Yehova Ni “Muthaski” Withu
“Yehova wakuwovwira na kuŵathaska.”—SAL. 37:40.
1, 2. Kasi ni fundo wuli yakuyowoya za Yehova iyo yikutipembuzga na kutipa nkhongono?
MIFWIRI iyo yikupangika na dazi yikukhala pa malo ghamoza yayi. Para caru cikwenda, mifwiri nayo yikwenda na kusintha. Ndipouli, Mlengi wa caru na dazi wakusintha cara. (Mal. 3:6) Baibolo likuti Iyo “kuti wangaŵa wakuzgokazgoka cara, panji nesi kuŵa na mufwiri wa kung’anamuka.” (Yak. 1:17) Fundo iyi, iyo yikuyowoya za Yehova, yikutipembuzga comene na kutipa nkhongono, comenecomene para tikukumana na viyezgo ndiposo masuzgo. Cifukwa wuli?
2 Nga ni umo vyalongosolekera mu nkhani iyo yajumpha, Yehova wakamanyikwa kuti ni “Muthaski” mu nyengo yakale. (Sal. 70:5) Ngwambura kusintha ndipo wakucita ivyo walayizga. Ntheura ŵasopi ŵake mazuŵa ghano ŵali na vifukwa vyakukwana vyakugomezgera kuti ‘waŵawovwirenge na kuŵathaska.” (Sal. 37:40) Kasi Yehova wathaska wuli ŵateŵeti ŵake mazuŵa ghano? Kasi wangatithaska wuli ise patekha?
Kuthaskika ku Ŵakususka
3. Cifukwa wuli tingasimikizga kuti ŵakususka ŵazamuŵalekeskapo yayi ŵanthu ŵa Yehova kupharazga makani ghawemi?
3 Nanga Satana wangayezgayezga wuli, wazamuŵatondeskapo yayi Ŵakaboni ŵa Yehova kusopa Yehova mwakufikapo. Mazgu gha Ciuta ghakutisimikizgira kuti: “Palije homwa ilo lafulikira iwe tilisakate, ndipo lulimi lose ilo tiluwukire iwe mu kweruzga tiulususkenge.” (Yes. 54:17) Ŵakususka ŵayezga kulekiska mulimo wa kupharazga wa ŵanthu ŵa Ciuta, kweni ŵatondeka. Wonani viyelezgero viŵiri.
4, 5. Kasi ŵanthu ŵa Yehova ŵakatambuzgika wuli mu 1918, ndipo nchivici cikacitika pamanyuma pake?
4 Mu 1918, ŵanthu ŵa Yehova ŵakatambuzgika comene, ndipo awo ŵakacitiska nthambuzgo iyi ŵakaŵa ŵaliska ŵa machalichi, kukhumba kuti ŵaŵalekeske mulimo wawo wa kupharazga. Pa Meyi 7, boma la United States likadumura kuti J. F. Rutherford, uyo pa nyengo iyo wakalaŵiliranga mulimo wa kupharazga pa caru cose, ndiposo ŵabali ŵanyake ku munthavi ukuru ŵakakike. Mu nyengo yambura kukwana myezi yiŵiri, Mbali Rutherford na ŵabali ŵake ŵauzimu ŵakaŵapusikizgira kuti ŵakaŵa na mulandu wa kuwukira boma ndipo ŵakaphalirika kuti ŵakhale mu jere kwa nyengo yitali. Kasi ŵakususka ŵakalekeskerathu mulimo wa kupharazga mwakugwiliskira nchito makhoti? Yayi.
5 Kumbukani layizgo la Yehova: “Palije homwa ilo lafulikira iwe tilisakate.” Mwamabuci, pati pajumpha myezi yinkhondi na yinayi kufuma apo Mbali Rutherford na ŵanyake ŵakakakikira, ŵabali aŵa ŵakafumiska pa belu, pa Malici 26, 1919. Cilimika cakulondezgapo, pa Meyi 5, 1920, khoti likaleka kuŵazenga mulandu. Ŵabali ŵakagwiliskira nchito mwaŵi uwu kucitira mulimo wa Ufumu. Kasi cikacitika nchivici pamanyuma pake? Paŵa kusazgikira kukuru comene kufumira nyengo yira. Malumbo ghose gha ivyo vyacitika ghakuluta kwa “Muthaski.”—1 Kor. 3:7.
6, 7. (a) Kasi nchivici cikacitikira Ŵakaboni ŵa Yehova mu muwuso wa Nazi ku Germany, ndipo cikacitika nchivici pamanyuma pake? (b) Kasi mdauko wa mazuŵa ghano wa Ŵakaboni ŵa Yehova walongora vici?
6 Sono wonani ciyelezgero caciŵiri. Mu 1934, Hitler wakalayizga kuti wamarenge Ŵakaboni ŵa Yehova wose mu Germany. Wakakhuka comene kuti wacite ivyo wakayowoya. Pamanyuma pakuti wayowoya mazgu agha, ŵanthu ŵanandi ŵakakakika na kuŵikika mu jere. Ŵakaboni masauzandi ghanandi ŵakatambuzgika ndipo ŵanandiso ŵakakomeka ku misasa yakusuzgirako ŵanthu. Kasi Hitler wakafiska cilato cake cakuti wamare Ŵakaboni wose? Kasi wakalekeska mulimo wa kupharazga makani ghawemi mu Germany? Yayi. Mu nyengo ya nthambuzgo, ŵabali ŵithu ŵakapharazganga mwakubisilizga. Muwuso wa Nazi wati wamara, ŵakagwiliskira nchito wanangwa wawo mwa kulutilira kupharazga. Lero, mu Germany muli ŵapharazgi ŵa Ufumu ŵakujumpha 165,000. Apa napo “Muthaski” walongora kuti wafiska layizgo lake lakuti: “Palije homwa ilo lafulikira iwe tilisakate.”
7 Mdauko wa mazuŵa ghano wa Ŵakaboni ŵa Yehova walongora kuti Yehova wazamuzomerezgapo yayi kuti ŵanthu ŵake wose ŵafwe. (Sal. 116:15) Wuli pakuyowoya za ise waliyose payekha? Kasi Yehova wakutithaska wuli ise patekha?
Wuli Pakuyowoya za Civikiliro Cakuthupi?
8, 9. (a) Kasi tikumanya wuli kuti ni nyengo zose yayi apo tingavikilirika mwakuthupi? (b) Nchinthu wuli ico tikwenera kuzomerezga?
8 Ise, waliyose payekha, tikumanya kuti Yehova wandatilayizge kuti nyengo zose wativikilirenge mwakuthupi. Nase tikucita nga ni Ŵahebere ŵatatu ŵakugomezgeka awo ŵakakana kugwadira cikozgo ca golide ca Themba Nebukadinezara. Ŵawukirano ŵakopa Ciuta aŵa, ŵakaghanaghanapo yayi kuti Yehova waŵathaskenge mwamunthondwe kuti ŵaleke kupwetekeka. (Ŵazgani Daniel 3:17, 18.) Kweni nga ni umo vinthu vikaŵira, Yehova wakaŵathaska ku moto wakofya wa mu ng’anjo. (Dan. 3:21-27) Nanga ni mu nyengo yakale, kuti ni nyengo zose yayi apo Yehova wakathaskanga ŵanthu mwamunthondwe. Ŵateŵeti ŵanandi ŵa Yehova ŵakakomekanga na ŵalwani ŵawo.—Heb. 11:35-37.
9 Wuli pakuyowoya za mazuŵa ghano? Pakuŵa “Muthaski,” Yehova wangathaska nadi ŵanthu ku vinthu vyakofya. Kasi tingayowoya usange Yehova wakajilirapo panji yayi pa vinthu vinyake? Yayi. Kweni munthu uyo wapona cinthu cakofya wangajipulika kuti Yehova ndiyo wamuthaska. Kungaŵa kujiŵikamo kukuru comene usange yunji wangamususka. Kweniso tikuzomerezga kuti Ŵakhristu ŵanandi ŵali kufwa cifukwa ca nthambuzgo, nga ni iyo yikaŵako mu nyengo ya Nazi. Ŵanyake ŵali kufwa cifukwa ca masoka ghakofya. (Muph. 9:11) Tingafumba kuti: ‘Kasi Yehova wakatondeka kuŵa “Muthaski” kwa ŵanthu ŵakugomezgeka awo umoyo wawo uli kudumulizgika?’ Ndimo viliri yayi.
10, 11. Cifukwa wuli munthu wakuŵavya nkhongono para nyifwa yafika, kweni kasi Yehova wangacita vici?
10 Ghanaghanirani za ici: Munthu wangayigega yayi nyifwa, cifukwa palije munthu uyo ‘wangathaska mzimu wake ku nkhongono za Sheole,’ panji Hadesi, kung’anamura malaro. (Sal. 89:48) Kweni wuli pakuyowoya za Yehova? Mudumbu uyo wakapona mu nyengo ya Nazi wakukumbuka ivyo amama ŵake, awo ŵakaŵa Ŵakaboni, ŵakamuphalira kuti ŵamupembuzge pa nyifwa za ŵakutemweka ŵawo awo ŵakafwa mu misasa yakusuzgirako ŵanthu. Iwo ŵakati: “Usange nyifwa yiwusenge pacanya pa ŵanthu kwamuyirayira, mphanyi yanguŵa yankhongono kuluska Ciuta. Ni nthena yayi?” Nadi, nyifwa tingayiyelezgera yayi na Mupi wa umoyo mweneuyo ngwankhongono comene. (Sal. 36:9) Yehova wakumbuka wose awo ŵali mu Sheole, panji Hadesi, ndipo wazamuthaska waliyose wa iwo.—Luka 20:37, 38; Civ. 20:11-14.
11 Ndipouli, Yehova wakukhwaskika comene na umoyo wa ŵasopi ŵake ŵakugomezgeka. Tiyeni sono tidumbiskane nthowa zitatu izo “Muthaski” wakutithaskira.
Kuvikilirika Mwauzimu
12, 13. Cifukwa wuli civikiliro cauzimu nchakuzirwa comene, ndipo Yehova wakutipa wuli civikiliro ici?
12 Yehova wakutipa civikiliro cauzimu ico nchakuzirwa comene. Pakuŵa Ŵakhristu ŵaunenesko tikumanya kuti pali cinthu cakuzirwa comene kuluska umoyo withu wasono. Cinthu cakuzirwa comene ico tili naco ni ubwezi withu na Yehova. (Sal. 25:14; 63:3) Kuŵavyenge ubwezi uwu, mphanyi umoyo withu wanguŵa wacandulo cicoko comene, ndipo mphanyi tanguŵavya cilindizga ca munthazi.
13 Ico tikuwonga nchakuti Yehova wakutipa wovwiri uliwose wakukhumbikwa kuti tiŵenge pafupi na iyo nyengo zose. Tili na Mazgu ghake, mzimu wake utuŵa, ndiposo gulu lake la pa caru cose kuti vitovwire. Kasi tingacita wuli kuti tisange candulo na vinthu ivi? Para tikusambira Mazgu ghake na mtima withu wose nyengo zose, mbwenu tikhozgenge cipulikano na cilindizga cithu. (Rom. 15:4) Para tikulomba mzimu wake mwakufumira pasi pa mtima, mbwenu tovwirikenge kukana kucita vinthu vyakukayikiska. (Luka 11:13) Para tikulondezga ulongozgi wa muzga wa magomezgeko na wa vinjeru, uwo ukupelekeka kwizira mu mabuku ghakulongosora Baibolo ndiposo maungano gha mpingo, gha dera na gha cigaŵa, mbwenu tiŵenge kuti tikurya cakurya cauzimu “mu nyengo yakwenelera.” (Mat. 24:45) Vinthu ivi vikutivikilira mwauzimu ndiposo kutovwira kuti tiŵe pafupi na Ciuta.—Yak. 4:8.
14. Yowoyani ciyelezgero cakulongora kuti Yehova wakuvikilira mwauzimu.
14 Kuti fundo ya civikiliro cauzimu yipulikikwe makora, kumbukani ŵapapi awo ŵazunurika pauyambiro wa nkhani iyo yajumpha. Mazuŵa ghacoko waka pamanyuma pa kusoŵa kwa mwana wawo mwanakazi, Theresa, ŵakapokera nkhani yacitima yakuti iyo wakomeka.a Dada wakukumbukira kuti: “Nkhalomba kwa Yehova kuti wamuvikilire. Apo wakasangika kuti wafwa, ningakana yayi kuti maghanoghano ghane ghakwamba ghakaŵa ghakuti, cifukwa wuli Yehova wakazgora yayi lurombo lwane. Nkhumanya kuti Yehova wandalayizge kuti nyengo zose wavikilirenge ŵateŵeti ŵake, waliyose payekha mwamunthondwe. Nkhalutilira kulomba kuti nipulikiske. Nakhozgeka cifukwa ca kumanya kuti Yehova wakuvikilira ŵanthu mwauzimu. Ici cikung’anamura kuti, wakutipa vyose ivyo tikukhumbikwira kuti tivikilire ubwezi withu na iyo. Civikiliro ca mtundu uwu ndico nchakuzirwa comene cifukwa cikukhwaska munthazi mwithu mwamuyirayira. Yehova wakamuvikilira Theresa mu nthowa iyi, cifukwa panyengo iyo wakafwiranga wakateŵeteranga mwakugomezgeka. Nasanga mtende cifukwa ca kumanya kuti cilindizga cake ca umoyo wa munthazi cili mu mawoko gha Yehova.”
Kufukatirika pa Citara ca Ulwari
15. Kasi ni nthowa wuli izo Yehova wangatovwilira para talwara comene?
15 Yehova wangatifukatira pa “citara ca urwali” nga ni umo wakacitira na Davide. (Sal. 41:3) Nangauli Yehova wakutithaska mwamunthondwe yayi mazuŵa ghano, kweni wakutovwira. Mwawuli? Fundo izo zili mu Mazgu ghake zingatovwira kuti tisankhe makora munkhwara ndiposo vinthu vinyake. (Zinth. 2:6) Tingasanga fundo ziwemi comene mu magazini gha Gongwe la Mulinda na Galamukani!, agho ghakulongosora vinthu vyakukhwaskana na nthenda yithu. Mwakugwiliskira nchito mzimu wake, Yehova wangatipa nkhongono zakuluska zakawiro kuti tizizipizge suzgo ilo tili nalo na kulutilira kuŵa ŵakugomezgeka visuzge viti wuli. (2 Kor. 4:7) Na wovwiri uwu, tingagega kukhwaskika comene na ulwari withu mpaka kuluwa vinthu vyakukhwaskana na ubwezi withu na Yehova.
16. Ni mwawuli umo mbali munyake wacitira kuti wazizipizge matenda?
16 Ghanaghanirani za mbali muwukirano uyo wazunurika pakwambilira pa nkhani iyo yajumpha. Mu 1998, wakasangika na matenda ghakomizga viŵaro, agho ghakucemeka kuti amyotrophic lateral sclerosis panji ALS, agho paumaliro ghakakoma viŵaro vyake vyose.b Kasi wacita wuli na matenda agha? Iyo wakalongosora kuti: “Naŵa mu nyengo ya vyakuŵinya ndiposo kufipa mtima cifukwa ca kumanya kuti umaliro wa nthenda yane ni nyifwa mbwenu. Nyengo yiliyose para najipulika kuŵa wambura wovwiri, nkhulomba vinthu vitatu kwa Yehova: kuleka kutaya mtima, kuzikira, ndiposo kuzizipizga. Nkhuwona kuti Yehova wazgora malurombo agha. Kuleka kutaya mtima kukunovwira kuti nighanaghanirenge vinthu vyakupembuzga, nga ni umo vinthu vizamuŵira mu caru ciphya apo nizamwendangaso makora, kusangwa na cakurya cakunowa, na kwambaso kuyowoya na mbumba yane. Kuzikira kukunovwira kuti nileke kudandaura comene na masuzgo gha ucilima. Kuzizipizga kukunipangiska kuti nilutilire kuŵa wakugomezgeka na kuleka kuzomerezga kuti vinthu vinyake viŵe vyakuzirwa kuluska ubwezi wane na Yehova. Nane nkhujipulika nga ni umo wakajipulikira wamasalmo Davide, cifukwa nkhuwona kuti Yehova wanifukatira pa citara cane ca ulwari.”—Yes. 35:5, 6.
Kupika Vyakukhumbikwa pa Umoyo
17. Kasi Yehova wali kulayizga kuti waticitirenge vici, ndipo kasi layizgo ili likung’anamuraci?
17 Yehova wali kulayizga kuti watipwelelerenge mwakuthupi. (Ŵazgani Mateyu 6:33, 34 na Ŵahebere 13:5, 6.) Ici cikung’anamura kuti vinthu ivi vizenge vyekha mwamunthondwe yayi nesi kuti tikanenge kugwira nchito. (2 Tes. 3:10) Ico layizgo ili likung’anamura nchakuti: Usange tikupenja dankha Ufumu wa Ciuta pa umoyo withu ndiposo tili ŵakukhumbisiska kuseŵeza kuti tisange vyakukhumbikwa, tingaŵa na cigomezgo cose kuti Yehova watovwirenge kuti tivisange. (1 Tes. 4:11, 12; 1 Tim. 5:8) Wangatipa ivyo tikukhumba mu nthowa iyo ise tikulindizga yayi. Wangacita nthena kwizira mwa musopi munyithu kuti watovwire panji kutipa nchito.
18. Yowoyani cakucitika ico cikulongora umo Yehova wangatipira vinthu ivyo tikusoŵerwa.
18 Kumbukani mama wambura mfumu wake, uyo wazunurika mu nkhani iyo yajumpha. Apo iyo na mwana wake msungwana ŵakaluta ku malo ghanyake, cikaŵa cakusuzga kuti wasange nchito. Iyo wakalongosora kuti: “Mulenji nkhalutanga mu uteŵeti wa m’munda ndipo kumise nkhapenjanga nchito. Nkhukumbuka ivyo vikacitika apo nkhaluta ku sitoro kukagura mkaka. Nkhawona mphangwe iyo ŵakaguliskanga pa malo ghanyake, kweni nkhaŵavyirathu ndarama zakugulira. Nkhadandawura comene mwakuti nindadandawulepo nthena umoyo wane wose. Pa zuŵa ili nkhati nawelera kunyumba, nkhasanga kuti panyumba pali majumbo ghakuzura na mphangwe mtundu uliwose. Pakaŵa cakurya cinandi cakuti tikarya kwa myezi yinandi. Nkhalira, na kumuwonga comene Yehova.” Pakajumpha nyengo yitali yayi, mudumbu uyu wakamanya kuti mbali munyake wa mu mpingo, uyo wakalimanga mphangwe ndiyo wakazakaŵikapo pa nyumba yake. Pamanyuma pake wakamulembera kalata na kumuphalira kuti: “Nangauli nkhamuwongani comene zuŵa lira, nkhawongaso Yehova cifukwa ca kupangiska imwe kuŵa walusungu mwakuti nikumbuke kuti wakunitemwa.—Zinth. 19:17.
19. Kasi ŵateŵeti ŵa Yehova ŵazamuŵa na cigomezgo wuli panyengo ya cisuzgo cikuru, ndipo ise tikwenera kusimikizga mtima kucita vici panyengo yasono?
19 Apa nchakuwonekerathu kuti ivyo Yehova wakacita mu nyengo yakale ndiposo mu nyengo yithu, vikupeleka cifukwa cakugomezgera kuti iyo ni Movwiri withu. Sonosono apa, pa nyengo ya cisuzgo cikuru ico cizenge pa caru ca Satana, ndipo tizamukhumbikwira wovwiri wa Yehova kuluska kumanyuma kose. Kweni ŵateŵeti ŵa Yehova ŵazamugomezga iyo kuti ndiyo wazamuŵathaska. Ŵazamwinuska mitu yawo na kukondwa, pakumanya kuti kuwombokwa kwawo kwaneng’enera. (Luka 21:28) Panyengo yasono, kwali tingakumana na viyezgo wuli, tiyeni tisimikizge mtima kuti tigomezge Yehova, uku tikumanya kuti Ciuta withu uyo wakusintha yayi, ni “Muthaski” withu nadi.
[Mazgu ghamusi]
a Wonani nkhani yakuti “Coping With an Unspeakable Tragedy,” (Kuzizipizga Para Pacitika Cinthu Cakucitiska Citima Comene) mu Galamukani! ya Cingelezi ya Julayi 22, 2001, mapeji 19-23.
b Wonani nkhani ya mutu wakuti: “Chikhulupiriro Chathandiza Kupirira Matenda Oopsa,” mu Galamukani! ya Janyuwale 2006, mapeji 25-29.
Kasi Mukukumbuka?
• Kasi Yehova wangaŵathaska wuli awo umoyo wawo wadumulizgika?
• Cifukwa wuli civikiliro cauzimu nchakuzirwa comene?
• Kasi layizgo la Yehova lakuti watipwelelerenge mwakuthupi likung’anamuraci?
[Cithuzithuzi pa peji 8]
Mbali Rutherford na ŵanyake ŵati ŵakakika mu 1918, ŵakafwaturika pamanyuma pake ndipo mulandu wawo ukamara
[Cithuzithuzi pa peji 10]
Yehova wangatifukatira para tili pa “citara ca ulwari”