Kasi Mukuwona Ŵanji nga Umo Yehova Wakuŵawonera?
“Muŵavye swekano mu thupi; kweni kuti viŵaro vipwelerane kwakuyanayana.”—1 KOR. 12:25.
1. Kasi mukajipulika wuli apo mukanjira mu paradiso wauzimu?
APO tikajipatura ku caru ciheni ici na kwamba kukolerana na ŵanthu ŵa Yehova, tikwenera kuti tikaŵa ŵakukondwa cifukwa ca citemwa ndiposo kupwelelerana uko tikawona pakati pawo. Ivi vikupambana comene na mikhaliro iyo ŵanthu awo ŵakulongozgeka na Satana ŵakulongora, nga ni thinkho ndiposo kujikuzga. Tili kunjira mu paradiso wauzimu, uyo muli mtende ndiposo kukolerana.—Yes. 48:17, 18; 60:18; 65:25.
2. (a) Nchivici ico cingaticitiska kuti tiwonenge ŵanji mwambura kwenelera? (b) Kasi tingakhumbikwira kucitaci?
2 Ndipouli, apo nyengo yikujumphapo, tingamba kuwona ŵabali ŵithu mu nthowa yambura kwenelera. Cifukwa cakuti ndise ŵambura kufikapo, tingamba kukuzga maubudi gha ŵabali ŵithu m’malo mwa kuwona mikhaliro yawo yose yauzimu. Mwakudumura, tingati tikuluwa kuŵawona nga umo Yehova wakuŵawonera. Usange ndimo viliri kwa ise, tikwenera kujisanda kuti tambe kuwona ŵanyithu nga umo Yehova wakuŵawonera.—Ex. 33:13.
Umo Yehova Wakuwonera Ŵabali Ŵithu
3. Kasi Baibolo likuyaniska mpingo wa Cikhristu na vici?
3 Nga umo lemba la 1 Ŵakorinte 12:2-26 likuyowoyera, mpositole Paulosi wakayaniska mpingo wa Ŵakhristu ŵakuphakazgika na thupi ilo liri na “viŵaro vinandi.” Nga umo viŵaro vya thupi viliri vyakupambana, ŵanthu awo ŵali mu mpingo nawo mbakupambanapambana cifukwa ca mikhaliro yawo ndiposo vinthu ivyo ŵakumanya. Ndipouli, Yehova wazomerezga kuti mu mpingo muŵe ŵanthu ŵakupambanapambana. Wakutemwa munthu waliyose ndipo wakumuwona kuti ngwakuzirwa. Lekani Paulosi nayo wakati ŵanthu awo ŵali mu mpingo ŵakwenera kupwelerana “kwakuyanayana.” Kucita nthena kungaŵa kwakusuzga cifukwa cakuti ŵanji ŵangaŵa na mikhaliro yakupambana na yithu.
4. Cifukwa wuli tingakhumbikwira kusintha kaghanaghaniro kithu kulazga ku ŵabali ŵithu?
4 Tingaŵaso na cizgoŵi ca kutemwa kudodoliska ivyo ŵabali ŵithu ŵakutondeka. Para tikucita nthena tingaŵa nga ni para tikuwona cithuzithuzi cakutowa, kweni ise jiso lithu likudodoliska waka pa malo ghamoza pera. Kweni Yehova wakuwona nthena yayi, wakuwona cithuzithuzi cose. Tingaŵa na cizgoŵi ca kudodoliska waka cigaŵa ico ise tikuleka kutemwa mwa munthu, kweni Yehova wakuwona wunthu wake wose, kusazgapo mikhaliro yake yose yiwemi. Apo tikuyezgayezga kuwona ŵanji nga umo Yehova wakucitira, tikovwira kuti mu mpingo muŵe citemwa ndiposo kukolerana.—Efe. 4:1-3; 5:1, 2.
5. Cifukwa wuli nchambura kwenelera kweruzga ŵanyithu?
5 Yesu wakamanyanga kuti ŵanthu ŵambura kufikapo ŵali na cizgoŵi ca kweruzga ŵanyawo. Wakati: “Mungeruzganga, mwakuti muleke kweruzgika.” (Mat. 7:1) Manyani kuti mu ciyowoyero ico Yesu wakayowoyanga, pa vesi ili wakagwiliskira nchito mazgu ghakuti, “lekani kweruzga.” Wakamanya kuti ŵategherezgi ŵake ŵanandi ŵakaŵa na cizgoŵi ca kweruzga ŵanji. Kasi tingaŵa kuti nase tili na cizgoŵi ici? Usange tili na cizgoŵi ici, tikwenera kufwilirapo kuti tisinthe mwakuti tileke kweruzgika. Ndipo mbunenesko nadi, ndise anjani ise kuti teruzge munthu uyo Yehova wamusora kuti wacite mulimo unyake, panji kuyowoya kuti ngwakwenelera yayi kuŵa mu mpingo? Mbali munyake wangaŵa kuti wakubudiska vinthu vinyake, kweni usange Yehova wakulutilira kumugwiliskira nchito, kasi cingaŵa cakwenelera kuti ise timukane? (Yoh. 6:44) Kasi tikugomezga kuti Yehova ndiyo wakulongozga mpingo wa ŵanthu ŵake, ndiposo kuti para pangakhumbikwira kusintha vinthu vinyake wasinthenge para nyengo yake yakwana?—Ŵazgani Ŵaroma 14:1-4.
6. Kasi Yehova wakuwona wuli ŵateŵeti ŵake?
6 Cinthu cakukondweska pakuyowoya za Yehova nchakuti wakuwonamo kauwemi mwa Mkhristu waliyose, ndipo wakumanya kuti para wazakaŵa wakufikapo, wazamucita makora. Wakumanyaso mikhaliro iyo wasintha cifukwa ca kusambira Baibolo. Ntheura walije cifukwa ca kudodoliskira maubudi agho waliyose wakucita. Pa lemba la Salmo 103:12 tikuŵazga kuti: “Umo uliri utali kufuma ku vuma kuyakafika na ku zambwe, ntheura ndimo wali kuwuskirapo pa ise majuvyo ghithu.” Tikuwonga comene cifukwa cakuti Yehova wakuticitira nthena.—Sal. 130:3.
7. Kasi tikusambira vici pakuwona umo Yehova wakawoneranga Davide?
7 Kwizira mu Malemba, tikuwona ukaboni wakuti Yehova wakuwona uwemi mwa munthu waliyose. Pakulongosora za Davide, Ciuta wakati: “Muteŵeti wane Davide, uyo wakasunga malango ghane, ndipo wakandilondezga Ine na mtima wake wose, kucita ico cikaŵa ciwemi ndipera mu maso ghane.” (1 Mathe. 14:8) Tikumanya kuti Davide wakacitapo maubudi ghanyake. Ndipouli, Yehova wakasankha kudodoliska pa viwemi ivyo wakacitanga cifukwa wakamanya kuti Davide wakaŵa na mtima wakunyoroka.—1 Mid. 29:17.
Wonani Ŵabali Ŵinu nga Umo Yehova Wakuŵawonera
8, 9. (a) Ni mwawuli umo tingaŵira nga ni Yehova? (b) Nchiyelezgero wuli ico tingayowoya pa nkhani iyi, ndipo cingatisambizgaci?
8 Yehova wakumanya vyose ivyo vili mu mtima wa munthu, apo ise tingamanya yayi. Ici nchifukwa cakukwana cakuti tilekere kweruzga ŵanyithu. Tikumanya vyose yayi ivyo vili mu mtima wa munthu. Tikwenera kufwilirapo kuyezga Yehova mwa kuleka kudodoliska pa maubudi gha ŵanyithu, agho mukuluta kwa nyengo ghazamumara. Kasi tingati nchiwemi yayi kuyezga Yehova pa nkhani iyi? Kucita nthena, kovwirenge comene kuti paŵe mtende pakati pa ŵabali na ŵadumbu.—Efe. 4:23, 24.
9 Mwaciyelezgero, ghanaghanirani za nyumba iyo yanangika, malata ghapankhuka, magilasi gha mu mawindo ghasweka, mathabwa gha kucanya ghavunda. Ŵanthu ŵanandi ŵangawona kuti nchiwemi kuyiwiska waka, cifukwa yikuhenipiska pa malo. Kweni pangiza munthu munyake uyo wangaŵa na maghanoghano ghakupambanako. Wangayisanda makora nyumba iyi, kwambira pasi mpaka kucanya, na kuwona kuti yicali yankhongono, ndipo yikukhumbikwira waka kuyinozga. Wangagura nyumba iyi na kwamba kunozga ivyo vyanangika, mwakuti yingamba kuwonekaso makora comene. Awo ŵakujumpha mu nthowa ŵangamba kulumba kuti yikuwoneka makora. Kasi tingaŵa yayi nga ni munthu uyu, uyo wanozgaso nyumba iyi? M’malo mwa kudodoliska waka pa maubudi gha ŵabali ŵithu, kasi cingaŵa ciwemi yayi kuwona vinthu ivyo ŵakucita makora na kuŵa na cigomezgo cakuti ŵanganyololera mwauzimu? Usange tikucita nthena, nga ni Yehova, nase titemwenge ŵabali ŵithu cifukwa mbakutowa mwauzimu.—Ŵazgani Ŵahebere 6:10.
10. Kasi ulongozgi wa pa Ŵafilipi 2:3, 4 ungatovwira wuli?
10 Mpositole Paulosi wakapeleka ulongozgi uwo ungatovwira kuti titemwanenge na ŵanthu wose mu mpingo. Wakaciska Ŵakhristu kuti: “[Muŵe] ŵambura kucita kanthu mu mphindano panji mu kujikuzga, kweni na mtima wa kujiyuyura munthu yose wapime munyake ndi mukuru wakuluska mwene; munthu yose kupwelera vinthu vyake pera cara, kweni mose na vya ŵanyinu wuwo.” (Fil. 2:3, 4) Kujiyuyura kutovwirenge kuti tiwonenge ŵanyithu mwakwenelera. Kupwelera vya ŵanyithu na kuwona viwemi ivyo ŵakucita kutovwirengeso kuti tiŵawonenge nga umo Yehova wakuŵawonera.
11. Kasi nkhusintha wuli kwa vinthu uko kwakhwaska mipingo yinyake?
11 Mazuŵa ghano, vinthu vyasintha pa caru ca pasi, ndipo vyapangiska kuti ŵanthu ŵendendekenge comene. Mu misumba yinyake muli ŵanthu ŵanandi ŵa mu vyaru vyakupambanapambana. Ŵanji mwa ŵanthu aŵa, awo ŵali mu vikaya vithu ŵanweka na uthenga wa mu Baibolo ndipo ŵamba kusopera nase lumoza Yehova. Ŵanthu aŵa ŵafuma “ku mtundu wose, na ku mafuko na ku ŵanthu na ku malulimi.” (Civ. 7:9) Ivi vyacitiska kuti mu mipingo yithu yinandi muŵe ŵanthu ŵa mu vyaru vyakupambanapambana.
12. Kasi tikwenera kuwonana wuli nyengo zose, ndipo cifukwa wuli cingaŵa cakusuzga kucita nthena?
12 Mu mpingo withu, tingakhumbikwira kuŵa maso comene mwakuti tilutilire kuwona ŵanji mwakwenelera. Kucita nthena kukukhumba kuti tikumbukirenge ulongozgi uwo mpositole Petrosi wakayowoya wakuti ‘titemwenge ŵabali kwambura kupusikizga,’ ndiposo ‘kufwilirapo kutemwana mu mtima.’ (1 Pet. 1:22) Cingaŵa cakusuzga kutemwa ŵabali mwakufumira pasi pa mtima mu mpingo uwo muli ŵanthu ŵa mu vyaru vyakupambanapambana. Mitheto, masambiro, kasangiro ka cuma, ndiposo kakuliro kawo vingaŵa vyakupambana comene na vithu. Kasi cikumusuzgani kupulikiska maghanoghano ndiposo kacitiro kawo? Nawo ŵangaŵa na suzgo lakuyana waka kulazga kwa imwe. Ndipouli, tose tikusambizgika kuti: “Temwani ŵabali” wose.—1 Pet. 2:17.
13. Ni maghanoghano wuli agho tingakhumbikwira kusintha?
13 Tingakhumbikwira kusintha kaghanaghaniro kithu mwakuti tisanuzge citemwa cithu pa ŵabali ŵithu wose. (Ŵazgani 2 Ŵakorinte 6:12, 13.) Kasi nyengo zinyake tikutemwa kuyowoya mazgu ghakuti: “Kuti ni sankho yayi, kweni . . . ” pamasinda na kwamba kuyowoya viheni ivyo ise tikughanaghana kuti ni vyakuzara mu ŵanthu ŵa mtundu unyake? Maghanoghano ghanthena ghangalongora kuti tikukhumbikwira kumazga sankho ilo ticali nalo mu mtima withu. Tingajifumba kuti: ‘Kasi nyengo zose nkhufwilirapo kuti nimanyanenge na ŵanthu awo ŵali na mitheto yakupambana na yane?’ Kujisanda kwanthena kutovwirenge kuti tiwonenge ŵabali ŵa mu vyaru vinyake mwakwenelera ndiposo kuŵatemwa comene.
14, 15. (a) Yowoyani viyelezgero vya awo ŵakasintha kaghanaghaniro kawo kulazga ku ŵanji. (b) Kasi tingaŵayezga wuli?
14 Baibolo likutiphalira viyelezgero vya ŵanthu awo ŵakasintha kaghanaghaniro kawo. Yumoza wawo wakaŵa mpositole Petrosi. Pakuŵa Muyuda, Petrosi wakwenera kuti wakakananga kunjira mu nyumba za ŵanthu Ŵamitundu. Ghanaghanirani waka umo wakajipulikira apo wakatumika kuti walute ku nyumba ya Korneliyo, uyo wakaŵa Wamitundu wambura kukotoleka. Cifukwa ca kumanya kuti khumbo la Ciuta ndakuti ŵanthu ŵa mitundu yose ŵaŵe mu mpingo wa Cikhristu, Petrosi wakasintha kaghanaghaniro kake. (Mil. 10:9-35) Saulosi, uyo pamanyuma wakazakaŵa mpositole Paulosi, nayo wakakhumbikwira kumazga suzgo la sankho ilo wakaŵa nalo. Wakazomerezga kuti wakatinkhanga comene Ŵakhristu, mwakuti wakafika “pa kuzikizga ekeleziya la Ciuta na kulipofya.” Ndipouli, apo Fumu Yesu yikamunyololera, Paulosi wakasintha comene, mwakuti wakafika nanga mpha kuzomera ulongozgi wakufuma ku ŵanthu awo kumanyuma wakaŵazikizganga.—Gal. 1:13-20.
15 Tikukayika yayi kuti mwakovwirika na mzimu wa Yehova, nase tingasintha kaghanaghaniro kithu. Usange tikuwona kuti mu mtima withu kamzimu ka sankho kacalimo, tiyeni tifwilirepo kuti tikamazge na “kusunga umoza wa mzimu mu cikondo ca cimango.” (Efe. 4:3-6) Baibolo likutikhuŵilizga kuti: “Vwarani kutemwa, uko nchikondo ca ukongolekwa.”—Kol. 3:14.
Kuyezga Yehova mu Uteŵeti
16. Kasi khumbo la Ciuta ndakuti wuli kulazga ku ŵanthu?
16 Mpositole Paulosi wakalemba kuti: “Kwa Ciuta kulive kulumba cisko.” (Rom. 2:11) Khumbo la Yehova ndakuti ŵanthu ŵa mitundu yose ŵamusopenge. (Ŵazgani 1 Timote 2:3, 4.) Kuti khumbo lake ili lifiskike, wanozga kuti “ivangeli landanda” lipharazgike “ku mtundu wose na fuko na lulimi na ŵanthu.” (Civ. 14:6) Yesu wakati: “Munda ndi caru.” (Mat. 13:38) Kasi mazgu agha ngakuzirwa wuli kwa imwe na ŵa mu mbumba yinu?
17. Ni mwawuli umo tingawovwilira ŵanthu ŵa mitundu yose?
17 Ni wose yayi awo ŵangaluta ku vyaru vinyake kukapharazga uthenga wa Ufumu. Ndipouli, tingapharazgira ŵanthu ŵakufuma mu vyaru vyakupambanapambana awo ŵakukhala mu cigaŵa cithu. Para mwaŵi wasangika, kasi tikupharazgira ŵanthu wose, padera pa awo taŵapharazgira kwa vilimika vinandi? Mwalekeraci kuyezgayezga kupharazgira ŵanthu ŵanyake awo ŵandapulikepo mwakukwana makani ghawemi?—Rom. 15:20, 21.
18. Kasi Yesu wakaghanaghanira wuli ŵanthu?
18 Yesu wakakhumbanga comene kovwira ŵanthu wose. Wakapharazga mu cigaŵa cimoza pera yayi. Nkhani yinyake ya mu Baibolo yikuti: “Wakendendekanga mu misumba yose na mu vikaya.” Ndipo wakati “wawona mizinda, wakayilengera citima” na kukhumba kuyovwira.—Mat. 9:35-37.
19, 20. Ni nthowa wuli zinyake izo tingalongolera kuti tikughanaghanira ŵanthu wose nga umo Yehova na Yesu ŵakucitira?
19 Kasi ni nthowa wuli zinyake izo mungacitira nga ni Yesu? Ŵanji ŵali na cilato ca kupharazga mu vigaŵa ivyo mpingo ukupharazgako viŵi yayi. Vigaŵa ivi vikusazgapo mu misika, ku malo agho ŵanthu ŵakukawona vinyama, masiteji, ndiposo kuwaro kwa nyumba izo nchakusuzga kulutako. Ŵanyake ŵayezgayezga kusambira ciyowoyero cinyake mwakuti ŵapharazgire ŵanthu ŵa mtundu unyake awo ŵakukhala mu cigaŵa cawo, panji awo kumasinda uku ŵakaŵavya mwaŵi wakukwana wa kupulika makani ghawemi. Kusambira kuŵatawuzga mu ciyowoyero cawo kungalongora kuti mukuŵaghanaghanira comene. Usange ise tingafiska yayi kusambira ciyowoyero cinyake, kasi tingakhuŵilizga yayi awo ŵangafiska? Tikwenera yayi kugongoweska panji kukayikira awo mbakunweka kupharazgira ŵanthu ŵakufuma mu vyaru vinyake. Ŵanthu wose mbakuzirwa mu maso gha Ciuta. Ndimo nase tikwenera kuŵawonera.—Kol. 3:10, 11.
20 Kuwona ŵanthu nga umo Ciuta wakuŵawonera kukung’anamuraso kupharazgira ŵanthu wose, mwambura kupwelerako za ukhaliro wawo. Ŵanyake ŵangaŵavya nyumba, ŵangaŵa ŵakazuzi, panji ŵakutemwa uzaghali. Usange ŵanthu ŵanyake ŵakuticitira nkhaza, ici cileke kutipangiska kuwona mtundu wawo wose kuŵa uheni. Paulosi wakacitirika nkhaza na ŵanthu ŵanyake, kweni ici cikamupangiska kuti waleke kupharazgira fuko lawo yayi. (Mil. 14:5-7, 19-22) Wakaŵa na cigomezgo cakuti ŵanji mwa ŵanthu aŵa ŵapulikenge uthenga wake.
21. Kasi kuwona ŵanthu nga umo Yehova wakuŵawonera kungamovwirani wuli?
21 Apa nchakuwonekerathu kuti tikukhumbikwira kuwona ŵanthu wose nga umo Yehova wakuŵawonera, kwali mbabali ŵa mu caru cithu, ŵa mu vyaru vinyake, panji ŵanthu awo tikuŵapharazgira. Para maghanoghano ghithu ghayanenge comene na gha Yehova pa nkhani iyi, tiŵenge ŵamtende comene ndiposo ŵakukolerana. Ndipo ciŵenge cipusu kovwira ŵanji kuti ŵatemwe Yehova, uyo ni Ciuta ‘wambura kupatula’ kweni wakutemwa ŵanthu wose cifukwa “wose ndi mulimo wa mawoko ghake.”—Job 34:19.
Kasi Mungazgora?
• Kasi nkhaghanaghaniro wuli kulazga ku ŵabali ako tikwenera kugega?
• Kasi tingawona wuli ŵabali ŵithu nga umo Yehova wakuŵawonera?
• Kasi mwasambiraci umo tikwenera kuwonera ŵabali ŵithu ŵa mu vyaru vinyake?
• Kasi tingawona wuli ŵanthu awo tikuŵapharazgira nga umo Yehova wakuŵawonera?
[Cithuzithuzi pa peji 26]
Mungacita wuli kuti mumanye ŵanthu ŵa mitheto yinyake?
[Cithuzithuzi pa peji 28]
Mungacita wuli kuti mupharazgire ŵanthu ŵanandi makani ghawemi?