yikakana kurwa Nkhondo Yituŵa mu zina la chalichi, Papa Gregory wacinkhondi na cinayi wakayithya cimikana na Khristu ndipo wakayisezga mu chalichi. Innocent Wacinayi, uyo wakanjira mu malo gha Gregory nayo wakazakayisezgaso. Pakuwona kuti wamusezga, Frederick wakayowoya kuti Innocent nchimikana na Khristu.

Mpositole Yohane ndiyo yekha pa ŵakulemba Baibolo uyo wali kuzunurapo mazgu ghakuti “cimikana na Khristu.” Mu ghaŵiri mwa makalata ghakumanyikwa na zina lake, lizgu ili likusangika pa malo ghankhondi. Mavesi agho mazgu agha ghakusangikamo ghali mu bokosi pa peji lakulondezgapo. Mu mavesi agha, tingawona kuti cimikana na Khristu ni mutesi na wakupusika, wakukhumba kunanga ubwezi wa munthu na Khristu kweniso Ciuta. Lekani mpositole Yohane wakaciska Ŵakhristu ŵanyake kuti: “Mwa ŵakutemweka, mungapulikananga na mizimu yose, kweni mupime mizimu, usange panji njakufuma kwa Ciuta; pakuti ŵaprofeti ŵatesi ŵanandi ŵali kufuma na kuya mu caru.”—1 Yohane 4:1.

Yesu nayo wakasoka za ŵakupusika, panji ŵaprofeti ŵatesi, wakati: ‘Iwo ŵakwiza kwa imwe ŵakuvwara nga ndi mberere, na muno mukati ndi mphumphi zakukwapula. Muti muŵamanyenge na vipasi vyawo [panji milimo yawo].’ (Mateyu 7:15, 16) Kasi Yesu wakacenjezgangaso ŵalondezgi ŵake za cimikana na Khristu? Tiyeni tiwone umo tingamumanyira mupusikizgi muheni uyu.