Kasi Nchivici Cikucitika Para Munthu Wafwa?
“Ŵanthu wose, kusazgapo na ŵaheni wuwo ŵali na mzimu wambura kufwa . . . Ŵakulangika mu moto wambura kuzimwa, ndipo ŵakufwa yayi, nchamacitiko yayi kuti ŵacimbire cilango ici.”—Clement, wa ku Alexandria, mulembi uyo wakaŵako mu vilimika vya m’ma 200 C.E.
MWAKUYANA na Clement, awo ŵakusambizga kuti kuli helo ŵakughanaghana kuti ŵanthu ŵali na mzimu wambura kufwa. Kasi ndivyo Baibolo likusambizga nadi? Wonani umo Baibolo likuzgolera mafumbo ghakulondezgapo agha.
Kasi Adamu, uyo wakaŵa munthu wakwamba wakaŵa na mzimu wambura kufwa? Pakuyowoya za kulengeka kwa Adamu, Baibolo likuti: ‘Fumu Ciuta wakawumba munthu kufuma ku dongo la caru, wakathutiramo mu mphuno zake mvuci wa umoyo; ndipo munthu wakazgoka wamoyo.’ (Genesis 2:7, King James Version) Wonani kuti lemba ili likuyowoyapo yayi kuti Adamu wakapika mzimu.
Kasi nchivici ico cikacitikira Adamu wakati wananga? Cilango ico Ciuta wakamupa cikaŵa cakuti wakasuzgike ku helo yayi. M’malo mwake, pakuyowoya za cilango ico Ciuta wakapeleka, Baibolo la Cikatolika likuti: ‘Mukufoma mavuci ndimo utiuwonerenge cakurya, usuke uwelere ku dongo, cifukwa ndiko ukatoreka. Ndiwe fuvu, ndipo uti uwelerenge ku fuvu.’ (Genesis 3:19, New American Bible) Cilango ico Ciuta wakapeleka cikulongorapo yayi kuti cigaŵa cinyake ca Adamu cikapona nyifwa. Apo Adamu wakafwa palije kanthu ako kakapona.
Kasi munthu wali na mzimu wambura kufwa? Ciuta wakaphalira Ezekiyeli kuti: ‘Munthu uyo wakwananga wamkufwa.’ (Ezekiel 18:4, The Holy Bible—New International Version) Mpositole Paulosi wakalemba kuti: “Kwananga kukanjira mu caru capasi na munthu yumoza [Adamu], ndipo nyifwa yikiza na kwananga. Ntheura nyifwa yikathandazgika mu ŵanthu wose, pakuti ŵanthu wose ŵakananga.” (Ŵaroma 5:12, Phangano Liphya) Usange ŵanthu wose mbakwananga, ipo wose ŵakufwa.
Kasi para munthu wafwa wakumanya kalikose? Mazgu gha Ciuta ghakuti: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara.” (Mupharazgi 9:5) Pakuyowoya ivyo vikucitika para munthu wafwa, Baibolo likuti: “Wakuwelera ku dongo; mu zuŵa leneilo pera vyose ivyo waphukwanga vikumara.” (Salmo 146:4) Usange ŵakufwa “ŵakumanya kanthu cara” ndipo ivyo “waphukwanga vikumara,” kasi ŵangasuzgika wuli mu helo?
Yesu Khristu wakayaniska nyifwa na tulo. (Yohane 11:11-14) Ndipouli, ŵanji ŵangasuska, na kuyowoya kuti Yesu wakasambizga kuti kuli helo wakocha, ndiposo kuti ŵakwananga ŵazamuponyeka mu moto wa helo. Tiyeni tiwone ivyo Yesu wakang’anamuranga apo wakayowoyanga za helo.