‘Msungwana wa ku Israyeli’ wa Mazuŵa Ghano
Masabata ghaŵiri pambere Cikumbusko ca nyifwa ya Yesu cindacitike, waliyose mu mbumba ya kwa Sales ku Praia Grande, Brazil, wakalemba mazina gha ŵanthu awo wakakhumbanga kuŵacemera ku Cikumbusko. Abigayl wa vilimika vinkhondi na cimoza wakapika kapepara kamoza kakuti wacemere munthu ku Cikumbusko. Wakafumbika za munthu uyo wakakhumbanga kumucema.
Wakazgora kuti: “Munthu uyo nyengo zose wakumwemwetera para waniwona.”
Ŵapapi ŵake ŵakamufumba kuti: “Ni njani munthu uyu?”
Wakazgora kuti: “Wakupendera yura.”
Pakati pajumpha mazuŵa ghanayi, Abigayl wakaŵalongora ŵapapi ŵake munthu yura. Munthu uyu, zina lake Walter, wakakhalanga kufupi na Nyumba ya Ufumu. Vilimika vyakujumpha 15 kumanyuma uku, apo wakaŵa na vilimika 28, wakapwetekeka pa ngozi ya galimoto ndipo malundi ghake ghakugwira nchito yayi. Pakuti wakaŵa musambazi wakaŵa na ŵanalume ŵaŵiri awo ŵakamuvikiliranga. Abigayl wakati wazomerezgeka kuyowoya na Walter, ŵapapi ŵake ŵakamurongosolera kuti mwana wawo wakakhumbanga kumupa kapepara kakumucemera ku Cikumbusko.
Wakati wapeleka kapepara, Abigayl wakati: “Wose ku Nyumba yithu ya Ufumu wapokera tumapepara tunandi, kweni ine nili na kamoza pera. Ntheura ndimwe mwekha imwe namucemani. Para mutondekenge kwiza, mbwenu nizamuŵavya mulendo. Kweni usange mwizenge, nizamukondwa comene, nakuti Yehova ndiyo wazamukondwa kwakuluska.”
Pa zuŵa la Cikumbusko, Ŵakaboni ŵa Yehova kusazgapo Abigayl, ŵakanozganga Nyumba ya Ufumu kunozgekera Cikumbusko. Ca ku muhanya zuŵa lira, Walter wakajumphanga, ndipo wakati wawona Abigayl, wakaphalira uyo wakendeskanga galimoto kuti wayime. Wakakhizga windo na kumufumba Abigayl ivyo wakacitanga. Abigayl wakamuphalira kuti ŵakanozganga Nyumba ya Ufumu kuti iyo wazakakhale pawemi.
Mise yira Abigayl wakafipa mtima comene. Nkhani yikamba, ndipo wakalaŵiskanga uku na uku kuti wawone usange Walter wiza. Mwamabuci wakasanga Walter pamoza na ŵanthu ŵake ŵiza. Wakamwemwetera comene. Nkhani yikati yamara, Walter wakayowoya kuti wakambapo ulendo wa kuya ku msumba unyake kweni wakawelera na kuluta ku Cikumbusko cifukwa ca Abigayl. Wakasazgirapo kuti: “Nkhani iyi ndiyo nakhumbanga.” Wakapempha Baibolo ndipo wakamba kusambira na kwiza ku maungano.
Pa nyengo iyo, mudumbu wa Walter wakati wakakhumba comene kuwonana na Abigayl uyo mulongosi wake wakatemwanga kumuzunura. Wakati wamuwona, wakakondwa kumanya kuti Abigayl wakaŵa msungwana muwemi comene. Wakati: “Sono namanya cifukwa ico ŵalongosi ŵakukondwera nthena.”
Walter walutilira kusambira na kwiza ku maungano. Nakuti wakuzgorapo pa maungano na kuphalira ŵanji ivyo wakusambira. Nadi, Abigayl wakutikumbuska msungwana wa ku Israyeli uyo wakawovwira Namani kumanya Ciuta waunenesko, Yehova.—2 Mathemba 5:2-14.