Wovwirani Mberere Zakuzgeŵa
“Musekelere pamoza na ine, pakuti ndayisanga mberere yane iyo yanguzgeŵa.”—LUKA 15:6.
1. Kasi Yesu walongora wuli kuti ni muliska muwemi?
YESU KHRISTU, uyo ni Mwana yumoza pera wa Yehova, wakucemeka “muliska mukuru wa mberere.” (Heb. 13:20) Malemba ghakayowoyerathu kuti wazamwiza ndipo ghakalongora kuti wakaŵa Muliska wapadera uyo wakakhumbisiskanga comene kusanga “mberere zakuzgeŵa” za Israyeli. (Mat. 2:1-6; 15:24) Kweniso, nga umo muliska wangalolelera kufwa mwakuti wavikilire mberere zake, Yesu nayo wakafwa kuti wawombore ŵanthu awo ŵali nga ni mberere, awo ŵakukhumba nadi kuwombokwa.—Yoh. 10:11, 15; 1 Yoh. 2:1, 2.
2. Ni vinthu wuli ivyo vikwenera kuti vili kupangiska Ŵakhristu ŵanyake kuti ŵalopwe?
2 Cacitima nchakuti ŵanyake awo ŵakawonekanga kuti ŵakuwonga sembe ya Yesu na kujipatulira kwa Ciuta, ŵali kuleka kuwungana na mpingo Wacikhristu. Vinthu vyakugongoweska, matenda, panji masuzgo ghanyake ndivyo vikwenera kuti vikacepeska mwamphu wawo na kuŵapangiska kuti ŵalopwe. Ndipouli, ŵanthu aŵa ŵangaŵa ŵakukondwa ndiposo kuŵa na mtende uwo Davide wakayowoya mu cipaturo 23 ca buku la Masalmo, pekha para ŵali mu mskambo wa Ciuta. Mwaciyelezgero, Davide wakimba kuti: “Yehova ndiye muliska wane, kuti ndisaukenge cara.” (Sal. 23:1) Ŵanthu awo ŵali mu mskambo wa Ciuta ŵali na vyose ivyo vingaŵawovwira kuti ŵakhozge ubwezi wawo na Ciuta, kweni ndimo viliri yayi na mberere zakuzgeŵa. Kasi Mbanjani awo ŵangaŵawovwira? Kasi wovwiri ungapelekeka wuli? Kasi ni vinthu wuli ivyo vingacitika kuti ŵawovwirike mwakuti ŵawelere ku mskambo?
Mbanjani Awo Ŵangaŵawovwira?
3. Kasi Yesu wakalongora wuli ico cikukhumbikwa kuti mberere zakuzgeŵa za Ciuta ziwombokwe?
3 Kufwilirapo kukukhumbikwa kuti mberere zakuzgeŵa za Ciuta ziwombokwe. (Sal. 100:3) Pa nkhani iyi, Yesu wakapeleka ciyelezgero, wakati: “Usange munthu wali na mberere makhumi pera khumi, ndipo yimoza yazgeŵa, asi wakuzisida zinyake makhumi ghankhondi na ghanayi mukati zinkhondi na zinayi, na kuluta ku mapiri kuya kapenja iyo yazgeŵa? Ndipo para wayisanga, nadi nkhumunenerani, wakuyikondwera comene kwakuluska makhumi ghankhondi na ghanayi mukati zinkhondi na zinayi izo zambura kuzgeŵa. Ntheura pera Ŵawiskemwe ŵa kucanya ŵalive kukhumba kuti yumoza wa ŵacoko ŵeneaŵa watayike.” (Mat. 18:12-14) Kasi mbanjani awo ŵangaŵawovwira ŵanthu awo ŵali nga ni mberere awo ŵaleka mskambo?
4, 5. Kasi ŵalara ŵakwenera kucita wuli na mskambo wa Ciuta?
4 Para ŵalara Ŵacikhristu ŵakukhumba kovwira mberere zakuzgeŵa, ŵakwenera kukumbuka kuti mskambo wa Ciuta ni mpingo wa ŵanthu awo ŵali kujipeleka kwa Yehova. Iwo ni mberere zakuzirwa comene ‘za maluhari gha Ciuta.’ (Sal. 79:13) Mberere zakutemweka izi zikukhumbikwira phwelelero lapadera, ndipo ici cikung’anamura kuti ŵaliska ŵazitemwenge. Kucita maulendo ghauliska ku ŵanthu aŵa kungaŵa kwakovwira comene. Para ŵalara ŵangaŵakhozga mwacitemwa, ŵangaŵawovwira kuti ŵaŵeso paubwezi na Yehova, kweniso kuti ŵaŵe na khumbo lakuti ŵawelere ku mskambo.—1 Kor. 8:1.
5 Ŵaliska ŵa mskambo wa Ciuta ŵali na mulimo wa kupenja mberere zakuzgeŵa na kuyezgayezga kuzovwira. Mpositole Paulosi wakakumbuska ŵalara ŵa mpingo wa Efeso za mulimo wawo wa kuliska mskambo, apo wakati: “Jicenjelerani mwaŵene na mskambo wose, mwa ku uwo mzimu utuŵa wamwimikani ŵaliska, kuti muliskenge Ekeleziya la Ciuta, ilo wali kuligura na ndopa za Mweneco.” (Mil. 20:28) Mwakuyana waka, mpositole Petrosi wakapa ŵanalume ŵalara ŵakuphakazgika na mzimu ulongozgi wakuti: “Liskani mskambo wa Ciuta weneuwo uli mwa imwe, uku mukulaŵilira kwambura kukhuŵilizgika, kweni kwakuzomera, kwakulingana na Ciuta; nesi cifukwa ca ndarama za malikho, kweni mwamphu; nesi nga mbakuyuzgayuzga mu vigaŵa vyinu, kweni nga ndi mabambiro ku mskambo.”—1 Pet. 5:1-3.
6. Cifukwa wuli panyengo yasono ndipo ŵaliska ŵakwenera kupwelelera comene mberere za Ciuta?
6 Ŵaliska Ŵacikhristu ŵakwenera kulondezga “Muliska Muwemi,” uyo ni Yesu. (Yoh. 10:11) Wakaghanaghaniranga comene mberere za Ciuta ndipo wakadidimizga kukhumbikwa kwa kuzipwelelera apo wakaphalira Simoni Petrosi kuti ‘walerenge twanamberere twake.’ (Ŵazgani Yohane 21:15-17.) Panyengo yasono ndipo mberere izi zikukhumbikwira kuzipwelelera comene cifukwa Dyabulosi wahaŵa comene na kupuluska ŵanthu awo ŵajipeleka kwa Ciuta kuti ŵaleke kugomezgeka. Satana wakusangirapo mwaŵi pa vinthu ivyo tikutondeka kucita makora, ndipo wakugwiliskira nchito caru kuti wapangiske mberere za Yehova kuti zicitenge vinthu viheni. (1 Yoh. 2:15-17; 5:19) Ŵanthu ŵakulopwa ndiwo ŵali paheni comene ndipo ŵakukhumbikwira kovwirika mwakuti ŵapulikire ulongozgi wakuti ‘tendenge mu mzimu.’ (Gal. 5:16-21, 25) Kuti tovwire mberere izi tikukhumbikwira kulomba na kugomezga Ciuta, mzimu wake, na kugwiliskira nchito Mazgu ghake mwaluso.—Zinth. 3:5, 6; Luka 11:13; Heb. 4:12.
7. Cifukwa wuli nchakuzirwa kuti ŵalara ŵaliskenge ŵanthu awo ŵali nga ni mberere?
7 Mu nyengo ya Ŵaisrayeli, muliska wakagwiliskiranga nchito ndodo panji nthonga pakuliska mskambo. Para mberere zikunjira panji kufuma mu ciŵaya, zikajumphanga “pasi pa nthonga” ndipo muliska wakazipendanga. (Lev. 27:32; Mika 2:12; 7:14) Muliska Wacikhristu nayo wakwenera kuwumanya makora mskambo wa Ciuta na kumanya umoyo wa mberere yiliyose. (Yaniskani na Zintharika 27:23.) Mwantheura, maulendo ghauliska njimoza mwa nkhani zakuzirwa izo wupu wa ŵalara ukudumbiskana. Ici cikusazgapo kupanga ndondomeko ya umo ŵangawovwilira mberere zakuzgeŵa. Yehova iyomwene wakayowoya kuti wazamupenja mberere zake na kuzipa phwelelero ilo zikukhumbikwira. (Ezek. 34:11) Ntheura Ciuta wakukondwa para ŵalara ŵakuyezgayezga kovwira mberere zakuzgeŵa kuti ziwelere ku mskambo nga umo iyo wakucitira.
8. Ni nthowa wuli izo ŵalara ŵangalongolera kuti ŵakupwelelera mberere?
8 Para Mkhristu walwara, wangakondwa comene na kukhozgeka para ŵaliska ŵa mskambo wa Ciuta ŵangamwendera. Ndimo vingaŵiraso para mberere iyo njilwari mwauzimu yawovwirika. Ŵalara ŵangaŵazga nayo malemba, kuŵazga nayo nkhani yinyake, kumuphalirako fundo zikuru izo zanguŵa ku maungano, kulomba nayo, na vinyake vyantheura. Ŵangamuphalira kuti ŵabali na ŵadumbu ku mpingo ŵangakondwa comene para wangambaso kuwungana na mpingo. (2 Kor. 1:3-7; Yak. 5:13-15) Mungalongora kuti mukumughanaghanira comene usange mungamwendera, kumuyimbira telefoni, panji kumulembera kalata. Muliska Ŵacikhristu uyo ngwalusungu wangakondwa comene usange wangawovwira mberere yakuzgeŵa.
Tingawovwirana
9, 10. Cifukwa wuli mungayowoya kuti mulimo wa kovwira mberere zakuzgeŵa ngwa ŵalara pera yayi?
9 Tili mu nyengo zinonono ndiposo za nthangwanika, ntheura, nyengo zinyake tingamanya yayi kuti Mkhristu munyithu waleka kwiza ku mpingo. (Heb. 2:1) Ndipouli, mberere za Yehova ni zakuzirwa comene kwa iyo. Mberere yiliyose njakuzirwa, nga umo ciŵaro cilicose mu thupi ciliri cakuzirwa. Antheura, tose tikwenera kulongora kuti tikufipira mtima ŵabali ŵithu ndipo tikwenera kupwelelerana. (1 Kor. 12:25) Kasi ndimo mukucitira?
10 Nangauli ŵalara ndiwo ŵakudangilira pakucita mulimo wa kupenja na kovwira mberere zakuzgeŵa, kweni mulimo uwu kuti ngwa ŵalaŵiliri pera yayi. Mkhristu waliyose wangawovwirana nawo ŵaliska aŵa. Tikwenera kukhozga na kovwira ŵabali na ŵadumbu ŵithu ŵauzimu awo ŵakukhumbikwira wovwiri kuti ŵawelere ku mskambo. Mulimo uwu ngwakuti tingatondeka yayi. Kasi wovwiri uwu ungapelekeka wuli?
11, 12. Kasi ni mwaŵi wuli uwo mungapika kuti movwire Mkhristu munyinu uyo walopwa mwauzimu?
11 Nyengo zinyake ŵalara ŵanganozga kuti ŵapharazgi ŵaluso ŵa Ufumu ŵasambirenge Baibolo na ŵakulopwa awo ŵalongora kuti ŵakukhumba wovwiri. Cilato ca kucita nthena nchakuti ŵawovwire ŵanthu aŵa kuti ŵaŵeso na ‘kutemwa kwawo kwakudanga.’ (Civ. 2:1, 4) Ŵasopi ŵanyithu aŵa ŵangakhozgeka mwauzimu mwa kusambira nawo vinthu ivyo vikaŵajumpha apo ŵakaleka kuwungana na mpingo.
12 Para ŵalara ŵamupemphani kuti musambirenge na musopi munyinu uyo wakukhumbikwira wovwiri wauzimu, lombani Yehova kuti wamulongozgani na kutumbika vyakuyezgayezga vinu. Enya, “peleka milimo yako kwa Yehova, ndipo ivyo mukukhumba kucita vikhozgekenge.” (Zinth. 16:3) Langulukani pa malemba gha mu Baibolo na fundo zakukhozga cipulikano izo mungakayowoya pakudumbiskana na ŵanthu awo ŵakukhumbikwira wovwiri wauzimu. Ghanaghaniranipo ciyelezgero ciwemi ca mpositole Paulosi. (Ŵazgani Ŵaroma 1:11, 12.) Paulosi wakakhumba comene kuwona Ŵakhristu ŵa mu Roma mwakuti waŵapeko cawanangwa ca mzimu mwakuti ŵakhozgeke. Kweniso wakakhumbanga kuti ŵakasanguluskane. Kasi nase tikwenera kuŵa na maghanoghano ghanthena agha yayi apo tikuyezgayezga kovwira mberere zakuzgeŵa za Ciuta?
13. Ni vinthu wuli ivyo mungadumbiskana na ŵanthu awo ŵalopwa?
13 Pakudumbiskana na munthu uyu, mungamufumba kuti, “Kasi mukasambira wuli unenesko?” Mukumbuskani cimwemwe ico wakaŵa naco apo wakateŵeteranga Yehova, na kumuciska kuti wayowoye vinthu vyakukondweska ivyo vikaŵanga pa maungano gha mpingo, mu upharazgi, ndiposo pa maungano gha cigaŵa. Yowoyani nyengo zakukondweska izo mukaŵiranga lumoza pakuteŵetera Yehova. Yowoyani cimwemwe ico muli naco cifukwa cakuti muli paubwezi na Yehova. (Yak. 4:8) Yowoyani umo mukuwongera vinthu ivyo Ciuta wakutipa taŵanthu ŵake, comenecomene cipembuzgo na cilindizga ico wakutipa para tikusuzgika.—Rom. 15:4; 2 Kor. 1:3, 4.
14, 15. Kasi cingaŵa cakovwira kukumbuska ŵakulopwa za vitumbiko wuli ivyo ŵakakondwanga navyo?
14 Nchakuwonekerathu kuti cingaŵa cakovwira kukumbuska munthu wakulopwa vitumbiko ivyo wakaŵanga navyo cifukwa ca kuwungana na mpingo. Mwaciyelezgero, panji wakamanyanga vinthu vinandi vyakukhwaskana na Mazgu gha Ciuta ndiposo khumbo lake. (Zinth. 4:18) Apo ‘wakendanga mu mzimu,’ nchakuwonekerathu kuti vikamusuzganga yayi kutonda viyezgo. (Gal. 5:22-26) Mwantheura, wakaŵanga na njuŵi yituŵa iyo yikamupangiskanga kuti walombenge kwa Yehova na kuŵa na ‘mtende wa Ciuta, uwo ukuzungura kuwamo kose, uwo ukusungilira mitima yithu na maghanoghano ghithu.’ (Fil. 4:6, 7) Kumbukirani fundo izi, longorani kuti mukumutemwa, ndipo yezgayezgani comene kukhuŵilizga mbali panji mudumbu winu wauzimu kuti wawelere ku mskambo.—Ŵazgani Ŵafilipi 2:4.
15 Tiyelezgere kuti ndimwe mulara ndipo mukucita ulendo wauliska. Mungaciska ŵakutorana awo ŵalopwa kuti ŵakumbukire umo ŵakajipulikira apo ŵakambira kusambira unenesko mu Mazgu gha Ciuta. Unenesko ukaŵa wakukondweska comene, wakupulikikwa makora, wakukhorweska, ndiposo wakufwatura mwauzimu. (Yoh. 8:32) Ŵakakondwanga comene na ivyo ŵakasambiranga vyakukhwaskana na Yehova, citemwa cake, ndiposo vinthu vyakukondweska ivyo wacitenge munthazi. (Yaniskani na Luka 24:32.) Ŵakumbuskani za ubwezi weneco uwo Ŵakhristu awo ŵakucita vinthu mwakuyana na kujipatulira kwawo ŵali nawo na Yehova ndiposo umo ŵakufwatukira kulomba kwa iyo. Ŵaciskani mwakufumira pasi pa mtima kuti ŵapulikire “ivangeli la ucindami wa Ciuta wakutumbikika,” Yehova.—1 Tim. 1:11.
Lutilirani Kuŵalongora Citemwa
16. Yowoyani ciyelezgero cakulongora kuti kovwira munthu uyo walopwa nkhwacandulo comene?
16 Kasi masacizgo agho ghalongosoreka apa ghakovwira nadi? Enya. Mwaciyelezgero, muwukirano munyake uyo wakaŵa mupharazgi wa Ufumu apo wakaŵa na vilimika 12 wakalopwa apo wakaŵa na vilimika 15. Kweni pakati pajumpha nyengo, wakaŵaso wamwamphu, ndipo wacita uteŵeti wa nyengo zose kwa vilimika vyakujumpha 30. Muwukirano uyu wakacira mwauzimu, comene cifukwa cakuti mulara Wacikhristu wakamovwira. Wakawonga comene wovwiri uwo mulara uyu wakamupa.
17, 18. Kasi ni mikhaliro wuli iyo yingamovwirani kuti movwire munthu uyo waleka mskambo wa Ciuta?
17 Citemwa ndico cikupangiska Ŵakhristu kuti ŵawovwire ŵakulopwa kuti ŵawelere ku mpingo. Pakuyowoya za ŵalondezgi ŵake, Yesu wakati: “Dango liphya nkhumupani, kuti mutemwanenge; nga ndi umo Ine nkhamutemwerani, ndimo namweso mutemweranenge. Na ceneici ndico ŵanthu wose ŵati ŵamanyirenge kuti muli ŵasambiri ŵane, para mukutemwana.” (Yoh. 13:34, 35) Enya, citemwa ndico nchimanyikwiro ca Ŵakhristu ŵaunenesko. Asi tikweneraso kulongora citemwa ici ku Ŵakhristu ŵakubapatizika awo ŵalopwa mwauzimu? Ndimo tikwenera kucitira nadi. Kweni kuti tipeleke wovwiri uwo ukukhumbikwa ku ŵanyithu, tikwenera kuŵa na mikhaliro Yacikhristu.
18 Kasi ni mikhaliro wuli iyo mukwenera kulongora para mukukhumba kovwira munthu munyake uyo waleka kuwungana na mskambo wa Ciuta? Padera pa citemwa, mukweneraso kulongora lusungu, ciwuravi, kuzika, na kuzizipizga. Mungakhumbikwiraso kuŵa ŵakugowokera mwakuyana na umo vinthu viliri. Paulosi wakalemba kuti: “Vwarani mtima wa cisungusungu, wezi, kujiyuyura, kuzika, kukunthirapo; pa kuzizipizgirana, na kugowokerana usange munthu wali na kafukwa pa munyake; ntheura umo Fumu yikamugowokelerani imwe, namweso ndimo mucitirenge: ndipo pacanya pa vyeneivi vyose vwarani kutemwa, uko nchikondo ca ukongolekwa.”—Kol. 3:12-14.
19. Cifukwa wuli nchakuzirwa kuyezgayezga kovwira ŵanthu awo ŵali nga ni mberere kuti ŵawelere ku mskambo?
19 Nkhani yakulondezgapo mu Gongwe ili yikulongosora vifukwa ivyo ŵanyake ŵakulekera mskambo wa Ciuta. Yikulongosoraso umo awo ŵawelera ku mskambo ŵapokelerekenge. Apo muŵazgenge nkhani yakulondezgapo na kughanaghanira pa nkhani yino, manyani kuti kuyezgayezga kose uko mukucita kuti movwire ŵanthu ŵa nga ni mberere kuti ŵawelere ku mskambo nkhwakuzirwa comene. Mu caru ici, ŵanandi ŵakumalira umoyo wawo wose pa kupenja usambazi, kweni umoyo wa munthu yumoza ngwakuzirwa kuluska ndarama zose za mu caru. Yesu wakadidimizga fundo iyi mu ntharika yake ya mberere yakuzgeŵa. (Mat. 18:12-14) Mphanyi mwakumbukira fundo iyi apo mukuyezgayezga kuti movwire ŵanthu awo ŵali nga ni mberere zakuzgeŵa za Yehova kuti ŵawelere ku mskambo.
Kasi Mungazgora Wuli?
• Kasi ni mulimo wuli uwo ŵaliska Ŵacikhristu ŵali nawo kwa ŵanthu awo ŵali nga ni mberere awo ŵaleka mskambo?
• Kasi imwe mungawovwira wuli ŵanthu awo ŵali kuleka kuwungana na mpingo?
• Ni mikhaliro wuli iyo yingamovwirani kuti movwire awo ŵali kuleka mskambo?
[Cithuzithuzi pa peji 10]
Mwacitemwa, ŵaliska Ŵacikhristu ŵakufwilirapo kovwira awo ŵaleka mskambo wa Ciuta