Kasi Ŵakaboni ŵa Yehova Ŵakumazga Nthengwa?
ŴANTHU ŵanandi ŵakuyowoya kuti: “Usange munyake mu nthengwa wasintha cisopa, nthengwa yikumara.” Nyengo zinyake ndivyo ŵanthu ŵanyake ŵakuyowoya usange munyake mu nthengwa wakukhumba kuŵa yumoza wa Ŵakaboni ŵa Yehova. Kweni kasi fundo iyi njaunenesko?
Mbunenesko kuti para yumoza mu nthengwa wakukhumba kusintha cisopa cake cakale, munyake wangapulikiska yayi cifukwa ico wakukhumba kucitira nthena. Munyake wangamba kwenjerwa, wangakhuŵara, nanga nkhwamba kuŵa mukali.
Kanandi ŵawoli ndiwo ŵakwamba kuŵa na maghanoghano gha kusintha cisopa. Usange muwoli winu wakusambira Baibolo na Ŵakaboni ŵa Yehova, kasi nthengwa yinu yingakhwaskika wuli? Usange ndimwe muwoli, ndipo mukusambira Baibolo na Ŵakaboni ŵa Yehova, kasi mungacitaci kuti movwire mfumu winu para wakwenjerwa?
Ivyo Ŵafumu Ŵakughanaghana
Mark, uyo wakukhala ku Australia wakakhala mu nthengwa kwa vilimika 12, apo muwoli wake wakamba kusambira Baibolo na Ŵakaboni ŵa Yehova. Mark wakati: “Nthengwa yithu yikaŵa yakukondweska comene, ndipo nkhagwiranga nchito yiwemi. Umoyo ukaŵa wakukondweska. Pamasinda muwoli wane wakamba kusambira Baibolo na Ŵakaboni ŵa Yehova. Nkhamba kughanaghana kuti ivyo muwoli wane wasankha vitimbanizgenge umoyo wane. Pakwamba nkhakondwa yayi kuti muwoli wane wacite nthena, kweni apo wakaniphalira kuti wakukhumba kukabapatizika kuti waŵe yumoza wa Ŵakaboni ŵa Yehova, nkhamba kwenjerwa comene.”
Mark wakamba kwenjerwa na kughanaghana kuti nthengwa yake yimarenge cifukwa cakuti muwoli wake wamba cisopa cinyake. Wakaghanaghana kuti wamukanizge muwoli wake kusambira Baibolo, ndiposo kulekerathu kukolerana na Ŵakaboni ŵa Yehova. Pambere wandacite ivi, Mark wakalindizgapo dankha. Nchivici ico cikacitikira nthengwa yake?
Mark wakati: “Nchakukondweska kuti nthengwa yithu sono njakukhora comene kuluska kale. Yalutilira kwenda makora kufuma waka apo muwoli wane wakabapatizikira na kuŵa yumoza wa Ŵakaboni ŵa Yehova vilimika 15 ivyo vyajumpha.” Nchivici ico cikawovwira nthengwa yawo kuti yendenge makora? Mark wakati: “Para nkhughanaghana vyakumasinda, nkhuwona kuti cikaŵa cifukwa cakuti muwoli wane wakalondezganga ulongozgi wa mu Baibolo. Nyengo zose wakuyezgayezga kunicindika.”
Ulongozgi Wakufuma ku Ŵawoli Awo Ŵakawovwirapo Ŵafumu Ŵawo
Usange ndimwe muwoli, ndipo mukusambira Baibolo na Ŵakaboni ŵa Yehova, kasi mungacitaci kuti movwire mfumu winu para wakwenjerwa? Wonani ivyo ŵakayowoya ŵawoli ŵakupambanapambana.
Sakiko, wa ku Japan wakati: “Nakhala mu nthengwa kwa vilimika 31, ndipo nili na ŵana ŵatatu. Pajumpha vilimika 22 kufuma apo nkhaŵira yumoza wa Ŵakaboni ŵa Yehova. Nyengo zinyake cikuŵa cipusu yayi kukhala na mfumu uyo mukupambana visopa. Kweni nkhufwilirapo kulondezga ulongozgi wa mu Baibolo wakuti ‘mupusumphe kupulika, muzitule kuyowoya, muzitule kukalipa.’ (Yakobe 1:19) Nkhuyezga kumulongora lusungu mfumu wane ndiposo kucita ivyo wakukhumba, para vikuleka kususkana na Baibolo. Ivi vyawovwira kuti nthengwa yithu yendenge makora.”
Nadezhda, wa ku Russia wakati: “Nakhala mu nthengwa kwa vilimika 28, ndipo pajumpha vilimika 16 kufuma apo nkhabapatizikira kuŵa yumoza wa Ŵakaboni ŵa Yehova. Pambere nindambe kusambira Baibolo, nkhaghanaghanangako yayi kuti mfumu wane ndiyo ni mutu wa mbumba. Nkhacitanga vinthu umo nkhukhumbira. Kweni pacokopacoko nkhamba kuwona kuti kulondezga ulongozgi wa mu Baibolo kukovwira kuti mbumba yithu yiŵe na mtende ndiposo cimwemwe. (1 Ŵakorinte 11:3) Pacoko na pacoko nkhamba kujilambika kwa mfumu wane, ndipo nayo wakamba kuwona kuti nasintha.”
Marli, wa ku Brazil wakati: “Nakhala mu nthengwa kwa vilimika 21, ndipo nili na ŵana ŵaŵiri. Pajumpha vilimika 16 kufuma apo nkhabapatizikira kuŵa yumoza wa Ŵakaboni ŵa Yehova. Nkhasambira kuti Yehova Ciuta wakukhumba kuti ŵakutorana ŵaleke kupatukana kweni ŵakhalenge pamoza. Ntheura nkhuyezgayezga kuti nyengo zose niŵe muwoli muwemi, ndiposo kuti ivyo nkhuyowoya na kucita vikondweskenge Yehova ndiposo mfumu wane.”
Larisa, wa ku Russia wakati: “Kufuma apo nkhaŵira yumoza wa Ŵakaboni ŵa Yehova, vilimika 19 ivyo vyajumpha, nkhamanya kuti cinthu cakuzirwa comene kwa ine nkhusintha vinthu vinyake pa umoyo wane. Mfumu wane nayo wawona umo Baibolo lanovwilira kuti niŵe muwoli muwemi. Pakwamba tikakolerananga yayi umo tingalelera ŵana ŵithu, kweni sono masuzgo agha ghali kumara. Mfumu wane wakuzomerezga kuti ŵana nilutenge nawo ku cisopa cane, cifukwa wakumanya kuti ndiko ŵakusambira vinthu ivyo ŵangasanga navyo candulo pa umoyo wawo.”
Valquíria, wa ku Brazil wakati: “Nakhala mu nthengwa kwa vilimika 19, ndipo nili na mwana yumoza. Pajumpha vilimika 13 kufuma apo nkhaŵira yumoza wa Ŵakaboni ŵa Yehova. Pakwamba mfumu wane wakakhumbanga yayi kuti nipharazgenge. Kweni nkhamovwira mwakuzika kuti wamanye kuti Baibolo ndilo likunovwira kuti niŵe na nkharo yiwemi. Pacoko na pacoko, mfumu wane wakamba kupulikiska kuti nkhwakuzirwa kuti nipharazgenge. Mazuŵa ghano wakunovwira comene para nkhucita milimo yauzimu. Para nkhuluta kukacitiska masambiro gha Baibolo kutali na uko tikukhala, wakuniyegha pa galimoto, ndipo wakunilindilira mpaka apo nimalirenge.”
Kusambira Baibolo Kukovwira Mbumba
Usange uyo muli kutorana nayo wakusambira Baibolo na Ŵakaboni ŵa Yehova, lekani kufipa mtima kuti nthengwa yinu yimarenge. Nga ni umo ŵawoli ndiposo ŵafumu ŵanandi ŵawonera, kusambira Baibolo kukovwira kuti nthengwa yendenge makora.
Mfumu munyake uyo kuti njumoza wa Ŵakaboni ŵa Yehova yayi wakati: “Pakwamba nkhakwiya comene apo muwoli wane wakamba cisopa ca Ŵakaboni ŵa Yehova, kweni sono nkhuwona kuti wakacita makora comene.” Pakuyowoya za muwoli wake, mfumu munyake wakati: “Kugomezgeka kwa muwoli wane ndiposo cikanga ico wali naco vyapangiska kuti nitemwenge comene Ŵakaboni ŵa Yehova. Nthengwa yithu yikwenda makora comene cifukwa ca ivyo wakusambira ku cisopa cake. Tikukolerana comene, ndipo tikuwona nthengwa kuŵa cinthu ca umoyo withu wose.”
[Bokosi/Cithuzithuzi pa peji 32]
Kasi Ŵakaboni ŵa Yehova Ŵakuwona Wuli Nthengwa?
Ŵakaboni ŵa Yehova ŵakugomezga kuti Baibolo ni Mazgu gha Ciuta. Ntheura ŵakuzirwiska comene ivyo likuyowoya pa nkhani ya nthengwa. Wonani umo Baibolo likuzgolera mafumbo ghakulondezgapo agha:
▪ Kasi Ŵakaboni ŵa Yehova ŵakukhuŵilizga ŵanyawo kuti ŵapatukane na mufumu panji muwoli uyo njumoza wa Ŵakaboni ŵa Yehova yayi? Cara. Mpositole Paulosi wakalemba kuti: “Usange mbali yunji wali na muwoli wake wambura kupulikana, ndipo iyo wakuzomera kukhala nayo, waleke kumupata. Ndipo mwanakazi uyo wali na mwanalume wambura kupulikana, ndipo iye wakuzomera kukhala nayo, waleke kumupata mfumu wake.” (1 Ŵakorinte 7:12, 13) Ŵakaboni ŵa Yehova ŵakupulikira dango ili.
▪ Kasi muwoli uyo njumoza wa Ŵakaboni ŵa Yehova wakukhuŵilizgika kuti wazerezgenge ivyo mufumu wake wakukhumba, cifukwa cakuti ŵakupambana vigomezgo? Yayi. Mpositole Petrosi wakalemba kuti: “Mwa ŵanakazi, muŵalambire ŵafumu ŵinu; mwakuti, usange ŵalipo ŵanji ŵambura kupulikira mazgu, ŵangawojeka na kakhaliro ka ŵawoli ŵawo kwambura mazgu; uku ŵakuwona kakhaliro kinu katuŵa ka mu wofi.”—1 Petros 3:1, 2.
▪ Kasi Ŵakaboni ŵa Yehova ŵakusambizga kuti mfumu ndiyo wali na mazaza ghose? Yayi. Mpositole Paulosi wakati: “Nkhukhumba kuti mumanye kuti mutu wa munthu yose ndi Khristu; ndipo mutu wa mwanakazi ndi mfumu wake; ndipo mutu wa Khristu ndi Ciuta.” (1 Ŵakorinte 11:3) Mwanakazi uyo ni Mkhristu wakucindika mfumu wake cifukwa ndiyo ni mutu wa mbumba. Ndipouli mfumu wali na mazaza ghose yayi. Nayo wali pasi pa mazaza gha Ciuta na Khristu. Ntheura, usange mfumu wakuphalira muwoli wake kuti wacite vinthu ivyo vikususkana na malango gha Ciuta, mwanakazi uyo ni Mkhristu wakwenera “kupulikira Ciuta kwakuluska ŵanthu.”—Milimo 5:29.
▪ Kasi Ŵakaboni ŵa Yehova ŵakusambizga kuti kupatana nkhwakukanizgika? Yayi. Yesu Khristu wakati: “Nkhumunenerani, yose uyo wati wapatenge muwoli wake kwambura cifukwa ca uleŵi, ndipo watorenge munyake, wakuleŵa: ndipo uyo wakumutora para wapatika, nayo wakuleŵa.” (Mateyu 19:9) Ntheura, nga ni umo Yesu wakayowoyera, Ŵakaboni ŵa Yehova ŵakugomezga na kuzomerezga kuti ŵakutorana ŵangapatana para yumoza wacita uleŵi. Kweniso ŵakugomezga kuti nthengwa yileke kumara pa vifukwa vyambura kupulikikwa. Ŵakaboni ŵa Yehova ŵakuciskana kupulikira mazgu gha Yesu ghakuti: “Munthu wati wasidenge ŵawiske na ŵanyina wademelerenge ku muwoli wake; ndipo ŵaŵenge thupi limoza . . . Ntheura ico Ciuta wagumanya, munthu waleke kupatulanya.”—Mateyu 19:5, 6.