Kasi Mbanjani Awo Ŵakuluta ku Helo?

Ivyo Baibolo likuyowoya

Lizgu lakuti helo (ilo mu Chihebere ni “Sheole” ndipo mu Chigiriki ni “Hadesi”) likung’anamura dindi, malo gha moto ghakulangirako ŵanthu yayi. Kasi mbanjani awo ŵakuluta ku helo? Ŵanthu wose, ŵawemi na ŵaheni wuwo. (Yobu 14:13; Salimo 9:17) Baibolo likuti dindi ni “nyumba iyo ŵamoyo wose ŵamukumana.”—Yobu 30:23.

Yesu nayo ŵakaŵikika mu helo panji kuti hadesi wati wafwa. Ndipouli, iyo ‘kuti wakasidika mu hadesi’ yayi, chifukwa Chiuta wakamuwuska.—Milimo 2:31, 32.

Kasi para munthu waŵikika mu helo wakukhala kuko kwamuyirayira?

Yesu wazamuŵawuska wose awo ŵali mu helo (malaro) na nkhongono za Chiuta ndipo ŵazamuŵaso ŵa moyo. (Yohane 5:28, 29; Milimo 24:15) Pakuyowoya za chiwuka, uchimi wa pa lemba la Chivumbuzi 20:13 ukuti ‘nyifwa na hadesi vikapeleka ŵakufwa aŵo ŵakaŵa mwenemumo.’ Para mu helo ŵanthu ŵazakafumiskikamo, helo wazamusangikaso yayi; palije uyo wamuŵikikaso mu helo chifukwa “nyifwa yizamuŵakoso yayi.”—Chivumbuzi 21:3, 4; 20:14.

Ni ŵanthu wose yayi awo ŵakuŵikika mu helo para ŵafwa. Baibolo likuti ŵanthu ŵanyake ŵakuchitira dala viheni ndipo ŵakulapa yayi. (Ŵahebere 10:26, 27) Para ŵanthu aŵa ŵafwa, ŵakuluta ku helo yayi, kweni ku Gehena. Gehena wakwimira pharanyiko lamuyirayira. (Mateyu 5:29, 30) Mwachiyelezgero, Yesu wakayowoya kuti ŵalongozgi ŵa visopa awo ŵakachitanga upusikizgi mu nyengo yake ŵazamuluta ku Gehena.—Mateyu 23:27-33.