Muwusi Musambazi uyo Wakasankha Mwambura Mahara
PAKAŴA muwukirano munyake musambazi uyo wakaŵa muwusi. Wakaŵa wakunyoroka, wakusunga dango, ndiposo wakutemwa kusopa. Wakati wiza kwa Yesu, wakajikama na kumufumba kuti: “Msambizgi muwemi, ndicitengeci mwakuti ndihare umoyo wamuyirayira?”
Pakumuzgora, Yesu wakalongora kuti munthu uyu wasange umoyo wakwenera kusungilira malango gha Ciuta. Apo munthu uyu wakafumba Yesu kuti wayowoye mwakudunjika ico wakenera kucita, Yesu wakati: “Ungakomanga, Ungaleŵanga, Ungibanga, Ungapanikizganga utesi, Cindika ŵawuso na ŵanyoko: ndipo, Utemwenge munyako nga ndi umo ukujitemwera wamwene.” Agha ghakaŵa malango ghakuru mu Dango ilo Ciuta wakapeleka ku Ŵaisrayeli kwizira mwa Mozesi. Pamanyuma pake, munthu uyu wakati: “Vyose vyeneivi ndili kusungilira: kwakhalasoci?”—Mateyu 19:16-20.
Yesu “wakamutemwa” munthu uyu, ndipo wakati: “Ukusoŵerwa cinthu cimoza: lutanga ukagure [ukaguliske] vyose uli navyo, na kuŵapa ŵakavu, ndipo uti uŵenge na usambazi kucanya: ndipo wize kandilondezga.”—Marko 10:17-21.
Muwukirano uyu wakeneranga kusankhapo cimoza, ndipo kucita nthena kukaŵa kupusu yayi. Kasi wakenera kucitaci? Kuleka usambazi wake na kulondezga Yesu, panji kulutilira na usambazi wake? Kasi wakenera kujiwunjikira usambazi pa caru capasi, panji kucanya? Cikwenera kuti cikaŵa cinthu cakusuzga comene kusankhapo. Nchakuwonekerathu kuti wakatemwanga kusopa, pakuti wakasungiliranga Malango na kukhumba kumanya vinandi ivyo vingamovwira kuti waŵe paubwezi na Ciuta. Kasi wakasankhaci? “Wakaluta na citima; cifukwa wakaŵa na vyakuŵeta vinandi.”—Marko 10:22.
Muwukirano uyu wakasankha mwambura mahara. Wasankhenge kulondezga Yesu mphanyi wakaŵa na mwaŵi wa kupokera umoyo wamuyirayira uwo wakapenjanga. Baibolo likuyowoya yayi ivyo pamanyuma pake vikamucitikira. Kweni ico tikumanya nchakuti pakati pajumpha vilimika pafupifupi 40, Ŵaroma ŵakiza na kuparanya Yerusalemu na cigaŵa cikuru ca Yudeya. Ŵayuda ŵanandi ŵakafwa ndipo usambazi wawo ukamara.
Mwakupambana na muwukirano uyu, mpositole Petrosi na ŵasambiri ŵanyake ŵakasankha mwamahara. ‘Ŵakasida vyose’ ivyo ŵakaŵa navyo, na kulondezga Yesu. Ŵakatumbikika comene cifukwa ca kucita nthena. Yesu wakaŵaphalira kuti ŵapokerenge vinandi kuluska ivyo ŵakasida. Cakuluska vyose nchakuti ŵakasanga umoyo wamuyirayira. Ŵakasankha mwamahara comene mwakuti ŵakadandaurapo yayi kuti ŵasankha uheni.—Mateyu 19:27-29.