Sambizgani Ŵana Ŵinu

Kasi Mukucitira Sanji Ŵanyinu? Ŵakuru ŵa Yosefe Ŵakamucitiranga Sanji

TIYENI tiwone ivyo kuŵa wasanji kukung’anamura. Kasi mukutondeka kutemwa munthu uyo ŵanji ŵakumuhaya kuti ni muwemi, ngwakutowa, panji wakuwoneka makora?a— Enya, ndivyo vingacitika para mukucitira sanji munthu munyake.

Ŵana ŵangacitirana sanji usange ŵapapi ŵakutemwa comene yumoza pera. Baibolo likuyowoya za mbumba yinyake iyo yikaŵa na suzgo la sanji. Tiyeni tiwone suzgo ilo likaŵapo cifukwa ca sanji ndiposo ivyo tingasambirapo.

Yosefe wakaŵa mwana wa Yakobe wa nambara 11, ndipo ŵakuru ŵake ŵakamucitiranga sanji. Kasi mukumanya cifukwa ico ŵakamucitiranga sanji?— Nchifukwa cakuti Yosefe wakatemwekanga comene na awiskewo. Mwaciyelezgero, Yakobe wakapangira Yosefe munjilira wakutowa comene. Yakobe wakatemwanga comene Yosefe “cifukwa wakaŵa mwana wa ucekuru wake,” kweniso ndiyo wakaŵa mwana wakwamba uyo Rakelo, muwoli wake wakutemweka wakamubabira.

Baibolo likuti: ‘Ŵanaŵanyake ŵakati ŵawona kuti wiskewo wakumutemwa Yosefe kwakuluska ŵanaŵanyake wose, ŵakamutinkha.’ Zuŵa linyake, Yosefe wakaphalira ŵa mu mbumba yake kuti wakalota kuti wose, kusazgapo awiske ŵakumusindamira. Baibolo likuti: “Ŵanaŵanyake ŵakaŵa naye na sanji,” ndipo nanga mbawiske ŵakamukalipira cifukwa ca kuŵaphalira ivyo wakalota.—Genesis 37:1-11.

Pakati pajumpha nyengo, apo Yosefe wakaŵa na vilimika 17, ŵakuru ŵake ŵakaŵa kutali na cikaya cawo, uko ŵakaliskanga mberere na mbuzi. Yakobe wakatuma Yosefe kuti wakaŵawone. Kasi mukumanya ivyo ŵakuru ŵake ŵakakhumbanga kumucitira ŵati ŵamuwona?— Ŵakakhumbanga kumukoma. Kweni ŵakuru ŵake ŵaŵiri, Rubeni na Yuda ŵakakana.

Apo ŵamalonda ŵanji ŵakajumphanga kuluta ku Eguputo, Yuda wakati: “Zaninge, timuguriske.” Ntheura, ŵakamuguliska. Pamasinda, ŵakakoma mbuzi, na kutora ndopa kuphaka munjilira wa Yosefe. Ndipo ŵakati ŵalongora munjilira uwu ku ŵawiskewo, Yakobe wakalira, wakati: ‘Cikoko cikwenera kuti camurya Yosefe.’—Genesis 37:12-36.

Mu kuluta kwa nyengo, Yosefe wakamba kutemweka na Faro, fumu ya Eguputo. Cikaŵa cifukwa cakuti Ciuta wakawovwira Yosefe kubawulizga maloto ghaŵiri gha Faro. Mu loto lakwamba Faro wakawona ng’ombe zinkhondi na ziŵiri zakututuŵa ndipo pamanyuma wakawonaso zinyake zinkhondi na ziŵiri zakughanda. Kaciŵiri wakalota visasuni vinkhondi na viŵiri vyakututuŵa, ndiposo pamanyuma pake wakawona visasuni vinkhondi na viŵiri vyakuphapa. Yosefe wakati maloto ghose ghaŵiri agha ghakang’anamuranga kuti kuŵenge vyakurya vinandi kwa vilimika vinkhondi na viŵiri, ndipo pamanyuma pake kuŵenge njara kwa vilimika vinkhondi na viŵiri. Ntheura Faro wakapa Yosefe udindo wa kusunga vyakurya mu vilimika ivyo kukaŵa vyakurya vinandi, kunozgekera nyengo ya njara.

Njara yikati yamba, mbumba ya Yosefe, iyo yikakhalanga kutali comene na ku Eguputo, yikamba kupenja cakurya. Ntheura, Yakobe wakatuma ŵakuru ŵa Yosefe kuti ŵalute ku Eguputo kukapenja cakurya. Ŵakakumana na Yosefe, kweni ŵakamumanya yayi. Pambere wandajivumbure kwa iwo, Yosefe wakaŵayezga, ndipo wakawona kuti ŵakaŵa na citima cifukwa cakuti ŵakamucitira nkhaza. Pamasinda Yosefe wakajivumbura. Ŵakavumbatirana na kukondwa comene.—Genesis, vipaturo 40 mpaka 45.

Kasi mungasambirako vici ku nkhani iyi vyakukhwaskana na sanji?— Sanji yingacitiska suzgo likuru comene, ndipo yingacitiska munthu kuti wapweteke mbali wake. Tiyeni tiŵazge Milimo 5:17, 18 na Milimo 7:54-59 ndipo tiwone ivyo ŵanthu ŵakacitira ŵasambiri ŵa Yesu cifukwa ca sanji.— Kasi sono mwawona cifukwa ico sanji yiliri yiheni?—

Yosefe wakakhala vilimika 110. Wakababa ŵana awo ŵakamubabiraso ŵazukuru, na ŵazukuru civu. Tikukayika yayi kuti Yosefe wakaŵasambizganga kuti ŵatemwanenge ndiposo kuti ŵaleke kuŵa na sanji.—Genesis 50:22, 23, 26.

[Mazgu ghamusi]

Mafumbo:

○ Kasi sanji ni vici?

○ Ni vici ivyo ŵakuru ŵa Yosefe ŵakacita cifukwa ca sanji?

○ Cifukwa wuli Yosefe wakagowokera ŵakuru ŵake?

○ Kasi tingasambira vici ku nkhani iyi?