Kumarana na Masuzgo gha Upharazgi wa ku Nyumba na Nyumba
“Tikakhoma mtima mwa Ciuta withu kumuphalirani ivangeli la Ciuta mu mphindano yikuru.”—1 TES. 2:2.
1. Kasi Yeremiya wakakumana na masuzgo wuli, ndipo wakamarana nagho wuli?
YEREMIYA wakajipulikanga nga umo tikujipulikira ise. Apo Yehova wakamupa uteŵeti wakuti waŵe “nchimi ku ŵamitundu,” iyo wakadandaura kuti: “Awe, Fumu Yehova! Wonani, ningamanya kuyowoya cara, cifukwa ndili mwana.” Ndipouli, cifukwa ca kugomezga Yehova, wakazomera uteŵeti uwo wakapika. (Yer. 1:4-10) Kwa vilimika vyakujumpha 40, Yeremiya wakapharazgira ŵanthu ŵambura kunweka na uthenga wake, ndipo ŵanyake ŵakamukananga, kumunyoza, nanga nkhumutimba. (Yer. 20:1, 2) Nyengo zinyake wakaghanaghananga kuti waleke waka uteŵeti. Ndipouli, wakalutilira kupharazga uthenga uwo ŵanthu ŵanandi ŵakawutemwanga yayi. Cifukwa ca nkhongono za Ciuta, Yeremiya wakafiska vinthu ivyo pa iyo yekha wakate watondekenge.—Ŵazgani Yeremiya 20:7-9.
2, 3. Kasi masuzgo agho ŵateŵeti ŵa Ciuta mazuŵa ghano ŵakukumana nagho ghakuyana wuli na gha Yeremiya?
2 Ŵateŵeti ŵanandi ŵa Ciuta mazuŵa ghano ŵangajipulika nga ni umo Yeremiya wakajipulikiranga. Para tikaghanaghananga za kukapharazga ku nyumba na nyumba, taŵanandi ŵa ise tikatenge: ‘Ningakwaniska yayi.’ Kweni tikati tamanya kuti khumbo la Yehova ndakuti tipharazgenge makani ghawemi, tikamazga wofi na kwamba kulimbikira kupharazga. Nangauli vili nthena, taŵanandi tili kukumanapo na masuzgo agho ghakapangiska kuti pa nyengo yinyake ciŵe cinonono kulutilira kupharazga. Mbunenesko nadi kuti nchakusuzga kwamba kupharazga ku nyumba na nyumba na kulutilira kucita nthena mpaka kuumaliro.—Mat. 24:13.
3 Wuli usange mukamba ni kale kusambira Baibolo na Ŵakaboni ŵa Yehova ndipo mukwiza ku maungano, kweni mukutondeka kwamba kupharazga ku nyumba na nyumba? Panji wuli usange ndimwe Kaboni wakubapatizika kweni mukuwona kuti nchakusuzga kupharazga ku nyumba na nyumba, nangauli muli na nkhongono zakucitira nthena? Manyani kuti ŵapharazgi ŵa mitundu yose ŵakumarana na masuzgo gha upharazgi wa ku nyumba na nyumba. Namwe Yehova wangamovwirani kumarana nagho.
Kukhwima Mtima
4. Kasi nchivici cikawovwira mpositole Paulosi kuti wapharazgenge makani ghawemi mwacikanga?
4 Mwambura kukayika, mukumanya kuti mulimo wa kupharazga pa caru cose ukucitika na mzimu wa Ciuta, kuti na nkhongono za ŵanthu yayi, nesi vinjeru vyawo. (Zek. 4:6) Ndimo viliriso na uteŵeti uwo Mkhristu waliyose payekha wakucita. (2 Kor. 4:7) Ghanaghanirani za mpositole Paulosi. Wati wakumbuka nyengo iyo wakasuzgikira pamoza na ŵamishonale ŵanyake, wakalemba kuti: “Tikati tasuzgika kale, na kukhozgeka soni pa Filipi, . . . tikakhoma mtima mwa Ciuta withu kumuphalirani ivangeli la Ciuta mu mphindano yikuru.” (1 Tes. 2:2; Mil. 16:22-24) Cingaŵa cakusuzga kugomezga kuti mupharazgi wa mwamphu nga ni Paulosi nyengo zinyake wakasuzgikanga kupharazga. Ndipouli, nga ndise, Paulosi nayo wakeneranga kugomezga Yehova kuti wapharazge makani ghawemi mwacikanga. (Ŵazgani Ŵaefeso 6:18-20.) Kasi tingamuyezga wuli Paulosi?
5. Kasi nthowa yimoza iyo tingaŵira ŵakukhwima mtima pakupharazga ni nji?
5 Nthowa yimoza iyo tingaŵira ŵakukhwima mtima pakupharazga nkhulomba. Mupayiniya munyake wakati: “Nkhulomba kuti niyowoyenge na cikanga, kuti niconthenge mitima ya ŵategherezgi, kweniso kuti nikondwenge na uteŵeti. Nakuti uwu ni mulimo wa Yehova, ngwithu yayi. Ntheura palije ico tingacita kwambura wovwiri wake.” (1 Tes. 5:17) Kuti tipharazge mwacikanga, tose tikwenera kulomba mzimu utuŵa wa Ciuta mwambura kuleka.—Luka 11:9-13.
6, 7. (a) Kasi Ezekiyeli wakapokera mboniwoni wuli, ndipo yikang’anamurangaci? (b) Kasi ŵateŵeti ŵa Ciuta mazuŵa ghano ŵakusambiraci ku mboniwoni ya Ezekiyeli?
6 Buku la Ezekiel likutiphaliraso nthowa yinyake iyo yingatovwira kuti tipharazgenge mwacikanga. Mu mboniwoni iyo Ezekiyeli wakawona, Yehova wakamupa buku lakuzinga ilo likaŵa lakulembeka mukati na kuwaro wuwo ndipo mukaŵa “mazgu gha kutengera na kulira na citima.” Ciuta wakamuphalira kuti warye buku ili, wakati: “Mwana wa munthu, irya buku ili nkhukupa na kuzuzga [nalo] matumbo.” Kasi mboniwoni iyi yikang’anamurangaci? Ezekiyeli wakeneranga kuwumanya makora uthenga uwo wakeneranga kukapharazga. Uthenga uwu ukeneranga kuŵa mu maghanoghano ghake, panji kuti kuŵa mu mtima wake. Mprofeti uyu wakati: “Penepapo nkharya; ndipo mu mlomo wane likaŵa lakunowa nga ndi uci.” Ezekiyeli wakakondwanga na mulimo wa kupharazgira ŵanthu uthenga wa Ciuta nga ni para wakurya uci. Nangauli wakeneranga kupharazga uthenga wa ceruzgo kwa ŵanthu ŵambura kunweka, kweni wakawonanga kuti ni mwaŵi ukuru comene kwimira Yehova na kufiska uteŵeti uwo wakapika.—Ŵazgani Ezekiel 2:8–3:4, 7-9.
7 Mboniwoni iyi yili na sambiro lakuzirwa kwa ŵateŵeti ŵa Ciuta mazuŵa ghano. Nase tili na uthenga wa ceruzgo wakuti tiphalire ŵanthu awo kanandi ŵakumanya yayi kuzirwa kwa mulimo withu. Kuti tilutilire kuwona uteŵeti withu Wacikhristu kuŵa mwaŵi wapadera wakufuma kwa Ciuta, nyengo zose tikwenera kuŵazga na kusambira Mazgu gha Ciuta. Mazgu gha Ciuta tingaghamanya makora yayi usange tikughasambira kwambura kulanguruka panji kughasambira mwakamozakamoza. Kasi munganyololera umo mukucitira sambiro la mwaŵene ndiposo kuŵazga Baibolo? Kasi mungayezgayezga yayi kuti nyengo zose muŵazgenge Baibolo na kulangurukapo?—Sal. 1:2, 3.
Umo Mungambira Kudumbiskana na Ŵanthu za Baibolo
8. Ni nthowa wuli iyo ŵapharazgi ŵanyake ŵa Ufumu ŵakwambira kudumbiskana na ŵanthu za Baibolo para ŵakupharazga ku nyumba na nyumba?
8 Ku ŵapharazgi ŵanandi, cinthu cakusuzga comene pa upharazgi wa ku nyumba na nyumba nkhwamba kuyowoya na munthu uyo ŵamusanga. Mbunenesko nadi, mu vigaŵa vinyake nchakusuzga kwamba kuyowoyeskana na munthu. Ŵapharazgi ŵanyake ŵakufwatuka comene kudumbiskana na ŵanthu pa nyumba zawo, usange ŵasankha mazgu ghacoko waka na kuŵagaŵira thirakiti, nga umo vyalongolekera pa bokosi ilo liri pasi apa. Mutu wa thirakiti panji vithuzithuzi vyake vyakutowa vingapangiska kuti mweneko wa nyumba wanweke, ndipo ici cikutipa mwaŵi wakuti tiyowoye mwakudumura cifukwa ico tizira ndiposo kumufumba fumbo. Nthowa yinyake nja kumulongora mathirakiti ghatatu panji ghanayi ghakupambana, na kumufumba kuti wasankhepo ilo watemwa. Ndipouli, cilato cithu nchakuti tigaŵire waka mathirakiti yayi nesi kuti ndigho tipharazgirenge pa nyumba yiliyose. Kweni nchakuti tambe kudumbiskana na ŵanthu nkhani iyo yingapangiska kuti tambe nawo sambiro la Baibolo.
9. Cifukwa wuli kunozgekera makora nkhwakukhumbikwa?
9 Mwambura kupwelelerako za nthowa iyo mwamwambira kudumbiskana na munthu, kunozgekera makora kumovwiraninge kuti mukayowoye mwambura wofi ndiposo na mtima wose. Mupayiniya munyake wakati: “Upharazgi ukuninozgera comene para nanozgekera makora. Nkhuŵa wakunweka kuphalira ŵanthu ivyo nanozgekera.” Mupayiniya munyakeso wakati: “Para buku ilo namugaŵira nalimanya makora, nkhuyowoya na mtima wose.” Nangauli kughanaghanira waka ivyo tamuyowoya kungaŵa kuwemi, kweni ŵanandi ŵawona kuti nchakovwira comene kuyezgelera mwakukwezga ivyo ŵamuyowoya. Kucita nthena kukovwira kuti ŵapeleke kwa Yehova vyose ivyo ŵangafiska.—Kol. 3:23; 2 Tim. 2:15.
10. Nchivici cingawovwira kuti maungano ghakunozgekera uteŵeti wa m’munda ghaŵenge ghacandulo?
10 Maungano ghakunozgekera uteŵeti wa m’munda agho ghakucitika mwaluso, nagho ghakovwira kuti para tikupharazga ku nyumba na nyumba tiŵenge ŵacimwemwe ndiposo kuti ticonthenge mitima ya ŵanthu. Para lemba la zuŵa la pa zuŵa ilo likuyowoya comene za mulimo wa kupharazga, mungaliŵazga na kudumbiskana mwakudumura. Ndipouli, mbali uyo wakucitiska ungano wa kunozgekera uteŵeti wa m’munda wakwenera kuyowoya panji kulongora ciyezgelero cipusu ico cingaŵa cakovwira mu cigaŵa cinu. Panji wangayowoya fundo zinyake izo zingaŵa zakovwira mu uteŵeti pa zuŵa ilo. Ici cingawovwira kuti ŵapharazgi ŵakapharazge mwaluso. Para ŵakunozgekera makora, ŵalara panji ŵanyake awo ŵakucitiska maungano agha, ŵangacita ivyo tadumbiskana apa na kumalizga mu nyengo iyo yili kuŵikika.—Rom. 12:8.
Kuzirwa kwa Kutegherezga
11, 12. Kasi kutegherezga comene ndiposo kulengera ŵanthu lusungu kungawovwira wuli kuti ŵanweke na makani ghawemi? Yowoya viyelezgero.
11 Padera pa kunozgekera makora, kulongora kuti tikutemwa ŵanthu nako kungawovwira kuti tambe kudumbiskana nawo nkhani za mu Baibolo na kuŵacontha. Nthowa yimoza iyo tingalongolera kuti tikuŵatemwa ni umo tikutegherezgera. Mulaŵiliri wakwendakwenda munyake wakati: “Kuzika na kutegherezga comene para ŵanthu ŵakuyowoya kukuŵapangiska kuti ŵategherezge makani ghawemi, ndipo kukulongora kuti tikuŵafipira mtima.” Kuŵategherezga makora ndiposo kulongora kuti tikuŵaghanaghanira, kungaŵapangiska kuti ŵanweke na uthenga wa mu Baibolo, nga umo ciyelezgero ico cili pasi apa cikulongolera.
12 Mu kalata iyo yikalembeka mu nyuzipepara ya Le Progrès, ya ku Saint-Étienne, ku France, mwanakazi munyake wakalongosora za ŵanthu ŵaŵiri awo ŵakiza ku nyumba yake apo mwana wake wa myezi yitatu wakaŵa kuti watayika waka. Iyo wakalemba kuti: “Mwaluŵiro nkhamanya kuti Mbakaboni ŵa Yehova. Nkhakhumbanga kuŵacimbizga mwanchindi, kweni nkhawona burosha ilo ŵakagaŵiranga. Likayowoyanga za cifukwa ico Ciuta wakuzomerezgera masuzgo. Ntheura nkhaŵacemera mu nyumba kuti nkhaŵasuske. . . . Ŵakaboni aŵa ŵakakhala mu nyumba yane kwa nyengo yakujumpha ora limoza. Ŵakanitegherezga comene ndipo ŵakalongora kuti ŵakunilengera lusungu. Apo ŵakafumanga pa nyumba yane, nkhapembuzgika comene ndipo nkhazomera kuti ŵakawereso.” (Rom. 12:15) Pakati pajumpha nyengo, mwanakazi uyu wakamba kusambira Baibolo. Tingawona kuti ico mwanakazi uyu wakakumbukira ni umo ŵadumbu aŵa ŵakamutegherezgera, kuti ivyo ŵakayowoya yayi.
13. Kasi tingacita wuli kuti upharazgi withu uyanenge na ŵanthu awo tikukumana nawo?
13 Para ŵanthu tikuŵategherezga na kuŵalengera lusungu, tikuŵapa mwaŵi wakuti ŵalongore kuti Ufumu ngwakukhumbikwa nadi. Ivyo ŵayowoyenge, vikovwira kuti tiŵapharazgire makora makani ghawemi. Mukwenera kuti muli kuwona kuti kanandi ŵapharazgi ŵaluso ŵakuŵa ŵategherezgi ŵawemi. (Zinth. 20:5) Ŵakulongora kuti ŵakughanaghanira nadi ŵanthu awo ŵakukumana nawo mu uteŵeti. Ŵakulemba waka mazina ghawo na maadiresi yayi, kweni ŵakumanyaso masuzgo ghawo na ivyo ŵakutemwa. Para munthu wayowoya suzgo linyake, ŵakukapenja fundo mu mabuku na kuwelerako kukamuphalira ivyo ŵasanga. Nga ni mpositole Paulosi, ŵakusintha uthenga wawo wa Ufumu mwakuyana na ŵanthu awo ŵaŵasanga. (Ŵazgani 1 Ŵakorinte 9:19-23.) Para ŵapharazgi ŵakughanaghanira ŵanthu mu nthowa iyi ŵakuŵapangiska kuti ŵanweke na makani ghawemi ndiposo kuwona “ciwuravi ca lusungu lwa Ciuta withu.”—Luka 1:78.
Lutilirani Kuwona Vinthu Mwakwenelera
14. Kasi tingalongora wuli mikhaliro ya Yehova apo tikucita uteŵeti withu?
14 Yehova wali kuticindika mwa kutipa wanangwa wa kusankha. Nangauli ni Ciuta Wankhongonozose, kweni wakucicizga munthu yayi kuti wamuteŵetere. M’malo mwake, wakuciska ŵanthu kuti ŵamuteŵeterenge cifukwa cakuti ŵakumutemwa, ndipo wakutumbika awo ŵakuwonga ivyo wakuŵacitira. (Rom. 2:4) Ise nga mbateŵeti ŵake, nyengo zose tikwenera kupharazga makani ghawemi mu nthowa yakuti yilongorenge kuti mweneco ni Ciuta walusungu. (2 Kor. 5:20, 21; 6:3-6) Mwantheura, tikwenera kulutilira kuwona ŵanthu ŵa mu cigaŵa cithu mwakwenelera. Nchivici cingatovwira kuti tiwonenge ŵanthu mwakwenelera?
15. (a) Kasi Yesu wakaphalira ŵapositole ŵake kuti ŵacitengeci para ŵanthu ŵakana uthenga wawo? (b) Nchivici ico cingatovwira kuti tilutilire kupenja awo mbakwenelera?
15 Yesu wakaphalira ŵalondezgi ŵake kuti ŵaleke kufipa mtima comene para ŵanthu ŵakana uthenga wawo. M’malo mwake, ŵalutilire kupenja awo mbakwenelera. (Ŵazgani Mateyu 10:11-15.) Kuŵa na vilato vicokovicoko ivyo tingafiska kungatovwira kuti ticite ntheura. Mbali munyake wakujiyaniska na munthu uyo wakupenja vinthu vyakuzirwa nga ni mafuta, golide, na vinyake. Iyo wakati: “Zuŵa lililose nkhupenja munthu uyo wanganweka na unenesko.” Mbali munyake wali na cilato ca “kukumana na munthu yumoza wa mtima uwemi sabata yiliyose ndiposo kuwelerako mwaluŵiro kuti munthu uyo walutilire kunweka.” Ŵapharazgi ŵanyake ŵakuyezgayezga kuti ŵaŵazgirenge munthu waliyose lemba nanga lingaŵa limoza pera usange nchamacitiko. Kasi nchilato wuli cakwenelera ico mungajiŵikira?
16. Kasi tili na vifukwa wuli vyakulutililira kupharazga?
16 Vinthu viwemi ivyo upharazgi wa ku nyumba na nyumba ukufiska, kuti vikuthemba pa umo ŵanthu ŵa mu cigaŵa cithu ŵakutegherezgera pera yayi. Mbunenesko kuti mulimo wa kupharazga ukovwira kuti ŵanthu ŵa mitima yiwemi ŵazakapone, kweni paliso vinthu vinyake vyakuzirwa ivyo ukufiska. Uteŵeti uwu ukutipa mwaŵi wakuti tilongore kuti tikutemwa Yehova. (1 Yoh. 5:3) Ukutovwiraso kuti tileke kuŵa na mulandu wa ndopa. (Mil. 20:26, 27) Ukucenjezga ŵanthu ŵambura kopa Ciuta za “ora la ceruzgo [ca Ciuta].” (Civ. 14:6, 7) Cinthu cikuru comene nchakuti kupharazga makani ghawemi kukuthuwuska zina la Yehova pa caru cose capasi. (Sal. 113:3) Antheura, kwali ŵanthu ŵategherezge panji yayi, tikwenera kulutilira kupharazga uthenga wa Ufumu. Nakuti Yehova wakukondwa comene para tikuyezgayezga kupharazga makani ghawemi.—Rom. 10:13-15.
17. Kasi sonosono apa ŵanthu ŵazamucicizgika kumanya vici?
17 Nangauli mazuŵa ghano ŵanandi ŵakuyuyura mulimo withu wa kupharazga, kweni sonosono apa ŵazamumanya kuti ngwakuzirwa. (Mat. 24:37-39) Yehova wakasimikizgira Ezekiyeli kuti para ceruzgo ico wakapharazganga cafika, Ŵaisrayeli ŵakugaruka “tiŵamanye kuti yikaŵamo nchimi mukati mwawo.” (Ezek. 2:5) Mwakuyana waka, apo Ciuta wazamweruzga caru ciheni ici, ŵanthu ŵazamucicizgika kumanya kuti uthenga uwo Ŵakaboni ŵa Yehova ŵakapharazganga ku nyumba na nyumba ndiposo ku malo ghanyake ukafuma kwa Yehova, uyo ni Ciuta waunenesko, ndiposo kuti Ŵakaboni ŵakimiranga nadi iyo. Ni mwaŵi ukuru comene kumanyikwa na zina lake ndiposo kupharazga uthenga wake mu nyengo yapadera iyi. Mwakovwirika na Yehova, mphanyi talutilira kumarana na masuzgo gha upharazgi wa ku nyumba na nyumba.
Kasi Mungazgora Wuli?
• Kasi tingacita wuli kuti tiŵe na cikanga pakupharazga?
• Nchivici cingatovwira kuti tambe kudumbiskana na ŵanthu za Baibolo para tikupharazga ku nyuma na nyumba?
• Kasi tingalongora wuli kuti tikutemwa nadi ŵanthu?
• Nchivici cingatovwira kuti tilutilire kuwona ŵanthu ŵa mu cigaŵa cithu mwakwenelera?
[Bokosi/Cithuzithuzi pa peji 9]
Nthowa Yimoza Yakwambira Kudumbiskana na Ŵanthu za Baibolo
Umo Mungambira:
◼ Pamanyuma pa kutawuzga mweneko wa nyumba, mungamupa thirakiti na kuyowoya kuti: “Ico nizira nchakuti nidumbiskane namwe za nkhani yakuzirwa iyi.”
◼ Panji mungamupa thirakiti na kuyowoya kuti: “Niza pano kuti nidumbiskane namwe pa kanyengo kacoko waka za umo mukuwonera nkhani iyi.”
Para wazomera thirakiti:
◼ Mwambura kucedwa, mufumbani fumbo lipusu lakukhwaskana na mutu wa thirakiti, ilo lingawovwira kuti wayowoye maghanoghano ghake.
◼ Tegherezgani mwakupwelelera mwakuti mumanye makora maghanoghano ghake. Muwongani pa ivyo wangayowoya na kuvighanaghanira para mukudumbiskana nayo.
Kuti Mulutilire Kudumbiskana:
◼ Ŵazgani na kudumbiskana nayo lemba limoza panji kuluska apa, ilo likuyana na masuzgo ghake ndiposo ivyo wakutemwa.
◼ Para walongora kuti ngwakunweka, mupani buku na kulongosora umo mungasambilira nayo Baibolo. Panganani nayo kuti mukawereso.