Kasi Helo Ni Malo Ghanadi? Kasi Baibolo Likuti Helo Ni Vichi?

Ivyo Baibolo likuyowoya

Mabaibolo ghanandi agho ghakang’anamurika mu vyaka vyakumasinda uku, ghakugwiliskira ntchito lizgu lakuti “helo” mu mavesi ghanyake. (Salimo 16:10; Milimo 2:27 a) Kuyana na chithuzi icho chili mu nkhani iyi, ŵanthu ŵanandi ŵakugomezga kuti helo ni malo agho ŵanthu ŵaheni ŵakulangikirako na moto kwamuyirayira. Kweni kasi ivi ndivyo Baibolo likusambizga?

Mu nkhani iyi

Kasi helo ni malo agho ŵanthu ŵakulangikirako muyirayira?

Yayi. Lizgu lakwambilira ilo likang’anamurika kuti “helo” ndipo mu Mabaibolo ghanyake lili kulembeka kuti (Chihebere, “Sheole”; Chigiriki, “Hadesi”) chomene likung’anamura “Dindi,” ilo tikusungamo munthu para wafwa. Baibolo likulongora kuti ŵanthu awo ŵali mu “Dindi” mbamoyo yayi.

Ŵakufwa ŵakumanya kalikose yayi ndipo ŵangapulika vyakuŵinya yayi. “Ku Dindi uko ukuluta kulije mulimo, maghanoghano, kumanya, panji vinjeru.” (Mupharazgi 9:10) Ku helo kulije chiwawa chakuti ŵanthu ŵakulira na vyakuŵinya. M’malo mwake, Baibolo likuti: “Ŵaheni ŵalengeskeke. Ŵachetamiskike mu Dindi.” [helo, Baibolo la Douay-Rheims].”—Salimo 31:17; (Baibolo la Douay-Rheims); Salimo 115:17.
Chiuta wakati nyifwa ndiyo ntchilango cha kwananga, wandayowoyepo kuti ŵanthu ŵamuphyanga na moto ku helo. Chiuta wakaphalira munthu wakwamba, Adamu, kuti chilango cha kuswa dango la Chiuta ni nyifwa. (Genizesi 2:17) Wakayowoyapo chilichose yayi chakukhwaskana na kutambuzgika mu moto wa helo. Pamanyuma pakuti Adamu wananga, Chiuta wakamuphalira chilango icho wapokerenge, wakati: “Ndiwe fuvu ndipo uzamuwelera ku fuvu.” (Genizesi 3:19) Kung’anamura kuti wazamuleka kuŵako. Viŵenge kuti Chiuta wamumuŵika Adamu ku moto wa helo, mphanyi napo wakayowoya. Chiuta wandasinthe chilango icho wakupeleka ku awo ŵaswa malango ghake. Pati pajumpha nyengo yitali kufuma apo Adamu wakanangira, Chiuta wakatuma mulembi munyake wa Baibolo kulemba kuti: “Malipiro gha kwananga ni nyifwa.” (Ŵaroma 6:23) Palijeso chifukwa cha kupelekera chilango chinyake, chifukwa “uyo wafwa wafwatuka ku kwananga kwake.”—Ŵaroma 6:7.
Chiuta wakukwiya nacho chisambizgo chakuti wakotcha ŵanthu ku helo muyirayira. (Yeremiya 32:35) Chisambizgo ichi chikususkana chomene na ivyo Baibolo likusambizga kuti “Chiuta ntchitemwa.” (1 Yohane 4:8) Iyo wakukhumba timusopenge iyo chifukwa chakuti tikumutemwa, chifukwa chakuti tikopa kuzakalangika muyirayira yayi.—Mateyu 22:36-38.
Ŵanthu ŵawemi ŵakaluta ku helo. Mabaibolo agho ghakugwiliskira ntchito lizgu lakuti “helo” ghakulongora kuti ŵanthu ŵakugomezgeka nga ni Yakhobe na Yobu ŵakaluta ku helo. (Genizesi 37:35; Yobu 14:13) Nanga ni Yesu nayo wakuyowoyeka kuti wakaŵa ku helo pa nyengo yapakati pa nyifwa yake na kuwuskika kwake. (Milimo 2:31, 32) Apa ntchakuwonekerathu kuti para Mabaibolo agha ghakugwiliskira ntchito lizgu lakuti “helo” ghakung’anamura Dindi.b

Wuli pakuyowoya vya ntharika ya Yesu ya munthu musambazi na Lazaro?

Ntharika iyi wakayowoya ni Yesu ndipo yili kulembeka pa lemba la Luka 16:19-31. Ntharika zikovwira kusambizga makora unenesko wa mu Baibolo. Ntharika ya munthu musambazi na Lazaro yikuyowoya vya nkhani iyo yikachitika nadi yayi. (Mateyu 13:34) Kuti mumanye vinandi vyakukhwaskana na ntharika iyi, wonani nkhani yakuti, “Kasi Munthu Musambazi na Lazaro Ŵakaŵa Anjani?”

Kasi helo wakwimira kuti munthu wali kutali na Chiuta?

Yayi. Chisambizgo chakuti ŵakufwa ŵangamanya kuti ŵali kutali na Chiuta chikususkana na Baibolo, ilo likuyowoya pakweru kuti ŵakufwa ŵakumanya kalikose yayi.—Salimo 146:3, 4; Mupharazgi 9:5.

Kasi walipo uyo wali kufwatukapo ku helo?

Enya. Baibolo likuyowoya vya ŵanthu 9 awo ŵakaluta ku Dindi (uko Mabaibolo ghanyake ghakuti ku “helo”) ndipo ŵakawuskika na kuŵaso ŵamoyo.c Viŵenge kuti ŵakamanyanga ivyo vikachitikanga apo ŵakaŵa mu helo, mphanyi ndiwo ŵakaŵa pa malo ghawemi kuyowoya ivyo vikuchitika para munthu wali uku. Chakukondweska ntchakuti palije uyo wakayowoyapo kuti wakatambuzgikanga panji kuti chinthu chinyake chikamuchitikiranga. Chifukwa wuli ŵakayowoyapo kalikose yayi? Nga umo Baibolo likuyowoyera, ŵakamanyanga kalikose yayi, vikaŵa nga ni para ŵagona “tulo” tuzito chomene.—Yohane 11:11-14; 1 Ŵakorinte 15:3-6.

a Mabaibolo ghanandi pasono ghakugwiliskira ntchito lizgu lakuti “helo” yayi pa lemba la Milimo 2:27. M’malo mwake, ghakugwiliskira ntchito mazgu nga ghakuti “dindi,” “ku malo gha ŵakufwa,” panji “ŵakufwa.” Ghanyake ghakugwiliskira waka ntchito lizgu la Chigiriki lenelilo lakuti “Hadesi.”

b Wonani bokosi lakuti “Mazgu gha mu chiyowoyero chakwambilira icho Baibolo likalembekeramo.”

c Wonani 1 Mathemba 17:17-24; 2 Mathemba 4:32-37; 13:20, 21; Mateyu 28:5, 6; Luka 7:11-17; 8:40-56; Yohane 11:38-44; Milimo 9:36-42; 20:7-12.

Mavesi gha mu Baibolo ghakuyowoya vya helo, panji kuti Dindi

Yobu 14:13: “Okwe, mphanyi mwanibisa mu Dindi [“helo,” Baibolo la Douay-Rheims Version], . . . muniŵikire nyengo yakwimikika na kunikumbuka!”

Ng’anamuro lake: Munthu wakugomezgeka Yobu, wakamanyanga kuti helo (Dindi) lingamupumuzga ku vyakuŵinya vyake ndipo pamanyuma Chiuta wangazakamuwuska ku ŵakufwa.

Salimo 145:20: “Yehova wakuvikilira awo ŵakumutemwa, kweni waparanyenge ŵaheni wose.”

Ng’anamuro lake: Chiuta wazamuwuskapo, panji kuti kuparanyirathu ŵaheni wose. Wazamuŵasunga ŵamoyo mu helo kuti waŵalange dankha yayi.

Mupharazgi 9:10: “Ku Dindi [“helo,” Baibolo la Douay-Rheims Version] uko ukuluta kulije mulimo, maghanoghano, kumanya, panji vinjeru.”

Ng’anamuro lake: Awo ŵali mu Dindi, panji kuti helo ŵakumanya kalikose yayi ndipo ŵangatambuzgika yayi. Nakuti ŵanyake awo mulembi wa Baibolo uyu wakaŵalemberanga mazgu gha vinjeru agha, ŵakaŵa ŵawemi.

Milimo 2:31: “Wakawonerathu na kuyowoya vya chiwuka cha Khristu, kuti wakasidika mu Dindi chara nesi thupi lake likawona kuvunda.”

Ng’anamuro lake: Yesu wakaluta ku helo (Dindi) apo wakafwa.

Ŵaroma 6:23: “Malipiro gha kwananga ni nyifwa.”

Ng’anamuro lake: Nyifwa ndiyo ntchilango chakukwana cha kwananga, kutambuzgika ku helo yayi.

Chivumbuzi 20:13: “Nyifwa na Dindi vikapeleka ŵakufwa awo ŵakaŵa mwenemumo.”

Ng’anamuro lake: Awo ŵali mu helo mbakufwa. Ŵazamuŵaso ŵamoyo para ŵazakawuskika.

Chivumbuzi 20:14: “Nyifwa na Dindi vikaponyeka mu nyanja ya moto.”

Ng’anamuro lake: Pamanyuma pakukhala mwazi chifukwa chakuti ŵanthu ŵawuka ku ŵakufwa, helo (Dindi) vizamuparanyika muyirayira, nga ni para vyawotcheka na moto. Kufuma apo, nyifwa iyo yikiza chifukwa cha kwananga kwa Adamu yizamuŵakoso yayi.—Ŵaroma 5:12.

Mazgu gha mu chiyowoyero chakwambilira icho Baibolo likalembekeramo

Nga umo mazgu ghamusi agha ghakulongolera, awo ŵakang’anamuranga Baibolo ŵapangiska kuti ŵanthu ŵatimbanizgikenge chifukwa cha kugwiliskira ntchito lizgu lakuti “helo” m’malo mwa mazgu gheneko gha mu viyowoyero vyakwambilira agho ghali na ng’anamuro linyake. Nakuti mu malo ghanyake vikuwoneka kuti ŵakakhumbanga ŵanthu ŵambe kugomezga kuti ŵaheni ŵamulangika muyirayira, m’malo mwa kuparanyika.

Sheole (Chihebere שְׁאוֹל), Hadesi (Chigiriki ᾅδης)

Ng’anamuro: Dindi lakusungamo wakufwa.—Salimo 16:10; Milimo 2:31

Kalembekero kake: Dindi, helo, khululu, malo gha ŵakufwa
Gehena (Chigiriki γέεννα)

Ng’anamuro: Kuparanyikirathu muyirayira.—Mateyu 5:30

Kalembekero kake: Gehena, helo
Tatarasi (Chigiriki ταρταρόω)

Ng’anamuro: Umo vinthu viliri ku viŵanda, ivyo ni vilengiwa vyauzimu viheni.—2 Petrosi 2:4

Kalembekero kake: Tatarasi; helo, helo wapasi
Apoleya (Chigiriki ἀπώλεια)

Ng’anamuro: Pharanyiko.—Mateyu 7:13

Kalembekero kake: Pharanyiko; helo
Pyr (Chigiriki πῦρ)[32]

Ng’anamuro: Moto, wanadi panji yayi.—Luka 17:29; Yuda 23.

Kalembekero kake: Moto; moto wa helo

Umo chisambizgo cha helo chikambira

Chikamba na ŵanthu ŵambura kusopa Chiuta: Ŵaeguputo ŵa mu nyengo yakale ŵakagomezganga kuti kuli moto wa helo. Buku lakulongosora vya nyifwa lakuchemeka Ȧm-Ṭuat (Amduat), ilo ŵakusanda mbiri ŵakuti likaŵako vyaka vya mu ma 1500 B.C.E. kumasinda uku, likulongosora vya awo “ŵazamuponyeka mu makululu gha moto; ndipo. . . ŵazamutondeka kufumamo mu moto uwu.”—The Egyptian Heaven and Hell.

Ŵakhristu ŵakwambilira ŵakasambizganga vyakukhwaskana na chisambizgo ichi yayi: “Ntchakuwonekerathu kuti mu Testamente Lasono mulije ukaboni uliwose wakuti Ŵakhristu ŵakwambilira ŵakasambizganga vya moto wa helo.”—A Dictionary of Christian Theology.

Vinjeru vya Ŵagiriki vikamba kunjira mu chisopa: “Kwamba cha mukatikati mwa vyaka vya mu ma 100 [C.E.] Ŵakhristu awo ŵakasambira vinjeru vya Ŵagiriki ŵakamba kusazga ivyo ŵakasambiranga na chisopa . . . Vinjeru ivyo ŵakavitemwanga chomene ni ivyo wakasambizganga Plato.” (Encyclopædia Britannica) Vinjeru ivi vikasazgangapo chigomezgo chakuti ŵanthu ŵakulangika ku helo para ŵafwa. “Pa Ŵagiriki ŵavinjeru wose, uyo wakapangiska kuti ŵanthu ŵagomezgenge chomene chisambizgo cha Helo ni Plato.”—Histoire des enfers (The History of Hell).

Chisambizgo cha moto wa helo chikagwiliskirikanga ntchito na chilato chakuti ŵanthu ŵawonenge nga kuti palije suzgo kutambuzga ŵanji: Mu nyengo iyo yikachemekanga kuti Spanish Inquisition, awo ŵasangika na mulandu wakugomezga vyakupambana na ivyo tchalitchi likasambizganga ŵakawotchekanga uku ŵapayikika pa khuni, awo ŵakachitanga ivi ŵakatenge munthu uyo wapika chilango ichi “ŵakucheta waka umo moto ukuŵira ku helo uko ŵakuya.” Nakuti ŵakatengeso ŵakuchita nthena kuti ŵawovwire awo ŵasangika na mulandu kuti ŵalape pambere ŵandafwe. (The Spanish Inquisition, lakulembeka na Jean Plaidy) Mwakuyana waka, Fumukazi Mary Yakwamba ya ku England yikawotcha ŵanthu pafupifupi 300 pa khuni, ndipo vikupulikikwa kuti yikatenge “ŵanthu aŵa ŵamuphya kale mu moto wa helo muyirayira, ntheura chingaŵa makora kuti nayo yiyezge chiuta pa nkhani iyi mwakuŵawotcherathu pano pasi, chifukwa ndimo chiuta wakulangira ŵanthu ŵaheni.”—Universal History, lakulembeka na Alexander Tytler.

Pasono chisambizgo ichi chasinthako: Visopa vinyake vyasinthako ivyo vikusambizga pa nkhani ya helo, ndipo vikuchita nthena kuti vikondweske waka ŵalondezgi ŵawo m’malo mwa kukana chisambizgo cha utesi ichi. (2 Timote 4:3) “Ŵanthu ŵakukhumba Chiuta uyo ngwa ubwezi na wambura kusuzga kuyowoyeskana nayo . . . Mazuŵa ghano ni viŵi yayi kuti ŵanthu ŵayowoyenge vya kwananga na kujiyimba mulandu.”—Purofesa Jackson W Carroll.