Zomerani Mazaza gha Yehova
“Kumutemwa Ciuta ncheneici, cakuti tisungilire malango ghake: ndipo malango ghake kuti ngazitu cara.”—1 YOH. 5:3.
1, 2. (a) Cifukwa wuli ŵanandi mazuŵa ghano ŵakukhumba yayi kulongozgeka? (b) Kasi ŵanthu awo ŵakuti ŵakwendera vyaŵanyawo yayi, ŵakucita nadi vya ŵekha pera? Longosorani.
ŴANTHU ŵanandi mazuŵa ghano ŵakukhumba yayi kuti munthu munyake waŵe na “mazaza” pa iwo. Ŵanthu awo ŵakuti ŵakwendera vyaŵanyawo yayi ŵakutemwa kuyowoya kuti: “Nkhukhumba yayi kuti munthu waniphalirenge cakucita.” Kweni kasi ŵanthu aŵa ŵakucita nadi vya ŵekha pera? Napacoko pose. Ŵanandi ŵakulondezga vyakucita vya ŵanthu awo ‘ŵakulinganizgika na caru.’ (Rom. 12:2) M’malo mwa kwendera vyawo pera, iwo ‘mbazga ŵa kwananga,’ mwakuyana na mazgu gha mpositole Petrosi. (2 Pet. 2:19) Ŵakwenda “kwakulingana na mendero gha caru cino, kwakulingana na fumu ya mazaza gha mudera,” iyo ni Satana Dyabulosi.—Efe. 2:2.
2 Mulembi munyake wakayowoya mwakujiŵikamo, wakati: “Ine nkhwendera maghanoghano gha ŵapapi ŵane yayi, nesi gha ŵaliska panji gha mu Baibolo pakusankha ico nchakwenelera.” Mbunenesko kuti ŵanji ŵangagwiliskira nchito uheni mazaza ghawo, ndipo ŵangaŵa ŵambura kwenelera kuŵapulikira. Kweni kasi vinthu vingaŵa makora para munthu wakukanirathu kulongozgeka? Kuwona mitu yicoko waka mu nyuzipepara, kukulongora kuti pa caru pakucitika vinthu viheni cifukwa cakuti ŵanthu ŵakukana kulongozgeka. Nchacitima kuti pa nyengo iyi, apo ŵanthu ŵakukhumbikwira comene ulongozgi, ŵanandi ŵakukhumba viŵi yayi kulongozgeka.
Umo Tikuwonera Mazaza
3. Kasi Ŵakhristu ŵakwambilira ŵakalongora wuli kuti ŵakapulikiranga waka cilicose yayi ico ŵamazaza ŵakaŵaphaliranga?
3 Taŵakhristu tikuwona vinthu mwakupambana na umo caru cikuwonera. Ici cikung’anamura kuti tikucita waka cilicose ico taphalirika yayi. Nyengo zinyake tikwenera kukana kupulikira ivyo ŵanji ŵakutiphalira, nanga ŵangaŵa na mazaza. Ndimo ŵakacitirangaso Ŵakhristu ŵakwambilira. Mwaciyelezgero, apo ŵapositole ŵakaphalirika kuti ŵaleke kupharazga, ŵakakana kupulikira musofi mukuru na ŵanthu ŵanyake ŵamazaza awo ŵakaŵa mu Sanihedirini. Ŵakaleka yayi kucita viwemi cifukwa ca kukhumba kukolerana na ŵamazaza.—Ŵazgani Milimo 5:27-29.
4. Ni viyelezgero wuli vya mu Malemba gha Cihebere ivyo vikulongora kuti ŵanthu ŵanandi ŵa Ciuta ŵakusankha vinthu vyakupambana na ivyo ŵanandi ŵakusankha?
4 Ŵateŵeti ŵanandi ŵa Ciuta awo ŵakaŵako pambere Yesu wandize ŵakacita mwakuyana waka. Mwaciyelezgero, Mozesi “wakakana kucemeka mwana wa mwana mwanakazi wa Faro; Wakasankha kusuzgika pamo na ŵanthu ŵa Ciuta,” nangauli kucita nthena kukawuska “kandundu ka Karonga.” (Heb. 11:24, 25, 27) Yosefe wakakana kunyengelereka na mwanakazi wa Potifara nangauli wakamanyanga kuti mwanakazi yura wakaŵa na mazaza gha kuwezgera mwa kumucitira ciheni. (Gen. 39:7-9) Daniyeli “wakapanikizga mu mtima wake kuti waleke kujifipiska na phande la vyakurya vya themba” nangauli wakamanyanga kuti cikaŵa cakusuzga kuti mukuru wa nthunguli wa ku Babulone wazomerezge ivyo iyo wakasankha. (Dan. 1:8-14) Viyezgelero ivi vikulongora kuti kwambira kale, ŵanthu ŵa Ciuta ŵakuleka yayi kucita ico nchiwemi nanga kungaŵa kuti ŵasangenge suzgo cifukwa ca kucita nthena. Ŵakakhumbanga yayi kupulikira ŵanthu cifukwa ca kukhumba kuti ŵatemweke. Ndimo nase tikwenera kucitira.
5. Ni mwawuli umo ise tikuwonera mazaza mwakupambana na umo caru cikughawonera?
5 Kucita vinthu mwacikanga kuti ni nkhwesa yayi, nesi kucita nga mbacigaruka awo ŵakukana kucita vinthu vinyake cifukwa ca kuleka kukolerana na ŵandyali. M’malo mwake, tili ŵakusimikizga kuzomera mazaza gha Yehova kuluska gha ŵanthu. Para dango la ŵanthu likususkana na la Ciuta, tikusuzgika yayi kusankhapo ico nchakwenelera. Mwakuyana na ŵapositole ŵa mu nyengo yakale, tikupulikira Ciuta kwakuluska ŵanthu.
6. Cifukwa wuli nyengo zose nchiwemi kulondezga malango gha Yehova?
6 Nchivici catovwira kuti tizomere mazaza gha Ciuta? Tikukolerana na mazgu agho ghali pa Zintharika 3:5, 6, agho ghakuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere Iye, ndipo tiwanyoroskenge nthowa zako.” Tikugomezga kuti cilicose ico Ciuta wakukhumba kuti ticitenge, ndise tikusanga naco candulo. (Ŵazgani Duteronome 10:12, 13.) Yehova wakaphalira Ŵaisrayeli kuti ndiyo ‘wakuŵasambizga kuti ŵawone candulo, kuŵalongozga mu nthowa iyo ŵakwenera kwendamo.’ Ndipo wakalutizga kuti: “A! mupulikirenge malango ghane mphanyi cimango cinu canguŵa nga ndi mronga, na urunji winu nga ndi majigha gha nyanja.” (Yes. 48:17, 18) Nase tikughagomezga mazgu agha. Tili ŵakukhorwa kuti kulondezga malango gha Ciuta nyengo zose kuli na vyandulo.
7. Kasi tikwenera kucitaci para tikupulikiska yayi dango linyake ilo liri mu Mazgu gha Ciuta?
7 Tikwenera kuzomera mazaza gha Yehova na kumupulikira nanga ni para tikupulikiska yayi cilato ca malango ghanyake agho ghali mu Mazgu ghake. Tikupulikiramo waka bweka yayi, tikupulikira cifukwa cakuti tikumugomezga. Kupulikira kwithu kukulongora kuti tikugomezga kuti Yehova wakumanya ico nchiwemi kwa ise. Para tikupulikira tikulongoraso kuti tikutemwa comene Ciuta, cifukwa mpositole Yohane wali kulemba kuti: “Kumutemwa Ciuta ncheneici, cakuti tisungilire malango ghake.” (1 Yoh. 5:3) Kweni paliso mtundu unyake wa kupulikira uwo tikwenera cara kuwuzerezga.
Kuzoŵezga Mamanyiro Ghithu
8. Kasi kuzoŵezga ‘mamanyiro ghithu’ kukukolerana wuli na kuzomera mazaza gha Yehova?
8 Baibolo likutiphalira kuti tikwenera kuzoŵezga ‘mamanyiro ghithu’ kuti ‘tipaturenge uwemi na uheni.’ (Heb. 5:14) Antheura, cilato cithu kuti nkhulondezga waka malango gha Ciuta kwambura kughanaghanirapo yayi. M’malo mwake, tikwenera “kupatula uwemi na uheni” mwakuyana na malango gha Yehova. Cilato cithu nchakuti tiwone vinjeru ivyo vili mu malango gha Yehova, mwakuti tiyowoye nga ni wamasalmo uyo wakati: “Dango linu liri mkati mwa mtima wane.”—Sal. 40:8.
9. Kasi njuŵi yithu tingayisambizga wuli malango gha Yehova ndipo cifukwa wuli nchakuzirwa kucita nthena?
9 Kuti nase timanye kuzirwa kwa malango gha Ciuta nga ni wamasalmo, tikwenera kughanaghanirapo pa ivyo tikuŵazga mu Baibolo. Mwaciyelezgero, para taŵazga za dango linyake la Yehova, tingajifumba kuti: ‘Cifukwa wuli fundo iyi njavinjeru? Cifukwa wuli nchacandulo kwa ine usange napulikira? Ni masuzgo wuli agho ghakuwira awo ŵakuleka kupulikira ulongozgi wa Ciuta pa nkhani iyi?’ Usange njuŵi yithu yikukolerana na malango gha Yehova, nchakuwonekerathu kuti tisankhenge vinthu mwakukolerana na khumbo lake. Tilutilirenge ‘kumanyiska ico ndi khumbo la Fumu’ na kulilondezga mwa kuŵa ŵakupulikira. (Efe. 5:17) Ni nyengo zose yayi apo kucita nthena nkhupusu.
Satana Wakukhumba Kucefya Mazaza gha Ciuta
10. Ni nthowa wuli iyo Satana wagwiliskira nchito kuti wacefye mazaza gha Ciuta?
10 Kufuma papo kale Satana wakukhumba kucefya mazaza gha Ciuta. Mzimu wake wa kujiyimira ukulongoreka mu nthowa zinandi. Mwaciyelezgero, wakupangiska ŵanthu kuleka kuzirwiska nthengwa iyo yikambika na Ciuta. Ŵanyake ŵakukhalira lumoza pambere ŵandatorane, ndipo ŵanji ŵakupenjerezga nthowa izo ŵangamazgira nthengwa. Ŵanthu ŵanthena ŵangakolerana na mwanakazi munyake wakumanyikwa comene uyo wakuŵa mu mafilimu. Iyo wakati: “Nchamacitiko yayi kuŵa na mwanalume panji mwanakazi yumoza.” Wakayowoyaso kuti: “Nkhumanya yayi usange pali munthu uyo ngwakugomezgeka kwa mufumu panji muwoli wake, nesi uyo wakukhumba kucita nthena.” Wati waghanaghanirapo za kumara kwa vibwezi vyake, mwanalume munyake wakumanyikwa comene uyo wakuŵa mu mafilimu wakayowoya mwakuyana waka, wakati: “Nkhukayika usange tili kulengeka kuti tikhalenge na mwanakazi panji mwanalume yumoza pera kwa umoyo withu wose.” Ntheura tikwenera kujifumba kuti: ‘Kasi nkhuzomera mazaza gha Yehova pa nkhani ya nthengwa, panji nkhuwona kuti nthengwa yingamara nyengo yiliyose nga umo caru cikuwonera?’
11, 12. (a) Cifukwa wuli cingaŵa cinonono ku ŵawukirano kuzomera mazaza gha Yehova? (b) Yowoyani ciyelezgero cakulongora uheni wa kuleka kulondezga malango gha Yehova.
11 Kasi ndimwe muwukirano uyo wali mu gulu la Yehova? Usange ni nthena, manyani kuti maso gha Satana ghali pa imwe apo wakuyezgayezga kuti wacefye mazaza gha Yehova. “Makhumbiro gha uwukirano” ndiposo kupusikika na ŵabwezi ŵinu vingamucitiskani kughanaghana kuti nchakusuzga kulondezga malango gha Ciuta. (2 Tim. 2:22) Lekani kuzomerezga kuti ivi vimucitikirani. Yezgayezgani kuwona vinjeru ivyo vili mu malango gha Ciuta. Mwaciyelezgero, Baibolo likumuphalirani kuti: “Cimbirani uzaghali.” (1 Kor. 6:18) Apa napo jifumbani kuti: ‘Cifukwa wuli dango ili ndavinjeru? Kasi nisangenge candulo wuli para napulikira dango ili?’ Panji mungaŵa kuti mukumanyapo ŵanji awo ŵakakana kupulikira ulongozgi wa Ciuta ndipo ŵakajicemera masuzgo. Kasi mbakukondwa pa nyengo ya sono? Kasi sono ŵali na umoyo uwemi kuluska apo ŵakacitanga vinthu mwakukolerana na gulu la Yehova? Kasi ŵasanga nadi cimwemwe ico ŵateŵeti ŵa Ciuta ŵalije?—Ŵazgani Yesaya 65:14.
12 Wonani ivyo wakayowoya Mkhristu munyake, zina lake Sharon. Wakati: “Cifukwa ca kuleka kucindika malango gha Yehova, nili kutora Ezi. Kanandi nkhukumbukira umo nkhakondweranga apo nkhateŵeteranga Yehova.” Mudumbu uyu wakamanya kuti ukaŵa ucindere kuswa malango gha Yehova, ndiposo kuti mphanyi wakaghazirwiska comene. Malango gha Yehova ghakutivikilira. Sharon wakafwa pati pajumpha masabata ghankhondi na ghaŵiri kufumira apo wakayowoyera mazgu agha. Ivyo vikacitikira Sharon vikulongora kuti Satana walije ciwemi cilicose cakuti wapeleke ku ŵanthu awo ŵakuŵa ku cigaŵa cake. Pakuti ni “wiske wa utesi,” wakulayizga vinthu vinandi kweni wakufiska yayi ivyo wakulayizga, nga umo wakacitira na Heva. (Yoh. 8:44) Nadi, nyengo zose nchiwemi comene kuzomera mazaza gha Yehova.
Kanani Mzimu wa Kujiyimira
13. Ni nthowa wuli yimoza iyo tingakanira mzimu wa kujiyimira?
13 Kuti tizomere mazaza gha Yehova tikwenera kukana mzimu wa kujiyimira. Kujikuzga kungatipangiska kughanaghana kuti tikukhumbikwira kulongozgeka na munthu munyake yayi. Mwaciyelezgero, tingakana ulongozgi wakufuma kwa awo ŵakulongozga ŵanthu ŵa Ciuta. Ciuta wali kunozga nthowa iyo muzga wa magomezgeko na wa vinjeru wakupelekera cakurya cauzimu pa nyengo yakwenelera. (Mat. 24:45-47) Mwakujiyuyura, tikwenera kumanya kuti nthowa iyi ndiyo Yehova wakugwiliskira nchito kupwelelera ŵanthu ŵake mazuŵa ghano. Iŵani nga mbapositole ŵakugomezgeka. Apo ŵasambiri ŵanji ŵakakhuŵara, Yesu wakafumba ŵapositole, wakati: “Imwe namwe kasi mukukhumba kuluta?” Petros wakazgora kuti: “Fumu, tilute tiye kwa njani? ndimwe muli nagho mazgu gha umoyo wa muyirayira.”—Yoh. 6:66-68.
14, 15. Cifukwa wuli tikwenera kupulikira ulongozgi wa mu Baibolo?
14 Kuzomera mazaza gha Yehova kukusazgapo kulondezga ulongozgi wakufuma mu Mazgu ghake. Mwaciyelezgero, muzga wa magomezgeko na wa vinjeru nyengo zose wakuticenjezga kuti tileke kugona tulo. (1 Tes. 5:6) Ulongozgi uwu ngwakwenelera comene mu mazuŵa agha ghaumaliro apo ŵanthu ŵanandi ‘mbakujitemwa, ndiposo ŵakutemwa ndarama.’ (2 Tim. 3:1, 2) Kasi nase tingakhwaskika na nkharo iyi? Enya. Kuŵa na vilato ivyo vikuleka kukolerana na kuteŵetera Ciuta kungatipangiska kuti tigone mwauzimu panji kwamba kutemwa comene vinthu vyakuthupi. (Luka 12:16-21) Lekani nchamahara kulondezga ulongozgi wa mu Baibolo na kukana umoyo wa kujikondweska, uwo wazara mu caru ca Satana ici.—1 Yoh. 2:16.
15 Cakurya cauzimu cakufuma kwa muzga wa magomezgeko na wa vinjeru cikupelekeka ku mipingo kwizira mu ŵalara. Baibolo likuticiska, kuti: “Ŵapulikirani awo mbacilongozi ŵinu, ndipo ŵalambirani: cifukwa ŵakulinda mizimu yinu, nga ndi awo ŵamkupataula; mwakuti ŵacite ici na cimwemwe, ndipo na citima cara: cifukwa ici nchambura kwandula kwa imwe.” (Heb. 13:17) Kasi ici cikung’anamura kuti ŵalara ŵa mpingo mbambura kwananga? Yayi. Ciuta ndiyo wakumanya makora kuwura urunji kwawo kuluska munthu waliyose. Ndipouli, wakukhumba kuti tijilambikenge kwa iwo. Kupulikira ŵalara, nangauli mbambura kufikapo, kukulongora kuti tikupulikira mazaza gha Yehova.
Kukhumbikwa kwa Kujiyuyura
16. Kasi tingalongora wuli kuti tikucindika Yesu uyo ni Mutu wa mpingo Wacikhristu?
16 Nyengo zose tikwenera kukumbuka kuti Yesu ndiyo ni Mutu wa mpingo. (Kol. 1:18) Ici nchifukwa cimoza ico tikujilambikira ku ulongozgi wa ŵalara ndipo ‘tikuŵacindika comene nkhanira.’ (1 Tes. 5:12, 13) Ŵalara ŵa mpingo nawo ŵangalongora kuti mbakujilambika mwa kusambizga mpingo ivyo Mazgu gha Ciuta ghakuyowoya, kuti maghanoghano ghawo yayi. Iwo ‘ŵakuleka kulutilira ivyo vili kulembeka’ mwakuti ŵaleke kusambizga maghanoghano ghawo.—1 Kor. 4:6.
17. Cifukwa wuli kujipenjera nchindi nkhwakofya?
17 Waliyose mu mpingo wakwenera kucenjera na mzimu wa kukhumba kujipenjera nchindi. (Zinth. 25:27) Vikuwoneka kuti ili likaŵa suzgo la musambiri munyake uyo mpositole Yohane wakakumana nayo. Yohane wakalemba kuti: “Diotrefe, uyo wakutemwa kuŵa mukuru mwa iwo, wakukana kutipulika. Ntheura, usange nkhwiza, nditi ndikumbuske milimo yake iyo wakuyicita, pakutiŵeleŵetera na mazgu ghaheni.” (3 Yoh. 9, 10) Nase mazuŵa ghano tingasambirapo kanthu pa nkhani iyi. Tili na cifukwa ciwemi ca kumazgira kamtima ka kujipenjera nchindi ako tingaŵa nako. Baibolo likutiphalira kuti: “Kujikuzga kukudangilira pharaniko, ndipo mzimu wakujituntha ukudangilira kuwa.” Wose awo ŵakuzomera mazaza gha Ciuta ŵakwenera kukana kujiŵikamo, cifukwa kuleka kucita nthena kungacitiska kuti ŵakhozgeke soni.—Zinth. 11:2; 16:18.
18. Nchivici cingatovwira kuti tizomere mazaza gha Yehova?
18 Enya, kaniranithu mzimu wa caru wa kujiyimira ndipo zomerani mazaza gha Yehova. Nyengo zose, ghanaghanirani comene za mwaŵi uwo muli nawo wa kuteŵetera Yehova. Kuŵa yumoza wa ŵanthu ŵa Ciuta nchilongolero cakuti wamuguzani na mzimu wake utuŵa. (Yoh. 6:44) Mungawuwonanga mwakupepuka yayi ubwezi winu na Ciuta. Yezgayezgani kuti mu umoyo winu wose mulongorenge kuti mukukana mzimu wa kujiyimira, ndiposo kuti mukuzomera mazaza gha Yehova.
Kasi Mukukumbuka?
• Kasi kuzomera mazaza gha Yehova kukusazgapo vici?
• Kasi kuzoŵezga ‘mamanyiro ghithu’ kukukolerana wuli na kuzomera mazaza gha Yehova?
• Ni nthowa wuli izo Satana wagwiliskira nchito kuti wacefye mazaza gha Ciuta?
• Cifukwa wuli kujiyuyura nkhwakukhumbikwa kuti tizomere mazaza gha Yehova?
[Cithuzithuzi pa peji 18]
“Tikwenera kupulikira Ciuta kwakuluska ŵanthu”
[Cithuzithuzi pa peji 20]
Nyengo zose nchamahara kulondezga malango gha Ciuta