Dangizgani Khumbo la Ciuta
“[Khristu] wakaŵafwira wose mwakuti awo mbamoyo, ŵaleke kujikhalira ŵekha.”—2 ŴAKORINTE 5:15.
1. Yowoyani ivyo vikacitikira mishonare munyake.
MISHONARE munyake, zina lake Aaron, wakuti: “Kupaturako galimoto za ŵasilikari, galimoto yithu ndiyo yikaŵa yakwamba kunjira mu muzi unyake ku Africa pamanyuma pakuti nkhondo ya pawenenawene yamara waka.a Cifukwa ca nkhondo iyi, tikaleka kuyowoyeskana na ŵabali ŵa mu mpingo ucoko uwo ukaŵa mu muzi uwu. Antheura, tikakhumbikwira kulutako kukawona umo ŵabali ŵakaŵira. Padera pa vyakurya, vyakuvwara, na mabuku, tikanyamulaso tepi ya vidiyo iyo yikulongosora za Ŵakaboni ŵa Yehova. (Jehovah’s Witnesses—The Organization Behind the Name)b Ŵanthu ŵanandi ŵakunweka ŵakiza kuti ŵazakawone vidiyo iyi, iyo tikayiwoneskera mu cisakasa cikuru ca utheka. Cifukwa cakuti ŵanthu ŵakaŵa ŵanandi, tikayilongora kaŵiri. Pamasinda pa kulongora filimu iyi, ŵanthu ŵanandi ŵakazomera kuti tisambirenge nawo Baibolo. Kuyezgayezga kwithu kukaŵa kwacandulo.”
2. (a) Cifukwa wuli Ŵakhristu ŵasankha kuteŵetera Ciuta? (b) Kasi sono tidumbiskanenge mafumbo wuli?
2 Cifukwa wuli Aaron pamoza na ŵanyake ŵakajipeleka kucita mulimo wakusuzga nga uwu? Cifukwa nchakuti ŵakuwonga sembe yakuwombora ya Yesu Khristu, ŵali kupatulira umoyo wawo kwa Ciuta, ndipo ŵakukhumba kucita vinthu vyakukolerana na khumbo la Ciuta. Umu ndimo Ŵakhristu wose ŵaunenesko ŵakucitira, ndipo ŵasankha kuleka “kujikhalira ŵekha” kweni kucita ivyo ŵangakwaniska “cifukwa ca ivangeli.” (2 Ŵakorinte 5:15; 1 Ŵakorinte 9:23) Ŵakumanya kuti apo caru ici cizamumalira, ndarama panji kumanyikwa vizamuŵa vyambura nchito. Mwantheura, ŵakukhumba kugwiliskira nchito umoyo wawo ndiposo nkhongono zawo mwakukolerana na khumbo la Ciuta. (Mupharazgi 12:1) Kasi ise tingacita wuli nthena? Kasi cikanga na nkhongono zakucitira nthena tingavisanga nkhu? Kasi ni mitundu wuli ya mauteŵeti iyo yilipo kuti ticite?
Kucita Dankha Ivyo Vikukhumbikwa
3. Kasi munthu wakwenera kucita dankha vinthu nga ni vici kuti wacite khumbo la Ciuta?
3 Ŵakhristu ŵaunenesko ŵakuwona kuti kuteŵetera Ciuta nchinthu ca umoyo wawo wose. Kuti munthu wacite khumbo la Ciuta, wakwenera kucita dankha vinthu nga nkhuŵazga Baibolo zuŵa lililose, kulembeska mu Sukulu ya Uteŵeti wa Ciuta, kupharazga, ndiposo kubapatizika. Para tikukura mwauzimu, tikukumbukira mazgu gha mpositole Paulosi ghakuti: “Koserezga mu vyeneivyi; uvifukatire nkhanira; mwakuti wose ŵawone umo ukukulira makora.” (1 Timote 4:15) Cilato ca kucita nthena nchakuti tijilongore ku ŵanji yayi, kweni nchilongolero cakuti tasimikizga mtima kuti ticitenge khumbo la Ciuta. Kucita nthena kukulongora kuti tasankha kuti Ciuta ndiyo watilongozgenge pa vyose ivyo tikucita mu umoyo withu, ndipo wakutilongozga makora comene kuluska umo taŵene tingacitira.—Salmo 32:8.
4. Kasi tingamazga wuli wofi wambura kwenelera?
4 Ndipouli, kuziulika panji kujifipira mtima comene vingatijandizga kuti tileke kucita mauteŵeti ghanyake. (Mupharazgi 11:4) Mwantheura, kuti tiŵe ŵacimwemwe pakuteŵetera Ciuta na ŵanji, tikwenera kumazga dankha suzgo ili. Mwaciyelezgero, Erik wakaghanaghana kukateŵetera ku mpingo wa ciyowoyero cinyake. Kweni wakafipanga mtima kuti: ‘Kasi ŵabali ŵamunipokelera? Kasi ine namuŵatemwa? Kasi iwo ŵamunitemwa?’ Iyo wakuti: “Paumaliro nkhamanya kuti nkheneranga kufipira mtima ŵabali m’malo mwa kujighanaghanira comene ndekha. Nkhawona kuti nileke kufipa mtima na vinthu ivi, kweni nijipeleke kuti niteŵetere ŵanji. Nkhalomba kwa Ciuta ndipo nkhacita ivyo nkhaghanaghananga. Panyengo yasono uteŵeti ukuninozgera comene.” (Ŵaroma 4:20) Enya nadi, para tikuteŵetera Ciuta na ŵanji mwambura kujighanaghanira tekha, tiŵenge ŵacimwemwe ndiposo ŵakukhorwa.
5. Cifukwa wuli tikwenera kunozgekera makora kuti ticite khumbo la Ciuta? Yowoyani ciyelezgero.
5 Kuti ticite makora khumbo la Ciuta tikweneraso kunozgekera makora. Cingaŵa camahara kuleka kuŵa na ngongoli zinandi izo zingatipangiska kuŵa ŵazga ŵa caru ici, na kutitondeska kucita mulimo wa Ciuta mwakufwatuka. Baibolo likutikumbuska kuti: “Uyo wakukongora ndi muzga wa wakumubwereka.” (Zintharika 22:7) Kugomezga Yehova na kuŵika vinthu vyauzimu panthazi, kukutovwira kuti tileke kutimbanizgika. Mwaciyelezgero, Guoming na ŵadumbu ŵake ŵaŵiri, ŵakukhala na anyinawo ku malo uko nyumba za lenti ni zakukwera comene ndipo nchakusuzga kusanga nchito zakugomezgeka. Nangauli ni wose yayi ŵali pa nchito, kweni ŵakukhala makora cifukwa ca kugwiliskira nchito makora ndarama ndiposo kovwirana kulipira vinthu. Guoming wakuti: “Nyengo zinyake ni tose yayi tikuŵa na ndarama. Ndipouli, tikulutilira kucita upayiniya na kupwelelera Amama ŵithu. Tikuwonga kuti Amama ŵithu ŵakukhumba yayi kuti tileke vinthu vyauzimu mwakuti tiŵapenge vinthu vyapacanya.”—2 Ŵakorinte 12:14; Ŵahebere 13:5.
6. Nchiyelezgero wuli ico cikulongora umo tingacitira kuti umoyo withu ukolerane na khumbo la Ciuta?
6 Para mukutangwanika comene na kupenja vinthu vyakuthupi, kwali ni ndarama panji vinthu vinyake, mungakhumbikwira kusintha vinthu vinandi kuti mudangizge khumbo la Ciuta. Kusintha uku kungacitika zuŵa limoza pera yayi. Ndipo para vinyake vikutondeka kwenda makora panyengo iyo mukwamba kusintha, lekani kujiwona nga mwatondeka. Wonani ivyo vikacitikira Koichi, uyo wakamaliranga nyengo yinandi pa vinthu vyakusanguluska. Koichi wakasambira Baibolo apo wakaŵa muwukirano, kweni kwa vilimika vinandi wakatandaliranga waka maseŵero gha pa vidiyo. Zuŵa linyake, Koichi wakajifumba kuti: ‘Kasi nkhucitaci? Nili na vilimika vyakujumpha 30, kweni palije camahara ico nkhucita na umoyo wane.’ Koichi wakambaso kusambira Baibolo, ndipo wakapokera ulongozgi kufuma ku mpingo. Nangauli wakasinthanga pacokopacoko, kweni wakathera yayi. Cifukwa ca kulimbikira kulomba na kuciskika na ŵanji, paumaliro wakaleka ivyo wakatangwanikanga navyo. (Luka 11:9) Panyengo yasono, Koichi ni mteŵeti wakovwira.
Sambirani Kucita Vinthu Mwamahara
7. Cifukwa wuli pakukhumbikwira mahara kuti ticite khumbo la Ciuta?
7 Kucita khumbo la Ciuta kukukhumba kujipeleka na mtima withu wose. Tileke kuziulika panji kucita ukata pakucita khumbo la Ciuta. (Ŵahebere 6:11, 12) Ndipouli, Yehova wakukhumba yayi kuti pakucita khumbo lake tijivuskenge comene mwakuthupi ndiposo mu maghanoghano. Kumanya kuti tingacita yayi khumbo la Ciuta na nkhongono za ise tekha, kukucindika Ciuta ndipo kukulongora kuti tikucita vinthu mwamahara. (1 Petros 4:11) Yehova wakulayizga kuti watipenge khongono zakucitira khumbo lake. Kweni tikwenera cara kujikoserezga kucita vinthu vyakuluska nkhongono zithu panji mahara ghithu, mwa kuyezga kucita vinthu ivyo Iyo wakumanya kuti tingakwaniska yayi. (2 Ŵakorinte 4:7) Kuti tilutilire kuteŵetera Ciuta mwambura kujivuska, tikwenera kugaŵa makora nyengo yithu.
8. Ni vici ivyo vikacitika apo Mkhristu munyake wakayezgayezganga kuti waŵe wakugomezgeka kwa Yehova ndiposo ku nchito yake, ndipo paumaliro wakasintha vici?
8 Mwaciyelezgero, mudumbu Ji Hye, uyo wakukhala ku East Asia, wakagwiranga nchito yakukhumba nyengo yinandi kwa vilimika viŵiri, uku wakucita upayiniya. Wakuti: “Nkhayezgayezganga kugomezgeka kwa Yehova ndiposo ku nchito, kweni nkhagonanga maora ghankhondi pera. Mukuluta kwa nyengo, nkhaŵavya nkhongono zakucitira vinthu vyauzimu, ndipo vinthu vyauzimu vikaninozgeranga viŵi yayi.” Kuti Ji Hye wateŵetere Yehova ‘na mtima wake wose, na mzimu wake wose, na vinjeru vyake vyose, na nkhongono zake zose,’ wakapenja nchito yambura kukhumba nyengo yinandi. (Marko 12:30) Iyo wakuti: “Nangauli ŵa mu mbumba yane ŵakanicicizganga kuti nigwirenge nchito ya ndarama zinandi, kweni nkhayezgayezga kuti nidangizge dankha khumbo la Ciuta. Nicali kusanga ndarama zakugulira vinthu vyakukhumbikwira, nga ni malaya ghawemi. Ndipo nkhukondwa kuti sono nkhugona tulo twakukwana. Nkhukondwa na uteŵeti wane, ndipo sono ndine wakukhora mwauzimu kujumpha kale. Ici nchifukwa cakuti vinthu vya caru ivyo vinganikopa ndiposo kunitangwaniska nili navyo kutali.”—Mupharazgi 4:6; Mateyu 6:24, 28-30.
9. Kasi kuyezgayezga kwithu kungakhwaska wuli ŵanthu awo tikuŵapharazgira?
9 Ni waliyose yayi wangacita upayiniya wa nyengo zose. Para mukusuzgika na ucekuru, ulwari, panji masuzgo ghanyake, manyani kuti Yehova wakuwonga comene kugomezgeka kwinu ndiposo uteŵeti wuliwose uwo mungamucitira na mtima winu wose. (Luka 21:2, 3) Mwantheura, tileke kudelera ivyo tikucita pakuteŵetera Ciuta, cifukwa ivyo tikucita nanga viŵe vicoko wuli, vikovwira ŵanji. Tiyelezgere kuti tapharazga ku nyumba zinandi ndipo tindasangepo munthu wakunweka na uthenga withu. Pamanyuma pakuti tawerako, ŵeneko ŵa nyumba ŵangaŵa kuti ŵakuyowoya za ise kwa maora panji mazuŵa ghanandi, nanga ni para pakaŵavya uyo wakatipokelera. Tikulindilira kuti waliyose wazomerenge uthenga withu yayi, kweni tikumanya kuti ŵanji ŵazomerenge. (Mateyu 13:19-23) Ŵanji ŵangazakazomera uthenga withu kunthazi para vinthu vyasintha mu caru panji mu umoyo wawo. Mulimose umo vingaŵira, para tikuyezgayezga kupharazga, tikucita mulimo wa Ciuta. Ndise “ŵalimi ŵamoza na Ciuta.”—1 Ŵakorinte 3:9.
10. Ni mwaŵi wuli wa uteŵeti uwo waliyose wangacita mu mpingo?
10 Kweniso, tose tingawovwira ŵa mu mbumba yithu ndiposo ŵabali na ŵadumbu mu mpingo. (Ŵagalatiya 6:10) Ivyo tikucitira ŵanyithu vingaŵa vyacandulo kwanyengo yitali. (Mupharazgi 11:1, 6) Para ŵalara na ŵateŵeti ŵakovwira ŵakufwilirapo kucita milimo yawo, vikovwira kuti mpingo uŵe wankhongono mwauzimu, ndipo ŵanandi ŵakulimbikira kucita vinthu vyauzimu. Baibolo likutisimikizgira kuti para tiŵenge “ŵakufwilira mazuŵa ghose mu mulimo wa Fumu,” kuteŵeta kwithu kuti “nkhwa waka cara.”—1 Ŵakorinte 15:58.
Sankhani Uteŵeti wa Nyengo Zose Kuŵa Nchito Yinu
11. Ni mauteŵeti wuli ghanyake agho tingacita padera pa kuteŵetera mu mpingo withu?
11 Pakuŵa Ŵakhristu, tikutemwa umoyo, ndipo tikukhumba kucindika Ciuta mu vilivyose ivyo tikucita. (1 Ŵakorinte 10:31) Para tikupharazga makani ghawemi gha Ufumu mwakugomezgeka ndiposo kusambizga ŵanthu kuti ŵakoreske vyose ivyo Yesu wakayowoya, tiŵenge na mwaŵi wa kucita mauteŵeti ghanyake agho ghatipenge cimwemwe. (Mateyu 24:14; 28:19, 20) Padera pa kuteŵetera mu mpingo withu, tingaŵaso na mwaŵi wa kukateŵetera ku cigaŵa ico kukukhumbikwira ŵapharazgi ŵanandi, kwali nkhu malo ghanyake, mu mpingo wa ciyowoyero cinyake, panji mu caru cinyake. Ŵalara ŵakwenelera panji ŵateŵeti ŵakovwira awo ŵandatore, ŵangaŵa na mwaŵi wa kuluta ku Sukulu Yakusambizga Uteŵeti. Pamanyuma, ŵangakateŵetera mu mipingo iyo mukukhumbikwira ŵabali ŵakukhwima mwauzimu, kwali ni mu caru cawo panji mu caru cinyake. Ŵakutorana awo ŵakucita uteŵeti wa nyengo zose ŵangaŵa na mwaŵi wa kuluta ku sukulu ya Gileadi, iyo yikusambizga uteŵeti wa umishonale, na kukateŵetera mu vyaru vinyake. Ndipo nyengo zose ŵanthu ŵakukhumbikwa kuti ŵakateŵetere pa Beteli, kuzenga, na kupwelelera malo gha maungano ndiposo maofesi gha munthavi.
12, 13. (a) Kasi mungasankha wuli uteŵeti uwo mukukhumba kucita? (b) Longosorani umo maluso agho mwasambira mu uteŵeti unyake, ghangawovwilira mu uteŵeti unyake.
12 Ni uteŵeti wuli uwo mukwenera kucita? Pakuŵa mteŵeti wakujipatulira kwa Yehova, gomezgani ulongozgi wakufuma kwa Yehova na gulu lake. ‘Mzimu [wake] uwemi’ umovwiraninge kuti musankhe makora vinthu. (Nehemiya 9:20) Kanandi uteŵeti uwo mukucita, ukulongozgera ku uteŵeti unyake, ndipo maluso agho mwasambira mu uteŵeti unyake ghangazakamovwirani pakucita uteŵeti unyake.
13 Mwaciyelezgero, Dennis na muwoli wake Jenny, nyengo zose ŵakovwira pa mulimo wakuzenga Nyumba za Ufumu. Cimphepo cikuru cikati casakaza vinthu kumwera kwa United States, ŵakajipeleka kukawovwira ŵanthu awo ŵakakhwaskika na suzgo ili. Dennis wakuti: “Maluso agho tikasambira pakuzenga Nyumba za Ufumu ghatovwira comene pakovwira ŵabali, ndipo ici catipa cimwemwe cikuru. Viwongo ivyo vikufuma kwa awo taŵawovwira, vikutikhozga comene. Magulu ghanyake agho ghakupeleka wovwiri ghazengaso nyumba zicoko comene. Ŵakaboni ŵa Yehova ŵanozga panji kuzengaso nyumba zakujumpha 5,300 ndiposo Nyumba za Ufumu zinandi waka. Ŵanthu ŵakuwona vyose ivi, ndipo sono mbakunweka comene na uthenga withu.”
14. Kasi mungacita vici usange mukukhumba kucita uteŵeti wa nyengo zose?
14 Kasi mungacita khumbo la Ciuta mwa kusankha uteŵeti wa nyengo zose kuŵa nchito yinu? Usange mungacita nthena, manyani kuti mutumbikikenge comene. Usange mikhaliro pasono yikumuzomerezgani yayi kucita nthena, panji mungakhumbikwira kusintha dankha vinthu vinyake. Lombani nga umo wakacitira Nehemiya apo wakakhumbanga kucita uteŵeti unyake wakuzirwa. Wakalomba kuti: “A, Yehova, nkhumuŵeyani, . . . musakatiske muteŵeti winu.” (Nehemiya 1:11) Para mwalomba, gomezgani ‘Wakupulika malurombo,’ ndipo citani vinthu mwakuyana na ivyo mwalomba. (Salmo 65:2) Kuti Yehova watumbike khumbo linu lakuti mumuteŵetere mwakukwana, mukwenera kufwilirapo dankha. Para mwasankha kucita uteŵeti wa nyengo zose, lekani kusintha maghanoghano ghinu. Mukuluta kwa nyengo, muŵenge na maluso ghanandi, ndipo cimwemwe cinu cisazgikirenge.
Umoyo Wakukhorweska Nadi
15. (a) Kasi tingasanga candulo wuli usange tingacezga na ŵanthu awo ŵateŵetera Ciuta kwa nyengo yitali ndiposo kuŵazga nkhani zawo? (b) Longosorani nkhani ya muteŵeti wakugomezgeka wa Ciuta iyo yili kumukhozgani comene.
15 Kasi mungasanga candulo wuli usange mwasankha kucita khumbo la Ciuta? Cezgani na ŵanthu awo ŵateŵetera Yehova kwa nyengo yitali, comenecomene awo ŵacita uteŵeti wa nyengo zose kwa vilimika vinandi. Muwonenge kuti ŵali na umoyo wacimwemwe ndiposo wakukhorweska. (Zintharika 10:22) Ŵamuphaliraninge kuti Yehova wandalekepo kuŵawovwira kusanga vinthu vyakukhumbikwira pa umoyo wawo, nanga ni mu nyengo ya masuzgo, ndipo wakuŵapaso vinandi. (Ŵafilipi 4:11-13) Kufuma mu 1955 mpaka mu 1961, mu magazini gha Cingelezi gha Gongwe la Mulinda mukaŵanga nkhani izo zikalongosoranga za umoyo wa ŵateŵeti ŵakugomezgeka. Kufuma nyengo yira, palembeka nkhani zinandi izo zikulongosora za ŵateŵeti ŵakugomezgeka. Nkhani yiliyose yikulongora mwamphu na cimwemwe ivyo vikuŵa na ŵateŵeti aŵa, ivyo vikutikumbuska nkhani za mu Baibolo izo zili mu buku la Milimo. Kuŵazga nkhani zakukondweska izi kumukhuŵirizganinge kuti namwe muyowoye kuti, ‘Uwu ndiwo umoyo uwo nane nkhukhumba!’
16. Nchivici cikupangiska Mkhristu kuŵa na umoyo wakukhorweska ndiposo wacimwemwe?
16 Aaron, uyo wazunurika pakwamba pa nkhani iyi, wakuti: “Ku Africa, kanandi nkhakumananga na ŵawukirano awo ŵakayingayinganga kupenja umoyo wakukhorweska. Ŵanandi ŵakatondeka kuwusanga. Kweni ise tikaŵa na umoyo wakukhorweska cifukwa tikacitanga khumbo la Ciuta mwa kupharazga makani ghawemi gha Ufumu, nangauli tikakumananga na masuzgo. Tajiwonera tekha kuti kupa kukupeleka cimwemwe kuluska kupokera.”—Milimo 20:35.
17. Cifukwa wuli tikwenera kucita khumbo la Ciuta sono nthe?
17 Wuli pakuyowoya za imwe? Kasi mukukhumba kucitaci na umoyo winu? Para mulije khumbo la kucita vinthu vyauzimu, nkhongono zinu zimalirenge waka pa vinthu vya caru. Cifukwa wuli mukukhumba kusakazira umoyo winu pa vinthu vya mu caru ca Satana ici? Sonosono apa, “suzgo yikuru” yambenge, ndipo usambazi na kumanyikwa vizamuŵa vyambura nchito. Ico cizamuŵa cakuzirwa mbubwezi withu na Yehova. Tizamuŵa ŵakukondwa comene cifukwa cakuti tateŵetera Ciuta ndiposo ŵanji, ndipo mu umoyo withu tacita khumbo la Ciuta mwakukwana.—Mateyu 24:21; Civumbuzi 7:14, 15.
[Mazgu ghamusi]
a Mazina ghanyake ghasinthika.
b Yakupharazgika na Ŵakaboni ŵa Yehova.
Kasi Mungalongosora?
• Kasi Yehova wakujipulika wuli para tikumuteŵetera?
• Kasi kucita vinthu mwamahara kungatovwira wuli kuti titeŵetere Ciuta na ŵanji?
• Kasi ni mauteŵeti wuli agho tingacita?
• Kasi tingaŵa wuli na umoyo wakukhorweska nadi pasono?
[Vithuzithuzi pa peji 25]
Pakukhumbikwira mahara kuti tilutilire kuteŵetera Yehova na mtima wose
[Vithuzithuzi pa peji 26]
Pali nthowa zinandi zakuteŵetelera Ciuta