Gongwe la Mulinda la Cingelezi Cipusu
NDISE ŵakukondwa kupharazga kuti tiŵenge na Gongwe la Mulinda lakulembeka mu Cingelezi cipusu. Gongwe ili tiliyezgenge dankha kwa cilimika cimoza kwambira waka na Gongwe lakusambira ili. Liŵenge na nkhani zakusambira pa mpingo ndipo para malo ghacalimo muŵengeso nkhani zinyake zicoko waka. Tikugomezga kuti Gongwe ili lovwirenge ŵabali ŵanandi. Mwawuli?
Cingelezi nchiyowoyero ico nchakuzara comene mu vyaru nga ni Fiji, Ghana, Kenya, Liberia, Nigeria, Papua, New Guinea, na Solomon Islands. Nangauli ŵabali ŵithu mu vyaru ivi ŵangayowoya viyowoyero vinyake, kweni kanandi ŵakuyowoya Cingelezi pa maungano gha mpingo, ndiposo pakupharazga. Ndipouli, iwo ŵakuyowoya Cingelezi cipusu pakuyelezgera na ico cikuŵa mu mabuku ghithu. Kweniso, pali ŵabali ŵanyake awo ŵasamira mu vyaru vinyake, ndipo kuti ŵayowoyeskane na ŵanji ŵakwenera kuyowoya Cingelezi nangauli ŵangaŵa kuti ŵakucimanya makora yayi. Nakuti ku malo agha kukuŵa kuti kulije mpingo wa ciyowoyero cawo.
Nkhani za mu Gongwe la Mulinda izo tikusambira sabata yiliyose, ndiyo ni nthowa yikuru iyo tikupokelera cakurya cauzimu ca pa nyengo yake. Mwantheura, Gongwe la Cingelezi cipusu ili liwovwirenge kuti waliyose wasangenge candulo na cakurya cauzimu. Gongwe liphya ili liŵenge na cikopi cakupambana na linyake. Tumitu tucokotucoko, ndime, mafumbo ghakuweleramo, ndiposo vithuzithuzi vya mu Gongwe ili viyanenge waka na linyake. Ivi viwovwirenge kuti wose ŵenderenge lumoza pa nyengo ya Sambiro la Gongwe la Mulinda. Kuti muwone mphambano yake, wonani bokosi ilo liri pasi apa, ilo liri na mazgu ghanyake agho ghafuma mu ndime 2 pa peji 10 mu magazini iyi.
Tili na cigomezgo kuti Gongwe liphya ili, ni zgoro ku awo ŵakalombanga Yehova kuti: “Mundipe mahara mwakuti ndisambire malango ghinu.” (Sal. 119:73) Tikugomezga kuti awo Cingelezi ŵakucimanya pacoko waka, kweniso ŵana ŵanji ŵa ŵabali ciŵaŵirenge cipusu kunozgekera Sambiro la Gongwe la Mulinda. Tikuwonga comene Yehova, uyo cifukwa ca “citemwa pa ŵabali wose” wakupeleka cakurya cinandi pa nyengo yakwenelera kwizira mwa “muzga wakugomezgeka na wakucenjera.”—1 Pet. 2:17; Mat. 24:45.
Wupu Wakulongozga wa Ŵakaboni ŵa Yehova