Gongwe la Mulinda Liphya Lakusambira pa Mpingo

MAGAZINI iyi ni Gongwe la Mulinda liphya lakusambira pa mpingo. Tikukhumba kumulongosolerani vigaŵa vinyake ivyo ni viphya mu magazini iyi.

Gongwe la Mulinda lakusambira pa mpingo likulembekera Ŵakaboni ŵa Yehova na ŵasambiri ŵa Baibolo awo ŵakukura mwauzimu. Lifumiskikenge kamoza pa mwezi, ndipo liŵenge na nkhani zinayi panji zinkhondi zakusambira pa mpingo. Ndondomeko ya nkhani zakusambira pa mpingo yilembekenge pawaro pa magazini iyi. Mwakupambanako na Gongwe la Mulinda lakugaŵira m’munda, cithuzithuzi ca pawaro pa magazini iyi cisinthenge yayi mwezi na mwezi, pakuti ndakugaŵira mu uteŵeti yayi.

Pa peji 2, pali fundo zakudumura izo ni zakovwira comene. Zikulongosora cilato ca nkhani zakusambira pa mpingo. Kweniso pa peji ili pali nkhani zinyake. Cigaŵa ici cizamovwira comene awo ŵakucitiska Sambiro la Gongwe la Mulinda apo ŵakunozgekera kuti ŵakacitiske makora sambiro ili.

Muwonenge kuti nkhani zakusambira pa mpingo ni zifupiko pacoko pakuyelezgera na zakumasinda. Mwantheura, tizamuŵa na nyengo yinandi yakudumbiskana malemba agho ghakakilira Sambiro la Gongwe la Mulinda. Tikumuciskani kuti muŵazgenge malemba ghose gha mu ndime, agho mazgu ghake ghandalembeke. Malemba ghanyake palembeka kuti “ŵazgani,” ndipo ghakwenera kuŵazgika na kudumbiskana pa nyengo ya Sambiro la Gongwe la Mulinda. Malemba ghanyake nagho ghangaŵazgika para nyengo yikuzomerezga. Mu nkhani zinyake musangenge malemba agho palembeka kuti “yelezgerani na.” Pakuti malemba agha ghakukhozgera mwakudunjika yayi fundo izo zili mu ndime, kanandi ghakwenera yayi kuŵazgika pa nyengo ya sambiro. Ndipouli, malemba agha ghakuŵa na fundo zakukondweska, panji mwanthowa yinyake ghakukhozgera fundo izo zili mu ndime. Tikumuciskani kuti mughaŵazgenge para mukunozgekera Sambiro la Gongwe la Mulinda. Panji mungaghalongosora pakuzgora pa nyengo ya sambiro.

Lipoti la pa cilimika lizamulembekaso mu Gongwe la Mulinda yayi. Kwambira mu cilimika ca 2008, lizamuŵa mu mphapika ya Uteŵeti Withu wa Ufumu kweniso mu Yearbook. Kweni nga umo tayowoyera pacanya, Gongwe la Mulinda lakusambira pa mpingo lizamuŵaso na nkhani zinyake. Nangauli nkhani izi zamusambirika ku mpingo yayi, mukuciskika kuti nazo muziŵazgenge. Nazo zili na cakurya cauzimu cakufuma kwa “muzga wa magomezgeko na wa vinjeru.”—Mat. 24:45-47.

Paumaliro, manyani kuti cilato ca magazini gha Gongwe la Mulinda lakusambira pa mpingo ndiposo lakugaŵira m’munda nchimoza. Ghose ghakucemeka Gongwe la Mulinda Likupharazga Ufumu wa Yehova. Pa peji 2 pa magazini ghose agha, pali ndime izo zikulongosora cilato ca Gongwe la Mulinda. Pa cilimika, ghose ghazamuŵa mu baundi voliyumu yimoza. Ndipo nkhani zakufuma mu magazini ghose zizamuŵa pa mutu wakuti “Kasi Mukukumbuka?” uwo uzamuŵanga mu Gongwe la Mulinda lakusambira pa mpingo.

Kufuma waka mu cilimika ca 1879, mu nyengo yose ya nkhondo, nyengo yakusuzga, ndiposo mu nyengo ya nthambuzgo, Gongwe la Mulinda lapharazga unenesko wakuyowoya za Ufumu wa Ciuta. Lurombo lwithu ndwakuti na vitumbiko vya Yehova, lilutilire kupharazga Ufumu wa Ciuta nanga ni apo lasintha kalembekero. Ndipo tikulomba kuti Yehova wamutumbikani imwe mukuŵazga, apo mukusambira Gongwe la Mulinda liphya lakusambira pa mpingo.