Sendelerani kwa Ciuta

“Ciuta wa Cisangulusko Cose” 2 Ŵakorinte 1:3, 4

PALI vinthu vinandi ivyo vingacitiska munthu kuti waŵe na citima ndiposo kutaya mtima. Vinthu ivi vikusazgapo masuzgo, kukhuŵazgika, ndiposo phukwa. Pa nyengo nga ni izi, mungajifumba kuti ‘Ni nkhu uko ningasanga wovwiri? Ivyo mpositole Paulosi wakayowoya pa 2 Ŵakorinte 1:3, 4 vikulongora kuti Yehova Ciuta wangatipembuzga.

Mu vesi 3, Ciuta wakuzunurika kuti ni “Ŵawiske ŵa lusungu.” Kasi mazgu agha ghakung’anamuraci? Mazgu gha Cigiriki agho ghali kung’anamurika kuti “lusungu” ghangang’anamura kucitira citima ŵanji para ŵakusuzgika.a Buku linyake likuti mazgu agha ghangang’anamurikaso kuti “wakucita citima” panji “wakupwelelera comene.” “Lusungu” lwa Ciuta lukumucitiska kuti wacitepo kanthu para ŵanthu ŵakusuzgika. Kumanya ukhaliro wa Ciuta uwu kukutipangiska kuti tisendelere kufupi na iyo.

Paulosi wakayowoyaso kuti Yehova ni “Ciuta wa cisangulusko cose.” Apa, Paulosi wakayowoya lizgu ilo likung’anamura “kupembuzga munthu uyo wali na suzgo panji citima, ndiposo kumovwira panji kumukhozga.” Baibolo likuti: ‘Tikusanguluska yunji uyo wali mu suzgo,’ para tikumukhozga kuti wazizipizge suzgo lake.

Mungafumba kuti, ‘Kasi Ciuta wakutipembuzga na kutikhwimiska mwawuli para tikusuzgika?’ Comenecomene wakutikhwimiska kwizira mu Mazgu ghake Baibolo, ndiposo lurombo. Paulosi wakutiphalira kuti Ciuta wali kutipa Mazgu ghake mwakuti “tiŵirenge na cigomezgo mu cizizipizgo na cisangulusko ivyo vili mu Malembo.” Kweniso, para tikulomba kufumira pasi pa mtima, tingasanga “mtende wa Ciuta, uwo ukuzungura kuwamo kose.”—Ŵaroma 15:4; Ŵafilipi 4:7.

Kweni kasi Yehova wakupembuzga ŵanthu ŵake kufika mpha? Paulosi wakuti Ciuta “wakutisanguluska mu suzgo yithu yose.” (2 Ŵakorinte 1:4) Ciuta wakutikhwimiska na kutipa nkhongono zakuzizipizgira masuzgo gha mtundu uliwose agho tingakumana nagho. Kasi fundo iyi njakukhozga yayi?

Cipembuzgo ico Ciuta wakupeleka cikumalira pa uyo wakucipokera pera yayi. Paulosi wakayowoyaso kuti Ciuta wakutisanguluska mwakuti “ise timanye kusanguluska awo ŵali mu suzgo yinji, na cisangulusko ceneico ise taŵene tikusanguluskika naco na Ciuta.” Para tapembuzgika ku suzgo lithu, nase tikucitira citima ŵanyithu awo ŵali na suzgo, ndipo tikukhuŵirizgika kuti tiŵawovwire.

Yehova, uyo ni “Ciuta wa cisangulusko cose,” kuti wakumazga masuzgo ghithu mwamunthondwe yayi. Ndipouli, usange tikumulomba kuti watipembuzge, wangatipa nkhongono zakuzizipizgira citima panji suzgo ilo tili nalo. Ipo nchakwenelera kuti Ciuta walusungu nga ni uyu ndiyo timusopenge na kumulumba.

[Mazgu ghamusi]